“Pa Medio di Esaki Tur Lo Sa Ku Boso Ta Mi Disipelnan”

Mi kerido rumannan, mi kerido amigunan, mi stima e Iglesia di Hesu-Kristu di e Santunan di e Delaster Dianan. E ta e Salbador Su Iglesia berdadero i bibu, i e ta siña e plenitut di e evangelio restourá di Hesu-Kristu. Su poder di saserdosio i outoridat ta habitá [ta presente] aki. Hesu-Kristu ta guia Su Iglesia personalmente, pa medio di siervonan ku El a yama i outorisá, i pa medio di un profeta bibu, si Presidente Russell M. Nelson. E Salbador a duna e Santunan di Delaster Dianan un mishon úniko pa rekohé Dios Su yunan i prepará e mundu pa e di Segunda Benida di e Salbador. Mi ta duna mi testimonio ku tur esaki ta bèrdat.

Pero ta importante pa kòrda ku ora mayoria hende eksperensiá e Iglesia di Hesu-Kristu pa promé biaha, nan no ta pensa tokante e outoridat di saserdosio òf e ordenansanan òf e rekohementu di Israel. Loke probablemente nan ta ripará, riba tur kos, ta kon nan ta sinti ora ku nan ta ku nos i kon nos ta trata otro.

“Stima un na otro,” Hesus a bisa. “Pa medio di esaki tur lo sa ku boso ta Mi disipelnan.” Hopi bes, un persona su promé testimonio di Hesu-Kristu ta bini ora ku e sinti amor entre e disipelnan di Hesu-Kristu.

E Salbador a deklará ku El a restourá Su Iglesia pa asina fe por … krese na tera.” P’esei, ora ku hende bishitá reunionnan di Iglesia, e Salbador kier pa nan bai ku fe mas fuerte den djE. E amor ku nos amigunan ta sinti entre nos lo hala nan mas serka di Hesu-Kristu! Esaki ta nos meta simpel kada bes ku nos bini huntu.

Kualkier persona ku ta buskando fe mas grandi den Kristu òf un konekshon mas di aserka ku Tata Selestial lo sinti na kas mes ora den e Iglesia di Hesu-Kristu di e Santunan di e Delaster Dianan. Invitando nan na nos reunionnan por ta mesun normal i natural ku invitando nan den nos hogar.

Awor, mi ta realisá ku mi ta deskribiendo e loke ta ideal. I den e bida mortal aki, poko bes nos por yega na eksperensiá e loke ta ideal. I “te na e dia perfekto,” semper lo tin un espasio entre e ideal i e real. Pues, kiko nos lo mester hasi ora ku Iglesia no ta sinti manera e dia perfekto? Ora ku, pa kualkier motibu, nos rama no ta nutri fe òf amor perfekto ainda? Of ora ku e ta sinti manera nos no ta pas?

Un kos ku nos lo no mester hasi ta entregá riba e loke ta e ideal!

E página di título di e Buki di Mormon ta inklui e aviso importante aki: “Si tin erornan,” e ta bisa. “nan ta e kibokashonnan di hende; pesei, no kondená e kosnan di Dios.”

Un buki—òf un iglesia òf un persona—por tin “erornan” òf “kibokashonnan” i ainda ta e obra di Dios?

E kontesta ta un si resonante!

Pues, miéntras nos ta tene nos mes na e normanan haltu di Señor, laga nos tin pasenshi tambe un ku otro. Nos kada un ta un obra den progreso, i nos ta dependé riba e Salbador pa kualkier progreso ku nos hasi. Esei ta berdadero pa nos komo individualnan, i e ta berdadero pa e reino di Dios na tera.

Señor no ta invitá nos pa djis uni na Su reino pero tambe pa ta ansiosamente komprometí den konstruí esaki. Dios ta visualisá un pueblo ku ta “un di kurason i un di mente.” I pa ta un di kurason, nos mester buska kurasonnan puru i ku ta rekerí un kambio poderoso di kurason.

Pero esei no ta nifiká kambia mi kurason pa ahustá ku esun di bo. Tampoko e ta nifika kambia boso kurason pa ahustá ku di mi. E ta nifiká ku nos tur ta kambia nos kurason pa ahustá ku e Salbador.

Si nos no ta einan ainda, kòrda, ku Señor Su yudansa, nada ta imposibel.

I si algun bes bo sinti manera bo no ta pas aden, por fabor sa ku bo no ta bo so. Nos tur no a yega di ta den situashonnan di bida kaminda nos a sinti manera e estranhero den e kamber? Mi a eksperensia esaki mas ku un bes. Ora mi tabatin diesun aña, mi famia a wòrdu fòrsá pa bandoná nos kas i move pa un region no familiar. Tur kos tabata diferente for di loke mi tabata kustumbrá kuné. I mi aksènt a hasié kla pa e otro muchanan ku ami tabata diferente for di loke nan tabata kustumbrá kuné. Den un momentu kaminda desesperadamente mi tabatin nesesidat di amistat i sentido di pertenesé, mi a sinti mi so i for di lugá.

Aki na mundu, mayoria di e diferensianan ku nos ta ripara—e diferensianan ku algun di nos ta usa pa kategorisá otro—tin di aber ku kosnan di mundu: aparensia físiko, nashonalidat, lenguahe, paña, kustumbernan, i asina por sigui. Pero “Dios no ta wak kosnan e manera ku hende ta hasié. Hende ta wak e aparensia eksterno, pero Dios ta wak e kurason.”

For di Su perspektiva, tin un kategoria ku ta bini promé ku tur otronan: yu di Dios. I nos tur ta pas perfektamente den esaki.

Ta natural pa kier ta rondó di hendenan ku ta mustra, papia, aktua, i pensa manera nos ta hasi. Tin un luga pa esei.

Pero den e Salbador Su Iglesia, nos ta bini huntu tur Dios Su yunan ku ta disponibel pa bini huntu i ku ta buska e berdat. No ta nos aparensia físiko, nos punto di bista pólitíko, nos kultura, òf nos orígen étniko ku ta trese nos huntu. No ta nos antesedente komun ku ta uni nos. Ta nos ophetivo komun, nos amor pa Dios i amor pa nos próhimo, nos kompromiso na Hesu-Kristu i Su evangelio restourá. Nos ta “un den Kristu.”

E unidat ku nos ta buska no ta pa por tin tur hende pará den e mesun lugá; e ta pa por tin tur hende ku bista den mesun direkshon—na Hesu-Kristu. Nos ta un, no pa motibu di nos eksperensianan pero na unda nos ta luchando pa bai, no pa motibu di ken nos ta pero ken nos ta buska pa bira.

Esei ta e propósito prinsipal di Kristu Su Iglesia berdadero.

Si bo stima Dios, si bo kier konos’É mihó dor di sigui Su Yu, e ora ei bo ta pertenesé aki. Si sinseramente bo ta buskando pa warda e Salbador Su mandamentunan—ounke bo no ta perfekto na esei ainda—e ora ei bo ta pas perfekto den e Iglesia di Hesu-Kristu di e Santunan di e Delaster Dianan.

I kiko si bo ta diferente for di hende rondó di bo? Esei no ta hasi bo un persona—e ta hasi un parti nesesario pa e kurpa di Kristu. Tur hende ta nesesario den e kurpa di Kristu. E oreanan ta persibí kosnan ku e wowonan nunka lo por. E pianan ta hasi kosnan ku e mannan lo ta inefektivo pa hasi.

Esei no ta nifiká ku bo tarea ta pa kambia tur hende pa ta manera abo mes. Pero e ta nifiká ku abo tin algu importante pa kontribuí—i ku bo tin algu importante pa siña!

Den kada seshon di konferensia general, nos ta wòrdu bendishoná ku músika inspirá for di koronan ku talento. Segun bo ta skucha, bo por ripará ku e kantantenan tur no ta kanta e mesun notanan. Tin bes un sekshon ta hiba e melodia, tin bes un otro. Pero nan tur ta kontribuí na e zonido bunita, i nan ta kompletamente unifiká. Kada miembro di koro tin e mesun meta sentral: pa alabá Dios i alsa nos kurason na djE. Kada un mester tin su mente i kurason sentrá riba e mesun propósito divino. I ora ku esei pasa, di bèrdat nan ta bira un stèm.

Si ainda bo no ta un miembro di e Iglesia di Hesu-Kristu di e Santunan di e Delaster Dianan, nos ta invitá bo pa djòin nos ora nos ta regosihá den e Salbador Su “kanshon di amor redentor.” Nos mester di boso. Nos ta stima boso. I Iglesia lo ta mihó ku boso esfuersonan pa sirbi Señor i Su yunan.

Si bo a mustra kaba, pa medio di boutismo, pa medio di hasi kombenionan ku Dios, bo deseo pa “bini den e tou di Dios, i pa wòrdu yamá Su pueblo,” danki pa ta parti di e obra grandi i divino aki i pa yuda hasi e Iglesia di Hesu-Kristu loke e Salbador kier pa e ta.

Manera mi a siña di mi amiga na Alemania, nos amor pa Dios i Su yunan ta un testimonio poderoso na e mundu ku esaki berdaderamente ta e Iglesia di e Salbador.

Ku Dios bendishoná nos pa ku pasenshi pero diligentemente nos buska pa biba na e altura di e idealnan ku nos Salbador, Redentor, i e Maestro a pone pa nos—pa asina tur lo sa ku nos ta Su disipelnan. Den e nòmber sagrado di Hesu-Kristu, amèn.