Tene Kuidou ku e Segundo Tentashon

Un par di aña pasá, ora mi a kumpli 12 aña, mi a wòrdu invitá pa asistí na mi promé kampamentu di anochi di quorum di Saserdosio Aaróniko. Esaki tabata un invitashon tan sperá ya ku mi tata tabata un lider di quorum i hopi bia tabata bai kamper ku e muchanan hòmber den e bario, miéntras tabata laga mi na kas.

Ora e dia a yega, mi tabata entusiasmá. I mi mester atmití ku mi tabata ke desesperadamente pa pas den e muchanan hòmber mas grandi. Mi tabata determiná pa proba mi mes. Den e esfuerso ei no a dura muchu promé ku mi a wòrdu di tèst pa wak si mi lo a hunga huntu i forma parti di e grupo.

Mi tarea asigná tabata pa buska e yabi di outo di mi tata p’asina por a hasi un triki riba e lidernan. Mi no ta kòrda eksaktamente kiko mi a bisa pa konvensé mi tata, pero lihé mi a kore bai serka e grupo di mucha hòmber ku yabi den man, orguyoso di mi logro.

Despues a bini e siguiente asignashon. Mi mester a habri e porta di outo i hinka un palu entre e lomba di e stul di e shofùr i e pitu di outo. I mi mester a sera e porta na yabi pa e pitu por a zona te den oranan di anochi sin ningun manera pa haña akseso na e outo pa kita e aparato kruel.

Awor, aki ta kaminda e historia ta bira dolorosamente bergonsoso pa mi. Unabes mi a sigurá e palu na su lugá, mi a lòk e porta i a kore mas lihé ku mi por pa skonde den un pida mata den serkania. Segun mi ta sak bai na suela, mi a sinti un doló ardiente. Den skuridat i den mi purá, mi a sinta riba un infrou.

Mi gritunan di doló a wòrdu hogá dor di e pitu ku tabata zona, i mi no tabatin otro rekurso ku kore bai bèk na outo, konfesá mi “pikánan,” i buskando atenshon médiko rudimentario i bergonsoso.

E restu di e anochi ei, mi a drumi riba mi barika den un tènt miéntras ku mi tata, usando pinza, a kita e spiñanan di kaktus for di mi … pues, laga mi djis bisa ku mi no a sinta kómodamente pa vários dia despues.

Mi a reflehá riba e eksperensia ei hopi bia. Awor mi por hari di e bobedat di mi hubentut asta ora algun prinsipio signifikante a bira kla pa mi.

Hopi patronchi den komportashon humano ta parse di ta komun den e hende natural—e deseo pa pas aden, e deseo pa proba bo mes, e miedu di pèrdè, i e nesesidat konvinsente pa skonde pa nos evitá konsekuensianan. Ta e komportashon final aki lo mi enfoká riba dje awe—skonde despues ku nos hasi algu ku nos no mester hasi.

Awor, mi no ta igualá mi triki infantil ku piká grave, pero nos por saka algun paralelo ku por resultá útil segun ku nos ta wòrdu poné na prueba den nos estadia mortal.

Den e Hardin di Edén, Adam i Eva tabatin un sirkunstansia idíliko—un abundansia di kuminda, e bunitesa inkomparabel di e hòfi—no solamente un hòfi di bunitesa, pero un hòfi sin yerba shimaron ni infrou,

Sin embargo, nos sa tambe ku bida den hardin a limitá nan progreso nesesario. E hardin no tabata un destinashon final pero un prueba, e promé di hopi, ku lo a proba, prepará, i permití nan progresá pa nan destinashon final di regresá na e presensia di e Tata i e Yu.

Lo bo kòrda ku tabatin oposishon den e hardin. Lusifèr a wòrdu permití pa tenta Adam i Eva. Promé el a tenta Adam pa tuma di e fruta di e palu di konosementu di bon i malu. Kòrdando e mandamentu pa no partisipá di dje, Adam a resistí. Despues a bin Eva bendishoná, kende a skohe pa partisipá di e fruta, konvensiendo Adam pa hasi meskos.

Despues, Adam i Eva a deklará ku e desishon aki tabata nesesario pa kumpli ku e plan di Tata Selestial. Pero dor di partisipá di e fruta, nan a transgredí e lei—un lei duná na nan direktamente for di e Tata. E entendimentu aplastante di bon i malu ku a resultá mester a laga nan den angustia ora nan a tende e bos di e Tata anunsiando Su regreso na e hardin. Nan a realisá ku nan tabata sunú, pasobra nan tabata, enbèrdat, sin paña, despues di a biba den un estado di inosensia. Pero kisas mas doloroso ku nan ta sin paña na e momentu ei, nan tabata awor eksponé pa nan transgreshon. Nan tabata indefenso i vulnerabel. Nan tabata sunú den tur sentido di e palabra.

Semper e oportunista, Lusifèr, sabiendo nan estado eksponé i debilitá, a tenta nan un biaha mas—e biaha aki pa skonde pa Dios.

E tentashon aki—lo mi yam’é e “di segundo tentashon”—ta e tentashon ku por trese e konsekuensia di mas grandi si nos sukumbí. Sigur, pa evitá tur promé tentashon pa kibra e lei di Dios ta optimal, pero nos sa ku tur lo sukumbí na un variedat di promé tentashonnan aki riba tera. Segun ku nos ta progresá den nos madures i entendimentu, nos ta spera ku nos forsa pa evitá promé tentashonnan lo mehorá kontinuamente segun ku nos ta hasi esfuerso pa bira mas manera nos Salbador, Hesu-Kristu.

Algun por purba di skonde pa Dios pasobra nan no ke wòrdu deskubrí òf eksponé, i nan ta sinti bèrgwensa òf kulpa. Sin embargo, numeroso Skritura ta siña nos ku skonde pa Dios ta imposibel. Mi ta kompartí djis algun.

Señor ta siña Yeremías pa medio di e siguiente preguntanan: “Un hende por skonde den lugánan sekreto pa Ami lo no mir’é?’ Señor ta bisa. No ta ami ta yena shelu i tera?”

I Job ta wòrdu siñá:

“Pasobra su wowonan ta riba e kamindanan di hende, i e ta mira tur su kamindanan.

“No tin skuridat, ni sombra di morto, kaminda e hasidónan di maldat por skonde.”

E salmista David mas poétikamente ta sklama:

“O Señor, Bo a saminámi, i Bo konosémi.

“Bo sa ki ora mi ta sinta i ki ora mi ta lanta; Bo ta komprendé mi pensamentunan djaleu. …

“Pasobra no tin ni un palabra den mi lenga, ma, mira, O Señor, Bo sa tur kos. …

“Unda lo mi bai for di bo spiritu? Of unda lo mi hui for di bo presensia?

“Si mi subi shelu, bo ta einan: si mi pone mi kama den fièrnu, mira, bo ta einan.”