Konfiansa den e Presensia di Dios

Mi kerido rumannan, mi ta agradesido pa papia ku boso awe den e konferensia general importante aki. Mi wowonan ta sigui bira mas bieu. Danki pa boso komprenshon miéntras mi ta duna mi mensahe.

Nos ta biba den un dia di gran impulso den e Iglesia di Hesu-Kristu di e Santunan di e Delaster Dianan. Mi ta yená ku goso ora mi mira progreso den asina tantu área.

Mi ta spesialmente inspirá pa nos hubentut. Nan ta dunando servisio na gran kantidat. Nan ta buskando nan antepasadonan i ta kumpli ku ordenansanan den tèmpel. Nos hóbennan hòmber i muhé ta entregá aplikashonnan pa servisio mishonal na kantidatnan rèkòrt. E generashon kresiente ta lantando komo siguidónan firme di Hesu-Kristu.

Resientemente mi a konosé un bisanieta nobo. Ora mi kontemplá e desafionan ku e lo eksperensiá den su bida, mi ta sinti un deseo grandi pa yud’é edifiká fe den Hesu-Kristu. Biba Su evangelio ta esensial pa su felisidat den futuro.

E, meskos ku kada un di nos, lo enfrentá retonan. Nos tur lo eksperensiá malesa, desepshon, tentashon i pèrdida. E retonan aki por bati nos konfiansa propio. Sin embargo, disipelnan di Hesu-Kristu tin akseso na un otro tipo di konfiansa.

Ora nos hasi i warda kombenionan ku Dios, nos por tin konfiansa ku ta nasé di e Spiritu. Señor a bisa e Profeta José Smith ku nos konfiansa por “bira fuerte den e presensia di Dios.” Imaginá e konsuelo di tin konfiansa den e presensia di Dios!

Ora mi ta papia di tin konfiansa dilanti di Dios, mi ta referí na tin konfiansa den aserká Dios awor aki! Mi ta referí na hasi orashon ku konfiansa ku Tata Selestial ta skucha nos, ku E ta komprondé nos nesesidatnan mihó ku nos. Mi ta referí na tin konfiansa ku E ta stima nos mas ku nos por komprondé, ku E ta manda angelnan pa ta ku nos i ku esnan ku nos ta stima. Mi ta referí na tin konfiansa ku E ta anhelá pa yuda kada un di nos alkansá nos potensial di mas haltu.

Awor, kon nos ta haña e konfiansa ei? Señor ta kontestá e pregunta aki ku e palabranan aki: “Laga bo tripa … ta yen di karidat pa ku tur hende, … i laga virtut dorna bo pensamentunan sin stòp; e ora ei bo konfiansa lo bira fuerte den presensia di Dios.”

Esei ta e klave! Den e palabranan di Señor mes, karidat i virtut ta habri e kaminda pa por tin konfiansa dilanti di Dios! Rumannan, nos por hasi esaki! Nos konfiansa di bèrdat por bira fuerte den presensia di Dios, awor aki mes!

Laga nos konsiderá tantu karidat komo virtut.

Promé, karidat. Dos aña pasá, mi a hasi un yamada riba nos, komo siguidónan di kombenio di Hesu-Kristu, pa ta hasidónan di pas. Mi ta ripití loke mi a bisa e tempu ei: “Rabia nunka ta persuadí. Hostilidat nunka no ta alsa niun hende. Pleitu nunka ta hiba na solushonnan inspirá.”

Karidat berdadero pa ku tur hende ta e karakterístika di hasidónan di pas! Ta imperativo pa nos tin karidat den nos kombersashon, tantu públiko komo privá. Mi ta gradisí esnan di boso ku a tuma mi konseho anterior na pechu. Pero tòg nos por hasi mihó.

E hostilidat aktual den diálogo públiko i riba medionan sosial ta alarmante. Palabranan yen di odio ta arma mortal. Pleitu ta stroba e Spiritu Santu di ta nos kompañero konstante.

Komo siguidónan di Hesu-Kristu, nos mester guia e kaminda komo hasidónan di pas. Segun ku karidat ta bira parti di nos naturalesa, nos lo pèrdè e impulso pa rebahá otronan. Nos lo stòp di husga otronan. Nos lo tin karidat pa esnan di tur ramo di bida. Karidat pa ku tur hende ta esensial pa nos progreso. Karidat ta e fundeshi di un karakter piadoso.

Laga nos supliká nos Tata Selestial pa yena nos kurason ku karidat mas grandi—spesialmente pa esnan ku ta difísil pa stima—pasobra karidat ta un regalo di nos Tata Selestial pa berdadero siguidónan di Hesu-Kristu. E Salbador ta e Prens di Pas. Nos mester ta Su instrumentonan pa pas.

Awor, laga nos papia di virtut. Señor ta bisa nos pa dorna nos pensamentunan sin stòp ku virtut. Imaginá e impulso ku bo lo risibí pa kualke pensamentu positivo, ora bo engrandesé esaki ku virtut. Virtut ta hasi tur kos mihó i mas felis! Di otro banda, imaginá kiko lo pasa, ora bo agregá virtut na un pensamentu impuru, un pensamentu kruel, òf un pensamentu depresivo. Virtut lo kore ku e pensamentunan ei. Virtut lo libra bo di pensamentunan di ansiedat i molestioso.

Rumannan, segun ku e mundu ta bira mas malbado, nos mester bira mas i mas puru. Nos pensamentu, palabra i akshonnan mester ta infaliblemente virtuoso, i yená ku e amor puru di Hesu-Kristu pa ku tur hende. E gran oportunidat nos dilanti ta pa bira e hendenan ku Dios mester pa nos ta.

Adorashon regular den e kas di Señor ta oumentá nos kapasidat pa tantu virtut komo karidat. Asina, tempu den tèmpel ta oumentá nos konfiansa dilanti di Señor. Mas tempu den tèmpel lo yuda nos prepará pa e Segunda Binida di nos Salbador, Hesu-Kristu. Nos no sa e dia ni e ora di Su binida. Pero mi sa ku Señor ta impulsá mi pa urgi nos pa prepará pa e “dia grandi i spantoso” ei.

Segun nos ta buska diligentemente pa tin karidat i birtut yena nos bida, nos konfiansa den aserká Dios lo oumentá. Mi ta invitá boso pa tuma pasonan intenshonal pa krese den boso konfiansa dilanti di Señor. E ora ei, segun ku nos ta bai serka nos Tata Selestial ku mas konfiansa, nos lo ta yená ku mas goso, i nos fe den Hesu-Kristu lo oumentá. Nos lo kuminsá eksperensiá poder spiritual ku ta surpasá nos speransanan di mas grandi.

Nos ta gradisido na Señor pa e aselerashon di konstrukshon di tèmpel den añanan resien. Bou di Su direkshon, awe nos ta anunsiá plannan pa konstruí un tèmpel na kada un di e 15 lugánan aki:

• Reynosa, Mexico

• Chorrillos, Peru

• Rivera, Uruguay

• Campo Grande, Brazil

• Porto, Portugal

• Uyo, Nigeria

• San Jose del Monte, Philippines

• Nouméa, New Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, South Carolina

• Norfolk, Virginia

• Spanish Fork, Utah

Mi ta testifiká ku Hesu-Kristu, e Redentor di Israel, ta guia esaki, Su Iglesia. E ta preparando pa bini atrobe. Laga nos tambe prepará pa risibiE. Pa esaki mi ta hasi orashon den e nòmber di Hesu-Kristu, amèn.