Cristo Ñe’ẽnguéra ha Espíritu Santo ñandegueraháta Añeteguápe
Jaikuaa ko plan ijojaha’ỹva ñanepytyvõta jaikuaa hag̃ua ñane identidad Tupã ra’y ha rajykuéraicha ha ñande destino oiko hag̃ua ñandehegui Ha’éicha.
Tupã ha’e ñande Ru Yvagagua. Ñande ha’e Ita’yrakuéra ñanereñoiva’ekue espíritu-pe ha jaje’apókuri Ha’angaháicha. Upévare, peteĩteĩ ñande, peteĩ Tupã ta’ýra térã tajýraicha, jareko pe potencial divíno ha’e hag̃ua Ha’éicha.
Jaikókuri Hendive espírituicha jaju mboyve ko yvy ári. Pe Túva Yvagagua, ñande Ru espíritu-pe ramo, ñanderayhu, oipota iporãvéva ñandéve g̃uarã ha ombosako’i peteĩ plan jahupyty hag̃ua umi Ijehovasa tuichavéva, ha’éva pe ñemanove’ỹ ha tekove opave’ỹva. Upe plan-pe he’iháicha, ñandéve, ta’ýra ha tajýra oñemoheñóiva espíritu-pe, oñeme’ẽta ñandéve pe albedrío, sãso jaiporavo hag̃ua Iplan. Jajúvo ko yvýpe, jahejáta Tupã renda, ñanderesaráita ñande rekove preterrenal-gui, jarresivíta peteĩ tete to’o ha kanguégui, jahupytýta ñane rembiasa tee ha jadesarrolláta jerovia. Ñande rete to’o ha kanguegua reheve, yvypóra natural ramo, ja’áta umi py’ara’ãme, oikóta ñandehegui hekoky’áva ha ñañemomombyrýta Tupãgui, ha ndaikatumo’ãi jaha jey Henda marangatúpe. Ñande Ru Yvagagua mborayhu ijapyra’ỹva rupi ñanderehe, ombou Ita’ýra Primohénito, Jesucristo, ha’e hag̃ua ñande Salvador. Ijehasa’asy expiatório, pe Expiasiõ rupive, Jesucristo ojapo tañañerredimi ñane angaipakuéragui, tajaikovejey ha tajahupyty pe tekove opave’ỹva.
Cheaguyjevete ko’ã añetegua gloriósova, ñahenóivape Ñande Ru plan de salvación, Iplan poriahuvereko rehegua térã Ituicha plan de felicidad. Añemoarandu ko’ã añetegua imba’egusúva chepytyvõ aikuaa hag̃ua che identidad añetéva ha umi tuicha jehovasa exaltasiõ ha tekove opave’ỹva rehegua Tupã ombosako’iva’ekue ñandéve g̃uarã. Proféta Nefi ñanembo’e pe tape: “Upévare, … penderory Cristo ñeʼẽme; ha péina ápe, Cristo ñeʼẽ heʼíta peẽme opa mbaʼe pejapovaʼerã.” Haʼe heʼive, “peikéramo upe tapépe, ha oñemeʼẽ peẽme pe Espíritu Santo, haʼe ohechaukáta peẽme opa mbaʼe pejapovaʼerã.” Ko árape akompartise mba’éichapa umi Cristo ñe’ẽ ha pe Espíritu Santo chepytyvõ ajuhu hag̃ua ko’ã añetegua imba’eguasúva umi ary ñepyrũ che adolescencia-pe.
Cristo ñe’ẽ he’íta peẽme opa mba’e pejapova’erã.
He’i haguéicha Nefi pe versículo peteĩha pe 1 Nefi kuatiañe’ẽme, che avei “chereñói sy ha túva marangatúgui.” Akakuaa Nagano, Japón-pe, peteĩ óga oñemokyre’ỹ meméva pe tekoañete, jesareko ha umilda, ha ojesegi estricamente umi ymaguare jepokuaa. Che ru peteĩ kuimba’e irreligiosoitereíva. Ahecha chupe oñembo’évo Shinto ha Buda altar renondépe káda pyhareve ha káda pyhare. Ndaikuaáirõ jepe mávapepa térã mba’érepa oñembo’e hína, aguerovia oĩha peteĩ pu’aka ojehecha’ỹva térã Tupã “ipu’akapáta ñandesalva hag̃ua” térã ñanepytyvõ hag̃ua ñañembo’érõ añetete.
Umi ambue mitãrusúicha, ahasa heta jeiko’asy rupi. Hasy chéve apensávo ko tekove ndahekojojaiha ha orekoha heta ñepu´ã ha jeguejy. Añandu akañyha, ndarekóivo peteĩ sentido de dirección che rekovépe. Pe tekove ojogua mbykyetereiha opátagui amano vove. Pe tekove jaikuaa’ỹre pe Plan de Salavación chekonfundi.
Pokã uperire añepyrũ aestudia inglés escuela secundaria-pe, opavave umi alumno ore escuela-pe ohupyty peteĩ Nuevo Testamento ehemplar pyahu. Roñepyrũramorõ jepe roestudiávo inglés, ore mbo’ehára he’i oréve roestudiava’erã romoñe’ẽvo. Aipe´a ha ahecha upe oĩva ipype. Umi Nuevo Testamento ñe’ẽnguéra hasyeterei chéve g̃uarã. Umi ñe’ẽ japonés-pe hasýnte avei. Upevére, ohenói che atención peteĩ lista angagua marandu ha porandukuéra rehegua oñeinkluíva pe texto bíblico mboyve pe Gedeón Biblia-pe—umi porandu ñañeñandu ñaneaño, ñemoapañuái, ñambohovake tekovegua py’ara’ã rehegua etc. Káda punto upe lista-pe ojesegi peteĩ versículo ha Nuevo Testamento páhina referencia rehe. Cheinteresa especialmente peteĩ marandu: “Nekane’õiterei vove.” Pe referencia chegueraha Mateo 11:28–30-pe, Jesús he’ihápe Idiscipulokuérape:
“Peju cherendápe, opavave peẽ pemba’apo ha pegueraháva mba’e pohýi, ha che porombopytu’úta.
“Pegueraha pende ári che júgo, ha peikũmby chehegui; Che niko che korasõ mánso ha imirĩva: ha pejuhúta pytu’u pene ángape g̃uarã.
“Che yugo ningo ndahasýi ha ivevyi’asy che kárga”.
Kóva ha’ékuri peteĩha jave chemandu’áva amoñe’ẽhague Jesucristo ñe’ẽnguéra. Nantendepáirõ jepe umi ñe’ẽ he’iva’ekue, chemoangapyhy, omopu’ã che ánga ha ome’ẽ chéve ñeha’arõkuaa. Amoñe’ẽvérõ Iñe’ẽnguéra, añanduve amoĩva’erãha a prueba umi Iñe’ẽ pu’aka. Araka’eve nañeñanduiva’ekue añeñanduháicha upe árape. Añandu ajehayhuha. Añandu Jesucristo ha’eha peteĩ máva aikuaava’ekue.
Aestudia memévo, añandu Ha’e oñe’ẽramoguáicha chéve directamente he’ívo: “Ojehovasapyre umi Tupã rembipotánte oipotáva ojehu, ha’e ome’ẽtagui chupekuéra opa oikotevẽva.”
Iñe’ẽnguéra omyanyhẽ che korasõ, ndaikatuirõ jepe amohesakã porã upérõ che remiandukuéra. Jesucristo oikórõ jepe ojapo heta ary peteĩ yvy che ndaikuaáivape, apensa ikatuha ajerovia Iñe’ẽnguérare opa che korasõ reheve. Aha’arõkuri algún día ára oúvape ikatunga’u arresivive Jesucristo ñe’ẽnguéra.
Espíritu Santo ohechaukáta peẽme opa mba’e pejapova’erã.
Upe ára og̃uahẽ pokã ary rire. Aikuaa misionero-kuéra de tiempo completo idedikadoitereíva Jesucristo Tupao Santokuéra Ára Pahapeguáva. Ha pya’e aikuaa peteĩ Santokuéra Ára Pahapegua aty’imi iñamáble ha horýva oñeha’ãva hína osegi Jesucristo-pe. Che’are’imirõ jepe ajeroviapa hag̃ua hesekuéra, ahecha pe evanhélio restaurádope upe mba’e aipotaitéva aestudiárõ guare pe Nuevo Testamento—Jesucristo ñe’ẽnguéra ha pe ñeha’arõkuaa ha py’aguapy oúva umívagui.
Peteĩ tembiasa isagrádova ha’ékuri umi misionero chembo’erõ guare añembo’e hag̃ua. Añemoarandu ñahenoiva’erãha Tupãme héra rupi. Ñañembo’évo ñañe’ẽva’erã ñane korasõ reheve, jahechauka aguyje ha ñakomparti ñane esperanza ha potapykuéra. Ja’epa rire ja’eséva ñambopaha ñane ñembo’e ja’évo: “Jesucristo rérape. Amén.” Jajapo upéva Jesús omanda haguére ñandéve ñanembo’e hag̃ua Hérape. Añembo’e Túva Yvagaguápe chepytyvõ aikuaa hag̃ua mávapa Ha’e ha che relasiõ Hendive, che ha’eha Ita’ýra ajehayhúva chereñoiva’ekue espíritu ramo. Aikuaa Túva Yvagagua chekuaa ha cherayhúgui, Ha’e oñe’ẽtaha chéve en forma personal, ha ikatu hag̃uáicha antende Espíritu Santo rupive.
Oĩkuri peteĩ ára ndaikatuihápe añete ahechakuaa pe Espíritu Santo-pe. Antende vai, apensávo upe ajapova’erãnte ha’e asegi pe ñembo’e pasokuéra ha peteĩ mba’e dramático ojehutaha. Peteĩ ára peteĩ mbo’epy aja misionero-kuéra ndive, asẽ pe lección-gui apytu’u hag̃ua. Añekonfundi gueteri mba’épa ajapova’erã reheve pe Jesucristo evanhélio añeteguárõ.
Aha jey potávo pe kotýpe umi misionero oha’arõháme, ahendu petĩva ñe’ẽpu. Ahendu che réra. Aipe´a rangue pe okẽ, ahendu pe ñe’ẽpu pe okẽ kupépe. Añemondýikuri. Ha’ekuéra oñembo’énte hína Túva Yvagaguápe. Pe oñembo’éva hína ojerure’asy Tupãme tohendu che ñembo’e. Ijaponés ndaha’éirõ jepe fluido, ahendúvo iñembo’e sinséro omohu’ũ che korasõ. Añeporandu mba’érepa ojepy’apyete hikuái cherehe. Upéramo ahechakuaa iñembo’e cherehe ha’eha peteĩ pe Túva Yvagagua ha pe Salvador mborayhu cherehe ñemoha’anga. Upe mborayhu ome’ẽ chéve ñeha’arõkuaa, ha upéi ajerure Tupãme jerovia ha intención añete reheve. Ajapóvo upéicha, arekókuri peteĩ temiandu vy’apavẽ ha py’aguapy rehegua che ha’eha añetehápe peteĩ Tupã ra’y ha arekoha peteĩ potencial ha destíno divíno. Pe Plan de Salvación oike pypuku che korasõme.
Presidente Russell M. Nelson he´ikuri: “Pepensaháicha mávapa peẽ rehe oinflui …opa jeiporavo pejapótavape.” Upéva añetete chéve g̃uarã. Pe desisiõ asegitaha pe Salvador Jesucristo-pe añemongarai ha arresivívo pe Espíritu Santo don ohovasave che rekove aimo’ã’ỹháicha araka’eve. Jaikévo pe konvénio bautismal Tupã ndive, ñapromete ñaimeha dispuesto jajagarrávo ñande ári Jesucristo réra, ñañongatutaha Tupã rembiapoukapykuéra ha jaservitaha Chupe opa ñande rekove pukukue. Ñande Ru Yvagagua, ilado gotyo, avei opromete ñandéve tapiaite jaguerekotaha Ijespiritu ñanendive—pe Espíritu Santo gía meme.
Poinvita pejerovia hag̃ua Nefi mensáhe ñanembo’eva’ekuére—Cristo ñe’ẽnguéra ha pe Espíritu Santo ohechaukataha peẽme “opa mba’e pejapova’erã.” Opa mba’e! Kóva ha’e peteĩ Tupã don ijojaha’ỹva.
Hermano ha hermana-kuéra, cheaguyjevete ñande Ru Yvagagua plan de Salvacion rehe. Ñanderayhúgui ombosako’i pe tape jaha jey hag̃ua Hendápe Ita’ýra Unihénito, Jesucristo rupive. Jaikuaa ko plan ijojaha’ỹva ñanepytyvõta jaikuaa hag̃ua ñane identidad Tupã ra’y ha rajykuéraicha ha ñande destino oiko hag̃ua ñandehegui Ha’éicha. Cheaguyjevete ko añetegua imba’eguasúvare. Ame’ẽ peẽme che testimonio Jesucristo ñe’ẽnguéra ha Espíritu Santo ñandeguerahataha opa mba’e jajapova’erãme jahupyty hag̃ua pe tekove opave’ỹva. Aikuaa ko’ã mba’e añeteguaha. Jesucristo réra sagrádope, Amén.