Outoridat Divino, Hòmbernan Hóben Sublime

Danki, Elder Andersen, pa e ekspreshon remarkabel ei di poder di saserdosio i e poder di e Salbador Su Ekspiashon.

Un djadumingu mainta e yanüari ku a pasa, ora mi tabata sinta den reunion sakramental, mas di un dozein di hòmbernan hóben a wòrdu sostené pa avansá den e Saserdosio Aaróniko. Mi a sinti e mundu kambia bou di mi pianan.

Mi a realisá ku den henter mundu, di zona di tempu, pa zona di tempu, den reunionnan sakramental manera esun ei, desénas di míles di diákono, maestronan, i presbíteronan—manera amigu di Presidente Holland e mainta aki, Easton—tabata wòrdu sostené pa wòrdu ordená den ministerionan di saserdosio pa bida largu kubriendo tur kaminda e rekohementu di Israel.

Tur yanüari, mannan ta wòrdu poné riba e kabes di mas o ménos 100.000 hòmber hóben, konektando nan pa medio di ordenansa na un liña briante di outoridat ku ta bai bèk dor di e époka di e Restourashon na José Smith i Oliver,na Huan Boutista, i na Hesu-Kristu.

Awor, nos iglesia no ta unu masha demonstrativo. Aki, nos ta supestimá.

Pero tòg, mirando e batayon di poseedórnan di saserdosio resien ordená plamá rònt mundu, mi ta puntra mi mes—den un “iglesia di goso” den sierto manera—ku no mester a grita esaki for di e daknan. “Awe,” mi a pensa, “mester tin tròmpèt i simbalnan ku ta bati i vürwèrk belanan romano sendé. Mester tin marchanan!”

Konosiendo Dios Su poder pa loke e ta berdaderamente, nos tabata testigu di e interupshon di e patronchinan mes di e mundu aki dor di outoridat divino plamando rònt mundu.

E ordenashonnan aki ta lansa e hòmbernan hóben aki den servisio di bida ora nan lo haña nan mes den tempu i lugánan signifikante kaminda nan presensia i orashonnan i poder di e saserdosio di Dios ku nan ta poseé lo ta profundamente importante.

E reakshon en kadena kontrolá aki a kuminsá ku un ministrashon di angelnan mandá di Dios. E Huan Boutista di tempunan antiguo resusitá a aparesé na José i Oliver, a pone su mannan riba nan kabes i a bisa: “Riba boso mi siervonan, den nòmber di e Mesias mi ta konferí e Saserdosio di Aaron, kual ta poseé e yabinan di angelnan ministradó, i di e evangelio di arepentimentu i di boutismo di inmershon pa remishon di pikánan“ (Doktrina i Kombenionan 13:1

Huan a yama e outoridat aki e “Saserdosio di Aaron,” na honor di Moises su ruman i kompañero di saserdosio. Den antigwedat, e poseedónan di e saserdosio di Aaron tabata siña i asistí ku e ordenansanan—ordenansanan ku tabata enfoká riba disipulado di e futuro Mesias, Señor Hesu-Kristu (wak Deuteronomio 33:10).

E buki di Numbernan eksplísitamente ta asigná na e poseedónan di saserdosio di Aaron e tareanan di atendé e kanikanan di e ordenansanan “I lo bo apuntá Aaron i su yunan hòmber … i nan tarea lo ta … e mesa … i tur otro opheto sagrado di uso ku kual nan ta sirbi” (Numbernan 3:10, 31).

E ordenansa di sakrifisio di animal den e Tèstamènt Bieu a wòrdu kumplí i remplasá pa medio di e Salbador Su bida i Ekspiashon. E ordenansa antiguo ei a wòrdu remplasá ku e ordenansa ku awor nos ta yama e sakramento di Señor Su Sena.

Señor ta konfia e poseedónan di e saserdosio di Aaron pa hasi hopi di e mesun kosnan ku nan tabata hasi den antigwedat: pa siña i atministrá ordenansanan—tur pa kòrda nos di Su Ekspiashon.

Ora diákononan, maestronan, i presbíteronan yuda ku e sakramento, nan ta risibí su bendishonnan meskos ku tur otro hende: dor di warda e kombenionan ku nan a hasi ora nan ta partisipá individualmente di e pan i e awa. Pero den e realisashon di e debernan aki, nan ta siña tambe mas tokante nan ròl i responsabilidatnan di saserdosio.

E Saserdosio Aaróniko ta yamá e saserdosio preparatorio un parti pasobra su ordenansanan ta permití nan pa eksperensiá e peso i goso di ta na enkargo di Señor, preparando nan pa futuro servisio di saserdosio, ora nan por wòrdu yamá pa ministrá den maneranan imprevisto—inkluyendo pronunsiá bendishonnan inspirá den tempunan ora speransa i soñonan, i asta bida i morto, ta kologá den balansa prekario.

Ekspektativanan serio asina ta rekerí preparashon serio.

Doktrina i Kombenionan ta splika ku diákononan i maestronan “tei pa atvertí, eksponé, ekshortá, i siña i invitá tur hende pa bini na Kristu” (Doktrina i Kombenionan 20:59). Ademas di e oportunidatnan aki, presbíteronan tei pa “prediká … i batisá” (Doktrina i Kombenionan 20:50).

Wèl, tur esei ta zona manera hopi, pero, den e mundu real, e kosnan aki ta sosodé di forma natural, rònt mundu.

Un obispu a siña su presidensia di quorum di diakonónan e debernan aki, Asina ku e presidensia yòn a kuminsá na papia tokante kiko esei lo por nifiká den nan quorum i en nan bario. Nan a disidí ku nan mester kuminsá bishitá miembronan di edat avansá di e bario pa kiko nan tabatin mester i despues hasié.

Entre esnan ku nan a sirbi tabatin Alan, un bisiña, ròf, ku hopi biaha tabata profaná, i tin biaha hostil. Alan su kasá, Wanda, a bira un miembro di Iglesia, pero Alan tabata, manera nos ta bisa, algu di un kaso difísil.

Tòg, e diákononan a pone man na obra, ignorando di manera kómiko su insultonan, miéntras nan tabata saka sneu ku skòp i tira sushi afó. Diakononan por ta difísil pa odia, i Alan eventualmente a kuminsá stima nan. Dado momentu nan a invité na iglesia.

“Mi no gusta iglesia,” el a respondé.

“Wèl, bo gusta nos,” nan a bisa. “Bini ku nos anto. Bo por bini solamente na e reunion di quorum si bo ke.”

I ku aprobashon di e obispu, el a bini—i a keda bini.

E diákononan a bira maestronan, i segun nan a sigui sirbié, el a siña nan pa traha riba outo i konstruí kosnan. Pa e tempu ku e diákononan aki a bira presbíteronan, Alan tabata yama nan “mi muchanan.”

Nan tabata preparando seriamente pa mishonnan i a puntra si nan por a praktiká e lèsnan mishonal kuné. El a hura ku nunka lo e skucha i lo no kere nunka, pero, si, nan por a praktiká na su kas.

I despues Alan a bira malu. I el a suavisá.

I un dia, den reunion di quorum, ku ternura el a puntra nan pa hasi orashon p’e pa e stòp di huma, i asina nan a hasi. Pero despues nan a siguié pa su kas i a konfiská tur su stòk di tabako.

Ora su salú delikado a pone Alan den hòspitalnan i sentronan di rehabilitashon, “su muchanan” tabata sirbié, ehersiendo podernan di saserdosio silensiosamente i amor sinsero (wak Doktrina i Kombenionan 121:41).

E milager a kontinuá ora Alan a puntra pa wòrdu batisá—pero despues a fayesé promé ku e por a sosodé. Na su petishon, su diákononan ku a bira presbíteronan tabata su kargadónan di kaha i e diskursantenan na su entiero, kaminda nan—apropiadamente—a atvertí, eksponé, ekshortá, siña, i invitá tur hende na Kristu.

I despues den e tèmpel, tabata, un “dje muchanan di Alan” ku a batisá e eks presidente di quorum di diákononan komo remplasante pa Alan.

Tur kos ku Huan Boutista a bisa pa hasi, nan a hasi. Nan a hasi loke diakónonan, maestronan, i presbíteronan ta hasi den henter e Iglesia aki i den tur parti di e mundu aki.

Un dje kosnan poseedónan di e saserdosio di Aaron ta enkargá kuné ta involvé e ordenansa di e sakramento.

Aña pasá, mi a topa un gran obispu i su maraviosa kasá. Resientemente riba un djasabra mainta, nan tabata riba kaminda pa boutismo di nan yu hòmber i nan a sufri e fayesementu trágiko i diripiente di nan dushi yu muhé di dos aña, Tess.

E siguiente mainta, nan miembronan di bario a reuní pa reunion sakramental yen di kompashon, sufriendo tambe pa e pèrdida di e mucha muhé perfekto aki. Niun hende no a spera e famia di e obispu na iglesia e mainta ei, pero algun minüt promé e reunion kuminsá, nan a drenta den silensio i a sinta na nan lugá

E obispu a bai na e púlpito i a kana pasa su asiento usual meimei di su konseheronan i enbes a kai sinta mei mei di e presbíteronan na e mesa di sakramentu.

Durante e anochi angustioso i sin por drumi promé ku buska pa komprondementu i pas, el a risibí un impreshon fuerte di loke su famia tabtin mas mester di dje—i loke su bario tabtin mas di mester dje. Tabata pa skucha e stèm di nan obispu, Presidente di Saserdosio Aaróniko di nan bario, nan tata afligí, pronunsiá e promesanan di e kombenio sakramental.

Asina, na su debido tempu, el a hinka rudia ku e presbíteronan i a papia na Su Tata. Ku tur e tristesa grandi di e okashon ei, el a pronunsiá algun di e palabranan mas poderoso ku kualke hende hamas a wòrdu permití pa bisa na bos haltu den e bida aki.

Palabranan di konsekuensia eterno.

Palabranan di ordenansa.

Palabranan di kombenio.

Instrukshon ku ta konektá nos na e propósitonan real di e bida aki—i na e resultadonan di mas magnífiko di Tata Selestial Su plan pa nos.

Bo por imaginá kiko e kongregashon a tende den e kapiya ei—loke nan a sinti den e palabranan ku nos ta skucha tur djadumingu den nos kapiyanan?

“O Dios, e Tata Eterno, nos ta pidi bo den e nòmber di bo Yu, Hesu-Kristu, pa bendishoná i santifiká e pan aki pa e almanan di tur esnan ku ta partisipá di dje; pa nan por kome den memoria di e kurpa di bo Yu, i testifiká na abo, O Dios, e Tata Eterno, ku nan ta dispuesto pa tuma riba nan e nòmber di bo Yu, i semper kòrd’é, i warda su mandamentunan ku el a duna nan, pa nan por tin su Spiritu semper huntu ku nan. Amèn” Doktrina i Kombenionan 20:77

I despues: “O Dios, e Tata Eterno, nos ta pidi bo, den e nòmber di bo Yu, Hesu-Kristu, pa bendishoná i santifiká e [awa] aki pa e almanan di tur esnan ku ta bebe di dje, pa nan por hasi’é den memoria di e sanger di bo Yu, ku a wòrdu dramá pa nan; pa nan por testifiká na abo, O Dios, e Tata Eterno, ku semper nan ta kòrd’é, pa nan por tin su Spiritu huntu ku nan. Amèn” Doktrina i Kombenionan 20:77

E bon tata i mama aki a testifiká ku e promesa aki a wòrdu kumplí. Nan en realidat, pa nan konsuelo eterno, “tin su Spiritu huntu ku nan.”

Mi ta gradesido ku poseedónan di e Saserdosio Aaróniko, ku su podernan, ordenansanan, i debernan, ta bendishoná nos tur pa medio di e yabinan di e “ministrashon di angelnan i di e evangelio di arepentimentu, i boutismo di inmershon pa remishon di pikánan” (Doktrina i Kombenionan 13:1. Den e nòmber di Hesu-Kristu, amèn.