Tapeg̃uahẽporãite Vy’apavẽ Tupaópe

Ñande Ru Yvagagua plan mborayhu rehegua rupi peteĩteĩ Ita’yrakuérare, ha ñande Salvador, Jesucristo, rekove redentor ha misiõ rupi, ñande ikatu—ha ha’eva’erã—tekove yvy arigua ovy’avéva! Jepeve umi tekovepegua yvytu atã ñanenupã peteĩ múndo py’ỹi oguyryrývape, ikatu ñañotỹ peteĩ vy’apavẽ andu okakuaáva ha hi’aréva ha tyepypegua py’aguapy ñane ñeha’arõ rupi Cristo-pe ha ñaikũmbýgui ñane renda tee plan vy’apavẽ rehegua porãitépe.

Ñandejára Apóstol orekóva hetave ary aservívo, Presidente Russell M. Nelson, oñe’ẽva’ekue vy’apavẽ oúvare peteĩ tekove Jesucristo-pe oñesentrávagui, haimete opa discurso ome’ẽva’ekuépe oiko guive chugui Tupao Presidente. Omombyky porãite kóicha: “Vy’apavẽ ou Chugui ha Ha’e rupi. … Santokuéra Ára Pahapeguápe g̃uarã, Jesucristo ha’e vy’apavẽ!”

Ñande ha’e Jesucristo Tupao miembro. Ñande ha’e vy’apavẽ tupao miembro! Ha ndaiporiva’erã moõve ñande vy’apavẽ tavayguakuéra ramo ojehechaveha pe ñañembyaty javégui opaite Pytu’uha Ára ñande reunión sacramental-pe ñatupãitũ hag̃ua opa vy’apavẽ gueruhápe! Ko’ápe ñañembyaty ñande barrio ha rama-gua familiakuéra ndive jaguerovy’a hag̃ua Ñandejára Santa Cena, ñane ñemosãso angaipa ha ñemanógui, ha Salvador grásia ipu’akapáva! Ko’ápe jaju ñañandu hag̃ua vy’apavẽ, ñemo’ã, perdón, aguyjeme’ẽ, ha pertenénsia ojejuhúva Jesucristo rupive!

Ha’épa ko espíritu vy’apavẽ oñondivepa Cristo-pe upe pejuhúva? Ha’épa péva upe peguerúva? Ikatu peimo’ã péva ndorekoiha mba’eve penendive, térã ikatu oime pejepokuaa mba’éichare akói ojejapóva. Ha katu opavave ñakontrivuikuaa, taha’eha’e ñande eda térã ñane llamamiénto, jajapo hag̃ua umi ñande reunión sacramental-gui pe aravo vy’águi henyhẽva, Cristo-pe oñesentráva, ha oporomog̃uahẽporãva, omýiva peteĩ vy’apegua rreverénsia espíritu reheve.

Vy’apegua rreverénsia? “Ha’épa upéva peteĩ mba’e?” peporandukuaa. Héẽ, añetehápe ha’e! Jahayhu, ñamomora, ha jarrespeta pypuku ñande Tupãme, ha ñande rreverénsia osẽva peteĩ ánga ovy’ávagui Cristo mborayhu eta, poriahuvereko ha salvasiõme! Ko vy’apegua rreverénsia Ñandejárape jepiveva’erã umi ñande reunión sacramental sagrado-pe.

Upevére, hetápe, rreverénsia kóvante he’ise: ñambohasa atã ñande jyva ñande py’áre, ñañakãity, ñamboty ñande resa ha ñaime ku’e’ỹme—akoiete g̃uarã! Péva ikatu oipytyvõ oñehekombo’e hag̃ua mitã michĩ isarakívape, ha katu jakakuaa ha ñañemoarandúvo, jahechami rreverénsia hetave mba’eha pévagui. Péicha ñaiméne Salvador oĩramo ñanendive? Nahániri, “[Ha’e] oĩháme henyhẽgui vy’apavẽ”!

Upeichaite, heta ñandekuérape ko ñemoambue servicio sacramental-pe oikotevẽta práctica.

Nañañembyatýi Día de reposo-pe jaju hag̃uánte reunión sacramental-pe ha ñamarka lísta. Jaju oñondivepa ñatupãitũ hag̃ua. Oĩ tuicha ñemoambue ko’ã mokõi apytépe. Jeju he’ise oñeimeha upépe. Ha katu ñetupãitũ he’ise jaipotágui ñamomorã ha ñatupãitũha ñande Tupãme ñanemoambue hag̃uáicha!

Ñañembyatýramo ñande Salvador-re momandu’ávo ha rredensiõ Ha’e ojapova’ekuére, ñande rova ohechaukava’erã ñande vy’a ha aguyje! Élder F. Enzio Busche omombe’u peteĩ tembiasakue ha’érõguare peteĩ presidente de rama, ha peteĩ mitã rusu atypegua omaña hese estrádope ha oporandu hatã, “Mba’e pe kuimba’e hova vaíva ojapo hína yvate?” Umi estrádope oguapýva—discursante, lider, coro—ha umi kongregasiõme oñembyatýva oñe’ẽ oñondive ko “ñemog̃uahẽporã vy’apavẽ tupaópe” rehe hovakuéra ohechaukáva rupive!

Japurahéi jave, jajoajúpa oñondive ñamomorã hag̃ua ñande Tupã ha ñande Rey-pe, taha’eha’e mba’éicha ipu ñane ñe’ẽ, térã ñañe’ẽmbeguénte térã ndajapuraheiriete voi? Escritura-kuérape ojehai “umi hekojojáva purahéi ha’eha [Tupãme] ñembo’e” Hi’ánga ombohorýva. Japurahéike! Ha ñamomorã Chupe!

Ñamoĩ ñane mensáhe ha testimoniokuéra mbyte Túva Yvagagua ha Jesucristo rehe ha umi yva oúva mirĩme javivi haguére Iñevanheliokuéra, yva “heʼẽvéva opa mbaʼe heʼẽvagui”. Upéi añetehápe “jaʼúta … jepe [ña]nerenyhẽ meve, upéicha na[ña]neñembyahýi, ni … yʼuheimoʼãi,” ha umi ñane mbaʼepohýi ivevýi pe Itaʼýra vyʼapavẽ rupi.

Ñande servicio mbyte glorióso ha’e pe Santa Cena jehovasa ha jerresivi ijehegui, pe mbujape ha pe y omoha’anga Ñandejára don expiatório ha ñaneñembyaty propósito tuichakue. Kóva ha’e “ára marangatu ñembopyahu espiritual” rehegua jatestifika jeývo ñamoĩseha Jesucristo réra ñandejehe, ñambopyahu jey hag̃ua konvénio akói ñanemandu’a hag̃ua Salvador rehe ha ñañongatu Hembiapoukapykuéra.

Oĩ ára tekovépe, jajuha Santa Cena-pe korasõ ñembyasy ha kárga ñandepy’apýva reheve. Ambue ára, jaju sãsóme ha umi jepy’apy ha mba’evai pohyi’ỹre. Jajapysaka porãramo pe y ha mbujape jehovasa rehe ha japartisipa ko’ã techauka marangatúgui, ikatu ñañandu jajepy’amongeta hag̃ua Salvador sacrificio rehe, Ijehasa’asy Getsemaní-pe, ha Iñembyasy kurursúpe, ha umi vy’a’ỹ ha mba’erasy Ha’e ogueropu’akava’ekuére ñanderehe. Upéva ombovevýita ñane ánga ñambojoajúvo ñande jehasa’asy Imba’éva rehe. Ambue ára, jahecharamóta aguyje rechapyrãme pe vy’apavẽ “porãite ha he’ẽtéva” Jesús don ijojaha’ỹva ojapova’ekue rehe ñande rekovépe ha ñane eternidápe! Javy’áta upe oútavare—ñane ñembyaty porãite ñande Ru jahayhuetéva ha ñande Salvador oikovejeýva ndive.

Ikatu jajepokuaára’e ñaimo’ã Santa Cena propósito ha’eha jaguapy apykápe ñapensántevo opaite jejavy upe semana jajapova’ekue rehe. Ha katu ñambojere ko jepokuaa. Kirirĩháme, ikatu jajepy’amongeta umi hetaite mba’ére jahecha haguépe Salvador-pe oho atãvo ñande rapykuéri upe semánape Imborayhu rechapyrã reheve! Ikatu jajepy’amongeta mba’épa he’isére “jajuhu vy’apavẽ ára ha aragua arrepentimiéntope”. Ñame’ẽkuaa aguyje umi ára Salvador oike haguére ñane ñeha’ã ha ñane ñesẽporãme ha umi ára ñañandúrõguare Igrásia, iperdón, ha ipokatu ome’ẽvo ñandéve mbarete jagueropu’aka hag̃ua ñane mba’erasy ha jagueraha hag̃ua ñane mba’epohyikuéra ñeha’arõkuaa ha pire porã reheve jepe.

Héẽ, jajepy’amongeta jehasa’asy ha inhustísia oñemoĩva’ekuére ñande Redentor ári ñane angaipa rehe, ha upéva ogueru jepy’amongeta guapy. Ha katu sapy’ánte japyta upépe—yvotytýpe, kurusúpe, ñeñotỹha ryepýpe. Jafalla jaha hag̃ua yvate gotyo pe ñeñotỹha vy’apavẽme, ñeha’arõ’ỹme ojepe’áva, ñemanóre jegueropu’aka ha Cristo ñesẽporã opaite mba’e áripe ikatúvakuri ndohejái jahupyty py’aguapy ha jahajey ñande róga yvagaguápe. Taha’e ñanerasẽ vy’a’ỹ térã aguyjégui Santa Cena aja, tañamomba’eguasu Túva marandu porãre, Ita’ýra don!

Ko’ág̃a, tuvakuéra orekóvape mitã michĩ térã i-necesidad especial-va, py’ỹi ndaipóri peteĩ kirirĩ ha jepy’amongeta moménto Santa Cena aja. Ha katu momento’imíme semana javeve, ikatu pembo’e ehémplo rupive, mborayhu, aguyjeme’ẽ, ha vy’apavẽ peẽ peñandúva Salvador rehe ha chugui, peñangareko memévo Ijovecha’ikuérare. Mba’eve ñeha’ã ko mba’e’apópe ndareíri. Tupã oikuaapaite pendehegui.

Upéicha avei ógape, ikatu ñañepyrũ ñamoporãve ñane esperánsa ha ñaneñeha’arõ ñande árare tupaópe. Familia konséhope, ñañe’ẽkuaa mba’éichapa peteĩteĩ tapicha tuicha ikatu okontrivui omog̃uahẽporãvo opavavépe vy’apavẽ tupaópe! Ikatu ñaplanea ha naha’arõ jareko hag̃ua peteĩ vy’apavẽ rehegua tembiasa tupaópe.

Umi barrio ha rama-gua konséhope ikatu ojehecha ha ojejapo peteĩ arandukuaa rreverénsia vy’a rehegua ñande Santa Cena aravópe g̃uarã, ojehechakuaávo umi paso hasy’ỹva ha umi techaukarã ojehecháva oipytyvõ hag̃ua.

Vy’apavẽ napeteĩcha ojehecha heta tapichápe g̃uarã. Oĩ tapicha, ikatúvape he’ise tuicha maitei pe okẽme. Ambuévape, ikatu he’ise kirirĩme oipytyvõ tapichakuéra oñeñandu porã hag̃ua opukavy ha oguapývo ijypypekuéra korasõ rory ha ojepe’áva reheve. Umi oñeñandúvape g̃uarã noñemoingéi térã oñemboykeha, ko ñemog̃uahẽporã kyre’ỹkue tekotevẽtereíta. Ipahápe, ñañeporandukuaa mba’éicha Salvador oipotáne taha’e ñande Santa Cena aravo. Mba’éichapa oipotáne Ha’e, peteĩteĩ Ita’yrakuéra oñemog̃uahẽ, oñeñangareko, oñemongakuaa ha ojehayhu? Mba’éicha oipotáne Ha’e ñañeñandu jaju vove ñañembopyahu hag̃ua ñanemandu’ávo ha ñatupãitũvo rupive Chupe?

Che jerovia rehegua je’ói ñepyrũme, vy’apavẽ Jesucristo-pe ha’ékuri che jejuhu ypy tuichavéva, ha omoambue che múndo. Ndapejuhúirõ gueteri ko vy’apavẽ, peñemoĩ peheka. Kóva peteĩ invitasiõ pemog̃uahẽ hag̃ua Salvador don py’aguapy, tesape ha vy’apavẽ rehegua—penderory hag̃ua heseve, pejepy’amongeta hag̃ua hese, ha pevy’a hag̃ua ipype káda Domingo.

Ammón Mormón Kuatiañe’ẽme ohechauka che korasõ remiandu he’írõguare:

“Koʼág̃a ndajaguerekóipa ñande mbaʼérepa javyʼa hag̃ua? Héẽ, che haʼe peẽme, ndaiporivaʼekue [tapichakuéra] oguerekóva tuichaite mbaʼérepa ovyʼa hag̃ua ñande jaguerekoháicha, yvóra ñepyrũmby guive; héẽ, ha che vyʼa henyhẽ, jepe añemombaʼeguasu peve che Tupãme; haʼe oguerekógui opa pokatu, opa arandu, ha opa ñeikũmby; haʼe oikuaapa opa mbaʼe, ha haʼe peteĩ Tekove iporiahuverekóva, jepe osalva peve, umi oñearrepentiséva ha ogueroviávape héra.

“Koʼág̃a kóva haʼéramo ñembotuicha, jepe péicha añembotuicháta; kóva haʼégui che rekove ha che resape, … che vyʼa, ha che aguyje tuichaite”.

Tapeg̃uahẽporãite vy’apavẽ tupaópe! Jesucristo rérape, amén.