Apresiando Bida

El a sigui: “Mi a risibí asina tantu amor i apoyo di nos famia di bario. Tabata abrumador. [Mi] obispu i presidente di Muhénan Hòben a hasi tur posibel pa demostrá mi nan amor i apoyo. … Mi a mira Señor Su man … guiando ami i mi famia. … Un bario manera esun di mi ta e famia ku tur hende tin mester, spesialmente un muhé hóben den mi posishon.”

E i su famia i su famia di bario ku amor a duna bon biní na su yu hòmber na febrüari ku a pasa.

Presidente Russell M. Nelson a bisa, “Un karakterístika di Señor Su Iglesia berdadero i bibu semper lo ta un esfuerso … organisá … pa ministrá na e yunan individual di Dios .… [ministrá ku amabilidat amoroso] na esun, meskos ku E a hasi.”

Ora un muhé soltera diskubrí ku e ta na espera di un yu no antisipá, prekupashonnan di salú i finansiero, inkietut spiritual, bèrgwensa, preguntanan edukashonal, inseguridat matrimonial, i e tristesa di soñonan ruiná, por, den un momento di doló i konfushon, pone ku un muhé kouteloso ta tuma pasonan ku lo trese doló profundo i duele.

Pa kualke persona ku ta skucha i a eksperensiá e doló profundo i duele di a hasi òf partisipá den un aborto, por fabor kòrda: “Aunke nos no por kambia e pasado, Dios por sana e pasado.” Pordon por bini pa medio di e milager di Su grasia ekspiatorio ora bo bira na djE ku un kurason humilde i arepentí.

Dos palabra hopi biaha ta konektá na e santidat di nasementu mortal: bida i eskoho. Bida ta un parti masha presioso di nos Tata Su plan perfekto, i pa medio di Su dekreto nos ta apresiá i preservá bida; i nos ta skohe e kontinuashon di bida unabes konsebí. Nos ta tesorá tambe e don di skohe, di albedrio moral— ku ta yuda fortalesé eskohonan rekto aprobá pa Dios ku ta trese felisidat eterno.

Ora un muhé òf hòmber ta den un momentu asina fragil, enfrentando un eskoho krusial, nos palabranan, nos mannan, nos kurason—spiritualmente, emoshonalmente, i finansieramente—por bendishoná nan pa sinti e Salbador Su amor i, manera Presidente Henry B. Eyring a bisa, trese entendimentu na nan wowonan spiritual for di “loke nan ta pensa nan ta mira” pa “loke nan no por mira ainda.”

Presidente Dallin H. Oaks a bisa: “Nos aktitut tokante aborto no ta basá riba konosementu di ora bida mortal ta kuminsá. … E ta basá riba nos konosementu ku … tur yunan spiritual di Dios mester bini na e mundu aki pa un propósito glorioso, i ku identidat individual a kuminsá hopi tempu promé ku konsepshon i lo kontinuá pa tur eternidat ku lo bini.”

E palabra di Señor konserniente esun ku no a nase, duná pa medio di e Promé Presidensia i e Quorum di Diesdos Apòstel, nunka no a varia i ta resoná e palabranan di profetanan durante siglonan, dunando klaridat divino na loke Señor a pidi di nos.

“E Iglesia di Hesu-Kristu di e Santunan di e Delaster Dianan ta kere den e santidat di bida humano. P‘esei, Iglesia ta oponé abortonan elektivo pa kombiniensia personal òf sosial, i ta konsehá su miembronan pa no someté na, hasi, enkurashá, paga pa, òf regla pa e tipo di abortonan ei.

“[Señor] ta permití pa posibel eksepshonnan … ora:

• Embaraso ta resultado di un violashon òf insèst, òf

• Un dòkter kompetente ta determiná ku e bida òf e salú di e mama ta den peliger serio, òf

• Un dòkter kompetente ta determiná ku e fetus tin defektonan severo ku lo no pèrmití e beibi pa sobrebí despues di nasementu.”

E Promé Presidensia ta kontinuá: “Aborto ta un asuntu masha serio mes. [Asta den e situashonnan raro aki] e mester wòrdu konsiderá solamente despues ku e personanan responsabel a risibí konfirmashon pa medio di orashon”i a konsultá ku otronan.

Trinta aña pasá, Señor Su profetanan a emití un proklamashon na e mundu. E ta inkluí e palabranan aki:

“Nos … ta deklará ku Dios a manda pa e podernan sagrado di prokreashon mester wòrdu utilisá solamente entre hòmber i muhé, legalmente kasá.

“Nos ta deklará e medio di kual bida mortal ta wòrdu kreá ta apuntá divinamente. Nos ta afirmá e santidat di bida i di su importansia den e plan eterno di Dios.”

Kuida i protehá bida ku ainda no a nase no ta un posishon polítiko. E ta un lei moral konfirmá pa Señor pa medio di Su profetanan.

Un deklarashon pa Presidente J. Reuben Clark Jr., ku a sirbi den e Promé Presidensia, di un manera bunita ta deskribí nos hubentut awe: “E hubentut di Iglesia tin hamber pa kosnan di e Spiritu; nan ta ansioso pa siña e evangelio, i nan kier e kla, puru. Nan ke sa tokante … nos kreensianan; nan ke haña testimonionan di [e] bèrdat. Nan ta … puntradónan, buskadónan di bèrdat.” Laga nos papia mas tantu ku fe i kompashon na nos hubentut den nos hogarnan, i ku otro den nos reunionnan di Sosiedat di Sokoro i quorum di elder tokante Señor Su lei di kastidat, e santidat di bida, i e kuido di yunan ku no a nase ainda i nan mamanan.

Un kerido ruman muhé a skirbi mi di un eksperensia ku e tabatin dekadánan pasá: “Na edat di 17 aña … , mi a haña mi mes na estado ku tiki òf sin sosten di mi frei. Mi a sinti mi bergonsá i so [pero ami] nunka a konsiderá [un aborto]. … Mi [tabatin] mi famia i obispu amoroso, ku ken mi a reuní regularmente pa guia. … Mi a bira na Dios. Mi a studia e Skrituranan … i hasi orashon [i] haña forsa pa medio di mi Salbador i e proseso di arepentimentu. … Mi a risibí un kontesta [na mi orashonnan] ku mi no por a nenga. … E tabata hopi tristu, pero mi tabata sa ku lo mi duna mi yu pa adopshon. … Mi a hasi orashon pa kurashi [i] a sinti e Salbador Su amor klaramente pa medio di arepentimentu, mi sa ku Dios … ta kontestá i ta fortalesé nos.”

Un pareha amoroso a adoptá e beibi mucha muhé presioso aki i a siñé e evangelio. Awor aki e ta kasá i tin un famia bunita di su mes.

Tin bia, inseguridat profundamente difísil i agonisante por kompañá e protekshon di bida.

Resientemente un pareha hóben ku Kathy i ami stima a skirbi mi tokante e beibi presioso ku nan tabata sperando.

E tata a skirbi: “[Ora mi kasá tabatin] 10 siman di embaraso nos a haña sa ku nos beibi milagroso tabatin un kondishon genétiko di trisomia 21, komunmente konosí komo sindrom di Down. Nos a sinti e preshon … di e tim médiko pa konsiderá terminashon. Algun siman despues nos a deskubrí … nos yu ku no a nase ainda lo mester di multiple operashon di kurason den su promé aña di bida. Durante e proseso aki ora nos a hasi orashon fervientemente pa yudansa divino, … nos a sinti e Spiritu duna nos konsuelo. Nos a risibí revelashon i komprendementu ku nos yu muhé ta un yu elite [privilegiá] di Tata Selestial i tin un deseo inmenso pa ta den nos famia i pa bini na mundu.”

E beibi su mama a skirbi: “[Nos] tabata kompletamente di shòk, konfuso, i honestamente destruí pa e notisia. … Ora mi tabatin 14 siman na estado, nos a sa ku nos beibi tabatin defektonan multiple kongenital di kurason, un ku por ta potensialmente fatal. Nos a mira gran kantidat di dòkter i spesialistanan for di 10–18 siman na estado. … Na kada sita, a puntra nos si nos kier a kontinuá ku e embaraso òf terminé. … E Salbador a sana mi kurason i a duna mi un sentimentu di pas i emoshon tokante nos yu muhé. … [Tata Selestial] a mustra mi kada bia di nobo ku E tin un plan perfekto pa mi [i] mi ta konfi‘E.

Ku emoshon nan a yama bon biní na nan yu muhé eksáktamente awe un siman pasá. E ta di nan i nan ta di dje pa semper.

Fe sin miedu i kurashi remarkabel ta karakterístikanan di disipelnan di Hesu-Kristu.

Durante e añanan, mi tabatin e privilegio di reuní ku hòmbernan i muhénan kende ku humildat a buska pa bolbe riba e kaminda di kombenio i na nan bendishonnan di saserdosio i tèmpel hopi aña despues di a pèrdè nan miembresia.

Na un okashon, mi tabatin ku entrevistá un hòmber na nòmber di e Prome Presidensia pa e restourashon di su bendishonnan di saserdosio i di tèmpel.

Despues di su matrimonio den e santu tèmpel, i despues di haña tres yu maravioso, e hòmber tabata infiel na su kasá i su kombenionan sagrado. Un muhé soltero a sali embarasá i tabata ke un aborto.

E hòmber su kasá virtuoso i kompasivo a supliká e muhé pa haña e yu i a primintí ku e lo kria e yu, unabes ku e nase huntu ku su mes yunan.

E muhé hóben aki kuidadosamente a bai di akuerdo pa no terminá su embaraso.

Awor ta 10 aña a pasa. E hermana humilde sintá mi dilanti a stima e mucha hòmber manera su yu i a bisa mi di su kasá su esfuersonan pa drecha kos i stima i kuida e i e famia. E tata a yora ora el a papia.

Kon e muhé noble di Dios aki por tuma un mucha manera di e mes ku por ta un rekuerdo diario di e infieldat di su kasá? Kon? Pasobra el a haña forsa pa medio di Hesu-Kristu i e tabata kere ku bida ta sagrado, e santidat di bida. E tabata sa ku e yu ku no a nase ainda tabata un yu di Dios, inosente i puru.

Mi kerido rumannan, e amor ku ta disminuí pa yunan ku no a nase ta un prekupashon mundialmente. Dios ta apresiá bida. Ta Su obra i Su gloria pa trese inmortalidat i bida eterno na Su yunan. Komo disipelnan di Hesu-Kristu, nos ta apresiá bida. “Pa medio di esaki tur hende lo sa ku boso ta mi disipelnan, si boso tin amor unu pa otro.” Laga nos kompartí nos amor asta mas abundante ku esnan ku tin mester di nos asina desesperadamente. Mi ta ekspresá mi amor pa boso i nos Tata Selestial Su amor pa Su yunan ku ta biniendo na mundu. Den e nòmber di Hesu-Kristu, amèn.