Ñandejára Jesucristo Ou Jeýta

Che hermano ha hermana-kuéra pohayhuetéva, cheaguijevete Ñandejárape cherovasa haguére añe’ẽ hag̃ua peẽme.

Ko conferencia-pe, Ñandejára oñe’ẽ ñandéve Isiervokuéra rupive. Poromokyre’ỹ pestudia hag̃ua imensahekuéra. Peiporu umíva prueba de fuego ramo pehechakuaa hag̃ua mba’épa añetegua ha mba’épa nahániri ko’ã 6 mese oúvape.

Pe Salt Lake Templo preservasiõ ha ñembopyahu ha avei ambue Manzana del Templo área oiko meme hína ojapo cinco ary rupi. Umi proyección paha ohechauka ko tembiapo opataha 2026 paha rupi. Oreaguijeterei opavave umi omba’apóva ndive ko tuicha proyecto-pe.

Ko’ã sei mese paha rodedika térã rorrededika nueve templo-kuéra cinco tetãme. Ko’ág̃a guive ary paha peve rodedikavéta ambue cinco templo-kuéra.

Ko árape rovy’a roanunsiávo 17 templo ñemopu’ã plan. Ajerue’asy peẽme tapehendu reverencia reheve aanunsiávo moõpa.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, República Dominicana

• Puerto Montt, Chile

• Dublin, Irlanda

• Milan, Italia

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Che hermano ha hermana pohayhuetéva, pehechápa hína pe oikóva ñande resa renondépe? Añembo’e ani hag̃ua japerde ko momento techapyrãngue. Añetehápe Ñandejára ombopya’e hína Hembiapo.

Mba’érepa ñamopu’ã hína templo-kuéra peteĩ ritmo ijojaha’ỹvape? ¿Mba’érepa? Ñandejára oremoarandúgui rojapo hag̃ua upéicha. Umi templo jehovasa oipytyvõ oñembyaty hag̃ua Israel mokõive velo lado-pe. Ko’ã jehovasa oipytyvõ avei oñembosako’i hag̃ua peteĩ tavayguakuéra oipytyvõtava ombosako’ívo ko múndo Ñandejára Jeju Mokõiháme g̃uarã!

Oprofetisa haguéicha Isaías ha oñemomandu’aháicha Pe Handel Mesías-pe, Jesucristo ou jey vove “pe Ñandejára gloria ojehechaukáta ha opa to’o ohecháta oñondivepa.”

Upe árape “pe principado oĩta ijati’y ári: ha hérata Hechapyrãva, Oñemoñe’ẽva, Tupã Mbarete, Túva Ijapyra’ỹva, Py’aguapy Príncipe.”

Jesucristo oisãmbyhýta Jerusalén ymaguare guive ha avei pe Jerusalén pyahu “oñemopu’ãva continente Americano ári guive.” Ko’ã mokõi centro guive, Ha’e oisãmbyhýta Itupao asunto-kuéra.

Upe árape Ñandejára ojeikuaáta “Rey de Reyes, ha Señor de Señores” ramo. Umi Hendive oĩva “oñehenói ha ojeiporavóta ha ijeroviarekóta.”

Hermano ha hermana-kuéra, kóva ha’e ára peẽ ha che ñañembosako’i hag̃ua Ñandejára ha Salvador, Jesús upe Cristo, Jeju Mokõiháme g̃uarã. Ko’ág̃a ha’e momento jajapo hag̃ua ñande discipulado-gui ñande priorida tuichavéva. Mba’éichapa ikatu jajapo upéva peteĩ mundo henyhẽva umi distracción opomoakãnga’úvagui?

Pe tupãitũ meme templo-pe ñanepytyvõta. Ñandejára rógape, ñañesentra Jesucristo-re. Ñañemoarandu Chugui. Jajapo konveniokuéra jasegitaha Chupe. Jaju jaikuaa Chupe. Ñañongatúvo ñane konveniokuéra templo pegua, jahupytyve acceso Ñandejára pu’aka oporomombaretévape. Templo-pe jarresivi ñemo’ã umi mundogua jerovapetégui. Ñañandu heta rasa pe Jesucristo ha ñande Ru Yvagagua mborayhu potĩ! Ñañandu py’aguapy ha seguridad espiritual pe mundo sarambi rangue.

Kóva ha’e che promesa peẽme g̃uarã: Opavave oheka añetéva Jesucristo-pe ojuhúta Chupe templo-pe. Peñandúta Iporiahuvereko. Pejuhúta mbohovái umi pene porandu pendepy’apyvévape g̃uarã. Pentende porãvéta Iñevanhélio rehegua vy’apavẽ.

Añemoarandu pe porandu imba’eguasuvéva peteĩteĩ ñambohovaiva’erã ha’e kóva: Mávapepa ame’ẽta che rekove?

Che desisiõ asegívo Jesucristo-pe ha’e pe desisiõ imba’eguasuvéva ajapova’ekue araka’eve. Añehekombo’e jave medicina-pe, ahupyty peteĩ testimonio Tupã pe Túva ha Ita’ýra Jesucristo divinidágui. Upe guive ñande Salvador ha’e pe ita amopu’ãha ári che rekove. Upe desisiõ ojapo opa upe diferencia! Upe desisiõ ombohasy’ỹve heta ambue desisiõ. Upe desisiõ ome’ẽ chéve propósito ha dirección. Avei chepytyvõ agueropu’aka hag̃ua umi tekovegua aravai. Pehejami takomparti penendive mokõi techapyrã:

Peteĩha, che rembireko Dantzel omanorõguare oñeha’arõ’ỹre, ndaikatúikuri añekomunika ni peteĩ ore ta’yrakuéra ndive. Upépe aĩ che, che’año, py’aropúpe, ha ajerurévo pytyvõ sapukáipe. Vy’arã, Ijespíritu rupive, Ñandejára chembo’e mba’érepa che mborayhu Dantzel ojeguerahákuri ógape. Upe entendimiento reheve añemoangapyhy. Ára ohasávo, agueropu’aka porãve che ñembyasy. Tenondeve, amenda che rembireko ahayhuetéva, Wendy, ndive. Ha’e ha’ékuri peteĩ parte central che techapyrã mokõihápe.

Wendy ha che roĩ aja peteĩ asignasiõme peteĩ tetã mombyrýpe, umi mondaha orekóva armakuéra omoĩ peteĩ mboka che akãme ha ojopy pe gatillo. Ha katu pe mboka ndokapúiri. Upe experiencia rupive, mokõivéva ore rekove oĩkuri peligro-pe. Upevére, Wendy ha che roñandu peteĩ py’aguapy oñenegakuaa’ỹva. Ha’ékuri pe py’aguapy “ohasáva opa entendimiento.”

Hermano ha hermana-kuéra, Ñandejára avei penemoangapyhýta peẽme! Ha’e penemombaretéta. Ha’e penderovasáta py’aguapy reheve, jepe sarambi apytépe.

Pehendumína ko Jesucristo promesa peẽme g̃uarã: “Aiméta pende akatúa ha pende asúpe, ha che Espíritu oĩta pene korasõme, ha che anhelkuéra pende jerére, pendejoko hag̃ua”.

Ndaipóri límite Salvador pu’akápe g̃uarã penepytyvõ hag̃ua. Pe ijehasa’asy oñeimo’ãkuaa’ỹva Getsemaní ha pe Calvario-pe ha’e peẽme g̃uarã! Iñexpiasiõ ijapyra’ỹva ha’e peẽme g̃uarã!

Pomokyre’ỹ pededika hag̃ua tiempo peteĩteĩ semana, pende rekove rembyre pukukue, pembotuichave hag̃ua pene entendimiento Jesucristo Expiasiõgui. Che korasõ oñembyasy umi oĩvare angaipa kuápe ha ndoikuaáiva mba’éichapa osẽta. Cherasẽ umi oñorairõvare hína espiritualmente térã ogueraháva hína ha’eño umi mba’epohýi nontendéiguinte pe Jesucristo ojapova’ekue hesekuéra.

Jesucristo ojagarra Hi’ári pene angaipakuéra, pene ñembyasy, pende py’arasy ha pene mba’asykuéra. Ndaipóri mba’érepa peguerahava’erã pene’año! Ha’e peneperdonáta peñearrepentivove. Ha’e penderovasáta umi mba’e peikotevẽva reheve. Ha’e omongueráta pene ánga hasýva. Pejoajúvo Hendive Ijúgope, pende kárga oñeñandu vevuivéta. Pejapórõ ha peñongatúrõ konveniokuéra pesegitaha Jesucristo-pe, pehechakuaáta umi momento hasyetéva pende rekovépe sapy’arãnteha. Pende jehasa’asy “oñekonsumi Cristo vy’apavẽme.”

Ndaha’éi ni voi ni areterei oiko hag̃ua pendehegui peteĩ Jesucristo discípulo idevótova. Upérõ peñandu porãvéta Iñexpiasiõ rovasakuéra. Avei pejapo porãvéta peipytyvõvo Israel ñembyatýpe.

Che hermano ha hermana-kuéra pohayhuetéva, peteĩ ára oútavape, Jesucristo ou jeýta ko yvy ári pe Mesías milenario ramo. Upévare poinvita ko árape pededika jey hag̃ua pende rekove Jesucristo-pe. Poinvita peipytyvõ hag̃ua ñambyaty hag̃ua pe Israel isarambívape ha ñambosako’i hag̃ua ko mundo Ñandejára Jejujey Mokõiháme g̃uarã. Pohenói peñe’ẽ hag̃ua Cristo-gui, petestifika hag̃ua Cristo-gui, pejerovia hag̃ua Cristo-re ha pevy’a hag̃ua Cristo-pe!

Peju Cristo-pe ha “peikuave’ẽmbaite Chupe pene ánga”. Kóva ha’e pe secreto peteĩ tekove ovy’ávape g̃uarã!

Pe iporãvéva oupota hína, che hermano ha hermana-kuéra, pe Salvador oujeýtagui! Pe iporãvéva oupota hína Ñandejára ombopya’égui Hembiapo. Pe iporãvéva oupota hína ñambojerepavévo ñane korasõ ha ñande rekove Jesucristo-pe.

Ame’ẽ che solemne testimonio Jesucristo ha’eha pe Tupã Ra’y. Che ha’e Idiscípulo. Añeñandu honrado ha’e haguére Isiervo. Ijeju Mokõiháme, “pe Ñandejára gloria ojehechaukáta ha opa to’o ohecháta oñondivepa”. Upe ára henyhẽta vy’apavẽgui umi hekojojávape g̃uarã!

Umi sacerdocio llavekuéra sagrado pu’aka aguerekóva rupive, amomarandu koã añetegua peẽme ha opa múndope! Jesucristo rérape, amén.