Jajerovia Ñande Ru rehe

Tupã ojerovia ñanderehe jadesidi hag̃ua heta mba’e iñimportánteva ha, opa mba’épe, ojerure ñandéve jajerovia hag̃ua Hese. Kóva hasy ko’ýte ñande juicio, térã opinión pública, idiferente jave Ivoluntad-gui Ita’yrakuérape g̃uarã.

Oĩ he’íva ñadefini jeyva’erãha umi límite pe oĩporãva ha pe oĩvaíva apytépe he’ígui pe añetegua ha’eha relativo, pe realidad oñedefiniha ijehegui térã Tupã ipy’aporãiterei ha Chupe noimportái añetehápe mba’épa jajapo.

Ña’aprende aja jahechakuaa ha jaacepta Tupã añetegua, ideprovécho ñanemandu’a umi límite oĩva iporãva ha ivaíva apytépe ndaha’eiha ñande ñadefini hag̃ua. Tupã voi omoĩ ko’ã límite, oñemopyendáva umi añetegua eterno-pe ñande beneficio ha jehovasarã.

Pe deseo ñamoambue hag̃ua Tupã añetegua eterno, ymaite guive ojereko. Oñepyrũ ko mundo oexisti mboyve, Satanás opu’ãrõ guare Tupã plan kóntrape, ha’e egoístamente oheka ohundi yvypóra albedrío. Osegívo ko modelo, umi tapicha Sherem, Nehor ha Korihor-icha odiskutíva pe jerovia vyroreiha, pe revelación ndaha’eiha mba’eve ha oimeraẽ mba’e jajaposéva oĩ porãha. Ñembyasýpe, heta jey, ko’ã desviación Tupã añeteguágui ogueru tuicha ñembyasy.

Oĩramo jepe umi mbaʼe ikatúva odepende pe kontékstore, opa mba’e ndaha’éi upéicha. Presidente Russell M. Nelson mante ñanembo’e Tupã añetegua salvadora ha’e absoluta, independiente ha Tupãite voi odefiníva.

Mávarepa jaiporavo jajerovia ha’e peteĩ decisión iñimportánteva ñande rekovépe. Rréi Benjamín omoarandu itavaguakuérape, “Peguerovia Tupãme; peguerovia ha’eha … ; peguerovia ha’e oguerekoha opa arandu… ; peguerovia pe yvypóra ndaikatuiha oikũmby opa mba’e Ñandejára oikũmbykuaáva.”

Vy’arã, jaguereko umi escritura ha profeta oikovéva gía ñanepytyvõ ha ñantende hag̃ua pe Tupã añetegua rehegua. Oñeikotevẽramo ñemyesakã ohasáva pe jaguerekóva, Tupã ome’ẽ iprofetakuéra rupive. Ha Ha’e ombohováita ñane ñembo’e sincero Espíritu Santo rupive jahekávo ñantende umi añetegua nañamomba’eguasúiva gueteri.

Elder Neil L. Andersen ombo’e peteĩ jey nañañesorprendeiva’erãha “sapy’ánte [ñande] perspectiva personal noĩriramo iñepyrũrãme armonía completa-pe Ñandejára profeta mbo’epykuéra ndive. Ko’ãva ha’e momento ñañemoarandu,” he’i ha’e, “ñañemomirĩ ha ñañesũ ñañembo’évo. Jaguata tenonde gotyo jerovia reheve, jaikuaávo tiempo rehe jahupytyvéta tesakã espiritual ñande Ru Yvagaguágui.”

Opa ára, ja’aprovechakuaa ñanemandu’áramo Alma mbo’epýre Tupã ome’ẽha Iñe’ẽ según ñañatende ha ñañeha’ã hese. Ñañatendéramo Tupã ñe’ẽre, jahupytyvéta; ñamboykéramo ikonsehokuéra, sa’ive ha sa’ive jarresivíta ndajarekói peve. Ko mba’ekuaa ñehundi nde’iséi pe añetegua ojavyhague; upéva rangue, ohechauka japerdehague pe kapasida ñantende hag̃ua.

Capernaúm-pe, Salvador ombo’e Iñidentida ha imisión rehegua Heta ojuhu Iñe’ẽ hasy ohendu hag̃ua, ogueraháva chupekuéra ojere hag̃ua ha “[ndoguata]véima hikuái hendive.”

¿Mba’érepa oñemomombyry hikuái?

Ndogustáigui chupekuéra pe Haʼe heʼivaʼekue. Upévare, ojeroviávo ijuicio-re, oñemomombyry hikuái, onegávo ijupe umi jehovasa ohupytýtava haʼekuéra opytarire.

Ndahasýi ñande orgullo oñemoĩ hag̃ua ñande ha pe añetegua eterno mbytépe. Nañantendéi jave, ikatu japytu’u, jaheja ñane remiandu oñemohenda ha upéi jaiporavo mba’éichapa ñambohováita. Ha katu pe Salvador ojerurejey “ñama’ẽ hag̃ua [Hese] opa temiandúpe; ani jaduda, ani jakyhyje.” Jajesarekóramo Salvador rehe, ñande jerovia ikatu oñepyrũ osupera ñande preocupación.

Presidente Dieter F. Uchtdorf ñanemokyre’ỹ haguéicha: “pendepy’amokõi raẽ umi pendepy’amokõigui, pendepyamokõi mboyve pende jerovíagui”. Araka’eve ndajahejaiva’erã pe duda ñandejopy prisionero ramo ha ñandejoko pe mborayhu, py’aguapy ha don divino-gui oúva jerovia rupive Ñandejára Jesucristo-re.”

Umi discípulo oguata aja mombyry pe Salvador-gui upe árape, Ha’e upéi oporandu umi Doce-pe: “¿Peẽ piko pehóta avei?”.

Pedro ombohovái:

“Ñandejára, mávape piko rohóta? Nde reguereko ñe’ẽ tekove ijapyra’ỹva rehegua.

“Ha roguerovia ha roĩme seguro nde ha’eha upe Cristo, Tupã oikovéva Ra’y.”

Umi Apóstol oiko mismo mundo-pe ha ombohovái umi presión social peteĩchagua umi discípulo oguatáva mombyrýicha. Ha katu, ko momento-pe, oiporavo hikuái ijerovia ha ojerovia Tupãre, upéicha oñongatu umi jehovasa Tupã ome’ẽva umi opytávape.

Ikatu nde, cheichaite avei, sapy’ánte rejejuhu mokõive lado ko decisión-pe. Hasy jave ñandéve ñantende térã ña’añuávo Tupã rembipota, ñanembopy’aguapy ñanemandu’ávo Ha’e ñanderayhuha ñande ha’eháicha, taha’e ha’éva ñaimehápe. Ha Ha’e oguereko peteĩ mba’e iporãvéva ñandéve g̃uarã. Ñañembojáramo Hendápe, Ha’e ñanepytyvõta.

Ikatu ramo jepe hasy ñañemboja Hendápe, pe Salvador he’i haguéicha pe túvape ohekáva ñemonguera ita’ýrape g̃uarã “opa mba’e ikatu pe ojeroviávape g̃uarã” ñane momento de lucha-pe, ñande avei ikatu jasapukái: “Eipytyvõmi [che] jerovia’ỹ.”

Elder Neal A. Maxwell peteĩ jey omboʼe “Pe volunta sumisiõ haʼe pe peteĩete ñane mbaʼeteetéva ñamoĩva’erã Tupã altar-pe.” Ndareíri ningo rréi Benjamín oipotaitereivaʼekue oiko ipueblo-peguágui “peteĩ mitã michĩvaicha, iñeʼẽrendúva, ndaipochýiva, oñemomirĩva, ha ohaʼarõkuaáva, henyhẽva mborayhúgui, ha oñemoĩséva Ñandejára poguýpe opa mbaʼépe haʼe ohusgáva iporã omoĩ hiʼári, jepe mitã michĩ oñemoĩháicha itúva poguýpe.”

Jepiveguáicha, pe Salvador ohechauka ñandéve ejemplo perfecto. Peteĩ korasõ pohýi reheve, ha oikuaávo pe tembiapo hasýva Ha’e ojapova’erã, oñeme’ẽ Itúva rembipota poguýpe, okumplívo Imisión mesiánica ha oipe’ávo pe promesa eternidad rehegua peẽme ha chéve g̃uarã.

Pe elección ñamoĩ hag̃ua ñane volunta Tupã poguýpe ha’e peteĩ acto de fe oĩva ñande discipulado korasõme. Jajapóvo upe jeporavo, jadescubri ñande albedrio noñemomichĩriha; upéva rangue, oñembotuichave ha oñembojopói Espíritu Santo presencia rupive, oguerúva propósito, vy’a, py’aguapy ha esperanza ndaikatumo’ãiva jajuhu ambue hendápe.

Ojapo heta meses, peteĩ presidente de estáka ha che rovisita peteĩ hermana oĩva ijestákape ha imemby karia’y adulto soltero-pe. Heta áño rire imombyryhague Tupaógui, ojere tape hasy ha ndaha’éiva angirũ, ha’e ou jey. Rovisita aja, roporandu chupe mbaʼérepa ou jey.

Haʼe heʼi: “Ajapókuri sarambi che rekovégui,” “ha aikuaa moõpa tekotevẽ aime.”

Upémarõ aporandu chupe mbaʼépa oaprende ijeʼóipe.

Sapy’ami oñeʼemocionávo, okomparti o’aprendehague tekotevẽha oho are tupaópe omboyke hag̃ua pe jepokuaa ndoúi hag̃ua ha tekotevẽha opyta ha’e peve pe ha’e oĩsehápe. Ijeju jey hasyetereíkuri, ha katu oipuru aja jerovia Túva plan rehe, oñandu pe Espíritu ou jey.

Ha upéi heʼi: “Chejehegui voi aaprende Ñandejára imbaʼeporãha ha hapekuéra iporãveha che rapégui.”

Che ame’ẽ che testimonio Tupãgui, ñande Ru Eterno, ñanderayhúva; Ita’ýra Jesucristo rupive, ñandesalvava’ekue. Ha’ekuéra oikuaa umi ñande jehasa’asy ha ñande desafío. Ha’ekuéra araka’eve nañanderejamo’ãi ha oikuaa porãiterei mba’éichapa ñanepytyvõta. Ikatu javy’a jajeroviavévo Hesekuéra oimeraẽvagui térã opa mba’égui. Jesucristo réra sagrádope, Amén.