Nepotĩke

Arekópe cinco áño, añembosaraiva’ekue pelóta che angirũnguéra ndive tupao kupépe che tava’i Costa de Marfil-pe. Chemandu’a porãite pe pastor ohenóivo ikongregasiõme omopotĩ hag̃ua hikuái ijaokuéra oñembosako’ívo Salvador og̃uahẽvo g̃uarã. Chemitãvo, ajapyhy ko ñehenói he’ihaichaite. Añani ógape che retyma’imi ikatuháicha ha ajerure’asy che sýpe omopotĩ hag̃ua che ao mbovymi ikatu hag̃ua chepotĩ ha aime ñembosako’ípe Salvador jejurã upe ára ko’ẽme. Che sy ndoroviapáirõ jepe Salvador jejujey ag̃uiete, ojohéi chéve umi che ao iporãvéva.

Pyhareve ko’ẽme, amonde umi ao ne’írãva ikãporã ha kyre’ỹme aha’arõ Salvador ñeg̃uahẽ rehegua marandu. Ohasávo upe ára ha ndoikóivo mba’eve, adesidi aha hag̃ua pe aty oikohápe. Tuicha chekyre’ỹpoi ajuhúvo pe tupao nandiha ha Salvador nog̃uahẽihague. Ikatúne peimo’ã che remiandu aguatávo mbeguekatu ógape.

Heta ary rire, arresivívo lección misionero-kuéragui ajoaju hag̃ua Jesucristo Tupao Santokuéra Ára Pahapeguápe, amoñe’ẽ kóva: “Ha mbaʼeve ipotĩʼỹva ndaikatúi oike irréinope; upévare mbaʼeve ndoikéi ipytuʼúpe ndahaʼéiramo umi ijao ojoheivaʼekue che ruguýpe, ijerovia rupi, ha oñearrepenti rupi opa iñangaipágui, ha ijeroviareko ipahaite peve.”

Ñemyesakã oñeme’ẽva’ekue chéve upe árape, chepytyvõ aikũmby hag̃ua añetegua imba’eguasúva che apytu’ũ mitãite ndaikatuiva’ekue oikũmby heta ary upemboyve. Pe pastor mensáhe oñesentrákuri tekopotĩ espiritual imba’eguasuháre. Ha’e ojerure pe kongregasiõme oheka hag̃ua arrepentimiénto, omoambue hag̃ua hikuái hekove, ha ou hag̃ua Salvador-pe rredensiõ rekávo.

Ñande Ru Yvagagua oikũmby ñande je’ói yvy arigua ha ndaikatuiha ndajajapói angaipa ñande rekove aja. Cheaguyje pypuku Ha’e ome’ẽ haguére peteĩ Salvador oexpia hag̃ua ñane rembiapovaikuéra. Salvador sacrificio redentor rupive, peteĩteĩ ñande ikatu ñañearrepenti ha jaheka perdón ha ñanepotĩ. Arrepentimiénto, peteĩ evanhélio prinsípio ñepyrũmegua, tekotevẽ ñande jekakuaa espititual-pe g̃uarã ha jagueropu’aka hag̃ua jaytávo tekovepegua desafiokuérare.

Conferencia General Abril 2022 aja, Presidente Russell M. Nelson oinvita opa Tupao miembro-kuérape oñandu hag̃ua vy’a oúva ára ha aragua arrepentimiéntogui. Ha’e he’i:

“Aníkena pekyhyje ni pembotapykue pe arrepentimiénto. Satana ovy’a pene miseria-re. Peikytĩ pya’e. Peipe’a iñinfluénsia pende rekovégui! Peñepyrũ ko ára peñandu hag̃ua vy’apavẽ pemboykévo pe yvypóra natural. Pe Salvador ñanderayhu tapiaite ha katu ko’ýte ñañearrepenti jave. …

“Peñandúrõ pejeihague konveniokuéra rapégui mombyryete térã pukueterei ha ndapeguerekoiha mba’éicha pejevy jey hag̃ua, upéva na’añetéi”.

Oĩramo peteĩ mba’e napeñearrentipáivare, pomokyre’ỹ pehendu hag̃ua Presidente Nelson ñehenói ani hag̃ua pembotapykue pene arrepentimiénto. Ikatu oñeikotevẽ py’aguasu ojehasa hag̃ua ko proceso; upevére, aasegurakuaa peẽme pe vy’a oúva arrepentimiénto añetégui ohasaha entendimiénto. Arrepentimiénto rupive, ñane mba’epohýi oñembovevýi ha oñemyengovia peteĩ py’aguapy ha jepy’apy’ỹ andu reheve. Ñañearrepenti añetévo, ñañesantifika Salvador ruguy rupive, ombotuichavéva katupyry ñañandu hag̃ua Espíritu Santo impresiõ ha influénsia.

Che compañera eterna heñói peteĩ discapacida ohendu hag̃ua reheve ha upéva rupi oiporumanteva’erã audífono. Yvytimbo ha ty’ái ikatu ombyai ko’ã dispositivo, ha upéicha káda pyhareve ahecha chupe jesarekópe omopotĩvo umi tubo de conexión oiporu mboyve umi audífono. Ko tembiapo hasy’ỹva ha katu ojejapo memeva’erã oipe’a pe ky’a, tykue térã y ñembyaty, omehorávo ikatupyry ohendu hag̃ua ha oñe’ẽ hag̃ua ambuekuéra ndive. Ndojapóiramo ko mba’e ára ha ára, ikapasida ohendu hag̃ua ára pukukue ivaive; umi ñe’ẽ oje’éva ogue ohóvo ha ipahápe nohenduvéi. Upe iñaudífono ñemopotĩ ára ha aragua ohejaháicha chupe ohendu porã, ára ha aragua arrepentimiénto oheja avei ñandéve jahechakuaa Ñandejára mboguata Espíritu Santo rupive.

Ñandejára ministério paha mbotápe ha oho mboyve Jardín de Getsemaní-pe, Ha’e ombosako’i Hemimbo’ekuérape ombohovake hag̃ua umi jeipy’ara’ã oútava. Omoañete chupekuéra, he’ívo, “Pe Moangapyhyhára katu, ha’éva pe Espíritu Santo, Túva omboútava che rérape, ha’e penembo’éta opaite mba’e, ha penemomandu’áta opa mba’e, oimeraẽ mba’e ha’emava’ekue peẽme.”

Peteĩ pe Espíritu Santo rembiapo imba’eguasúva ha’e oñemoñe’ẽ, omboguata ha oisãmbyhy peteĩteĩ tapicha ohendúvape upe ñe’ẽpu mbeguemi pypegua. Peteĩ audífono tubo de comunicación ojebloqueáva ikatuháicha ndohejái omba’apo porã, umi ñande joaju espiritual ñande Ru Yvagagua ndive ikatu avei oñembyai, ñande rerahávo umi mbo’epy oĩvaíva ipeligrósovape térã nañahendúipe Iñemoñe’ẽ. Internet ñeguahẽ ombohasy’ỹve jajahupty hag̃ua informasiõ araka’evégui. Upéva ikatu ñandegueraha jajere hag̃ua múndo gotyo, ñesãmbyhy rekávo, jaheka rangue Tupãme. Presidente Russell M. Nelson ombo’e, “Umi ára oúvape, ndaikatumo’ãi jaikove espiritualmente Espíritu Santo influénsia omboguatáva, ombohapéva, omoangapyhýva ha oñemovã’ỹva ỹre.”

Cheaguyje peteĩteĩ ñanderehekuéra ikatuháre jahupyty pe Espíritu Santo don ára ñañekonfirma jave. Upevére, Presidente Dallin H. Oaks omomarandu “umi tovasapy oĩva ojehupyty hag̃uáicha Espíritu Santo don rupive oñekondisiona tekomarangatúre [ha] ‘Ñandejára Espíritu ndoikói témplo naimarangatúivape’ [Helamán 4:24].”

Jeikuaaporãme jaiporavóramo jasegi umi proféta ha apóstol gía, ñande katupyry okakuaa, jaguereko hag̃ua Espíritu Santo peteĩ irũ tapiagua ramo. Pe Espíritu Santo ome’ẽ ñemyesakã desisiõ jejapyhýpe, ogueru akãremiandu ha impresiõ oĩporãva ñande Ru Yvagagua rembipotándi. Jaguereko Espíritu Santo irũ tapiagua ramo tekotevẽte ñande jekakuaa espiritual-pe g̃uarã.

Nda’aréi añeasignahague apresidi hag̃ua peteĩ conferencia de estaca, Estaca Salt Lake Granger West, Utah-pe. Ko evénto aja, aikuaa peteĩ presidente de estaca jesarekópe omongakuaáva ikatupyry ohechakuaa hag̃ua umi Espíritu Santo impresiõ tekojojápe jeiko ha arrepentimiénto diario rupive. Ore ministrasiõ ñeha’ã párte ramo, ro’e rovisitataha mbohapy ogapy. Rojapopa rire ore visíta paha, rohechakuaa hembyha oréve haimete 30 minuto ore kompromíso uperiregua mboyve. Roho jeývo centro de estaca-pe, Presidente Chesnut orresivi peteĩ impresiõ rovisitave hag̃ua peteĩ famíliape. Mokõive rohecha oĩporãha rosegi ko impresiõ.

Roho rovisita familia Jones-pe, rojuhuhápe hermana Jones-pe oĩha tupápe mba’asy rupi. Hesakãporã ha’e oikotevẽva peteĩ sacerdocio jehovasa. Ipermíso reheve, roadministra chupe. Rosẽ mbotávo, Hermana jones oporandu mba’éicha roikuaára’e oikotevẽteha peteĩ jehovasa. Pe añetegua, ore ndoroikuáikuri. Upevére, ñande Ru Yvagagua, oikuaaporãva hemikotevẽ, oikuaákuri ha oinspira Presidente Chesnut-pe rovisita hag̃ua chupe. Ñande rreseptívoramo upe ñe’ẽpu vevuimi ha guapymíre, jaje’ekipa porãve ñaministra hag̃ua umi oikotevẽvape.

Che atestifika peteĩ Túva Yvagagua ipy’aporã ha oporohayhúvagui. Jesucristo ha’e yvypóra Salvador ha Redentor. Atestifika añeteha Jesucristo Expiasiõ ha ñañemoarandúvo jasegi hag̃ua Espíritu Santo gía, Ha’e ñande gueraháta ñañearrepenti ha jaiporu hag̃ua Salvador Expiasiõ pokatu ñande rekovépe. Presidente Russell M. Nelson ha’e Ñandejára proféta añetegua ha oikovéva, opa sacerdocio llavekuéra reheve ko árape yvy ári. Jesucristo rérape, amén.