Jasegívo Cristo-pe

Pe jeguata peteĩha jasegívo Cristo-pe ha’e tañaneñe’ẽrendu pe Ha’e ohenoiva’ekuére “pe tuicha tembiapoukapy léire”:

“Ehayhúta Ñandejára nde Tupãme opa ne korasõ, opa ne ánga, ha opa ne apytu’ũ reheve.

“Kóva ha’e tembiapoukapy peteĩha ha tuichavéva.

“Ha pe mokõiha katu ojogua chupe: Ehayhu nde rapichápe ndejupéicha.

“Ko’ã mokõi tembiapoukapy ári oñemoĩ opa pe léi ha profetakuéra”.

Tupã rembiapoukapykuéra ome’ẽ pe mbarete ogia ha oporomova’ỹva ñande rekovépe. Ñane rembiasa ko tekove terrenal-pe ha’e pe mitã’i ha itúvaicha ombovevévo peteĩ pandorga peteĩ ára ijyvytúvape. Pe pandorga ojupívo yvateve, yvytu ojapo pe sã oĩva mitã’i pópe tojestira. Ndorekóivo experiencia umi yvytu mortal mbaretekue reheve, ha’e he’i toñeikytĩ pe sã ikatu hag̃uáicha pe pandorga ojupi yvateve. Itúva iñarandúva oakonseha ani hag̃ua, omohesakãvo ha’eha pe sã ojokóva pe pandorga hendápe umi yvytu atã renondépe. Japerdérõ pe sã jejagarra, pe pandorga ndojupimo’ãi yvateve. Ojegueraháta umi yvytu mortal rehe ha ikatu’ỹre ojejoko ho’áta yvýre.

Pe sã imba’eguasuetereíva orrepresenta ñane konveniokuéra ñanembojoajúva Tupã, ñande Ru Yvagagua, ha Ita’ýra Jesucristo ndive. Ñaonrrávo umi konvénio ñañongatúvo Hembiapoukapykuéra ha jasegívo Iplan Redensiõ rehegua, Ijehovasakuéra oprometeva’ekue ñandéve oheja tajajupi alturas celestiales-pe.

Mormón Kuatiañe’ẽ py’ỹi omomarandu Cristo ha’eha “pe múndo resape”. Ojehechauka aja nefita-kuérape, pe Ñandejára oikovejeýva omohesakã upe tekombo’e he’ívo: “Che amoĩ pe techaukarã peẽme” “Péina ape che ha’e pe tesape pehupiva’erã yvate—umi mba’e pehechava’ekue ajapo.” Ha’e ñane modelo jasegiva’erã. Jaikuaave umi mba’e Ha’e he’i ha ojapova’ekue jaestudiávo escritura-kuéra ha jasegívo umi tekombo’e profétiko, Presidente Russell M. Nelson ojerureháicha ñandéve tajajao. Santa Cena ordenánsape, káda Día de Reposo jajapo konvénio “ñanemandu’ataha tapiaite Hese ha ñañongatutaha Hembiapoukapykuéra”.

Mormón Kuatiañe’ẽme, Ñandejára ome’ẽ ñandéve umi fundamento pe Ha’e ohenóivape “Cristo doctrina”. Ko’ãva ha’e jerovia Ñandejára Jesucristo-re, arrepentimiento, bautismo, Espíritu Santo don jerresivi, ñeñeha’ãmbaite ipahaite peve, ha oikóvo ñandehegui peteĩ mitã michĩcha,he’iséva jajerovia Ñandejárare ha ñañemoĩ opa Ha’e ojeruréva ñandehegui guýpe.

Ñandejára rembiapoukapykuéra ha’e mokõi lája: umi opytáva tapiaite g̃uarã, Cristo doctrina-icha, ha umi opytáva sapy’a aja. Tembiapoukapykuéra sapy’arã ha’e umi oñeikotevẽva oñemyanyhẽ hag̃ua Ñandejára Tupao térã umi ijeroviarekóva remikotevẽ umi circunstancia sapy’aguápe, ha katu ojehejava’erã ijyképe umi temikotevẽ ohasa vove. Peteĩ tembiecharã umi tembiapoukapy sapy’arãgui ha’e sãmbyhy Ñandejára ome’ẽva’ekue umi Tupaogua liderkuéra ñepyrũguápe oguerova hag̃ua Santokuérape Nueva York, Ohio-gui, Missouri-pe, Illinois-pe ha ipahápe olidera hag̃ua umi pionero éxodo Ykytykuéra Oeste-guápe. Ha’érõ jepe sapy’arã, oĩ aja vihénte ko’ã tembiapoukapy oñeme’ẽ oñeñe’ẽrendu hag̃ua hesekuéra.

Oĩ tembiapoukapykuéra tapiaite g̃uarãva ogueraháva heta ára oñeñe’ẽrendupa hag̃ua hesekuéra. Techapyrã, Presidente Lorenzo Snow sermón ojeikuaaporãva pe diésmo léipe omoĩ énfasis peteĩ tembiapoukapýpe voi oñeme’ẽva’ekue ha katu noñeñongatúiva jepi Tupaogua miembrokuérare. Oikotevẽkuri oñemoĩ jey énfasis hese umi circunstancia pe Tupao ha imiembrokuéra ombohovakévape hína. Techapyrã ramogua oñemoĩ jey haguépe énfasis oñeikotevẽkuri umi circunstancia ko’ág̃agua rupi Santokuéra Ára Pahapegua térã Tupao ombohovakéva hína. Ko’ãvape oike pe proclamación para la familia ome’ẽva’ekue Presidente Gordon B. Hinckley ojapo peteĩ generasiõ, ha Presidente Russell M. Nelson ñehenói pyahu Tupao ojeikuaa hag̃ua héra rreveládore, Jesucristo Tupao Santokuéra Ára Pahapegua.

Oĩ ambue ñande Salvador rekombo’e oikotevẽvaicha toñemoĩ jey énfasis hese umi ñande aragua circunstancia rupi.

Kóva ha’e peteĩ ára heta ñe’ẽ atã ha ñe’ẽrasy rehegua ñane ñemongetápe opavave renondépe ha sapy’ánte ñane familia apytépe jepe. Umi joavy guasu umi asunto política pública reheguávape py’ỹi opa ñemyangekóipe—jeja’e’ỹme jepe—umi rrelasiõ públiko ha personal-pe. Ko jeja’eỹ reko sapy’ánte oparalisa jepeve pe katupyry ojejapo hag̃ua léi umi mba’e imba’eguasúvape hetave tavayguakuéra oikotevẽhápe tojejapo pya’e mba’e’apo opavave ñeimeporãrã.

Mba’épa ombo’e ha ojapova’erã umi Cristo segiha ko époka ñemongeta tóxiko reheguápe? Mba’épa umi Hekombo’e ha techapyrã?

Imba’eguasu pe peteĩha principio ombo’eva’ekue Jesús ojehechauka vove nefita-kuérape ha’eha ojehekýi hag̃ua ñorairõgui. Ombo’érõ jepe kóva peteĩ doctrina religioso joavy contexto-pe, umi motívo Ha’e ome’ẽva’ekue oje’aplika hesakãporã gueteri umi komunikasiõ ha rrelasiõ político, política pública ha familiagua rrelasiõme. Jesús ombo’e:

“Upe oguerekóva joavy rehegua espíritu ndaha’éi che mba’e, ha katu ha’e aña mba’e, ha’éva joavy túva, ha haʼe omokyreʼỹ pochýpe yvyporakuéra korasõ, oñorairõ hag̃ua peteĩva ambue ndive.

“Péina ápe, péva ndahaʼéi che doctrina, yvyporakuéra korasõ toñemokyreʼỹ pochýpe, peteĩva ambue rehe; ha katu kóva haʼe che doctrina, topa umi mbaʼe.”

Iministério rembyrépe nefita-kuéra apytépe, Jesús ombo’e ambue tembiapoukapykuéra ohóva ag̃uieterei pe Iñembotove joavy rehe. Jaikuaa Biblia rupi Ha’e ombo’emahague peteĩ teĩ ko’ãva Ituichaite Sermón del Monte-pe, oiporúvo jepi pe ñe’ẽreko oiporuva’ekue upéi nefita-kuéra ndive. Asitáta pe ñe’ẽreko ojeikuaaporãva Biblia-pe:

“Pehayhu penderayhu’ỹvape, pehovasa okaguaívape penderehe, pejapo iporãva umi penderayhu’ỹvare, peñembo’e umi ojapovaívare penderehe ha penemuñávare.”

Kóva ha’e peteĩ Cristo rembiapoukapy ojeikuaaporãvéva—irrevolusionariove ha hasyvéva ojesegi. Upevére, ha’e upe imba’eguasuvéva Iñinvitasiõme opavavépe ojesegi hag̃ua Chupe. Ombo’e haguéicha Presidente David O. McKay: “Ndaipóri ojehechauka porãveháicha mborayhu Tupãre ojehechaukágui mborayhu tapichakuérare oñeha’arõ’ỹre mba’eve.”

Ko’ápe oĩ ambue tekombo’e fundamental Pe ha’évagui ñane modelo jasegi hag̃ua: “Ojehovasapyre umi py’aguapy apoha, oñembohératagui chupekuéra Tupã ra’y”.

Py’aguapy apohakuéra! Mba’eichatépa oñemomabuéne umi rrelasiõ personal Cristo segihakuéra ojejokórõ ñe’ẽ atã ha ñe’ẽrasy jeiporúgui opa iñemongetápe.

Ary ohasava’ekue conferencia general-pe, Presidente Russell M. Nelson ome’ẽkuri ñandéve ko’ã desafío:

“Peteĩ jahechakuaa porãveháicha peteĩ Jesucristo segiha añetévape ha’e mba’éichapa upe tapicha otrata hapichakuérape. …

“… Umi Jesucristo discípulo añetéva ha’e py’aguapy’apoha.

“… Peteĩva umi ñamomba’eguasukuaaháicha pe Salvador-pe he’e toiko ñandehegui py’aguapy’apoha. …

Ombopahávo hekombo’ekuéra: “Ñorairõ ha’e peteĩ mba’e jaiporavóva. Py’aguapy jejapo ha’e peteĩ jeiporavo. Nde reguereko sãso reiporavo hag̃ua ñorairõ térã rrekonsiliasiõ. Poromokyre’ỹ peiporavoha’e hag̃ua py’aguapy apoha, ko’ág̃a ha tapiaite g̃uarã.”

Umi parte oime ojoavýva oñepyrũva’erã ohechakuaávo peteĩ yvy común opavave oĩháme de acuerdo.

Jasegi hag̃ua nane Modelo Perfecto ha Iprofétape, jajapova’erã upe ojeikuaáva jepi Regla de Oro ramo: “Opa mbaʼe peipotáva yvyporakuéra ojapo penderehe, jepe upéicha pejapo peẽ hesekuéra: haʼégui upéva léi ha profetakuéra”. Jahayhu ha jajapo porãva’erã opavavépe. Jajehekýiva’erã ñorairõgui ha ha’eva’erã py’aguapy apoha opa ñane ñemongetápe. Upéva nde’iséi ñakompromete umi ñane principio ha prioridakuéra, ha katu jajejoko je’atakágui ambuekuérape imba’ekuérare. Upéva ha’e pe ñane Modelo Perfecto ojapova’ekue Iministériope. Upéva ha’e pe techapyrã Ha’e ome’ẽva’ekue ñandéve ñaneinvitávo jasegi hag̃ua Chupe.

Ko conferencia-pe ojapo irundy ary, Presidente Nelson ome’ẽkuri ñandéve peteĩ desafio profétiko ko’ã ñande árape g̃uarã:

“Reimépa nde dispuesto rehejávo Tupã taipu’akapa nde rekovépe? Peimépa peẽ dispuesto pehejávo Tupã taha’e influencia imba’eguasuvéva pende rekovépe? Pehejátapa Iñe’ẽ, Hembiapoukapykuéra ha Ikonveniokuéra toinflui pejapóvape ára ha ára? Pehejátapa Iñe’ẽpu toreko priorida opa mba’e ári?”

Cristo segiha ramo, ñambo’e ha jatestifika Jesucristo-gui, ñane Modelo Perfecto. Upéicharamo, jasegi Chupe ñamboykévo joavy. Ja’aplikávo umi ñande norma ñandegustavéva umi mba’e’apo públikope, tañamerese Hovasakuéra jaiporúvo umi py’aguapy apoha ñe’ẽ ha lajakuéra. Jajejoko ñe’ẽ atã ha ñe’ẽvai jeiporúgui umi ñane rrelasiõ familiar ha personal-pe. Tañañeha’ã ñanemarangatu, ñande Salvador-cha, hérape atestifikáva ha ahenóiva Ijehovasa ñanepytyvõ hag̃ua ñande ha’e hag̃ua Santokuéra. Jesucristo rérape. Amén. Jesucristo rérape, amén.