Pe Kuimba’e Ojoajuva’ekue Jehová ndive

Peteĩ ára hesakã ha iporãva pyharevépe arapoty ñepyrũme 1820-pe, José Smith orekóva 14 ary oikékuri peteĩ yvyratýpe opytáva ag̃ui hogaygua rógagui oñembo’e hag̃ua iñangaipáre ha oporandu hag̃ua mba’e tupaórepa ojoaju va’erã. Iñembo’e sincero oñeikuave’ẽva jerovia ñemova’ỹ reheve ohupyty universo pu’aka tuichavéva jesareko, oikévape pe Túva ha Ta’ýra. Ha pe aña. Peteĩteĩ ko’ã oguerekokuri interés pypuku upe ñembo’e ha upe mitãrusúre.

Ko’ág̃a ñahenóivape Primera Visiõ omoñepyrũ opa mba’e Ñemoĩjey ko dispensación pahápe. Ha katu José-pe g̃uarã, upe experiencia ha’evakuri ijupe g̃uarã ha oñembosako’i hag̃ua. Opa ha’e oipontamínteva ha’e perdón ha ñeisãmbyhy. Ñandejára ome’ẽ chupe mokõivéva. Pe mbo’epy “ndojoajuivaʼerãha [mbaʼeveichagua tupaóre]“ ohechauka upe tape. Umi ñe’ẽ: “Oñeperdona ne angaipakuéra“ ha’e redentor.

Opa umi añetegua iporãva ñañemoarandukuaáva upe Primera Visiõgui, ikatu José ohechakuaavéva ha’e, “Ajuhúkuri Santiago testimónio añeteguaha—yvypóra naiñarandúiramo, ikatuha ojerure Tupãme, ha ohupytyta“.

Peteĩ erudito he’i haguéicha: “Primera Visiõ jehejapyre añete ko árape ha’e kuaapy Tupã naturaleza ome’ẽ hag̃ua umi ndoguerekóivape arandu. … Tupã ojechaukavakuri José Smith-pe yvyraty marangatúpe ha’e Tupã ombohováiva mitãrusume jehasa’asy árape“.

José experiencia yvyratype ome’ẽ chupe jerovia ojerure hag̃ua perdón ha ñeisãmbyhy hekove pukukue aja. Iñexperiencia ome’ẽ avei chéve jerovia ajerure hag̃ua perdón ha ñeisãmbyhy che rekove pukukue aja.

Setiembre 21, 1823-pe, José oñembo’e perdón-re ipy’a guive, oikuaávo ijehasa yvyratype mbohapy ary upe mboyve rupi, yvága ombohovai jeytaha. Ha upéicha oiko. Ñandejára ombou peteĩ ánhel, Moroni, ombo’e hag̃ua José-pe ha omombe’u hag̃ua chupe peteĩ jehaipyre ymaguarégui ha’e ombohasava’erãha upéi Tupã don ha pokatu rupi—Mormón Kuatiañeʼẽ.

Haimete 13 ary uperire, José ha Oliver Cowdery oñesũ oñembo’e mbarete hag̃ua kirirĩháme Kirtland Templo ojededika ramóvape. Ndajaikuaapái mba’épa he’íne iñembo’epekuéra, ha katuete iñembo’epekuéra oikene ra’e perdón jejerure, ha’ekuéra opu’ãvo, pe Salvador ojehechaukagui ha he’i: “Péina ápe, oñeperdona peẽme pene angaipakuéra“.

Umi mes ha ary ko jehasa rire, José ha Oliver ojapo jeýne angaipa. Ha ambue jey. Ha katu pe momento, upe momento jave iñembo’e ñembohovái ramo ha umi lláve jeguerujey glorioso og̃uahẽpotáva ñembosako’irã, Jesús ojapo chuguikuéra iñangaipa’ỹva.

José rekove arrepentimiento jepiveguágui ome’ẽ chéve jerovia “añemboja hag̃ua py’aguasu reheve grásia apykajegua renondépe, ahupyty hag̃ua poriahuvereko.“ Añemoarandúma Jesucristo añetehápe “oĩ katuete operdona hag̃uáicha.“ Ndaha’éi Imisiõ ni Inaturalesa toporokondena. Ha’e ou ñanesalva hag̃ua.

“Opamba’e jeguerujey“ ñe’ẽme’ẽngue pehẽ ramo Ñandejára, José Smith rupive, og̃uenohẽ Mormón Kuatiañe’ẽ ha ambue revelasiõ oguerekóva iñevanhélio plenitu. Añetegua vital oñeikotevẽvape oñemyesakã ha oñemoĩmba José jey jey ojerurévo tape jehechauka. Pejehesarekomi ko’ãva rehe:

1. Túva ha Ta’ýra oguereko hete ”ojepokokuaáva rehe yvypóraicha.”

2. Jesús omoĩ Ijehe ndaha’éi ñane angaipa añónte ha katu avei umi ñane mba’asy, jehasa’asy, ha tasy.

3. Iñexpiasiõ tuichaitereíkuri ojapóva Ha’e huguy opa ipirekua rupi.

4. Jajesalva grásia rupi ”jajapoparire ikatuha peve.”

5. Oĩ mba’e tekotevẽva ojejapo ojehupyty hag̃ua Cristo poriahuvereko.

6. Jaju jave Cristo-pe, ndaha’éi ñane angaipa añónte Ha’e oipe’átava, ha katu Ha’e omoambuéta avei ñane naturaleza, “ndajarekovéima hag̃ua aña jejapose.”

7. Cristo tapiaite omanda itavayguakuérape ojapo hag̃ua umi templo, Ha’e ojehechaukahápe chupekuéra ha oinvestihápe chupekuéra yvága pu’aka reheve.

Atestifika opa ko’ã mba’e ha’eha añete ha tekotevẽva. Umíva ha’e peteĩ pehẽnte umi mba’e henyhẽvagui Jesucristo rupi ojeguerujeyva’ekue José Smith rupive, oñembohováivo José-pe ojerure jeyjeyyva’ekuére ñeisãmbyhy.

1842-pe, José ohai mba’e techapyrãpa oikóta ko dispensación pahápe. Ha’e he’i upe ára jave “Sacerdocio yvaga pegua oñembyatýta yvy pegua ndive, ojapo hag̃ua umi jehupytyse tuicháva; ha péicha jajoajúvo peteĩ jehupytyse añómente, tojeipyso Tupã réino, Sacerdocio yvaga pegua ndaha’éi omañareívante“.

Iñangirũ Benjamin Johnson-pe, José he’i, “Benjamin, [amanorõ] ndaĩmo’ãi mombyry ndehegui, ha aime ramo vélo mboypýri, amba’apóta gueteri nendive, ha pu’aka okakuaáva reheve, ojeipyso hag̃ua Tupã rréino“.

Junio 27, 1844-pe, José Smith ha ityke’ýra Hyrum ojejuka. José rete oñeñotỹ, ha katu itestimónio ipu gueteri opa múndo jerére ha che ángape:

“Che ahecháguikuri peteĩ visiõ, che aikuaa upéva ha aikuaa Tupã oikuaaha; ha ndaikatúi anega“.

“Nda’éi peẽme araka’eve cheperfectoha; ha katu ndaipóri oĩvaíva umi rrevelasiõ ambo’eva’ekuépe”.

“Umi ñande rrelihiõ principios fundamentales ha’e Apóstol ha Profeta-kuéra testimonio, Jesucristo-gui, omanohague, oñeñotỹ ha oikovejeyhague mbohapyha ára rire, ha ojupihague yvágape; opa umi ambue mba’e ñande rrelihiõ rehegua oñembojoapýnte [ko añeteguáre].”

Oje’eva’ekue Juan el Bautista-re oje’ekuaa avei José Smith-re: “Oĩva’ekue peteĩ kuimba’e oñembouva’ekue Tupãre, herava’ekue [José]. … Ndaha’éi pe Tesape, ha katu oñembou otestifika hag̃ua pe Tesapégui”, ”opavave yvypóra oguerovia hag̃ua ha’e rupi.”

Che aguerovia. Aguerovia ha aikuaa Jesús ha’eha Cristo, Tupã oikovéva Ra’y. Che atestifika pe Tupã oikovéva ha’eha ñande Ru ñanderayhuetéva. Aikuaa kóva Ñandejára ñe’ẽpu he’i rupi chéve, ha upéicha avei isiérvo ñe’ẽpu, apóstol ha profeta-kuéra, oikévape ha oñepyrũvo José Smith reheve.

Atestifika José Smith ha’ehague ha ha’eha Tupã profeta, Ñandejára Jesucristo siervo ha testigo. Ha’e “ojehovasa oabri hag̃ua ko dispensación paha“, ha jajehovasa ha’e ojapo haguére.

Ñandejára omanda Oliver ha opavave ñandéve: “Eipytyvõ che rembiguái José, jeroviarekópe.“ Atestifika Ñandejára oipytyvõha Hembiguái José-pe ha pe Ñemoĩjey oúva haʼe rupi.

José Smith ko’ág̃a ha’e peteĩ sacerdocio yvaga pegua pehẽ upe ha’e oñe’ẽhaguégui. Ha’e oñe’ẽme’ẽ haguéicha iñangirũme, ndoĩri mombyry ñandehegui, ha vélo mboypýri, omba’apo gueteri ñanendive, ha pu’aka okakuaáva reheve, ojeipyso hag̃ua ko rréino. Vy’a ha aguyjeme’ẽ reheve, ahupi che ñe’ẽpu “amomorã hag̃ua pe kuimba’e ojoajuva’ekue Jehová ndive.” Ha opa mba’e ári, toñemomorã Jehová, ojoajuva’ekue pe kuimba’e ndive! Jesucristo rérape, amén.