Nos Sistema di Guia Selestial

Pa Elder Sergio R. Vargas

Di e Setenta

Ora nos enfoká nos bida riba Hesu-Kristu, nos lo haña e kaminda pa kas, perseverá te na fin i regosihá te na fin.

Hesu-Kristu a kambia mi bida ora mi a batisá na edat di 26 aña den mi Frutillar, Chile stimá. E tempu ei, mi trabou a hiba mi krusa e oséano, riunan i lagonan di e bunita Patagonia Chileno. Despues di mi boutismo, mi a mira mi trabou i mi bida di un manera nobo i diferente, i mi a rekonosé di bèrdat ku “tur kos ta indiká ku tin un Dios.”

Den naturalesa, salmou ta nase den e fuente di e riunan. Den algun momento di nan bida, nan mester landa bai abou di riu pa yega na laman, kaminda nan ta haña e kuminda i kondishonnan nesesario pa nan desaroyo.

Pero e laman tambe ta un lugá peligroso kaminda predadónan ta keda pará i kaminda piskadó ta purba di pega e salmounan ku ansué briante ku ta imitá kuminda, pero ku no ta alimentá nan. Si e salmou por sobrebibí e menasanan aki, nan lo ta kla pa usa nan sistema poderoso di guia pa bolbe subi riu pa e mesun lugá kaminda nan a nase, enfrentando retonan nobo i algun konosí. Sientífikonan a studia nan komportashon migratorio pa añanan largu i a deskubrí ku nan ta usa un tipo di mapa magnetiko, manera GPS, pa guia nan na nan destinashon final ku un presishon inkreibel.

Un dia nos tur por bolbe na nos kas selestial for di kaminda nos a bini. I manera e salmou, nos tin nos propio mapa magnetiko, òf Lus di Kristu pa guia nos aya. Hesu-Kristu a siña Su disipelnan, “Mi ta e kaminda, e bèrdat i e bida: niun hende ta bini na e Tata, sino pa medio di Mi.”

Ora nos enfoká nos bida riba Hesu-Kristu, nos lo haña e kaminda pa kas, perseverá te na fin i regosihá te na fin. Presidente Russel M. Nelson a bisa ku “E felisidat ku nos ta sinti tin poko di aber ku e sirkunstansianan di nos bida i tur kos di aber ku e enfoke di nos bida.”

Nos Naturalesa Divino i Nos Destino

For di e deklarashon di famia nos ta lesa ku “kada un [di nos] ta un spiritu stimá yu hòmber òf yu muhé di mayornan selestial, i komo tal, kada un tin un naturalesa i destino divino. … Den e reino premortal, e yunan hòmber i yunan muhé spiritual a konosé i adorá Dios komo nan Tata Eterno i a aseptá Su plan pa medio di kual Su yunan por a haña un kurpa físiko i gana eksperensia terenal pa progresá na perfekshon i finalmente realisá nan destinashon divino komo heredero di bida eterno.”

Promé ku Hesu-Kristu a nase na tera, El a aparesé na Moises i a papia kuné den nòmber di e Tata. El a bisa Moisés ku E tabatin un trabou grandi pa e hasi. Durante e enkuentro ei, Señor a yam’é “mi yu” diferente biaha.

Despues di e eksperensia ei, Satanas a bin tent’é, bisando: “Moises, yu di hende, adorá mi.”

Moises a reakshoná riba e tentashon dor di kòrda riba su naturalesa divino, bisando: “Ken bo ta? Pasobra mira, mi ta un yu di Dios.” E bèrdat a liberá Moises for di un atake di e atversario.

Rumannan, e peligernan di mortalidat ta real. Hopi biaha nan ta atraktivo, pero nan tin solamente un meta: pa kita nos for di e kurso di awa bibu ku ta hiba na e Tata i bida eterno.

Mi sa kon real e anzuenan di mortalidat por ta. Un djadumingu, ora mi tabata un konverso nobo, mi tabata duna un kurso di saserdosio ora a surgi un kombersashon perturbadó. Mi a lucha pa kaba mi lès. Mi a sinti mi ofendí i a sinti ku mi tabata e víktima. Sin a bisa ningun palabra, mi a bai pa e salida, ku e idea ku mi no lo bolbe iglesia pa un tempu.

Na e mesun momentu ei, un poseedó di saserdosio preokupá a para mi dilanti. El a invitá mi ku amor pa konsentrá riba Kristu i no riba e situashon ku nos a eksperensiá den klas. Ora mi a wak bèk riba e eksperensia kuné, el a kompartí ku mi ku el a tende un stèm bis’é: “Bai tras di dje; e ta importante pa mi.”

Mi amigunan stimá, nos tur ta importante p’E. Presidente Nelson a siña ku “pa motibu di nos kombenio ku Dios, E nunka lo no kansa den Su esfuersonan pa yuda nos, i nunka nos lo agotá Su pasenshi di mizerikòrdia ku nos.” Nos naturalesa divino i e relashon di kombenio ku Dios ta duna nos e derechi di risibí yudansa divino.

E Nesesidat di Nutrishon

Meskos ku e salmou mester wòrdu nutrí den laman pa e por krese, nos tambe mester di nutri nos mes spiritualmente pa nos por evitá di muri di malnutrishon spiritual. Orashon, e Skrituranan, e tèmpel, i nos asistensia regular na e reunionnan di djadumingu ta esensial den nos menú spiritual.

Na novèmber 1956, Ricardo Garcia a drenta e awa di boutismo na Chile, i a bira e promé miembro di e Iglesia den mi pais. Djis un dia promé ku el a muri, el a deklará dilanti di su famia i amigunan, “Hopi aña pasá mishoneronan a invitá mi pa ta felis huntu ku mi famia. Mi ta un hòmber felis. Bisa tur hende na Chile ku e evangelio ta felisidat.”

Despues di a wòrdu alimentá ku e evangelio di Hesu-Kristu, Ricardo a dediká henter su bida na sirbi Dios i su próhimo ku amor. Su ehèmpel di disipulado a bendishoná generashonnan, mi mes inkluí. E Profeta José Smith a siña ku “un hòmber yená ku amor pa Dios, no ta kontentu pa bendishoná su famia so, sino ku e ta bai rònt mundu, ansioso pa bendishoná henter e rasa humano.”

Bai Bèk na Nos Hogar Selestial

Profundo den kada un di nos tin e deseo di regresá na nos hogar selestial, i Hesu-Kristu ta nos sistema di guia selestial. E ta e kaminda. Su sakrifisio ekspiatorio ta hasi posibel pa nos hasi kombenionan sagrado ku Dios. Ora nos hasi kombenionan, tin biaha nos ta haña nos mes ta landa kontra e koriente. Peligèr, desapunte, tentashon i aflikshon lo pone nos fe i nos forsa spiritual na prueba. Pidi yudansa. Hesu-Kristu ta komprondé nos i semper e ta dispuesto pa yuda nos ku nos karganan.

Kòrda ku e ta konosí komo “un hòmber di doló, i konosí ku tristesa.” E Salbador a siña, “Den e mundu boso lo tin tribulashon: pero ta di bon ánimo; mi a vense e mundu.” Su sakrifisio ekspiatorio ta permití nos pikánan wòrdu pordoná te na e punto ku E no ta kòrda nan mas.

Nos no por lubidá nos pikánan kompletamente komo parti di nos siñamentu mortal pues nos lo kòrda pa no ripití nan. Na lugá di esei, nos lo kòrda riba djE ora nos tuma e sakramento na iglesia tur djadumingu. E ordenansa aki ta un parti esensial di adorashon i desaroyo spiritual. E alegria ta bini ora nos ta komprondé ku e no ta un dia normal. “E sabat a wòrdu trahá pa hende” ku e intenshon di duna nos sosiegu for di mundu i renobá nos kurpa i spiritu.

Nos ta kòrda riba djE tambe ora nos bai tèmpel—e kas di Señor. Tèmpelnan ta duna nos un konosementu mas profundo di Hesu-Kristu komo e sentro di e kombenio ku ta hiba nos na bida eterno,esun di mas grandi di … e donnan di Dios.”

Asistí na e tèmpel a duna mi konsuelo i hopi speransa tokante nos destino eterno. Mi a eksperensiá konekshonnan selestial ku hende riba tur dos banda di e velo. Mi a mira milagernan di sanashon den bida di mi yunan chikitu, dos di nan ta biba ku malesanan invisibel ku ta rekerí kuido diario pa restu di nan bida.

Nos famia ta regosihá ora nos ta papia tokante e plan di felisidat. Kara di mi yunan ta bria ora nan tende ku, danki na Hesu-Kristu, nan “aflikshonnan lo ta solamente un momentu chikitu.” Nos ta stima nos yunan profundamente, y nos sa ku algun dia, manera Presidente Jeffrey R. Holland a siña, nan “lo para nos dilanti glorifiká i grandioso, impresionantemente perfekto den kurpa i mente.” Nos kombenionan ta trese nos mas serka Dios te na e punto di hasi e imposibel posibel, yenando tur lugá di skuridat i duda ku lus i pas.

Danki na Hesu-Kristu, tin speransa i motibunan bon fundá pa sigui stima, hasi orashon i apoyá esnan ku nos ta preokupá pa nan.

Mi sa ku e ta bibu. E konosé nos i E ta stima nos. E ta e kaminda, e bèrdat, i e bida di e mundu.

Mi ta invitá nos tur awe pa sentra nos bida riba Hesu-Kristu i Su enseñansanan. Si nos hasi esei, nos lo evitá di kai den tentashon, ofendé otro i sinti pena di nos mes. Nos lo para komo tèmpelnan—santu, firme, i konstante. Nos lo soportá e tormentanan, i nos lo yega kas, perseverando te na fin i regosihá te na fin. Den e nòmber di Hesu Kristu, amèn.