Tupã ohayhu opa Ita’yrakuérape

Mba’épa ñande Ru Yvagagua oipota ñendehegui? Pentendépa peẽ peime aja pende rekove yvy arigua mboyvépe, Túva Yvagagua penembosako’ihague hína pende rekove yvy ariguápe g̃uarã? Oñe’ẽvo huventúpe, Presidente Russell M. Nelson ombo’e, “Ñande Ru Yvagagua oñongatuhague heta umi Ijespíritu hekojojavéva—ikatu … Ijekípo ikatupyryvéva—ko fáse pahápe g̃uarã”. Ñañeñongatu rupi ko’ã ára pahápe g̃uarã, imba’eguasu jaikuaa mba’éicha oiko hag̃ua ñandehegui Jesucristo discípulo.

Ñandejára Jesucristo ha’e pe Ovecha rerekua Mba’eporã, ha Ha’e oikuaa Ijovecha’aty, ha umi ovecha oikuaa Ijárape “ha’e ohenóigui ijovechakuéra héra rupi.” Ha’e akói ñanerenói, ha ñandeporu, Hembiguaikuéra ordinario, ñaipytyvõ hag̃ua jagueru Ita’ýra ha Itajyrakuérape Hendápe.

Peteĩ ára, peteĩ presidente de estaca ha che rovisitákuri Tupao miembro-kuéra peteĩ komunidápe. Rombopa rire umi ore visíta, presidente de estaca oporandu chéve ikatúpa roho rovisitave peteĩ família. Ha’e oñandu impresiõ roñe’ẽva’erãha hendivekuéra.

Rombota pe okẽ, ha peteĩ hermana oipe’a. Oma’ẽ cherehe, ha katu ndoikuaái mávapa che, upévare mba’eve chupe. Ahechauka che po presidente de estaca gotyo, omomaiteíva chupe héra rupi. Ohendu ha ohechamívonte chupe, ha’e ovy’aite. Oñembo’ývo upépe okẽme, oñoañua ha hasẽ hikuái oñondive. Kóva he’ípama mba’éichata ore visíta. Ore ndoroikuaái upe hermana orekohague quimioterapia upe ára mboyve. Ha’e ikangyeterei oñangareko hag̃ua imemby kuimba’e kakuaa rehe. Upéramo aipytyvõ presidente de estaca-pe romonde hag̃ua imemby kuimba’épe, ha romoĩ chupe isílla de rueda-pe. Romongaru chupe tembi’u peteĩ hemana roryete ore barrio-gua voive ogueruva’ekue reheve, ha roipytyvõ ambue mba’épe. Rosẽ mboyve hógagui, rohovasákuri chupekuéra.

Opa ohasáva che akã rupi ko visíta aja ha’ékuri peteĩ ñemoañete Jesucristo ohayhueteha chupekuéra. Ha’e ontende chupekuéra ha ha’ete voi oikuaa mba’easy isituasiõkuéra peteĩtégui. Haimete opa upe visíta oikókuri kirirĩháme. Ko ára norome’ẽikuri sermon tuicha térã norokompartíri ore escritura favorita, ha katu Ñandejára tuichaite orerovasa Ijespíritu reheve.

Peteĩ tuichave mba’érepa pende Ru Yvagagua penembou ko’ápe ko árape ha’e pehechakuaa hag̃ua pene potensial tuichakue. Embo’e Che Evanhélio ñanembo’e Cristo discípulo ramo, nañañekomparaiva’erã ojuehe. Pende katupyry espiritual peteĩete, ipersonal, ha heñói penendive, ha pende Ru Yvagagua penepytyvõse pemongakuaa hag̃ua umíva. Akói oĩta peteĩ tapicha ikatúvape peipytyvõ toñandu pende Ru Yvagagua mborayhu. Pende potesial idivíno. Imba’eguasúrõ jepe peñembosako’i pesẽporã hag̃ua ko múndo kompetitívope, peteĩ pene misiõ tuichavéva pende rekove pukukue aja ha’e oiko hag̃ua pendehegui Jesucristo discípulo ha pesegi hag̃ua pe Espíritu impresiõ. Kóva pejapóramo, Tupã ohovasáta pende rekove; Ha’e ohovasáta pene família ko’ag̃agua térã pene família oútava; ha Ha’e ohovasáta umi Ita’ýra ha Itajýra peẽ pejuhúva rekove.

Jaiko hína peteĩ ára oĩháme tuicha oportunida. Ñambohovakéramo jepe heta mba’e hasýva, aikuaa umíva oĩha upépe en párte ikatu hag̃ua ñaipytyvõ ambue tapicha toñandu ñande Ru Yvagagua mborayhu. Presidente Nelson ombo’e, “Ára oúvape, jahecháta umi tuichavéva Salvador pokatu jehechauka ko múndope araka’eve ojehechava’ekue.” Jaguereko priviléhio ñañangereko hag̃ua umi tekove oikotevẽvare peteĩ angirũ po, peteĩ añuã, peteĩ angapyhy andu, térã ñaiménte hag̃ua hendivekuéra kirirĩháme. Ikatúramo ñambovevúi imba’epohyikuéra, sapy’ami jepe, upérõ ikatúta jahecha umi tuicha jehechauka Salvador pokatu rehegua hekovepekuéra.

Jesucristo discípulo ramo, Santokuéra Ára Pahapegua ikatu ojapo peteĩ diferénsia positíva ko múndope. Ikatu ñame’ẽ peteĩ vy’a andu ojehecháva ñande rováre—peteĩ vy’a ñakompartíva ñe’ẽ mborayhu ha mba’eporã apo reheve. Taha’éke ñande vesíno porã, empleador porã, mba’apohára porã. Tañañeha’ãke ha’e hag̃ua cristiano porã opa ára.

Ñandejára omoĩjeyva’ekue Iñevanhélio ordenansakuéra tekotevẽva reheve Túva Yvagagua ra’yrakuéra oguereko hag̃ua opa promésa ñenembojoajúva Hese. Ñaipytyvõvo ñande hermano ha hermana-kuérape hi’ára ha aragua desafíope, ñanemandu’áke avei ñaipytytvõ hag̃ua chupekuéra tojapo ha toñongatu ko’ã promésa marangatu Itúva Yvagagua ndive ha upéicha Ha’e ikatu hag̃ua opromete chupekuéra umi jehovasapy hepyvéva ko tekovépe ha ára apyra’ỹme g̃uarã. Ko’ã promésa ikatu ojejapo Jesucristo evanhélio Restaurasiõ rupive añoite ha Isacerdocio llavekuéra.

Ambue ñe’ẽme, ikatu ñaipytyvõ ambue tapichápe opyta hag̃ua konvénio rapére. Oĩ ñande apytépe ñasẽva upe tapégui sapy’a py’a, ha upévare ñanemandu’ava’erã ñande Ru Yvagaguápe g̃uarã akói jaguerekoha posibilida jajujey hag̃ua. Ñande rape nda’éiramo jepe iperfectovéva, pe Salvador akói ñeneromandu’a, “[Ñañearrepenti] jave ha [jaheka] perdón, añetehápe, [ñañe]perdonáta”.

Peteĩ pe aña ñuhã ko árape ha’e ñanemopensa ha jaguerovia hag̃ua ndaporiha mba’éicha ñakambia hag̃ua térã ndajarekoveimaha esperánsa. Ko pensamiénto oporombyaíva rupi heta ñandekuéra nañaha’ãvéima. Ha ko árape umi ñane mborayhu, ñane ñe’ẽ ñemokyre’ỹ ha ñeipytyvõ rehegua, ñane tiempo, ha ñane pytyvõ ome’ẽkuaa peteĩ tapichápe esperánsa oikotevẽva oha’ã hag̃ua peteĩ jeyve.

Ikatu pepensa hína, “Iporã, ha máva cheministráta chéve?” Jaha ha jahovasávo ñande hermano ha hemana-kuéra rekove, ñambyatýta testimoniokuéra omyenyhẽtava ñande rekove jerovia reheve Ñandejára Jesucristo-re. Ko’ã testimónio ñanemombaretevéta ñañeha’ãjey hag̃ua peteĩ jeyve. Pe Espíritu Santo ñanemokyre’ỹta ha ñanepytyvõta testimónio ñembopyahu reheve jaha meme hag̃ua umi mba’e hasýva ha umi jepy’ara’ã ñane mba’éva reheve. Jaheka jave jahovasa hag̃ua ambue tapicha rekove, Ñandejára ñandeporiahuverekove jepe; Ha’e ñanemombarete ha ñanepytyvõ ñande rekovépe.

Penemandu’amíke Ñandejára Jesucristo ha’eha pende Salvador ha penentende personalmente. Ha’e oikuaa mba’épa he’ise oñekumpli hag̃ua peteĩ ñehenói ha mba’ekuéra ñembotapykue oñeipytyvõ hag̃ua Tupã ra’ykuérape. Ha’e oreko pokatu pende rovasa hag̃ua opaite mba’épe pejeroviáramo Hese ha ndapedudái.

Che hermano ha hermana-kuéra ahayhuetéva, upe ára peteĩ sacerdocio líder oñandúrõguare impresiõ rovisita hag̃ua peteĩ sy ha peteĩ memby ndoroguerekóiva ore ahéndape, che amomarandu Tupã oikuaaha oikotevẽhague hikuái orerehe. Ha ipahápe, chékuri pe oñeministrava’ekue avei. Upe ára, che ahupyty peteĩ mbo’epy tuichavéva Salvador mborayhu rehegua ñanderehe.

Atestifika Jesucristo ha’eha yvóra Salvahára, ha He’e oikoveha, Ha’e oikove ha omanohague penderehe ha cherehe, ha Ha’e oikovejeyhague penderehe ha cherehe ikatu hag̃ua ñaha’arõ aty yvagagua henyhẽva vy’águi umi oĩvama ndive ambue vélo gotyo. Che aikuaa Ha’e penentende porãmbaha peẽme ha chéve. Ha’e ontende peteĩteĩ ñande moménto hasýva, ha Ha’e oreko pokatu ñanepytyvõ hag̃ua umi ára ñandu jave ñanekangyveha. Che aikuaa Ñandejára Jesucristo ha ñande Ru Yvagagua ojehechaukahague José Smith-pe orrestaura hag̃ua evanhélio ko’ã árape. Che aikuaa ñande proféta jahayhuetéva, Presidente Russell M. Nelson, ha’eha Ñandejára proféta, ha atestifika ko’ã mba’ére Jesucristo rérape, amén.