“Bolbe serka Mi … Pa Mi Por Sana Bo”

Un tempu nos tabata biba den un kas rondoná ku palunan mahestuoso. Banda di e entrada tabatin un palu di wilg bunita. Un anochi tristu un tormenta fuerte a supla, i e palu a kai abou. E tabata abou na suela ku su raisnan saká afó i tabata un bista tristu.

Mi tabata kla pa lanta e mashin di zag i kòrta e mata pa palu di kandela ora nos bisiña a sali kore pa para mi. El a reklamá mi pasobra mi a entregá na e palu i a urgi nos enfátikamente pa no deshasí di dje. Despues el a mustra riba un rais ku ainda tabata den tera i a bisa ku si nos sostené e palu, kòrta su ramanan i aliment’é, e raisnan lo pega un biaha mas.

Mi tabata skeptiko i dudoso kon un palu asina opviamente kaí i den problema, por a sobrebibí i bin na bida bèk. Mi a pensa ku asta si e palu a kuminsá krese atrobe, sigur e lo no a sobrebibí e siguiente tormenta. Pero sabiendo ku nos bisiña tabata kere ku e palu ainda tabatin un futuro, nos a bai di akuerdo ku e plan.

I e resultado? Despues di algun tempu, nos a mira señal di bida ora e palu a kuminsá saka rais. Awor, 12 aña despues, e palu ta vibrante i yen di bida, ku raisnan fuerte i ta kontribuí atrobe na e bunitesa di e paisahe.

Miéntras ku mi ta topa ku e Santunan rònt mundu, mi ta kòrda riba e palu di wilg aki i kon tin speransa asta ora tur kos ta parse pèrdí. Algun di nan un tempu tabatin testimonio di e evangelio ku tabata fuerte i vibrante manera e wilg. Despues, pa motibunan personal, e testimonionan ei a bira debil, ku a hiba na un pèrdida di fe. Otronan ta keda ku e raisnan di mas fini ta bati den tera di evangelio.

Kada bia di nobo, mi ta wòrdu inspirá pa e historianan di hopi ku a skohe pa renobá nan disipulado i bin bèk na nan hogar di Iglesia. Na lugá di deskartá nan fe i kreensia manera palu di kandela sin balor, na lugá di esei nan a respondé na impulsonan spiritual i invitashonnan kariñoso pa regresá.

Mi a asistí na un konferensia di estaka na Sur Korea kaminda un miembro ku a regresá a kompartí: “Mi ta gradisí na e rumannan pa nan disposishon pa aseptá mi falta di fe i mi debilidat, pa yega serka mi, i pa e miembronan ku semper ta asina amabel ku mi. Mi tin hopi amigu ainda rònt di mi ku ta ménos aktivo. E ta grasioso, pero nan ta bisa otro pa bai bèk na Iglesia pa haña nan fe bèk. Mi ta kere ku kisas nan tur ta anhelá pa fe.”

Pa tur ku ta anhelá pa fe, nos ta invitá boso pa bin bèk. Mi ta primintí ku boso fe lo bira mas fuerte ora boso adorá atrobe huntu ku e Santunan.

Un eks-misionero di Afrika a skirbi un lider di edat avansá di Iglesia, pidiendo despensa i buskando pordon pa a wòrdu ofendí pa su enseñansanan tokante un tradishon kultural, ku a hib’é na bandoná Iglesia. El a bisa ku humildat: “Lamentabelmente, e echo ku mi a sinti mi ofendí 15 aña pasá a hasi ku mi a paga un preis ekstremadamente haltu. Mi a pèrdè asina tantu—hopi mas ku mi a yega di imaginá. Mi ta sinti mi ku hopi berguensa di e daño ku mi por a kousa durante e biahe, pero mas ku tur kos mi ta kontentu ku mi a haña mi kaminda bèk.

Pa tur esnan ku ta rekonosé loke boso a pèrdè, nos ta invitá boso pa bin bèk p‘asina boso por eksperensiá e fruta alegre di e evangelio atrobe.

Un hermana na Merka a bai for di Iglesia pa hopi aña. Su historia di regresá ta inkluí lèsnan poderoso pa mayornan i miembronan di famia ku ta angustiá pa sernan kerí ku ta bai. El a skirbi:

“Mi por a menshoná un kantidat grandi di motibu pa kiko mi a bai for di Iglesia, e evangelio, i den un sentido, mi famia. Pero realmente nan no ta importá. Mi no a tuma un desishon grandi pa bai di Iglesia—probabelmente mi a tuma mil desishon. Pero un kos ku semper mi a sa ta ku mi mayornan a tuma un desishon importante, i nan a keda fiel na dje. Nan a disidí di stima mi.

“Mi no por sa kuantu lágrima a wòrdu dramá, kuantu anochi sin soño, ni kuantu palabra di súplika sinsero a wòrdu pronunsiá na mi fabor. Nan no a yama mi riba mi pikánan; mas bien, nan a yama mi den mi konsiensia. Nan no a pone mi sinti mi indeseabel den nan hogar i na reunionnan di famia; kualke di e sintimentunan ei tabata di mi mes. Na su lugá, nan a sigui yamá mi bon biní. Nan mester a mira mi lus bira skur ku tempu. Pero nan tabata sa ku e persona ku mi tabata e tempu ei tabata djis un sombra di esun ku lo mi a bira.

“Meskos ku mi kaminda for di Iglesia tabata kompliká, asina mi kaminda pa regreso tambe tabata. Pero un kos ku no tabata difísil tokante mi regreso tabata e sintimentu di ta bèk na kas kaminda mi ta pertenesé.”

Awe mi mensahe ta spesialmente pa tur esnan ku un biaha a sinti e Spiritu pero ku ta puntra si tin un kaminda pa regresá òf un lugá pa boso den e Iglesia restourá di Hesu-Kristu. E ta tambe pa kualke hende ku apénas ta wanta òf ta tentá pa sali afó.

E mensahe aki no ta un reto, i e no ta un kondenashon. E ta un invitashon, ekstendé ku amor i ku un deseo sinsero pa yama boso bon biní bèk na boso hogar spiritual.

Mi a hasi orashon pa boso sinti e testimonio di e Spiritu Santu awor ku boso tende e invitashon amoroso aki i e promesa magnífiko di nos Salbador, Hesu-Kristu:

“Boso no ke bolbe serka Mi awor, i arepentí di boso pikánan, i kombertí, pa Mi por kura boso?”

Tur siman hopi ta reakshoná riba e invitashon di e Salbador dor di regresá na disipulado i ta aktivo den Iglesia, trankil i humildemente ta buska e sanashon ku Hesus ta primintí. I kontrali na e relatonan ku tin biaha ta sirkulá, un kantidat rèkòrt di nos hóbennan ta skohe pa keda fuerte i krese nan fe den Hesu-Kristu.

Ora algun di e siguidónan di Hesus na Kafárnao a haña Su enseñansanan difísil i a skohe pa bai, Hesus a bira na su Apòstelnan i a puntra, “Boso tambe lo bai?”

Esaki ta e pregunta ku kada un di nos mester kontestá segun nos ta enfrentá temporadanan individual di prueba. Pedro su kontesta na Hesus ta sin fin di tempu i rotundo: “Serka ken nos lo bai? Abo tin e palabranan di bida eterno.”

P’esei, ora bo ta konsiderá e invitashon di e Salbador pa bo regresá na djE, kiko bo por siña for di e relato di e palu di wilg?

1. E biahe di regreso no ta fásil òf konfortabel, pero e ta bale la pena. Ora nos wilg tabata pará atrobe, tur su ramanan a wòrdu kortá. E no tabata bunita. Nos tambe por sinti nos vulnerabel ora nos deshasí di nos maneranan bieu i kita nos orguyo tira afó. Enfoká bo fe riba Hesu-Kristu i Su evangelio—e tronkon i e raisnan— lo duna bo e speransa i kurashi pa tuma e promé paso bèk.

2. A tuma hopi aña pa nos wilg rekuperá su forsa i bunitesa di antes. Awor e ta mas fuerte i mas bunita ku antes. Tin pasenshi ora bo fe i bo testimonio tambe ta krese. Esaki ta inkluí no sinti bo ofendí pa komentarionan bisá sin pensa manera “Unda bo tabata tur e añanan aki?”

3. E wilg lo no a sobrebibí sin kuido i nutrishon konstante. Boso lo alimentá boso fe i boso testimonio ora boso tuma parti na e mesa di sakramento kada siman i ora bo ta adorá den e kas di Señor.

4. Meskos ku e wilg tabatin mester di solo pa su ramanan i blachinan krese atrobe, asina bo testimonio lo krese segun ku bo ta keda sensitivo na e sintimentunan i testimonio di e Spiritu. Siña for di Amulek, kende a deskribí su tempu komo un miembro ménos aktivo bisando, “Mi a wòrdu yamá hopi biaha i mi no a tende.”

5. Mi bisiña tabata sa kiko e wilg por a bira un biaha mas. Asina tambe Señor sa bo potensial divino i kiko bo fe i bo testimonio por bira. E nunka lo no entregá pa trese bo di regreso. Pa medio di e Ekspiashon di Hesu-Kristu, tur loke ta kibrá por wòrdu saná.

Mi ta testifiká ku tin goso den shelu pa esnan ku regresá. Bo ta nesesario i bo ta stimá. Mi ta testifiká ku Hesu-Kristu ta nos Salbador i ku E ta bendishoná tur ku ta regresá na djE ku pas mas grandi i gran goso. Su brasanan di mizerikòrdia no ta doblá, pero ta habrí i ekstendé na bo. No ta muchu lat pa bo bin bèk. Ku tur e amor den nos kurason, nos ta yama boso bon bini na kas. Den e nòmber di Hesu Kristu, amèn.