I Nos ta Papia di Kristu

Na final di un asignashon largu den eksterior, ami ku mi kasá, Lesa, a drenta un terminal di aeropuerto den preparashon pa djis un buelo mas—un red-eye—pa yega kas. Miéntras nos tabata para ku hopi otro hende ta move un paso kada bia den reinan largu, nos por a sinti e ansiedat kresiente di kompañeronan di biahe preokupá pa yega nan buelo, pasando dor di revishon di pasport i visa, i nabegá kòntròlnan di seguridat eksitosamente.

Finalmente nos a yega na un stashon okupá pa un ofisial di duana ku no tabata parse afektá pa e nivelnan haltu di strès i ansiedat den e sala. Kasi mekanikamente, sin kontakto visual, el a tuma mi dokumentonan, a konfirmá mi potrèt, a buska un página tras di otro, i finalmente a stèmpel mi pasport ku un zonido pisá.

Despues el a tuma e papelnan di Lesa. Sin emoshon, kabes abou i enfoká riba su trabou, el a pasa metódikamente dor di e páginanan ku un wowo eksperto, enfoká riba e detayenan di e dokumentonan su dilanti. Nos a keda algu sorprendí ora diripiente el a para, hisa su kabes, i a hasi kontakto visual ku Lesa den un mirada deliberá i kaluroso pa ariba. Ku un sonrisa tierno, el a stèmpel suavemente riba Lesa su pasport i a entrega e dokumentonan bèk na dje. Mi kasá a sonreí a kambio, a aseptá e dokumentonan, i a interkambiá palabranan kaluroso di despedida.

“Kiko a kaba di pasa?” Mi a puntra inkrédulamente.

Despues Lesa a mustra mi kiko e agente a mira—un karchi chikitu ku e imágen di e Salbador. El a slep aksidentalmente for di Lesa su tas drenta entre e páginanan di su pasport. Esaki ta loke e duanero a haña. Esaki ta loke a kambia henter su komportashon.

Grace and Truth, pa Simon Dewey, kortesia di altusfineart.com, © 2025, usá ku pèrmit

E potrèt chikitu aki di e Salbador a konektá e kurason di dos strañero ku di otro manera tabata deskonektá. El a transformá loke ta impersonal pa personal, kapturando e bunitesa, e milager, i e realidat di e Lus di Hesu-Kristu. Pa e restu di e dia ei i hopi bia for di e tempu ei, mi a kontemplá e momentu dushi i simpel ei ku rèspèt i a alegrá den e efekto glorioso di e Lus di Kristu riba e yunan di Dios.

Nos ta siguidónan di Hesu-Kristu, i nos ta buska pa tantu risibí komo kompartí Su lus. Implísito den e nòmber di Iglesia ta nos teologia ku “Hesu-Kristu mes ta e piedra prinsipal di skina.” Pa medio di profetanan antiguo i bibu, nos Tata Selestial a manda nos pa “Skuch’É!” i pa “bini na Kristu.” “Nos ta papia di Kristu, nos ta regosihá den Kristu, nos ta prediká di Kristu, [i] nos ta profetisá di Kristu.”

Nos ta siña ku Hesu-Kristu ta e Yu di Dios, i durante Su ministerio terenal, Hesus a siña Su evangelio i a establesé Su Iglesia.

Nos ta testifiká ku na final di Su bida, Hesus a ekspiá pa nos pikánan ora El a sufri den e Hardin di Getsémani, a wòrdu krusifiká na e krus, i despues a resusitá i a lanta atrobe riba e di tres dia.

Nos ta regosihá ku pa motibu di e sakrifisio ekspiatorio di e Salbador, nos por wòrdu pordoná i limpiá di nos pikánan segun ku nos ta arepentí. Esaki ta trese pas i speransa pa nos miéntras e ta hasi posibel pa nos regresá na e presensia di Dios i risibí un plenitut di goso.

Nos ta profetisá ku pa motibu di e Resurekshon di Hesus, morto no ta e fin sino un paso importante pa dilanti. “Nos tur lo resusitá despues ku nos muri. Esaki ta nifiká ku e spiritu i kurpa di kada persona lo wòrdu reuní i biba pa semper.”

Profetanan bibu den nos tempu—ku ta risibí revelashon di Dios pa siña i guia nos—ta invitando nos mas i mas pa bin na Kristu. Nan ta yudando nos pa sentra nos kurason, orea, i wowonan mas kompletamente riba djE. Nos por sita numeroso ehèmpelnan di ahustenan i mehorashonnan anunsiá pa e Promé Presidensia ku ta diseñá pa laga nos enfoká riba Hesu-Kristu. Algun di esakinan ta inkluí:

• E desishon pa kita e nòmber “Iglesia Mormon” i pa remplas’é ku e nòmber korekto, E Iglesia di Hesu-Kristu di e Santunan di e Delaster Dianan.

• E disponibilidat di arte nobo, inspirá ku e tema di Kristu pa eksponé den kasnan di reunion.

• Temanan i músika di Muhénan Hóben i di quorum di Saserdosio Aaróniko enfoká riba Hesukristu, manera “Disípulo di Kristu” i “Mira riba Kristu.”

• Mas énfasis riba e Ekspiashon i Resurekshon literal di Hesu-Kristu komo e susesonan di mas glorioso den historia.

• Selebrashon di Pasku komo un temporada i no solamente un dia di fiesta, ku un énfasis riba Hesu-Kristu.

• E introdukshon di e identifikadó visual di e Iglesia di Hesu-Kristu i su naturalesa simbóliko.

Laga nos wak mas di aserka e impakto di algun di esakinan. Promé, e símbolo di Iglesia.

Na 2020, Presidente Russell M. Nelson a introdusí un identifikadó visual nobo pa Iglesia. E símbolo aki ta reflehá e bèrdat ku Kristu ta na e sentro di Su Iglesia i mester ta na e sentro di nos bida. Awor nos ta mira e símbolo konosí aki riba rekomendashonnan di tèmpel, wèpsaitnan i revistanan di Iglesia, komo e símbolo pa e app di Biblioteka di Evangelio, i asta riba tagnan di ID militar pa hopi miembro di Iglesia ku ta sirbi den forsanan armá. E símbolo ta inkluí e nòmber di e Iglesia kontené den un piedra di skina, un rekordatorio ku Hesu-Kristu ta e piedra di skina prinsipal, mustrá aki na kambojano i den uso den 145 idioma.

E sentro di e símbolo ta un representashon di e estatua di marmer stimá di Albert Bertel Thorvaldsen Christus kual a bira ampliamente asosiá ku Iglesia i ta wòrdu hañá den sentronan di bishitante i riba terenonan di tèmpel rònt mundu. Su prominensia den e símbolo di Iglesia ta sugerí ku Kristu mester ta e sentro di tur loke nos ta hasi. Asina tambe, e brasanan ekstendé di e Salbador ta indiká Su promesa pa brasa tur ku lo bini serka djE. E símbolo aki ta un representashon visual di e amor di e Salbador Hesu-Kristu i un rekordatorio konstante di e Kristu bibu.

Pa motibu di kuriosidat, mi a puntra hopi famia i amigunan tokante un elemento importante di e símbolo di Iglesia. Sorprendentemente, hopi no ta na altura di un karakterístika santifiká ku e ta enkarná. Hesu-Kristu ta pará bou di e arko. Esaki ta representá e Salbador resusitá saliendo for di e graf. Nos ta selebrá di bèrdat e Kristu resusitá, bibu, asta den e uso di e símbolo di Iglesia.

Awor laga nos kontemplá e nifikashon di Pasku di Resurekshon. Den mensahenan resien di Promé Presidensia tokante Pasku di Resurekshon, nos a wòrdu desafiá “pa selebrá e Resurekshon di e Salbador bibu dor di studia Su siñansanan i yuda establesé tradishonnan di Pasku di Resurekshon den nos sosiedat den su totalidat, spesialmente den nos mes famianan.” Resumiendo, nos a wòrdu enkurashá pa move pa un selebrashon mas elevá i santu di Pasku di Resurekshon.

Mi ta stima revelashon kontinuo tokante Pasku di Resurekshon i mi ta kontentu pa boso hopi esfuersonan pa hasi Pasku di Resurekshon un okashon sagrado i santu. Ademas di tene un reunion sakramental di un ora riba djadumingu di Pasku di Resurekshon, otro ehèmpelnan di aktividatnan digno ta inkluí devoshonalnan di bario i estaka i aktividatnan riba djadumingu di Palma i tambe durante Siman Santu. E rekuerdonan aki ta inkluí aktividatnan ku mucha i hóbennan i hopi bia ta inkorporá koronan interreligioso. Otronan a tene kasnan habrí di “Living Christ” pa miembronan i amigunan i a partisipá den eventonan di Pasku di Resurekshon den komunidat multidenominashonal.

Aktividatnan asina ta reflehá e multitutnan den e siudat di Herusalèm kende nan stèmnan a uni pa alabá e Salbador durante Su entrada triunfal. Meskos impreshonante ta informenan di boso kontesta na e invitashon di e Promé Presidensia pa adorá na kas komo famianan pa konmemorá e fiesta di mas importante aki.

Mi ta kere ku adorashon di famia rònt di Pasku a elevá remarkabelmente. Dos aña pasá, mi a papia tokante e determinashon di nos famia pa mehorá e manera ku nos ta honra Pasku di Resurekshon. Ta di atmití ku esaki ta un trabou den progreso ainda. Semper nos a disfrutá di un kuminda spesial di djadumingu di Pasku di Resurekshon, makutunan di Pasku i un buskamentu di webu di Pasku, i ainda nos ta hasié. Sin embargo, agregá un dimenshon spiritual intenshonal ku ta enfoká riba Hesu-Kristu i Su Ekspiashon na nos selebrashon a trese un dushi balansa na nos konmemorashon di e evento mas santu aki di tur.

E aña aki lo ta nos di tres intento pa hasi Pasku di Resurekshon mas sentrá riba Kristu. Meskos ku e Nasementu di Pasku, nos obra di Dia di Pasku di Resurekshon di famia ta inkluí trahenan rudimentario, lesamentu di Skrituranan for di Tèstamènt Nobo i Buki di Mormon, músika, potrètnan di Pasku, blachi di palma—i un tiki kaos, si mi ta kompletamente honesto. Yunan i ñetunan lesando i resitando e alabansanan di Djadumingu di Palma di “Hosana … Bendishoná ta esun ku ta bini den nòmber di Señor; Hosana den haltura” i “Esaki ta Hesus … di Galilea”ta parse mes relevante ku “Pas riba tera, bon boluntat pa hende” ta na tempu di Pasku.

Awor nos ta disfrutá di un meskla di dekorashon. Loke un tempu tabata kasi eksklusivamente konènchi i webunan di Pasku awor ta balansá ku e Christus i imágennan di e graf bashí, e Salbador resusitá ku ta aparesé den e Hardin pafó di e graf, i e aparishon di e Salbador na e nefitanan. Nos ta hasi esfuerso tambe pa hasi Pasku di Resurekshon un temporada na lugá di djis un dia. Nos ta purba di ta mas informá, atento, i selebrá e djadumingu di Palma i djabièrnè Santu i e susesonan sagrado ku a tuma lugá durante henter Siman Santu.

Pasku di Resurekshon ta permití nos honra tantu e sakrifisio ekspiatorio di Hesu-Kristu komo e Resurekshon literal i gososo di djE. Nos kurason ta pisá ora nos ta imaginá e Salbador su sufrimentu den e Hardin i riba Kalvario, pero nos kurason ta regosihá ora nos ta imaginá e graf bashí i e dekreto selestial, “El a lanta!”

Resientemente e Promé Presidensia a enkurashá nos pa wak “dilanti na Pasku di Resurekshon i e Resurekshon di Hesu-Kristu—e mensahe mas glorioso di tur pa humanidat” resaltá e magnitut di e temporada aki. Miéntras ku ta parse ku tin un tendensia kresiente bou di vários teólogo kristian pa mira e Resurekshon den términonan figurativo i simbóliko, nos ta afirmá nos doktrina ku “e Resurekshon ta nifiká ku tur ku a yega di biba lo wòrdu resusitá, i e Resurekshon ta literal.” “Pasobra meskos ku den Adam tur ta muri, asina tur hende lo lanta for di morto den Kristu.” Hesu-Kristu a kibra e kadenanan di morto pa kada alma bibu.

Nos ta pará tur asombrá pa e grasia ku Hesus ta ofresé nos. Nos ta brasa Su palabranan ku “niun hende no tin amor mas grandi ku esaki, ku un hende ta entregá su bida pa su amigunan.”

C. S. Lewis a deklará ku “pa prediká Kristianismo tabata nifiká [pa e Apòstelnan] prinsipalmente pa prediká e Resurekshon. … E Resurekshon ta e tema sentral den kada sermon kristian ku ta wòrdu raportá den Echonan. E Resurekshon, i su konsekuensianan, tabata e ‘evangelio’ òf bon notisia kual e Kristiannan a trese.”

Mi ta proklamá ku “tin un Resurekshon, … e graf no tin viktoria, i e piká di morto ta wòrdu gulí den Kristu.”

Den konklushon, mi ta testifiká ku tur ku ta aseptá e invitashonnan di nos profeta bibu i su konseheronan pa mas intenshonalmente konmemorá e eventonan santu ku Pasku di Resurekshon ta representá lo haña ku nan laso ku Hesu-Kristu ta krese kada bes mas fuerte.

Djis dianan pasá, mi a siña tokante un wela ku a ensayá e historia di Pasku ku su ñetu di kuater aña dor di usa replikanan simpel di e graf, e piedra ku a tapa e graf, Hesus, Maria, e disipelnan, i e angel. E mucha hòmber chikitu a wak i skucha ku atenshon ora su wela a kompartí e entiero, seramentu i habrimentu di e graf, i e esena di hardin di e Resurekshon. Despues el a ripití e historia kuidadosamente den detaye sorprendente na su mayornan miéntras e tabata move e figuranan su mes. Siguiendo e dushi momentu aki, a puntr’é si e sa dikon nos tin Pasku di Resurekshon. E mucha hòmber a lanta kara i ku rasonamentu infantil a kontestá, “Pasobra E ta bibu.”

Mi ta agregá mi testimonio na esun di dje—i na esun di bo i na esun di angelnan i profetanan—ku E ta resusitá i ku E ta bibu, di kual mi ta testifiká den e nòmber di Hesu-Kristu, amèn.