“Che Ha’e Upéva”

Kóva ha’e ára pytu’uha, ha ñañembyaty ñañe’ẽ hag̃ua Cristo-gui ha Iñemongurusu rehe. Che aikuaa Ñandejára oikoveha.

Pemomba’emi upe esena Jesús rekove yvy ape ári semána pahápe guare. Hetaiterei tapicha oñembyatýkuri, ijapytepekuéra umi soldádo romano ogerekóva tukumbo ha ojejokuáva kysepuku rehe. Ojedirihívo umi sacerdote ruvicha oficial-kuéra rupi orekóva tataindy ipopekuéra, ko kompañía oho añetéva ndaha’éi ohóva okonkista hag̃ua peteĩ táva. Ko pyharépe oheka hikuái peteĩ kuimba’epénte, peteĩ kuimba’e ndojekuaáiva oguerahaha peteĩ árma, ohupytyha entrenamiento militar térã oikeha combate físico-pe oimeraẽ ára Hekove pukukue jave.

Umi soldádo oñembojávo, Jesús, oñeha’ãvo omo’ã Hemimbo’ekuérape, oñemotenonde ha he’i, “Mávapepa peheka?” Haʼekuéra ombohovái: “Jesús Nazaret-guápe.” Jesús he’i: “Che ha’e upéva. … Ha’e he’i riremínte … chupekuéra, Che ha’e upéva, oguevi hikuái ha ho’a yvýpe.”

Chéve g̃uarã, upéva ha’e peteĩva umi jehai ñanembopy’akryrỹivéva opa escritura apytépe. Ambue mba’e apytépe, he’i chéve hekoitépe upe oñeime haguénte Tupã Ra’y renondépe—upe Jehová tuichaitéva Antiguo Testamento pegua ha Ovecharerekua Porã Nuevo Testamento pegua, ndogueraháiva mba´evéichagua árma—pe ñe’ẽpu oñehendu haguénte upe Ñanemo’ãva Ára vaígui, pe Py’aguapy Prínsipe, iporãmaha umi hekoñemoĩva ovava hag̃ua oguevikuévo, ho’ávo sarambikuépe ojo´aripa, ha ojapóvo upe grúpo entéro oipotaitereive ra’e oñeasigna chupekuéra kosina rembiapo upe pyharépe.

Ára upe mboyvemi, oikerõ guare pu’akavépe upe távape, “opa pe táva oñembopy’akyrỹi”, he’i pe escritura, oporandúvo: “Mávapa kóva?” Añeimahinamínte “Mávapa kóva?” ha’eha upe ñeporandu umi soldádo iñapañuãiva ojapóva ijejupe ko’ág̃a!

Pe ñembohovái upe ñeporandu renondépe ndaikatúikuri ojehecha Ha’e ojekuaalájape, Isaías oprofetiságuikuri siete siglo rupi upe mboyve “ndojehechái hese iporãha ni iporãngue; ha jahecha vove chupe, ndaipóri iporãha ñama’ẽse hag̃ua hese.” Añetehápe ndaha’éikuri Ijaoñeñongatuha porãitépe, ni irrikésa personal tuichaitépe, Ha’e ndorekoiva´ekue ni peteĩva. Ndaikatúikuri ha’évo mba’eveichagua ñehekombo’e profesional rupi umi sinagoga upépe guarépe ndajarekóigui evidénsia Ha’e oñehekombo’e hague ni peteĩvape, ha katu Imitãrusúme jepe oiméne katatuete raka’e omoapañuãi umi escriba ha avogádo oñembosako’i porãiteva’ekuépe, opy’andýivo chupekuéra Idoctrina reheve “máva oguerekóvaicha autorida”.

Upe mbo’epy guive templo-pe Ijeike pu´aka peve Jerusalén-pe ha ijejegarra paha ha reietéva, Jesús oñemoĩ jepiveguáicha situasiõ ijetu´úvape, py’ỹi ikarẽvape Ha’e akóinte oñakarapu´ãvagui—umi victoria ndajarekóiva mba´éichapa ñamombe´úvo, ka katu ndaupéichai Iñ-ADN divino.

Upéicharõ jepe, tembiasakue rupive heta oĩ osimplifikáva, jepe omomba´e´íva umi ñaimo´ã Hese ha Itestimonio rehe mávapa Ha’e. Ha’ekuéra omboguejy Hekojoja puritanismo-gui reí, Ihustísia pochygui rei, Iporiahuvereko permisidad-gui rei. Aníke jaiko culpable umi versiõ Hese oñesimplifikaitereívagui convenientemente omboykéva umi mbo’epy ñanemoñanduporã’ỹva. Ko “ñemosimplifika” ha’ékuri añete Ivirtu odefini tuichavéva rehe jepe, Imborayhu.

Imisiõ aja yvy ape ári, Jesús ombo’e oĩha mokõi tembiapoukapy tuichavéva. Oñembo’ékuri ko conferencia-pe ha oñembo’éta gueteri tapiaite: “Ehayhuva´erã Ñandejára ne Tupãme [ha] ehayhuva´erã nde rapicha ndejupeicha.” Jasegítaramo Salvador-pe jeroviapýpe ko’ã mokõi regla tekotevẽpy ha ojoaju jehe’apávape, jajejagarra mbareteva’erã pe Ha’e añetehápe he’iva’ekuére. Ha pe Ha’e añetehápe he’iva’ekue ha’e, “Cherayhúramo, eñongatu che rembiapoukapykuéra.” Upe pyharépe voi, Ha’e he’i ñande “jajohayhuva’erãha ojupe; che pohayhu haguéicha.”

Escritura-kuérape, umi fráse ohechaukáva mba´eichapa Cristo mborayhu añete—sapy’ánte ojeheróva karida ramo—ha’e mba´e oñeikotevẽtereíva.

Mbaʼépa ohechauka umíva? Mbaʼéichapa Jesús ohayhu raka’e?

Peteĩháme, Ha’e ohayhu “opa [I]korasõ, hi’ánga, iñakãmegua ha imbarete reheve”, ome’ẽva Chupe katupyry omonguera hag̃ua mba’erasy pypukuvéva ha he’i hag̃ua añetegua ijetu’uvéva. Ñamombyky hag̃ua, Ha’e máva ikatúva oadministra pe grásia ha oha’ã hatã añeteguáre peteĩ tíempope jey voi. Lehi he´i haguéicha ijehovasapy rupive ita’ýra Jacob-pe, “Rredensiõ ou Mesías Imarangatúvare ha haʼe rupi; haʼe henyhẽ haguére grásia ha añetégui.” Imborayhu oheja peteĩ añuã mborayhu oñeikotevẽ jave ha peteĩ kópa iróva oñemboy’uva’erã jave. Upévare ñañeha’ã jahayhu—opa ñane korasõ, ánga, akãmegua ha mbarete reheve—péicha Ha’e ñanderayhúgui.

Pe mokõiha Jesús karida marangatu característica ha’e upe Iñe’ẽrendu opa ñe’ẽ osẽva Tupã jurúgui rehe,ombojoajúvo akóinte Hembipota ha heko Itúva Yvagagua mba´e rehe.

Oguahẽvo Hemisferio Occidental-pe Ijeikovejey rire, Cristo he’i nefita-kuérape: “Péina ápe, Che ha’e Jesucristo. Hayʼúkuri pe kópa iroitévagui Túva omeʼẽvaʼekue chéve, … ha upéva rupi añemoĩ Túva rembipotápe … iñepyrũmby guive.”

Umi hetaite manera ikatúvagui ha’e oñepresenta Ijupe, Jesús ojapo upéva odeclarávo Iñe’ẽrendu Túva rembipota rehe—araka’eve oimporta’ỹre nda’aréi upe mboyve Hi’ora oikotevẽ tuichave jave, ko Tupã Ra’y Unihénito oñeñandu hague Itúva ohejareieteha chupe. Cristo karida—ojehechaukáva tekojoja renyhẽ tembipota divína-pe—ohóva hese ha oho memétava gueteri, ndaha’éi umi ára ndahasýi ha ñañeñanduporã javénte ha katu avei umi iñypytũve ha ijetu’uve jave.

Jesús ha’ekuri “peteĩ kuimba’e ñembyasy”, umi escritúrape hé i. Ha´e ohasákuri ñembyasy, kane’õ, decepciõ ha teko año hasyetereíva. Ko’ã mba’épe ha opa ára, Jesús mborayhu ndojavýi ha Itúva mborayhu ndojavýi avei. Upéichagua mborayhu ityarõva reheve—pe ombohechapyrãva, omombaretéva, ha ome’ẽva—ñane mba’éva ndojavymo’ãi avei.

Upéicharõ, sapy’ánte peñeha’ãve jave, ha’etéva ijetu’uveha; peñeha’ã jave pemba’apo pene limitación ha deficiencia-kuérare, pejuhu máva térã peteĩ mba’e ojedesidíva odesafia pende jerovia; pemba’apo jave devosiõ rehe, peñandu gueteri umi jekyhyje ojejaho’iha pende ári, penemandu’áke upéicha ha’e hague heta tapicha ijeroviapy ha hechapyrãvape g̃uarã opa épokape. Penemandu’áke avei oĩha peteĩ mbarete ko universo-pe ojedesidíva oñemoĩ opa mba’e porã peñeha’ãva rehe pejapo.

Upévare, jeikoporã térã mboriahúpe, ñañemomorãvo en privado térã ñañeñe’ẽapívo en público, umi mba’e marangatu Restaurasiõ reheguápe térã umi yvypóra jejavy oikótava hendive, jaha tenonde gotýo Cristo Tupao Marangatu ndive. Mba’érepa? Ñane Redentor ndive oiko haguéicha rupi, ñañeanota jaike hag̃ua opa upe curso-pe—ndaha’éi opáva peteĩ cuestionario ñepyrũmente ha katu pe examen final peve. Iporãvéva ko’ã mba’épe ha’e pe Director ome’ẽ hague opavave ñandéve umi ñembohovái kuatiañe´ẽ oñemboty´ỹva rupi pe curso oñepyrũ mboyve. Avei, jaguereko hetaiterei tutor ñanemomandu’áva umi ñembohovái rehe umi parada regular-hápe tape pukukue. Ha katu, katuete, ni peteĩ ko’ã mba’e ndoikomo’ãi jafalta meme ramo klásepe.

“Mávapepa peheka?” Ñane korasõite guive ñambohovái, “Jesús Nazaret-guápe.” Ha’e he’ívo, “Che ha’e upéva,” jadobla ñane renymy’ã ha ñakonfesa ñane kũ rupiete ha’e Ha’eha pe Cristo oikovéva, Ha’e añoite oexpia hague ñande angaipa, Ha’e ñandegueraha hague ijyva ári ñaimo’ãrõ jepe ñandereja hague. Ñañembo’y vove Henondépe ha jahecha pe ojeikutu hague Ipo ha Ipýpe, ñañepyrũta ñaikũmby mba’épa he’ise ra´e Chupe g̃uarã ogueraha ñane angaipa ha oikuaa ñembyasy, iñe’ẽrendu opaite Itúva rembipotápe—opa ko’ã mba´e mborayhu potĩ rupi ñanderehe. Ñamoinguévo ambue tapichakuéra jerovia, arrepentimiento, ñemongarai, Espíritu Santo don-pe ha jahupyty ñande jehovasapy Ñandejára rógape—ko’ãva ha’e umi “prinsípio ha ordenansa” tekotevẽpy amo ipahápe ohechaukáva ñande mborayhu Tupã ha ñande rapicha rehe ha vy’apavẽme ocaracterisáva Cristo Tupao añetegua.

Hermano ha hermana-kuéra, atestifika Jesucristo Tupao Santokuéra Ára Pahapegua ha’eha pe vehículo Tupã ome’ẽva’ekue ñane exaltasiõrã. Pe evanhélio ombo’éva ha’e añete, ha pe sacerdocio omoañetéva chupe naimbojojahái. Atestifika Russell M. Nelson ha’eha peteĩ ñande Tupã proféta, umi ha’e mboyve guare ha’e haguéicha ha umi ha’e riregua ha’etaháicha. Ha peteĩ árape upe gía profétika ogueraháta peteĩ henerasiõ ohecha hag̃ua ñane Salvasiõ Mensahérope oguejýva ha’etévaicha “aratiri … kuarahyresẽgui gotyo,”ha jasapukáita, “Jesús Nazaret-gua.” Ijyva ojepysóva tapiaite ha mborayhu añete reheve, Ha’e ombohováita, “Che ha’e upéva.” Apromete upéicha Héra marangatu pu’aka ha autorida apostólico reheve, Jesucristo jepe, amén.