E Amor di Dios

Un verano ora nos tabata biaha den un área remoto, nos famia a pasa un anochi drumí den airu liber bou di un shelu sin nubia. Riba nos tabata visibel e galaksia maravioso Via Lactea, yen di strea inumerabel i un strea kayendo. Miéntras nos tabata maraviá den e mahestat di Dios Su kreashon, nos a sinti un konekshon di reverensia kunÉ. Nos yunan chikitu, ku a krese na Hong Kong, nunka promé no a eksperensiá algu manera esaki. Nan a puntra nos na un manera inosente si nos tabata biba bou di e mesun shelu na nos pais. Mi a purba splika nan ku tabata e mesun shelu, pero e polushon di airu i lus kaminda nos tabata biba a prevení nos di mira e streanan aki aunke nan tabata ei.

E Skrituranan ta siña nos ku “fe ta e sustansia di kosnan ku ta spera, e evidensia di kosnan ku no ta mira.” Miéntras ku distraishonnan i tentashonnan na mundu ta nubla nos vishon spiritual, ora nos ta ehersé fe den Dios i Su Yu, Hesu-Kristu, nos ta haña un garantia kla di Nan realidat i di Nan preokupashon pa nos.

Den e Buki di Mormon, e profeta Lehi a mira “un palu, kual su fruta tabata deseabel pa hasi unu felis” i tabata e “mas dushi ku tur.” Ora el a purba e fruta, su alma a yena ku goso grandi, i e tabata ke pa su famia tambe purba e fruta. Nos ta siña ku e palu aki ta representá e “amor di Dios”, i meskos ku Lehi, nos tambe por risibí un testimonio alegre di Dios ora nos invit‘É den nos bida.

Hesu-Kristu ta personifiká e amor ku nos Tata Selestial tin pa nos. Pa medio di Su sakrifisio èkspiatorio, El a tuma nos pikánan riba Su mes i a wòrdu heridá pa nos maldatnan. E personalmente a karga nos penanan, a karga nos tristesanan i a tuma nos dolónan i nos malesanan riba Su mes. E ta manda e Spiritu Santu pa konsolá nos, i e frutanan di Spiritu ta inkluí goso, pas, i fe, ku ta yena nos ku speransa i amor.

Aunke tur hende tin akseso na e amor di Dios, hopi ta busk’é sinseramente, miéntras otronan ta deseá di sinti e amor di Dios, pero no ta kere ku nan ta meresé. Algun otro ta purba desesperadamente di tene nan mes na dje. E Skrituranan i e profeta di Señor ta siña nos ku nos por eksperensiá e amor di Dios konsistentemente ora, pa medio di e grasia di Hesu-Kristu, nos ta arepentí repetidamente, ta pordoná sinseramente, ta esforsá pa kumpli ku Su mandamentunan, i ta sirbi otronan desintersadamente. Nos ta sinti e amor di Dios ora nos hasi kosnan ku ta trese nos mas serka djE, manera kombersá kunE tur dia pa medio di orashon i estudio di Skritura, i ta stòp di hasi kosnan ku ta distansiá nos for di djE, manera ta orguyoso, ku kontenshon i rebeldia.

Presidente Russell M. Nelson a invitá nos pa “eliminá, ku yudansa di e Salbador, e susesonan di pasado den nos bida”i pa “pone amargura un banda.” El a enkurashá nos pa “fortalesé nos fundeshi spiritual” dor di “sentra nos bida riba [e Salbador] i riba e ordenansanan i kombenionan di Su tèmpel.” El a primintí ku “segun nos ta warda nos kombenionan di tèmpel, nos ta optené mayor akseso na Dios Su poder ku ta fortalesé. … Nos ta eksperensiá e amor puru di Hesu-Kristu i nos Tata Selestial den gran abundansia!”

Mi tin un amigu ku a wòrdu bendishoná ku un famia bunita i un karera prometedor. Esaki a kambia ora un malesa a hasi ku e no por a traha mas i despues divorsio a sigui. E añanan despues di esei tabata difísil, pero su amor pa su yunan i e kombenionan ku el a hasi ku Dios a sostené. Un dia el a haña sa ku su èks esposa a bolbe kasa i a pidi pa anulá nan seyamentu den tèmpel. E tabata preokupá i konfundí. El a buska pas i komprondementu den e kas di Señor. E dia despues di su bishita, mi a risibí e siguiente mensahe di dje:

“Mi tabatin un eksperensia asombroso ayera nochi den tèmpel. Mi ta kere ku tabata obvio ku ainda mi tabatin un tiki resentimentu. … Mi tabata sa ku mi mester a kambia, i henter siman mi tabata hasi orashon pa hasi asin’ei. … Ayera nochi den tèmpel mi a sinti literalmente e Spiritu kita e resentimentu for di mi kurason. … Tabata un alivio pa ta liberá di dje. … Un karga físiko menasante ku tabata pone mi sufri a wòrdu kitá.”

Aunke ainda e tin su retonan, mi amigu ta tesorá e eksperensia ei den e kas di Señor, kaminda e poder liberador di e amor di Dios a yudé sinti su mes mas serka di Dios, mas optimista tokante bida, i ménos ansioso tokante su futuro.

Ora nos eksperensiá e amor di Dios, nos por soportá nos karga ku mas fasilidat i someté ku pasenshi i goso na Su boluntat. Nos tin konfiansa ku Dios lo kòrda Su kombenionan ku nos, bishitá nos den nos aflikshonnan, i libra nos di koutiverio. Tambe nos lo deseá pa kompartí e goso ku nos ta sinti ku nos famia i sernan kerí. Meskos ku e famia di Lehi, kada persona tin e libertat di skohe si e ke partisipa di e fruta òf no, pero nos oportunidat ta pa stima, kompartí i invitá di un manera ku esnan ku nos ta stima por sinti e amor di Dios.

Pa yuda otronan sinti e amor di Dios, nos mester kultivá den nos mes atributonan meskos ku Kristu manera humildat, karidat, kompashon i pasenshi, i yuda bira otronan den direkshon di e Salbador dor di sigui e dos mandamentunan grandi di stima Dios i stima nos próhimo.

Un di nos yunan hòmber tabatin problema ku integrashon i ku su outoestima durante su añanan di adolesensia. Mi kasá i ami a hasi orashon pa sa kon nos por a yudé, i nos tabata dispuesto pa hasi loke Señor a manda nos hasi. Un dia mi a haña impreshon pa puntra mi presidente di quórum di elder si e tabata sa di kualke persona den nesesidat ku mi por a bishitá huntu ku mi yu hòmber. Despues di pensa un poko, el a pidi nos pa bishitá un muhé ku tabatin problema di salú serio i, ku pèrmit di e presidente di rama, pa nos hiba e sakramento p‘e kada siman. Mi tabata kontentu, pero tambe preokupá pa kon mi yu hòmber lo a reakshoná riba e kompromiso semanal akí.

Na nos promé bishita, nos kurason tabatin doló pa e muhé kerí aki, ya ku e tabata konstantemente ku doló. E tabata hopi agradesido pa e sakramento, i nos a disfrutá di bishitá kuné i su kasá. Despues di algun bishita, un djadumingu mi no tabata na kas i mi no por a bai huntu ku mi yu hòmber, pero mi a kòrd’é di nos asignashon. Ora mi a yega kas, mi tabata ansioso pa sa kon e bishita a bai. Mi yu hòmber a kontestá ku e no tabata kere ku su kompañeronan di klas por a hasi kosnan interesante manera esaki. I el a elaborá bisando ku el a trese su ruman hòmber huntu kuné pa yuda, i ku e sakramento a bai sin problema, pero e hermana stimá aki tabata tristu durante e siman pasobra el a invitá amigunan na su kas pa wak pelikula, pero su reproduktor di video no tabata funshoná. Mi yu hòmber a bisa ku el a buska riba Internet, a haña e problema, i a drecha esaki mesora. E tabata sinti su mes útil, felis i konfiá pa hasi algu ku lo a hasi e hermana su dia mas felis. El a sinti Dios su amor p’e.

Si apesar di tur bo esfuersonan, bo bida ta nublá, si bo ta sinti ku bo orashonnan no ta wòrdu skucha, òf si bo no por sinti e amor di Dios, por fabor sa ku tur bo esfuersonan ta importante i, sigur manera e streanan riba nos, ku Tata Selestial i Hesu-Kristu sa, ta skucha i ta stima bo.

Na un okashon, ora Su disipelnan tabata den un boto ku tabata wòrdu “tirá [pa e] olanan,” e Salbador a kana bai serka nan riba awa i a sigurá nan, bisando, “Ta di bon animo; ta Ami; no tene miedu.” Ora Pedro tabata kier bai serka e Salbador riba awa, Hesus a hasié un señal i bis’é: “Bini”. I ora Pedro a pèrdè su enfoke i a kuminsá senk, e Salbador mesora a ekstendé Su man pa gar’é i a hib’é na siguridat, bisando: O hòmber di poko fe, pakiko bo a duda?”

Ora e bientu ta kontra nos den nos bida, nos ta dispuesto pa ta di bon animo i ku kurashi? Kon nos por kòrda ku e Salbador no ta bandoná nos i ku E ta serka di nos kisas den formanan ku nos no ta rekonosé ainda? Nos ta dispuesto pa bai serka djE ku fe, spesialmente ora e kaminda ku tin dilanti nos ta parse imposibel? I den ki maneranan E ta alsa nos na siguridat ora nos trompeká? Kon nos por mira na djE fielmente den tur pensamentu, sin duda òf miedu?

Si bo ke sinti e amor di Dios mas abundantemente den bo bida, mi ta invitá bo pa konsiderá e siguiente puntonan:

• Promé, pousa frekuentemente pa kòrda ku bo ta un yu di Dios i pensa riba e kosnan ku bo ta gradesido pa nan.

• Di dos, hasi orashon tur dia, pidiendo nos Tata selestial pa yuda bo sa ken rondó di bo tin nesesidat pa sinti Su amor.

• Di tres, Puntra ku sinseridat loke bo por hasi pa yuda e persona ei sinti e amor di Dios.

• I di kuatèr, aktua lihé riba e inspirashon ku bo a risibí.

Si nos sigui hasi orashon i puntra konsekuentemente na nòmber di otronan, Dios lo mustra nos ken nos por yuda. I si nos aktua lihé, nos por bira e medio pa medio di kua E ta kontestá nan orashonnan. Si nos hasi esei, ku tempu, nos lo risibí kontesta na nos orashonnan i nos lo sinti e amor di Dios den nos propio bida.

Algun luna pasá miéntras nos tabata biahando den Vietnam, mi kasá i ami tabata riba un avion ku a lanta buelo den un tormenta fuerte. E turbulensia tabata severo, i for di nos bentana nos por a mira nubianan skur, áwaseru fuerte i welek. Despues di un subida largu i volatil, nos avion porfin a subi riba e nubianan di tormenta i a sali na e bista glorioso aki. Un biaha mas nos a wòrdu rekòrdá riba nos Tata Selestial i Hesu-Kristu i a sinti Nan amor grandi pa nos.

Kerido amigunan, komo un persona ku a eksperensiá e amor di Dios, mi ta testifiká ku goso ku e Salbador Hesu-Kristu ta e amor di Dios. Su amor pa nos ta perfekto, personal i perpetuo. Ora nos sigui’É fielmente, laga nos ta yen di Su amor i laga nos ta un faro ku ta guia otronan na Su amor. Den e nòmber di Hesu-Kristu, amèn.