Tupã ohayhuvéva

Añepyrũ mboyve, ambe’uva’erã peẽme mokõi che ra’y ojedesmajáma oñe’ẽ aja púlpito-pe, ha araka’eve nañeñandúiva conectadove hendivekuéra ko momento-gui. Arekove che akãme pe trampa añóguinte.

Ore família oreko seis mitã, sapyʼánte oñembohorýva ojuehe haʼeha pe mitã ojehayhuvéva. Peteĩ teĩ oreko diferénte rrasón ojehayhuve hag̃ua. Ore mborayhu peteĩ teĩ ore mitãnguérare ipotĩ ha oporomyenyhẽ ha ikompleto. Ndoroikatúi rohayhuve peteĩ umívagui rohayhuvégui ambuépe—peteĩ mitã heñói vove ou ore mborayhu ñembotuicha iporãvéva. Añerrelasionave che Ru Yvagagua mborayhúre cherehe pe mborayhu añandúva che mitãnguérare rupive.

Peteĩ teĩ hikuái he’i aja mba’érepa ha’eha pe mitã ojehayhuvéva, ikatu peimo’ã ore familia araka’eve ndorekóiva peteĩ koty isarambíva. Pe imperfección remiandu oĩva pe relación túva ha mitã apytépe oñemomichĩ mborayhúre ñema’ẽ meme reheve.

Sapy’ánte, ikatu ahechávo rohoha peteĩ ñorairõ familiar rojeikuaa’ỹvagui gotyo, ha’e peteĩ mba’e kóicha: “Néi, pechemongane’õ, ha katu ndaikuaaukamo’ãi; peẽ peikuaa mávapa pende apytégui che ahayhuve”. Ahupytyséva ha’e peteĩ teĩ umi seis toñeñandu victorioso ha torojehekýi ñorairõgui ipahápe—jepe ambue jey peve!

Iñevanhéliope, Juan heʼi ijehe haʼeha “pe discípulo Jesús ohayhuvaʼekue,” upe disposición ijojaha’ỹ ramoguáicha. Chegusta apensávo upéva oiko hague Juan oñandu haguére ojehayhuetereiha Jesús rupi. Nefi ome’ẽ chéve peteĩ sentido peichaguáva ohaívo, “Che rory che Jesús-pe.” Añetehápe, pe Salvador ndaha’éi Nefi mba’e Ha’evévagui Juan mba’e, ha katu pe naturaleza personal Nefi relación-gui “i”Jesús ndive ogueraha chupe upe descripción kyrỹime.

¿Ndaha’éipa mba’e iporãitéva oĩha momento ikatúvape ñañandu jajehechakuaa ha jajehayhuha renyhẽ ha peteĩ teĩme? Nefi ikatu ohenói Chupe “i”Jesús, ha ñande ikatu avei. Ñande Salvador mborayhu ha’e pe “mborayhu ijyvatevéva, inoblevéva, imbaretevéva,” ha Ha’e ome’ẽva “ñañemyenyhẽ” peve. Pe mborayhu divino araka’eve opa’ỹva, ha peteĩ teĩ ñande ha’e ojehayhuetéva. Tupã mborayhu ha’e upe, círculo ramo peteĩ diagrama Venn-pe, opavave ñañembojoajúvape. Taha’e ha’éva ñande parte ha’etévaicha iñambuéva, Imborayhu ha’e pe jajuhuhápe ñeĩ oñondive.

¿Ñanesorprendépa umi mandamiento tuichavéva ha’eha jahayhu Tupãme ha jahayhu umi oĩvape ñande jerére? Ahechávo umi tapicha ohechaukáva mborayhu Cristo-icha ojupe, ha’ete chéve upe mborayhu oguerekoha hetave mba’e imborayhu añóntegui; ha’e mborayhu oguerekóva avei divinidad ipype. Jajoayhúramo péicha, completamente ha renyhẽ ikatuháicha, yvága oike avei.

Upéicharõ, peteĩ tapicha ñaneimportáva ha’etéramo imombyrýva peteĩ mborayhu divino remiandúgui, ikatu jasegi ko modelo—jajapóvo umi mba’e ñanemoag̃uivéva Tupãre ñande jehegui ha upéi jajapóvo umi mba’e ñanemoaguĩvéva hesekuéra—peteĩ séña noñeñe’ẽiva ou hag̃ua Cristo-pe.

Aguapyseterei penendive ha aporandu peẽme mba’e circunstanciapa penemoñandu Tupã mborayhu. ¿Mba’e versículo escritura-pegua, mba’e rembiapo servicio rehegua? ¿Moõpa reimevaʼerã? ¿Mba’e purahéipa? ¿Máva kompañíape? Conferencia general ha’e peteĩ tenda irríkova ñañemoarandu hag̃ua yvága mborayhúre ñembojoaju rehegua.

Ha katu ikatu peñeñandu mombyry Tupã mborayhúgui. Ikatu oĩ peteĩ koro desilusio ha pytumby rehegua ipohyiva pene apytu’ume, marandukuera he’íva peẽme pejekutuvai ha peñekonfundietereiha, penekangyeterei ha pejehejareiha, peneambueterei térã pekañyetereiha pegarantisa hag̃ua añetehápe mborayhu yvagapegua. Pehendúramo umichagua pene akãme, upéicharõ pehendumi ko mba’e: umi ñe’ẽpu ojavýnte. Ikatu jeroviapope namboyke umi jepy’apy ñanemomombyrýva yvagagua mborayhugui—peteĩ teĩ jey japurahéi pe himno ñanemomandu’áva ñande Salvador jahayhuetéva ha ojavy’ỹva oiporavo hague “ohasa asy, mba’asy, [ha] ñemano ñande rehe.” peteĩ teĩ jey ja’úvo pe mbujape pehẽ. Añetehápe, Jesús oipeʼapaite pe ñemotĩ oñembyaívagui. Iñemboja’o rupive, oiko Chuigui perfecto, ha Ha’e ikatu ojapo ñandehegui perfecto ñañembyai jepérõ. Ha’e oñemboja’o, ha’eño, oñeinupã ha oñehunga—ha ikatu ñañandu ñande peichaha avei—ha katu nañañemomombyrýi Tupã mborayhúgui. He’iháicha pe purahéi: “Gente oñembyaíva, ohupyty mborayhu añetegua”.

Ikatu reikuaa peteĩ mbaʼe ñemi ndejehe nemoñandúva ndaikatuiha ejehayhu. Ikatu ramo jepe peime porã umi mbaʼe peikuaáva pendejehegui, pejavy pepensávo peñemoĩ hague Tupã mborayhu ndaikatumoʼãihápe ohupyty. Sapy’ánte ñaneñaña ha nañanepasiénsiai ñandejehe manera araka’eve nañañeimahináiva ikatuha jajapo ambue tapicha rehe. Oĩ heta mba’e ojejapova’erã ko tekovépe, ha katu pejeguaru pendejupe ha peñekondena ñemotĩme noĩri pe lista-pe. Taha’e ha’éva mba’éichapa ikatu ñañandu ñaimevaiha, Ijyva noñemombykýi. Nahániri. Akóinte ipuku “[ome’ẽ] hag̃ua ñandéve ipo” ha ñañeañuã peteĩ teĩme.

Nañañandúi jave pe mborayhu divino añua, ndohói moõve. Tupã ñe’ẽ tee ha’e “umi yvytyrusu omýita ha umi yvyty ojepe’áta, ha katu [Imba’eporã] ndojepe’amo’ãi [ñandehegui].” Upéicharõ, hesakã porã hag̃ua, pe idea Tupã ndohayhuveimaha oĩva’erã iguypete pe lista mba’e ikatúvape ha’e explicación tekovépe, ¡nañag̃uahẽiva’erãicha upépe umi yvytyguasu ha yvyty ho’a peve!

Aguerohory añetehápe ko yvytykuéra símbolo ha’evo evidencia Tupã mborayhu añeteguaha. Ko simbolismo pu’aka ojoaju umi mombe’u ohóvagui yvytyguasúpe ohupyty hag̃ua revelación ha Isaías descripción-gui “pe yvytyguasu Ñandejára róga” “[oñemopyendáva] umi yvytyguasu ruʼãme.” Ñandejára róga ha’e ñane konvénio hepyvéva róga ha peteĩ tenda opavavave jajevy hag̃ua ha ñañapymi pypuku ñande Ru mborayhu evidencia-pe. Avei aguerohory pe angapyhy oúva che ángape añembojere hatãvéramo che konvénio bautismal-pe ha atopa peteĩ tapicha ombyasýva peteĩ pérdida térã ombyasýva peteĩ decepción, ha añeha’ã aipytyvõ chupekuéra tojoko ha toprosesa hemiandu. ¿Ha’épa ko’ã forma ikatuhápe ñañapymi pypuku pe mborayhu konvénio preciado-pe, hesed?

Upéicharõ, Tupã mborayhu nañanderejáiramo, ¿mbaʼére nañañandumeméi upéva? Embopy’aguapy hag̃uánte umi mba’e reha’arõva: Ndaikuaái. Ha katu jajehayhu katuete ndaha’éi peteĩcha ñeñandu jajehayhuha ndive, ha areko mbovy idea ikatúva penepytyvõ pehekávo mbohovái upe porandúpe.

Ikatu peñeha’ã hína ñembyasy, depresión, traición, ta’eño, decepción térã ambue intrusión ipu’akáva pende capacidad-re peñandu hag̃ua Tupã mborayhu penderehe. Oiméramo upéicha, umi mbaʼe ikatu ombogue térã ojoko ñande capacidad ñañandu hag̃ua umi mbaʼe ambuéicha ikatútava ñañandu. Sapyʼami jepe, ikatu ndaikatúi peñandu Imborayhu, ha pe kuaapy ohupytýmava’erã. Ha katu añeporandu ikatúpa pe’experimenta—ñeha’arõkuaa reheve—diferente manera pehechauka ha pehupyty hag̃ua pe mborayhu divino. ¿Ikatúpa peho peteĩ paso tapykue gotyo oimeraẽ mba’e oĩvagui pene renondépegui, ha ikatu ambue paso, ha ambue, pehecha peve peteĩ ta’anga tuichavéva, tuichavéva ha tuichavéva oñeikotevẽramo, literalmente “[pepensa peve] celestial-háicha” pejepy’amongetágui umi mbyjáre ha penemandu’ávo hetaiterei mundo rehe ha ha’ekuéra rupive, Ijapoharére?

Umi guyrakuéra purahéi, kuarahy’aku, yvytu térã ama ñeñandu che pire ári, ha umi momento naturaleza ojapohápe che sentidokuéra toñesorprende Tupãre—opavave oipytyvõ ome’ẽ hag̃ua chéve peteĩ conexión yvágandi. Oipytyvõne pe angapyhy oguerúva umi angirũ hekojojáva. ¿Ikatu pe música? ¿Térã servicio? ¿Peñongatúmapa peteĩ registro térã diario umi momento-gui pende conexión Tupã ndive hesakãvéva peẽme g̃uarã? Ikatu pe’invita umi pejeroviávare okomparti hag̃ua penendive ifuente de conexión divina pehekávo ñemonguera ha ñeikũmby.

Che añeporandu, Jesús oiporavórire peteĩ tenda nde ha Ha’e ikatuhápe peñembyaty, peteĩ tenda privado ikatuhápe peñesentra Hese añoitére, oiporavónepa Ha’e pende renda ijojaha’ỹva sufrimiento personal rehegua, pe tenda pene remikotevẽ pypukuvéva rehegua, avave ambue ndaikatuihápe oho? Peteĩ tenda peñanduhápe hi’añoitereiha añetehápe peimeva’erãme pende año, ha katu ndapeiméi añetehápe, peteĩ tenda oiméne Ha’e añoite oho haguépe, ha katu añetehápe Ha’e ombosako’íma penemog̃uahẽ hag̃ua upépe peg̃uahẽ vove? Peha’arõramo Ha’e og̃uahẽ, ¿ikatúpa ha’e oĩma upépe ha pende jehupytykuaápe?

Peñeñandúramo renyhẽ mborayhúgui ko etapa pende rekovépe, peñeha’ãmi pejejagarra upéva rehe efectivamente peteĩ colador ojokoháicha y. Ehypýi upéva opa rehohápe. Peteĩ milagro economía divina-pegua ha’e, ñañeha’ãvo ñakomparti Jesús mborayhu, jajuhu ñañemyenyhẽha peteĩ variante pe principio-gui “oimeraẽva operdeva’ekue hekove che rehehápe ojuhúta.”

Ñañemyenyhẽ Tupã mborayhúgui ñane mo’ã umi aravai tekove pegua ha katu avei ombovy’ave umi momento vy’arã—ñande ára vy’arã, oĩháme kuarahy yvágape, omimbive pe kuarahy mimbi ñane ánga ryepy reheguáre.

Toiko ñandehegui “[oñembohapo ha oñemopyendava]” ñande Jesús ha Imborayhúpe. Jaheka ha ñamomba’eguasu umi experiencia ñañanduhápe Imborayhu ha Ipu’aka ñande rekovépe. Pe evanhélio vy’a oĩ jehupytykuaápe opavavépe g̃uarã: ndaha’éi umi ovy’ávante peg̃uarã, ndaha’éi umi oñembyasýva peg̃uarã añónte. Vy’a ha’e ñande propósito, ndaha’éi pe don ñande circunstancia-kuéra rehegua. Jaguereko opa mba’e porã “[javyʼa] hag̃ua ha [ñanehenyhẽ] hag̃ua mborayhúgui Tupã ha opa yvypóra rehe.” Ñañemyenyhẽkena. Jesucristo rérape, amén.