O Mitãrusukuéra Primohenitúra Noble rehegua

Elder Stevenson, kóva ha’e peteĩ conferencia araka’eve nañanderesaraimo´ãiva.

Ore família-pe ogusta peteĩ kuatiañeʼẽ michĩ hérava Mitãnguéra Kuatiahai Tupãme g̃uarã. Ko’ápe jalee michĩmi:

“Tupã ahayhuetéva, reheja rangue omano tapichakuéra ha rejapova’erã ipyahúva, mba’ére nereñongatúi umi reguerekóva ko’ág̃aite?”

“Mba’éicha diez regla añónte reguereko, ha katu ore mbo’ehao oguereko millones?”

“Mba’ére remoĩ oreve umi ahy´ora´ỹi upéi reguenohẽ jeýta ramo?”

Ko’ág̃a ndaipóri tiempo ambohovái hag̃ua opa ko’ã mba’e ñeporandu, ha katu oĩ ambue ñeporandu ahendúva jepi mitãrusukuéra oipotava ambohovai. Ulaanbaatar, Mongolia guive Thomas, Idaho peve, upe mba´e ñeporandu ha´e peteĩchante: “Mba’érepa? Mba’érepa umi Santokuéra Arapahapegua oikova’erã iñambuetereíve ambuekuéragui?”

Che aikuaa hasy jagueroguata tekove ambue, especialmente nemitã jave ha reipota ambue tapichakuéra ndeacepta. Maymáva oiporãse, ha upe deseo oñembotuicha og̃uahẽ meve nahesãiri ko múndo digital ko’ág̃aguápe henyhẽva redes sociales ha ciberacoso-gui.

Ha jepeve ko´ã presion rupive, mba’érepa oiko Santokuéra Arapahapegua iñambueterei? Oĩ heta ombohovái porãva: Peẽ ha’é rupi Tupã ra’y. Peẽ peñeñongatu rupi umi ára pahápe g̃uarã. Peẽ ha’e rupi Jesucristo remimboʼe.

Jepe ko’ã ñemobohovái ndajepivéi penemoambue ambuekuéragui. Opavave ha’e Tupã ra´y. Opavave oĩva ko yvy ape ári ko’ág̃aite oñembou ko’ápe ko ára pahápe. Ha katu naentéroi oikove pe Arandu Ñe’ẽ térã kastida léi peẽ peñeha’ãháicha. Oĩ heta Cristo discípulo ipy’aguasúva ndaha’éiva miembro ko Tupaópe. Ha katu ha’ekuéra ndoservíri misiõ ha ndojapói ordenánsa Ñandejára rógape ijypykuéra rérape peẽ pejapoháicha. Oĩva’erã hetave mba’e—ha oĩ.

Ko árape añecentrase peteĩ razón adicional orekóva sentido che rekovépe. 1988-pe, peteĩ mitãrusu Apóstol hérava Russell M. Nelson ome’ẽ peteĩ discurso Universidad Brigham Young-pe ojeheróva “Thanks for the Covenant”[Aguyje umi Konvénio rehe]. Upe discurso-pe, upérõ Elder Nelson omyesakã jaipurúvo ñande albedrío moral jajapo ha ñañongatu hag̃ua konvénio Tupã ndive, oiko ñandehegui eredero pe konvénio sempitérno-gui Tupã ojapova’ekue ñande ypykuéra ndive opa dispensasiõme. Jaʼévo ambuéicha, oiko ñandehegui “konvénio ra’ykuéra.” Umíva ñanemoambue. Upéva ome’ẽ ñandéve acceso umi jehovasa peteĩchagua ñande ru ypykue ha ñande sy ipykue orrecibiva’ekue, ijapytépe pe nacimíento derécho terã primohenitúra.

Primohenitúra! Oiméne pehendu raʼe upe ñeʼẽ. Himno jepe japurahéi upéva rehegua: “O mitãrusukuéra primohenitúra noble rehegua, ñavense, ñavense, ñavense!” Ha’éva peteĩ ñe’ẽ oporokonvenséva. Ha katu, mbaʼépa heʼise upéva?

Antiguo Testamento árape peteĩ túva omano ramo, itaʼýra primohénito oguereko responsavilida oñangarekóvo isy ha iñermanakuérare. Iñermánokuéra orresivi iñerénsia ha oho ojapo hape ko múndope, ha katu pe taʼýra primohénito ndohói moõve. Omendáta ha oguerekóta ifamilia tee, ha katu opyta opa peve ára oisãmbyhy hag̃ua itúva mbaʼere. Ko responsavilida adicional rupi oñemeʼẽ chupe peteĩ medida adicional pe erénsiagui. Tuicha mba’e pe jerure ñaisãmbyhy ha ñañangareko hag̃ua ambue tapicháre? Ndaha’éi rehecháramo pe erensia adicional oñeme’ẽva’ekue chupe.

Ko árape nañañe’ẽi pende orden de nacimiento rehe umi familia terrenal-pe térã umi rol de género Antiguo Testamento-pe. Ñañe’ẽ hína pe erensia pehupytýva eredero ramo Cristo ndive pe relasiõ konvénio rehegua peiporavova’ekue pejapo hag̃ua Hendive ha pende Ru Yvagagua ndive. Hetaitereipa Tupã oha’arõ pendehegui peiko iñambuéva ambue Ita’yrakuéragui ikatu hag̃uáicha pemotenonde ha peservi porãve chupekuéra? Ndaha’éi pehecháramo umi jehovasa —mokõive temporal ha espiritual —oñeme’ẽva’ekue peẽme.

Heʼisépa ne primohenitúra rupi reime porãveha ambuévagui? Nahániri, ha katu heʼise oñehaʼarõha ndehegui reipytyvõ ambuépe oĩporãve hag̃ua. Heʼisépa ne primohenitúra rejeiporavo hague? Héẽ, ha katu ndojeiporavói oisãmbyhy hag̃ua ambue tapicha; nde rejeiporavo reservi hag̃ua chupekuéra. Haʼépa ne primohenitúra evidencia Ñandejára mborayhúgui? Héẽ, ha katu iñimportanteve, ha’e evidencia Ijeroviaha.

Jehayhu ha’e peteĩ mba’e, ha jerovia ha’e mba’e iñambuéva. Mitãrusukuéra Oñemombarete hag̃ua guia-pe, jalee: “Pende Ru Yvagagua ojerovia penderehe. Ha’e ome’ẽ peẽme tuicha jehovasa, umíva apytépe pe evanhélio plenitu ha umi ordenansa ha konvenio sagrádo penembojoajúva Hese ha oguerúva Ipu’aka pende rekovépe. Umi jehovasa ndive ou responsavilida adicional. Ha’e oikuaa ikatuha pejapo peteĩ diferencia ko mundo-pe, ha upéva oikotevẽ, heta kásope, tekove diferente ko mundo pegua-gui.”

Ñande experiencia mortal ikatu ñambojoja peteĩ barco de crucero rehe Tupã omondova’ekue opa Ita’yrakuérape oviaha aja peteĩ orilla-gui ambuépe. Pe viaje henyhẽ oportunida-gui ña’aprende, jakakuaa, javy’a ha japrogresa hag̃ua, ha katu henyhẽ avei peligro-gui. Ñandejára ohayhu opa Ita’yrakuérape ha ojepy’apy hekove porãre. Ha’e ndohejareiséi ni peteĩva, upévare o´invita umi oĩva dispuesto oiko hag̃ua chuguikuéra miembro Itripulasiõ-pe—upéva ha’e peẽ. Peiporavógui ​​pejapo ha peñongatu hag̃ua konvénio, Ha’e oikuave’ẽ peẽme Ijerovia. Ha’e ojerovia pende rekove ha’eha diferente, tekove teete ha apartado pende rembiapo iñimportánteva rupive Ha’e ojeroviaha penderehe.

Pepensami upévare! Tupã ojerovia penderehe—opa hénte ko yvy ape ári apytégui, konvénio ra’ykuéra , umi Itripulasiõ pegua—peipytyvõ hag̃ua Hembiaporãme pegueru porãite jey hag̃ua opa Ita’yrakuéra Hendápe. Ndareíri presidente Brigham Young peteĩ jey he’iva’ekue: “Opa umi ánhel oĩva yvágape omaña hína ko’ã tapicha aty’imi rehe.”

Remañávo nde jerére ko barco hérava yvy, ikatu rehecha ambue tapicha oguapýva silla de salón-pe omboy’u, ohuga casino-pe, omonde ao ojekuaaitereíva, oipuru celular opa ára ha operde hetaiterei tiempo oha’ãvo juego electrónico. Ha katu peñeporandu rangue “Mba’érepa che ndaikatúi ajapo umíva?,” ikatu penemandu’ami peẽ ndaha’eiha peteĩ pasajero kumu. Peẽ ha’e umi tripulasiõ pegua. Peguereko responsavilida umi pasajero ndorekóiva. Hermana Ardeth Kapp he’i haguéicha peteĩ jey: “Ndaikatúi remba´apo peteĩ [salva]vida ramo rejoguáramo opa ambue nadador-pe oĩva playa-pe.”

Ha peñedesanima mboyve opa umi obligación extra-gui, penemandu’amíke umi tripulante orrecibiha peteĩ mba’e umi ambue pasajero ndohupytýiva: jehepyme’ẽ. Elder Neil L. Andersen he’ikuri: “Oĩ peteĩ poder espiritual compensatorio umi hekojojávape g̃uarã”, oikehápe “tuichave seguridad, tuichave confirmación ha tuichave confianza.” Abrahám ymave guaréicha, peẽ pehupyty vy’a ha py’aguapy tuichavéva, tekojoja ha mba’ekuaa tuichavéva. Pende hepyme’ẽ ndaha’éi peteĩ mansión yvágapente ha umi tape ojejapóva óro-pe añónte. Ndahasýi va’erãmo’ã Túva Yvagaguápe ome’ẽ hag̃uánte peẽme opa mba’e Ha’e oguerekóva. Hembipota ha’e penepytyvõ oiko hag̃ua pendehegui opa mba’e Ha’e ha’éva. Upéicha, umi pene kompromíso ojerure hetave pendehegui upéicha Tupã ojapo hetavegui pendehegui.

Ha’e “heta mba’e jajerure oimeraẽvape g̃uarã, ha katu nde ndaha’éi oimeraẽva”! Peẽ ha’e mitãrusukuéra primohenitúra noble rehegua. Pene relasiõ konvénio rupi Tupã ha Jesucristo ndive ha’e peteĩ relasiõ mborayhu ha confianza rehegua peguerekohápe Igrásia jehupytykuaa tuichave—Ipytyvõ divino, investidura oporomombaretéva ha pu’aka habilitador. Upe pu’aka ndaha’éi jepotapy añónte, peteĩ encanto de suerte térã profesía oñekumplíva ijeheguinte. Ha’e añeteguáva.

Pejapóvo umi pende primohenitúra responsavilida rehe, araka’eve peñandúne peneañóha Pe víña Jára omba’apo penendive. Peẽ pemba’apo ojoykére Jesucristo ndive. Káda konvénio pyahu reheve—ha pene relasiõ Hendive ipypukuvévo—pejejoko hatãve ha pejoaju mbarete mbareteve peve. Upe símbolo sagrado Igrásia reheguápe pejuhúta mokõive, pe potapy ha mbarete peiko hag̃ua exactamente pe Salvador oiko haguéicha—iñambuéva ko múndo peguágui. Peguereko umíva Jesucristo pendejoko rupi!

2 Nefi 2:6-pe jalee, “Upévare, pe rredensiõ ou Mesías Imarangatúvare; ha’e henyhẽ haguére grásia ha añetégui.” Ha’e henyhẽgui añetegui, Ha’e penderecha añetehápe peimeháicha—pende defecto, debilidad, ñembyasy ha opa mba’e rehe. Ha’e henyhẽgui grásiagui, Ha’e penderecha añetehápe ikatúva peiko. Ha’e penemog̃uahẽ peimeháicha ha penepytyvõ peñearrepenti ha pemehora hag̃ua, pevense ha peg̃uahẽ hag̃ua peiko.

“O mitãrusu primohenitúra noble rehegua, ñavense, ñavense, ñavense!” Atestifika peẽme penderayhuha —ha ojejeroviaha penderehe —ko árape, 20 áño rire, ha tapiaite g̃uarã. Aníke pevende pene primohenitúra peteĩ lenteja pláto rehe. Ani pekambia opa mba’e mba’eve’ỹre. Ani peheja ko múndo penemoambue, peẽ penereñóigui pemoambue hag̃ua ko múndo. Jesucristo rérape, amén.