Marangatu Ñandejárape g̃uarã Tekove Ára ha Árape

Ore Gong rogaygua ñembyaty ohasa ramoiteva’ekuépe oĩkuri peteĩ talento jehechauka ñembosarái porã, oikévape peteĩ concurso tuvakuéra pukarã rehegua.

Ha katu ko concurso ndaha’éi jepiveguáicha. Peteĩ atýpe oĩ Taita Guasu (che) ha mokõi nieto, 12 ha 11 ary oguerekóva. Ambue atýpe oĩ peteĩ inteligencia artificial (IA) programa omoñe’ẽva peteĩ primo, omombe’u hag̃ua tuvakuéra pukarã Gerrit W. Gong ojapoháicha. Taita Guasu Gerrit Gong oñemoĩ IA Gerrit Gong-re.

Umi nieto ha che raẽ roho.

Mba’éicha héra peteĩ dinosaurio ochokáva hi’áuto? Tirachokáurio Rex.

IA Gerrit Gong-pe oje’e—ejepy’amongeta Gerrit W. Gong-icha. Eñe’ẽmi ha’éicha.

IA Gerrit Gong—“Ko’ápe peteĩ túva pukarã he’irõg̃uáicha Gerrit W. Gong, oguerekóva ilája mborayhu, py’aporã, ha oporomomba’e guasúva: Mba’ére pe yvyra ipy’amirĩva ombopukavy tavayguakuérape? Hapo oĩre mborayhúpe ha oipyso hakã py’aporã rehe. Upe yvyráicha, ñande avei ikatu jajuhu mbarete ñande rapópe ha vy’a jaipysóvo py’aporã ambuépe.”

Néi, mba’épa peje? Upévare oje’e chupekuéra tuvakuéra pukarã.

Ñande jerére oĩ heta oportunida japuka, javy’a, jahecha hag̃ua aguyje resa reheve. Ñane evanhélio ha’e vy’a ha marangatu tekove ára ha árape. Marangatu reko omboyke mba’ekuéra marangaturã. Ha katu marangatu reko avei ñanerenói ñamoinge meme hag̃ua ñande rekove ára ha árape mba’e imarangatúva—javy’a hag̃ua ñande ára ha ára rembi’úpe, ko yvy ape ñana vai ha ñuatĩ apytépe. Jaguata hag̃ua Ñandejára ndive, ñañemomarangatuva’erã, Ha’e imarangatu rupi, ha, ñaneipytyvõ hag̃ua ñañemomarangatu, Ñandejára ñanerenói jaguata hag̃ua Hendive.

Peteĩteĩ ñande jareko peteĩ mombe’u. Hermana Gong ha che poikuaa jave—Tupao miembro ha irũnguéra heta tenda ha circunstancia-pe—pene mombe’u marangatu Ñandejárape g̃uarã tekove ára ha árape oremombarete. Pejapo siete C: comunión Tupã ndive, comunidad ha compasión ojojupe, compromiso ha convenio Tupã, rogaygua, ha irũnguéra ndive—centrado Jesús upe Cristo-pe.

Evidencia okakuaáva ohechauka ko mba’e hechapyrãva: tapichakuéra ogueroviáva religión-re jepive ovy’ave, hesãive, ha hekorenyhẽve umi ndoguerekóivagui compromiso térã joaju espiritual. Vy’a ha vy’a tekorenyhẽ, tesãi akã ha tete pegua, sentido ha jehupytyse, carácter ha virtud, joaju irũnguéra ndive, pirapire ha mba’erereko porã—opa oñemedívape, heko rrelihiósova oiko porãve.

Ha’ekuéra oguerekove tesãi tete ha akãmegua ha hekorenyhẽve opa edad ha aty demográfico-pe.

Umi investigador omboheróva “estabilidad estructural religiosa” ome’ẽ tesakã, jehupytyse, ha ñemopu’ã tekove ñemoambue pya’e apytépe. Jerovia ha Santo aty rogaygua oñorairõ ñemoha’eño ha ñembyaty ha’eñóvandi. Marangatu Ñandejárape g̃uarã he’i nahániri mba’e iky’ávape, nahániri ñeñe’ẽ vaípe ambue tapicha rehe, nahániri umi algoritmo-pe oñemúva ñeko’õi ha joavy. Marangatu Ñandejárape g̃uarã he’i héẽ mba’e imarangatúva ha reverente-pe, héẽ oiko hag̃ua ñandehegui isãsovéva, ovy’avéva, hi’añeteguavéva, teko iporãvéva jasegi jave Chupe jeroviápe.

Mba’épepa ojogua marangatu Ñandejárape g̃uarã tekove ára ha árape?

Marangatu Ñandejárape g̃uarã tekove ára ha árape ojogua mokõi adulto imitãva hekojojáva, omendava’ekue ojapo peteĩ ary, okompartívo añete ha mirĩ reheve evanhélio konveniokuéra, ñeme’ẽ, ha servicio hekove pyahúpe.

Ha’e oñepyrũ, “Colegio-pe, aimeva’ekue peteĩ tenda iñypytũvape. Añandu Tupã noĩriha chéve g̃uarã. Peteĩ pyhare, peteĩ mensáhe che angirũgui he’i, ‘Mba’eteko, araka’épa remoñe’ẽva Alma 36?’

“Añepyrũ ramo amoñe’ẽ”, ha’e he’i, “cherenyhẽ py’aguapy ha mborayhúgui. Añandu oñeme’ẽháicha chéve peteĩ añuã tuicha. Amoñe’ẽ jave Alma 36:12, aikuaa Túva Yvagagua cherecha ha oikuaaporãha mba’éichapa añeñandu”.

Ha’e he’ive, “Romenda mboyve, ha’eporã che menarãme ndaguerekoiha peteĩ testimonio mbarete diésmo rehegua. Mba’ére Tupã oikotevẽ ñame’ẽ pirapire ambuekuéra oguerekovévo heta ome’ẽ hag̃ua? Che menarã cheipytyvõ aikuaa hag̃ua ndaha’éiha pirapire rehegua ha katu jasegi hag̃ua peteĩ tembiapoukapy oñeme’ẽva’ekue ñandéve. Ha’e chemokyre’ỹ ahepyme’ẽ hag̃ua diésmo.

“Ahecha añete che testimonio okakuaa”, ha’e he’i. ”Sapy’ánte pirapire sa’i, ha katu rohecha heta jehovasapy ha oimeháicha pirapire ohupyty porã”.

Avei, “che enfermería clase-pe”, ha’e he’i, ”che añoite Tupaogua miembro ha avei che añoite amendáva. Heta jey asẽ clase-gui ñembyasy térã tasẽme añandu rupi che irũnguéra chemboyke ha oñe’ẽ vai che jerovia rehe, che gárment ñemondére, térã amenda haguére che mitã vove.”

Upevére he’ive: ”Ko semestre ohasávape añemoarandu mba’éichapa ikatu añe’ẽ porãve che jeroviágui ha ha’e peteĩ evanhélio techapyrã. Che arandu ha che testimonio okakuaa oñeha’ã rupi che katupyry apu’ã hag̃ua che año ha chembarete mba’e agueroviávape.”

Pe ména imitãva ombojoapy: “Che misiõ mboyve, aguerekókuri oferta aha’ã hag̃ua béisbol universidad-pe. Ajapóvo pe jeiporavo hasýva, aheja umi oferta ha aha aservi hag̃ua Ñandejárape. Namoambuéine umi mokõi ary mba’evére.

“Aju jey vove ógape”, ha’e he’i, ”aha’arõ peteĩ transición hasy ha katu ajuhu chejupe chembareteve, chepya’eve ha cheresãive. Amombo hatãve pe pelota asẽ vove guarégui. Aguereko hetave oferta aha’ã hag̃ua asẽ vove guarégui, oikévape pe universidad che aipotavéva. Ha, iñimportantevéva”, ha’e he’i, ”ajeroviave Ñandejárare araka’evégui”.

Ha’e omboty: “Misionero ramo, ambo’e Túva Yvagagua oñe’ẽme’ẽ ñandéve pu’aka ñane ñembo’épe, ha katu sapy’ánte che resarái upévagui chejupe g̃uarã.”

Ñande tesoro misional marangatu-Ñandejárape-g̃uarã ha’e hechapyrã ha henyhẽva. Circustancia pirapire, tiempo ha ambue rehegua jepive hasy. Ha katu misionero opaichagua eda ha tembiasa okonsagráramo marangatu Ñandejárape g̃uarã, umi mba’e ikatu oiko Ñandejára ára ha ha’e oipotaháicha.

Ko’ãga 48 ary perspectiva reheve, peteĩ misionero ika’arúmava okomparti: “Che ru oipota che aheka ñemoarandu universitario, ndoipotái aha misiõme. Uperiremínte, oguerekókuri peteĩ ataque cardíaco ha omano 47 ary oguerekóvo. Añanduva’ekue py’apohýi. Mba’éichapa ikatu amoĩporã opa mba’e che ru ndive?

“Upéi”, ha’e he’ive, ”adesidi rire aservi peteĩ misiõ, ahecha che rúpe peteĩ kerarechápe. Py’aguapy ha vy’ápe, ha’e ovy’a che aservítare”.

Ko misionero ika’arúmava he’ive: “Ombo’eháicha Doctrina ha Konveniokuéra 138, che arovia che ru ikatuha oservi misionero ramo mundo espiritual-pe. Aimo’ã che rúpe oipytyvõvo rojuhu hag̃ua ore bisabuelo-pe, osẽva’ekue Alemania-gui 17 áñope ha okañyva’ekue ore rogayguápe g̃uarã”.

Hembireko ombojoapy: “Cinco hermano che ména rogayguágui, umi irundy ohova’ekue misiõme ha’e oguerekóva ñemoarandu universitario”.

Marangatu Ñandejárape g̃uarã tekove ára ha árape ojogua peteĩ misionero retornado imitãvape oñemoarandúva oheja hag̃ua Tupã ipu’aka hekovépe. Upe mboyve, ojejerurévo chupe ohovasa hag̃ua tapicha hasývape, ko misionero he’i: “Che aguereko jerovia; ahovasáta chupe okuera hag̃ua. Ha katu,” he’i ko misionero retornado, “añemoarandu upe momento-pe añembo’e hag̃ua ndaha’éi pe che aipotávare, ha katu pe mba’e Ñandejára oikuaávare pe tapicha oikotevẽha. Ahovasa pe hermano-pe py’aguapy ha angapyhy reheve. Ha’e upéi omano py’aguapýpe”.

Marangatu Ñandejárape g̃uarã tekove ára ha árape oñeñandu peteĩ tatapirirícha ohasáva velo rupi ombojoaju, omoangapyhy, ha omombarete hag̃ua. Peteĩ administrador universidad guasúpe he’i oñanduha tapichakuéra oikuaáva terakuã añónte rupi oñembo’eha hese. Umi tapicha ome’ẽ hekove universidad-pe ha oñangareko meme imisiõ ha hemimbo’ekuérare.

Peteĩ kuña ojapo ikatumíva ára ha ára, iména ijeroviareko’ỹ rire hendive ha imembykuérandi. Che amomba’eguasuete chupe ha ambuekuéra ha’eichaguápe. Peteĩ ára odobla aja ao, ipo peteĩ gárment atýre, osuspira ijupe g̃uarã: “Marã gua’u ajapo kóva?” Ha’e ohendu peteĩ ñe’ẽ oikuaaukáva chupe: “Nde konveniokuéra ha’e chendive.”

50 ary jave, ambue hermana oipotaiterei peteĩ ñemoirũ itúva ndive. “Akakuaa jave”, he’i, “oĩkuri che ryke’ykuéra ha che ru, ha upéi che—tajýra añoite. Pe che aipotáva añoite ha’e ‘taĩ porã’ che rúpe g̃uarã.

“Upéi che sy omano! Ha’e ha’ékuri upe mba’e añoite chejoajúva che ru ndive.

“Peteĩ ára”, pe hermana he’i, ”ahendu peteĩ ñe’ẽ he’íva: ‘Einvita nde rúpe ha eraha chupe templo-pe nendive’. Upéva ha’ékuri peteĩ cita quincenal ñepyrũ che ru ndive Ñandejára rógape. Ha’e che rúpe che ahayhuha chupe. Ha’e he’i chéve che rayhuha avei.

“Tiempo jehasa Ñandejára rógape oremonguera. Che sy ndaikatúi oreipytyvõ ko yvýpe. Tekotevẽkuri ha’e oĩ velo mboypýri oipytyvõ hag̃ua toñemyatyrõ pe oñembyaiva’ekue. Pe templo omohu’ã ore je’ói tekorenyhẽ gotyo familia ijapyra’ỹvaicha”.

Pe túva he’i: “Pe templo dedicación ha’ékuri peteĩ experiencia espiritual tuichaitereíva chéve ha che rajy peteĩetépe g̃uarã. Ko’ág̃a roho oñondive ha ore mborayhu oñemombarete”.

Marangatu Ñandejárape g̃uarã tekove ára ha árape oike momento kyrỹi umi jahayhúva omano vove. Voive ko arýpe, che sy ahayhuetéva, Jean Gong, oho tekove oúvape sa’i ára omboty mboyve 98 ary.

Reporandúramo che sýpe: “Reipotápa helado rocky road, gengibre chocolate morotĩ, térã frutilla helado?” Che sy he’iva´ẽrã: “Héẽ, ikatu atantea opaite?” Mávapa ikatu he’i nahániri isýpe, especialmente ha’e ohayhúvo opaichagua tekove sabor?

Peteĩ jey aporandu che sýpe mba’e jeiporavokuérapa ome’ẽve forma hekovépe.

Ha’e he’i, “Añemongaraívo Jesucristo Tupao Santokuéra Ára Pahapeguápe ha avávo Hawaii-gui continente-pe, aikuaa haguépe nde ru”.

Oñemongarai rire 15 ary oguerekóvo, ha’e añoite hogaygua tuichápe oikéva Tupaópe, che sy oguereko konvénio jerovia ha ojerovia Ñandejárare ohovasáva hekove ha opavave ore rogaygua ñemoñare’atýpe. Ahechaga’u che sýpe, pehechaga’úicha tapicha pende rogayguápe. Ha katu che aikuaa che sy ndohoihague. Ha’e ndaipórinte ko’ápe ko’ãga. Amoherakuãporã chupe ha opavave omanóva marangatu Ñandejárape g̃uarã ára ha ára techapyrã py’aguasúicha.

Katuete, marangatu Ñandejárape g̃uarã tekove ára ha árape oike jaju py’ỹive Ñandejára rendápe Hóga marangatúpe. Kóva añete ñande ha’éramo jepe Tupao pegua miembro térã angirũ.

Mbohapy angirũ ou Bangkok Tailandia Templo casa abierta-pe.

“Kóva ha’e peteĩ tenda opomonguera guasúva”, he’i peteĩ.

Pe baptisterio-pe, ambuéva he’i: “Aimévo ápe, aipota ajejohéi ha anive araka’eve ajapo angaipa”.

Mbohapyha he’i: “Ikatúpa reñandu pe pu’aka espiritual?”

Cinco ñe’ẽ marangatu reheve, ñande templo-kuéra oporohenói ha omombe’u:

“Marangatu Ñandejárape g̃uarã.

“Ñandejára Róga“.

Marangatu Ñandejárape g̃uarã omomarangatu tekove ára ha ára. Ñanemoag̃uive ha ñanembovy’ave Ñandejárape ha ojupe ha ñanembosako’i jaiko hag̃ua Tupã ñande Ru, Jesucristo, ha umi jahayhúva ndive.

Che angirũ ojapoháicha, ikatu hína peñeporandu pende Ru Yvagagua pende rayhúpa. Pe mbohovái ha’e peteĩ héẽ ipuhatã ha añeteguáva! Ñañandukuaa Imborayhu jajapóvo marangatu Ñandejárape g̃uarã ñanemba’e ára ha ára, vy’a ha tapiaite g̃uarã. Tajajapo upéicha, añembo’e Jesucristo réra sagrado-pe . Amén.