E Ekspiashon di Hesu-Kristu ta Proveé e Reskate Grandi i Final

E Ekspiashon di Hesu-Kristu ta proveé e reskate grandi i final for di e pruebanan ku nos ta enfrentá den e bida aki. Presidente Russel M. Nelson a asigná mi pa dediká e Tèmpel di Casper Wyoming fin di aña pasá. E tabata un eskperensia spiritual profundo, i emoshonal. El a trese un enfoke kla na e ròl ku tèmpelnan tin den reskatá Dios Su yunan pa medio di e Salbador Su Ekspiashon.

E estakanan den e distrito di e Tèmpel di Casper Wyoming ta inkluí un porshon di e ruta usá pa pioneronan Santu di Delaster Dianan entre 1847 i 1868. Den preparashon pa dedikashon di e tèmpel, mi a lesa di nobo algun di e historia di e ruta banda di e Platte River serka di Casper i siguiendo pa Salt Lake City. E ruta tabata un kaminda públiko pa shen di miles di emigrantenan di wèst. Mi énfasis primordial tabata e mas di 60.000 pioneronan Santu di Delaster dia ku a biaha riba e ruta.

Mayoria di nos pioneronan a bin ku wagòn, pero rònt di 3.000 a krusa den 10 kompania di garoshi di man. Ocho di e garoshinan di man aki a hasi e hornada monumental aki ku éksito remarkabel i poko morto. E kompanianan di garoshi di man Willie i Martin di 1856 tabata e eksepshon.

Mi a revisá e relatonan di e kompanianan di garoshi di man Willie i Martin for di e tempu e kondishonnan teribel di wer a kuminsá. Mi a bira intimamente konsiente di e desafionan ku nan a enfrentá na krusamentu di Sweetwater River, Martin’s Cove, Rocky Ridge, i Rock Creek Hollow.

Entre Tormentanan, pa Albin Veselka

Mi no a drenta paden di e Tèmpel di Casper promé ku e dedikashon. Ora mi a drenta e lòbi, mi atenshon a keda atraé inmediatamente na un pintura di un garoshi di man original titulá Between Storms[Entre Tormentanan]. E pintura klaramente no tabata intenshoná pa deskribí e tragedianan ku a sosodé. Miéntras mi tabata studié, mi a pensa, “E pintura aki ta korekto; e gran mayoria di e pioneronan di garoshi di man no a eksperensiá tragedianan.” Mi no por a yuda di sinti ku esaki ta manera bida en general. Tin bia nos ta entre tormentanan i tin bia entre nubianan i resplandor di solo.

Porta di Shelu, pa Jim Wilcox

Ora mi a bira pa e pintura original na e otro muraya, titulá Heaven’s Portal[Portal di Shelu], mi a realisá ku e pintura di berano bunita aki di lokual tabata yama “Devil’s Gate,”[Porta di Diabel] ku e Sweetwater River kalmu i kla ta kore dor di dje, tabata presentá e bunitesa di Señor Su kreashon, no solamente e desafionan ku e pioneronan a enfrentá den e temporada di wenter teribel aya.

Despues mi a wak padilanti, patras di e büró di rekomendashon, i a mira un pintura bunita di e Salbador. Esaki inmediatamente a invoká sentimentunan abrumadó di gratitut. Den un mundu di gran bunitesa, tin tambe desafionan enorme. Ora nos bira na Hesu-Kristu, e Salbador di mundu, E ta reskatá nos for di e tormentanan di bida dor di Su Ekspiashon di akuerdo ku e Tata Su plan.

Pa ami, e lòbi tabata un preparashon perfekto pa e salanan di ordenansa di tèmpel ku ta permití nos pa risibí e ordenansanan di eksaltashon, pa hasi kombenionan sagrado, i pa aseptá i eksperensiá kompletamente e bendishonnan di e Salbador Su Ekspiashon. E Tata Su plan di felisidat ta basá riba e Salbador Su reskate ekspiatorio.

E eksperensia komo pionero ta duna Santunan di Delaster dia un tradishon históriko úniko i un herensia kolektivo spiritual poderoso. Pa algun, e migrashon a tuma hopi tempu despues di a wòrdu fòrsá pa sali for di tantu Missouri i Nauvoo. Pa otronan el a kuminsá despues ku Presidente Brigham Young a anunsiá e plan di garoshi di man, kual tabata intenshoná pa hasi emigrashon mas pagabel. E garoshinan di man tabata kosta ménos ku wagòn i bueynan.

Un misionero na Inglatera, Millen Atwood, a bisa ku ora e plan di garoshi di man a keda anunsiá, “E notisia a plama manera kandela riba yerba seku, i e kurason di e pober Santunan a dal un salto di goso i alegria.” Hopi a “hasi orashon i a ayuná dia tras dia, i nochi tras di nochi, pa nan por tin e privilegio pa uni na nan rumannan den [e] serunan.”

Mayoria di e Santunan di e garoshinan di man a eksperensiá disfikultat pero a evitá eventonan di atversidat grandi. Pero dos kompanianan di garoshi di man, e kompania Willie i e kompania Martin, a eksperensiá hamber, eksposishon na wer di friu, i hopi morto.

Mayoria di e biaheronan aki a barka for di Liverpool, Inglatera, na mei di 1856 na bordo di dos barku. Nan a yega na e lugá di e garoshinan di man na Iowa City den yüni i yüli. Apesar di atvertensianan, tur dos kompania a sali pa Salt Lake Valley demasiado lat den e temporada.

Presidente Brigham Young a sa pa promé bia di e situashon peligroso di e kompanianan aki riba 4 di òktober, 1856. E siguiente dia el a para dilanti di e Santunan na Salt Lake City i a bisa, “Hopi di nos rumannan ta riba e planonan ku garoshinan di man, … i nan mester wòrdu tresé aki: nos mester manda asistensia na nan … promé e wenter drenta.”

El a pidi e obispunan pa proveé 60 tim di mula, 12 òf mas wagòn, i 12 tòn (10,886 kg) di hariña i a proklamá, “Bai i trese e hendenan ei riba e planonan aworaki.”

E kantidat kombiná di pioneronan den kompanianan di garoshi di man Willie i Martin tabata apróksimadamente 1,100. Mas o ménos 200 di e Santunan presioso aki a muri na kaminda. Sin e reskate na tempu, hopi mas lo a muri.

E tormentanan di wenter a kuminsá kasi dos siman despues ku e promé reskatadónan a sali Salt Lake City. E relatonan di miembronan di e kompanianan Willie i Martin a deskribí retonan teribel despues ku e tormentanan a kuminsá. E relatonan aki ta deskribí tambe e goso grandi ora nan reskatadónan a yega.

Deskribiendo e esena di yegada, Mary Hurren a bisa: “Lágrimanan a basha for di kara di e hòmbernan, i e muchanan tabata baila di goso. Asina ku e hendenan por a kontrolá nan sentimentunan, nan tur a hinka rudia den e sneu i a yama danki na Dios.”

Dos dia despues, e kompania Willie mester a biaha e parti mas difísil di e ruta, pasando riba Rocky Ridge, den un tormenta ku ta fris. E delasternan no a alkansá kampamentu te ku 5:00 e siguiente mainta. Diestres hende a muri i a wòrdu derá den un graf komun.

Riba 7 di novèmber, e kompania Willie tabata aserkando e Salt Lake Valley, pero e mainta ei, ainda tabatin tres morto. Dos dia despues, e kompania Willie porfin a yega Salt Lake, kaminda nan a risibí un saludo maravioso i a wòrdu yamá bon biní den e hogarnan di e Santunan.

E mesun dia, e kompania Martin ainda tabata 325 (523 km) miya patras riba e ruta, kontinuando ta sufri di friu i kuminda inadekuá. Algun dia promé, nan a krusa Sweetwater River pa yega loke awor yama Martin’s Cove, kaminda nan a spera pa haña protekshon di e elementonan. Un di e pioneronan a bisa, “E tabata e pió krusada di riu di e ekspedishon.” Algun di e reskatadónan—manera mi bisa tawela, David Patten Kimball, ku tabatin solamente 17 aña, huntu ku su amigunan yòn, “George W. Grant, Allen Huntington, Stephen Taylor, i Ira Nebeker—a pasa hopi ora den e awa friu,” heroikamente yudando e kompania logra krusa Sweetwater.

Miéntras e evento aki a risibí hopi atenshon, ora mi a siña mas di e reskatadónan, mi a realisá ku nan tur tabata siguiendo e profeta i a hunga ròlnan krítiko den salba e Santunan den problema. Tur e reskatadónan aki tabata heroiko, manera e emigrantenan tambe.

Studiando nan historia, mi a apresiá e relashonnan presioso i e vishon eterno di término largu entre e emigrantenan. John i Maria Linford i nan tres yu hòmber tabata miembro di e kompania Willie. John a muri oranan promé ku e promé reskatadónan a yega. El a bisa Maria ku e tabata kontentu ku nan a hasi e hornada. “Lo mi no biba pa yega Salt Lake,” el a bisa, “pero abo i e muchanan si, i mi no ta lamentá tur loke nos a pasa aden si nos yunan hòmber por krese i lanta nan famia den Sion.”

Presidente James E. Faust a proveé e maravioso resumen aki: “Den e esfuerso heroiko di e pionereona di garoshi di man, nos ta siña un bèrdat grandi. Tur hende mester pasa dor di e kandela rafinadó, i e kosnan insignifikante i sin importansia den nos bida por dirti bai manera skuma i hasi nos fe briante, intakto, i fuerte. Ta parse di tin un kantidat grandi di angustia, tristesa, i hopi bia desepshon pa tur hende, inkluso esnan ku sinseramente ta buska pa hasi bon i ta fiel. Sinembargo esaki ta parti di e purifikashon pa bira konosí ku Dios.”

Den Su Ekspiashon i Resurekshon pa formashon pa eternidat, e Salbador a kibra e “lasonan di morto, logrando viktoria riba morto” pa tur hende. Pa esnan ku a arepenti di pikánan, El a “tuma riba E mes nan maldatnan i nan pikánan, a redimí nan, i a satisfasé e demandanan di hustisia.”

Sin e Ekspiashon, nos no por salba nos mes for di piká i morto. Miéntras piká por hunga un ròl signifikante den nos pruebanan, atversidatnan di bida ta komponé di fayonan, desishonnan malu, akshonnan maligno di otronan, i hopi kos for di nos kontrol.

Preach My Gospel[Prediká Mi Evangelio] ta siña: “Ora nos ta konfia den Hesu-Kristu i Su Ekspiashon, E por yuda nos soportá nos desafionan, malesanan, i dolónan. Nos por ta yená ku goso, pas i konsuelo. Tur lokual ku ta desafiante di bida por wòrdu reglá mediante e Ekspiashon di Hesu-Kristu”

Durante e temporada di Pasku di Resurekshon aki, nos enfoke ta riba e Salbador i Su sakrifisio ekspiatorio. E Ekspiashon ta duna nos speransa i lus den un tempu ku pa hopi ta parse skur i tristu. Presidente Gordon B. Hinckley a deklará, “Ora tur kos den historia ta eksaminá, … [no tin] nada asina maravioso, asina mahestuoso, asina tremendo manera e akto di grasia aki.”

Mi ta kompartí tres konseho kual mi ta pensa ta partikularmente relevante pa nos tempu.

Promé, no balotá e importansia di hasi loke nos por pa reskatá otronan for di retonan físiko i spesialmente spiritual.

Di dos, aseptá ku gratitut e Salbador Su Ekspiashon. Nos tur mester hasi esfuerso pa ekshibí goso i felisidat ora nos ta enfrentá e retonan di bida. Nos meta mester ta pa biba ku optimismo den tur situashon. Mi a opservá mi kompañero presioso, Mary, hasi esaki henter su bida. Mi a apresiá su reakshon briante, i aserkamentu ku ta lanta ánimo asta ora nos tabatin problemanan durante e añanan.

Mi di tres konseho ta pa plania tempu pa fielmente kontemplá e Salbador Su Ekspiashon. Tin hopi manera pa hasi esaki den nos opservashon religioso. Pero, partisipá na reunion sakramental i partisipá di e sakramento ta spesialmente signifikante.

Igualmente importante ta asistensia regularmente den un tèmpel kaminda ta posibel. E tèmpel ta proveé un rekordatorio kontinuo di e Salbador Su Ekspiashon i loke E ta vense. I, asta mas importante, asistensia di tèmpel ta permití nos pa proveé un reskate spiritual pa nos sernan stimá ku a fayese i antepasadonan mas leu.

Presidente Russell M. Nelson, na nos último konferensia, a enfatisá e prinsipio aki i a agregá, “Bendishonnan di [tèmpel] … ta yuda prepará hende ku ke yuda prepará e mundu pa e Segunda Binida di Señor!”

Nos no mester lubidá nunka e sakrifisionan i ehèmpelnan di generashonnan anterior, pero nos alabansa, apresio, i adorashon mester ta sentrá na e Salbador di e mundu i Su sakrifisio ekspiatorio. Mi ta testifiká ku e yabi na e tata Su plan di felisidat ta e Ekspiashon efektuá pa nos Salbador, Hesu-Kristu. E ta biba i ta guia Su Iglesia. E Ekspiashon di Hesu-Kristu ta proveé e reskate grandi i final for di e pruebanan ku nos ta enfrentá den e bida aki. Den e nòmber di Hesu-Kristu, amèn.