Pe Ñeha’arõ Pu’akapa

Ñane ñeha’arõ tekove opave’ỹvare oĩ asegurado Cristo grásia rupive ha umi ñande jeiporavo, ohejáva ñandéve pe jehovasa hechapyrãitéva jaha jey hag̃ua ñande róga yvagaguápe ha jaiko upépe tapiaite g̃uarã py’aguapy ha vy’apavẽme ñande Ru Yvagagua ha Ita’ýra Ojehayhuetéva, ha ñane familia ha angirũnguéra ijeroviarekóva jahayhuetéva, ha umi kuimba’e ha kuña hekojojáva opa continente ha káda siglo-gua ndive.

Ko yvy ári jahasa vy’a ha ñembyasy jajepy’ara’ã aja. Ñande victoria ou jerovia rupi Jesucristo-re jagueropu’akávo ñane angaipa, jehasa’asy, py’ara’ã, tekojoja’ỹ ha tekovegua desafio-kuéra.

Ñamombaretévo ñande jerovia Jesucristo-re, jahecha mombyryve ñande jehasa’asýgui umi jehovasa ha promesa eternida reheguáva gotyo. Pe tesapéicha imimbi okakuaáva, pe ñeha’arõ ohesape pe mundo ypytũ ha jahecha ñande futuro igloriósova.

Ñepyrũmby guive, ñande Ru Yvagagua ha Ita’ýra Ojehayhuetéva ohovasa kyre’ỹ umi hekojojávape upe ñeha’arõ don reheve.

Osẽ rire pe yvotytýgui, peteĩ ánhel ombo’e Adán ha Eva-pe pe Jesucristo rehegua promesa. Pe ñeha’arõ don ohesape hekovekuéra. Adán he’i, “Ajehesape’a, ha arekóta vy’apavẽ ko tekovépe.” Eva oñe’ẽ pe “[i]rredensiõ ha tekove opavae’ỹva vy’apavẽgui, Tupã ome’ẽva umi iñe’ẽrendúvape.”

Espíritu Santo ogueru haguéicha ñeha’arõ Adán-pe, Ñandejára Espíritu ohesape umi ijeroviarekóvape ko’ã árape, omomimbívo pe tekove opave’ỹva añetegua.

Pe Salvador ombou peteĩ Moangapyhyhára, peteĩ ñande jerovia ha ñeha’arõ irũ, oguerúva py’aguapy, “ndaha’éi mundo ome’ẽlaja”.

“Ko yvy ári,” he’i pe Salvador “heta pehasa’asýta. Ha katu pejerovia [peguereko peteĩ ñeha’arõ mimbi’asy]; Che avense ko mundo.”

Umi jehasa’asy árape, jaiporavo jajerovia Ñandejárare fe reheve. Ñañembo’e kirirĩháme: “Ani ojejapo che aipotáva, ha katu ne rembipota”. Ñañandu Ñandejára moneĩ ñane disposisiõ mirĩre ha ñaha’arõ pe py’aguapy oñeprometéva Ñandejára omboútava ára Ha’e oiporavóvape.

Apóstol Pablo ombo’e: “Tupã, ome’ẽva ñandéve ñeha’arõ, tapene myenyhẽ … vy’a ha py’aguapýgui … , ha tombotuicha tuichave pene ra’arõkuaa,”peikove vy’ápe, umi mba’e peha’arõvare; peropu’aka py’aguasúpe umi pehasa’asyha;”Espíritu Santo pokatu rupi.”

Proféta Moroni oikuaa hembiasakue rupi mba’épa he’ise jareko ñeha’arõ Cristo-pe umi jeiko’asy aja. Ha’e omohesakã isituasiõ hasýva:

“Che’año. … nacheangirũi aha hag̃ua hendápe.”

“Ndajeikuaaukái … ani hag̃ua cherundi hikuái.”

Ñeimo’ã’ỹme, upe aravo ypytũ ha ha’eñóme, Moroni ohai itúva ñe’ẽnguéra ñeha’arõ rehegua:

“Upévare, peteĩ yvypóra ojeroviáramo tekotevẽ oguereko ñehaʼarõ; jeroviaʼỹre ndaikatúigui oĩ ñehaʼarõ.”

“Ha mbaʼe pehaʼarõvaʼerã? … Peguerekovaʼerãha ñehaʼarõ Cristo expiasiõ rupi ha ijeikovejey puʼaka rupi, peñemopuʼãtaha tekove opaveʼỹvape.”

Che hermano ha hermanakuéra, ñeha’arõ ha’e peteĩ don oikovéva, peteĩ don okakuaáva okakuaaháicha ñande jerovia Jesucristo-re. Jerovia ha’e pe convicción umi mba’e ñaha’arõvagui.” Ñamopu’ã umi ñande jerovia convicción ñembo’e rupive, umi templo-gua konvénio, ñañongatúvo umi tembiapoukapy, ñanderory memévo escritura-kuérape ha umi proféta moderno ñe’ẽnguérape, japartisipávo Santa Cena-gui, jaservívo tapichakuérape, ha ñatupãitũvo káda semana ñane hermano ha hermana-kuéra santo ndive.

Omombarete hag̃ua ñane ñeha’arõ ko tekovai okakuáva árape, Ñandejára omanda Iprofétape tomyanyhẽ pe yvy templo-kuéra reheve.

Jaikévo Ñandejára Rógape, ñañandu Tupã Espíritu, okonfirmáva ñane ñeha’arõ.

Pe templo otestifika pe ñeñotỹha nandígui ha pe tekove vélo mboypýri okontinuaha opavavépe g̃uarã.

Umi ndoguerekóivape peteĩ compañero eterno, umi ordenánsa okonfirma pu’aka reheve opa tapicha hekojojáva ohupytytaha opaite umi jehovasa oñeprometéva.

Oĩ peteĩ ñeha’arõ isublímeva peteĩ paréha imitãva oñesũrõ pe altar renondépe ojesella hag̃ua, ndaha’éi ko tekove ajánte ha katu opa eternida aja.

Oĩ ñeha’arõ ojeipapakuaa’ỹva ñandéve g̃uarã umi promesa ojejapóva ñane ñemoñarépe g̃uarã, taha’e ha’éva i-circunstancia ko’ag̃agua.

Ndaipóri ñembyasy, mba’asy, tekojoja’ỹ jehasa’asy ni mba’eve ikatúva omoypytũ ñane ñeha’arõ jaguerovia ha jajejoko atãrõ ñane konveniokuérare Tupã ndive Ñandejára Rógape. Upéva ha’e peteĩ óga tesape rehegua, peteĩ óga ñeha’arõ rehegua.

Ñañohẽ ñembyasy resay jahechávo umi ndorekóiva ñeha’arõ Cristo-pe ñembyasy ha py’aropu.

Nda’aréi ahecha mombyry guive peteĩ paréha orekova’ekue jerovia Jesucristo-re, ha katu upéi oiporavo omboyke iguerovia. Oho porã chupekuéra múndope, ha ojuhu placer iñintelecto ha ijerovia ñemboyképe.

Opa mba’e oho porãvaicha pe ména, imitã ha imbaretéva gueteri, hasy peve sapy’a ha omano. Peteĩ kuarahy eclipse-icha, ha’ekuéra omboty pe Ta’ýra resape, ha pe resultado ha’ékuri peteĩ ñeha’arõ rehegua eclipse. Pe tembireko, ijeguerovia’ỹme, ko’ág̃a oñeñandu desorientada, ñembyasyrã noĩri preparada, ha ndaikatúi omoangapyhy imembykuérape. Iñintelecto he’ikuri chupe hekove oĩha en perfecto orden ndaikatúi peve sapy’a ohecha pe ko’ẽrõ. Ipy’aropu ogueru ypytũ ha apañuãi.

Pehejami tambojoja ipy’aropu rasy pe ñeha’arõ Cristo-pe rehe ambue familia orekóva peteĩ korasõ rasy árape.

Ojapo 21 áño, che sobrino, Ben Andersen ha hembireko Robbie memby onase ramóva, ojegueraha helicóptero-pe itávagui Idaho-pe Salt Lake city-pe. Ag̃uahẽ hospital-pe ha Ben omohesakã chéve umi complicación orekóva imitãmi korasõ ikatúva ojuka chupe. Romoĩ ore po Trey akãmi ári. Ñandejára ohovasa chupe tekove meme reheve.

Trey orekókuri peteĩ cirugía cardiaca pe hekove semana peteĩhápe, ha upéi ouve cirugía-kuéra. Ary ohasávo ojehechakuaa Trey oikotevẽtaha peteĩ korasõ transplante. Jepe pokã umi activida físico ikatúva ojapo, ijerovia okakuaa. Ha’e ohai: “Araka’eve nañembyasýi chejehe aikuaágui akoiete imba’eguasuha jareko jerovia Jesucristo-re ha peteĩ testimonio pe Plan de Salvación-gui.”

Trey oreko iteléfonope ko Presidente Nelson cita: “Pe vy’apavẽ ñañandúva sa’i oreko rrelasiõ umi circunstancia ñande rekovépe rehe ha katu opa mba’e ojoaju ñande rekove enfóke rehe.”

Trey ohai: “Tapiaite aserviseva’ekue peteĩ misiõ de tiempo completo, ha katu … che medico-kuéra ndohejái chéve aservi peteĩ misiõ ohasa peve peteĩ ary jepe che transplante rire. … Che amoĩ che jerovia Jesucristo-re.”

Trey horýkuri ojeacepta haguére osegi hag̃ua pe carrera de contabilidad BYU-pe ko semestre guive, ha katu ovy’avéntema julio paha rupi ohupytývo pe teléfono-pe ñehenói oha’arõiteva’ekue hína oho hag̃ua hospital-pe orresivi hag̃ua ikorasõ rehegua transplante.

“Peteĩ ary,” he’i Trey “ha aĩtama che misiõme.”

Oĩ heta ñeha’arõ oikévo pe kirófanope. Upevére, pe cirugía aja oikókuri peteĩ complicación vaieterei ha Trey araka’eve ndorrekuperái pe conciencia.

Isy, Robbie, he’i: “Pe viernes ha’ékuri pe ára ore korasõ ojekahague … roñeha’ãvonte rontende. … Ndakéi pyhare mbyte peve añeha’ãvo aprocesa opa mba’e. … Ha katu pe sábado, apay peteĩ vy’apavẽ remiandu reheve. Ndaha’éikuri py’aguapy añónte; ndaha’éikuri peteĩ negasiõ. Añandu vy’apavẽ che memby rehe ha avy’a isýicha. … Ben opu’ã voive chehegui, ha ipahápe roguereko vove oportunidad roñe’ẽ hag̃ua, Ben opu’ãkuri upe remianduete reheve avei.”

Ben omohesakã: “Che ánga henyhẽ tesakãgui Tupã chembo’évo Espíritu Santo rupive. Apu’ã pyhareve pe las cuatro rupi ha chemyenyhẽ peteĩ py’aguapy ha vy’apavẽ ñamombe’ukuaa’ỹva. Mba’éichapa ikatu upéva oiko? … Trey ñemano hasyeterei ha ahechanga’ueterei chupe. Ha katu Ñandejára nañanderejái tyre’ỹ. … Aha’arõ’asy upe jotopa jey vy’apópe.”

Trey oanotákuri idiáriope ko’ã ñe’ẽ presidente Nelson discurso-gua conferencia general-pe: “Ha’etévaicha ndaikatumo’ãi ñañandu vy’apavẽ ñande ra’ykuéra hasýramo peteĩ mba’asy ndokueráiva reheve, japyta ramo mba’apo’ỹre, térã ñande cónyuge ñande traiciona ramo. Upevére, upévaite ha’e pe vy’apavẽ pe Salvador oikuave’ẽva. Igoso iconstante, oasegurávo ñandéve ñande ‘aflicciones-kuéra sapy’aitétanteha’ [Doctrina ha Konveniokuéra 121:7] ha oñeconsagrataha ñande provechorã.”

Hermano ha hermana-kuéra, ikatu pe py’aguapy pehekáva nog̃uahéi pya’ete peipotaháicha, ha katu apromete peẽme, pejeroviárõ Ñandejárare, Ipy’aguapy og̃uahẽtaha.

Ajerure’asy tañamombarete ñande jerovia hepyetéva, jahávo tenonde gotyo peguerekóvo peteĩ ñehaʼarõporã mimbi. Atestifika ñane ñeha’arõ ha’eha ñande Salvador Jesucristo. Ha’e rupive, opa ñande kerayvoty ijojáva oñemoañetéta. Ha’e ningo peteĩ Tupã ñeha’arõ rehegua—pe ñeha’arõ pu’akapa. Ha’e oikove ha penderayhu. Jesucristo rérape, amén.