Jesucristo doctrina ningo isensíllo

Opavave jareko umi familia pegua miembro jahayhúva oñetenta ha oñeipy’ara’ãva hína umi Satana mbarete meme rehe, pe oporohundíva, omboheko’asýne opavave Tupã ra’y ha rajykuérape. Heta ñande apytépe jareko umi pyhare ikatu´ỹháme jake. Ñañeha’ãkuri ñambojere umi tapicha oĩva rriésgope opa mbarete porãrã reheve. Jajerure’asy ñembo’épe hesekuéra. Jahayhu chupekuéra. Ñame’ẽ chupekuéra tembiecharã porãve ikatúva.

Alma, peteĩ proféta iñarandúva ymaguare, ombohovake upeichagua py’ara’ã. Umi tapicha ha’e oisãmbyhy ha ohayhúvape py’ỹi oĩ peteĩ enemigo ñarõ atakeguýpe, ha katu jepe upéicha oñeha’ã hikuái omongakuaa ta’ýra ha tajyrakuéra hekojojáva peteĩ múndo hekoky’ávape. Alma oñandukuri iñeha´arõmby peteĩmi ikatuha ipu´akapa ha’eha peteĩ mbarete sapy’ánte nañamomba’e´íva ha jaiporúva jepi sa’ieterei. Ha’e ojerure’asykuri Tupã ñepytyvõ.

Alma oikuaákuri, Tupã ikatu hag̃ua oipytyvõ, oñeikotevẽ arrepentimiento umi ha’e oisãmbyhývape, ha avei umi adversario-gui. Upévare, ha’e oiporavo peteĩ enfóke iñambuéva pe ñorairõgui.

Mormón Kuatiañe’ẽ odeskrivi kóicha: “Ha koʼág̃a, pe ñeʼẽ ñehekomboʼe oguereko haguére tuicha puʼaka ogueraha hag̃ua tavayguakuérape ojapo hag̃ua pe ijojáva—héẽ, … oikeve kysepukúgui iñapytuʼũnguérape, térã oimeraẽ mbaʼe ojehuvaʼekue chupekuéragui—upévare Alma ohechaporã omoĩ hikuái pyʼaraʼãme pe Tupã ñeʼẽ puʼaka.”

Pe Tupã ñe’ẽ ha’e pe doctrina Jesucristo ha Iprofetakuéra ombo’eva’ekue. Alma oikuaa pe doctrina ñe’ẽ oguerekoha tuicha pu’aka.

Pe sección 18 Doctrina ha Konveniokuéra peguápe, Ñandejára orrevela Idoctrina pyenda:

“Ha, péina ápe, che ajapouka opa yvypóra opárupi oikóvape, oñearrepenti hag̃ua. …

“Péina ápe, Ñandejára pene Rredentor ohasákuri ñemano hetépe; upévare, ohasa’asýkuri opa yvypóra mba’erasy rehe, ikatu hag̃ua opa yvypóra oñearrepenti ha ou hendápe.

“Ha haʼe oikovejey omanóva apytégui, ogueru hag̃ua ijupe opa yvypóra, oñearrepentíramo hikuái.”

“Ha peñesũ ha petupãitũta Túvape che rérape.

“… Peñearrepenti ha peñemongaraivaʼerã Jesucristo rérape.”

“Pejerure Túvape che rérape, jerovia reheve, pegueroviávo pehupytytaha, ha peguerekóta Espíritu Santo.”

“Ha koʼág̃a, peẽ … pehupyty rire kóva, peñongatuvaʼerã che rembiapoukapykuéra opa mbaʼépe.”

“Pemoĩ pende jehe Cristo réra, ha pemombeʼu pe añetegua akãguapýpe.

“Ha mayma oñearrepenti ha oñemongaraíva che rérape, haʼéva Jesucristo, ha ogueropuʼakáva ipahaite peve, umíva ojesalváta.”

Umi versículo sa´imíme, pe Salvador ome’ẽ ñandéve ehémplo perfecto mba’éichapa ñambo’eva’erã Idoctrina. Ko doctrina ha’e pe jerovia Ñandejára Jesucristo-re, arrepentimiento, ñemongarai, Espíritu Santo don jerresivi, ha ñeñeha’ãmbaite ipahaite peve ohovasaha opavave Tupã ra’y ha rajykuérape.

Ñambo’évo ko’ã principio umi jahayhúvape, Espíritu Santo ñanepytyvõta jaikuaa hag̃ua pe añetegua. Ñaikotevẽgui umi Espíritu Santo ñe’ẽmbegue, jajehekýiva’erã especulación térã interpretación personal-gui ohasáva pe doctrina añetegua mbo’epy.

Upéva ikatu hasy rehayhúvo pe mávape reñeha’ãva hína reinflui. Ikatu ha’e oignora pe doctrina oñembo’eva’ekue. Ñanetenta ñaha’ã umi mba’e pyahu térã isensacional-va. Ha katu pe Espíritu Santo orreveláta pe añetegua espíritu ñane’akãguapýrõ añónte ha ñañangareko ani jaha pe doctrina añeteguáva mboypýri. Peteĩ iseguroveháicha ani hag̃ua ñañemboja umi doctrina añetegua’ỹvare ha’e ñambo’e sencillez reheve. Upéva rupi ñagana seguridad, ha sa’i ojeperde.

Pe mbo´epy opermitínte ñandéve ñakomparti pe salvasiõ doctrina ñepyrũmby guive, mitãnguéra oĩ aja inmúne umi tentasiõ ñanembotavývape ag̃ave ha’ekuéra ombohovakétava, voive umi añetegua tekotevẽva oikuaa hikuái tojahoga umi redes sociales, irũnguéra ha iñorairõ personal ryapu rehe. Jajagarrava’erã opa oportunida oĩva ñakomparti hag̃ua Jesucristo mbo´epy mitãnguéra ndive. Umi momento oñehekombo´e jave hepyeterei ha sa´ive oñembojoja umi ñeha’ã meme ojapóvagui umi oporohapejoko mbaretéva. Opa aravo ojehasava rehe oñeinculka hag̃ua doctrina peteĩ mitã rekovépe, oĩ ojeipapakuaapa´ỹva aravo porohapejokóva henyhẽva umi mensáhe ha ta’angágui opu´ã térã omboykéva umi añetegua porosalváva.

Oĩmeva´erã pende apytépe oñeporandúva naiporãveichénepa peñemoag̃ui pende raʼykuérare diversiõ rupive, térã peñeporandúva pe mitã oñepyrũnépa oñeñandu ipohyietereiha umi mbaʼe pemboʼéva. Upéva rangue, pekonsiderava’erã, “Sa´ieterei tiempo ha sa´i oportunida reheve, mba’e doctrina ñe’ẽpa ikatu akompartimi omombaretétava chupekuéra umi jerovia desafío oútava katuete renondépe?” Umi ñe’ẽ pekompartíva ko árape ikatu ha’e umi oguerahátava hendivekuéra, ha ko ára ohasáta pya’eterei.

Akóinte amomba’eguasu che bisabuela Mary Bommeli devosiõ okompartíi haguére Jesucristo doctrina. Suiza-pe misionero-kuéra ombo’e ifamília-pe ha’e orekórõ 24 áño.

Oñemongarai rire, Mary ojoajuse umi Santo ndive América-pe, upéicha ha’e oje’ói Suiza-gui Berlín-pe ha ojuhu omba’apo hag̃ua peteĩ kuña ndive okontratáva chupe ojapo hag̃ua poyvi familia-kuéra aorã. Mary oiko peteĩ tembiguái kotýpe ha omoĩ ijaovyta óga sála-pe.

Upérõ, oñembo’e pe Jesucristo Tupao Santokuéra Ára Pahapegua doctrina ndaha’éiva´ekue legal Berlín-pe. Ha katu Mary ohechakuaa ndaikatuiha ojejoko okomparti umi mba’e oaprendeva’ekue. Umi kuña ogapegua ha iñangirũnguéra ijaty pe aovyta jerére ohendu hag̃ua Mary-pe ombo’évo. Ha’e oñe’ẽkuri Túva Yvavagua ha Jesucristo jehechauka rehe José Smith-pe, anhelkuéra visita ha Mormón Kuatiañe’ẽ rehe. Imandu’ávo Alma ñemombe’úre, ha’e ombo’e pe jeikovejey doctrina rehegua. Ha’e otestifika familia-kuéra ikatuha ojoaju jey pe Reino Celestial-pe.

Pe kyre’ỹ orekóva Mary okomparti hag̃ua pe evanhélio restaurádo doctrina pya’e ogueru provléma. Ndohasa´aréi, policía ojagarra ogueraha Mary-pe ka´irãime. Tapére, ha’e oporandu pe policía-pe mba’éichapa pe juez réra oñembo’yva’erãha renondépe pe ára oúvape. Avei oporandu ifamilia rehe ha ha’épa peteĩ túva ha ména porã. Pe policía omombe´u pe juez-pe ha´eha peteĩ kuimba’e mundáno ramo.

Ka’irãime, Mary ojerure peteĩ kuatia ha peteĩ jehaiha. Ohasa pe pyhare ohaívo peteĩ kuatiañe’ẽ juez-pe, ome’ẽvo itestimonio Jesucristo jeikovejeýgui oñemohesakãháicha Mormón Kuatiañe’ẽme, oñemongetávo pe mundo de los espíritus rehe ha omohesakãvo pe arrepentimiento. Osuheri pe Juez oikotevẽtaha tiempo ojepy’amongeta hag̃ua hekove rehe ombohovake mboyve pe juicio paha. Ha’e ohai oikuaaha ha’e oguerekoha heta mba’e oñearrepentiva’erãgui, heta umíva omoñembyasy tuichaiterítava ifamilia ha oguerúta chupe tuicha py’arasy. Pyhareve, omohu’ãvo ikuatiañe’ẽ, ome’ẽ pe policía-pe ha ojerure chupe omoguahẽ hagua juez-pe, ha upéva he´i ojapotaha.

Uperireve, pe juez osita pe policía idespácho-pe. Pe kuatiañe’ẽ Mary ohaíva’ekue ha’ékuri peteĩ evidencia irrefutable ha’e ombo’e hague hína pe evanhélio restaurádo doctrina, ha ojapóvo upéva ojapyhara hína pe léi. Upevére, nda’aréi uperire, pe policía oho jey Mary celda-pe. Ha’e he’i chupe opaite umi kárgo opytareimaha, ha ha’e oĩmaha sãsóme oho hag̃ua. Umi rekombo’epy Jesucristo evanhélio restaurádo rehegua ogueraha oñemoĩ chupe ka’irãime. Ha odeklara haguére pe doctrina arrepentimiento rehegua pe juez-pe onohẽ chupe ka’irãigui.

Mary Bommeli mbo´epy ndopái ojepoima haguére chugui. Umi iñe’ẽ registro ombohasa pe doctrina añetéva generasiõ nonaséiva gueteri rupive. Ijerovia peteĩ konverso pyahu jepe ikatuha ombo’e Jesucristo doctrina oasegura iñemoñarekuéra oñemombaretetaha iñorairõkuéra teépe.

Jajapo aja opa jaikatumíva ñambo’e hag̃ua pe Jesucristo doctrina umi jahayhúvape, ikatune gueteri oĩ nombohováiva. Ikatu oike pene akãme umi dúda. Ikatu peñeporandu peikuaa porãpa pe Salvador doctrina pembo’e porã hag̃uáicha. Ha peñeha’ãma ramo pembo’e, ikatu peñeporandu mba’érepa umi efecto positivo ndojehechavéi. Ani peñeme’ẽ umi dúda-pe. Tapeho Tupã rendápe ñepytyvõ rekávo.

“Héẽ, ha ejerureʼasy Tupãme opa mbaʼe reikotevẽvare; … eheja ne korasõ mborayhukuéra toĩ Ñandejára ndive tapiaite peve.”

“Ha koʼág̃a che aipota peñemomirĩ, ha peneñeʼẽrendu, ha penemarangatu; ndahasýivo pejehekomboʼe hag̃ua; penerenyhẽvo ñehaʼarõkuaa ha pyʼaporãgui; peneakãguapývo opa mbaʼépe; pejesarekóvo peneñeʼẽrendu hag̃ua Tupã rembiapoukapykuérare opa ára; pejerurévo opa mbaʼe peikotevẽvare, espíritu ha yvy ári reheguávape; pemeʼẽvo aguyje tapiaite Tupãme opa mbaʼe oñemeʼẽvare peẽme.”

Peñembo’e ramo, peñe’ẽ ramo Tupã ndive, ha pejerure’asy ramo Iñepytyvõre umi pehayhúvape g̃uarã, ha peaguyjeme’ẽ ramo ndaha’éi pe ñepytyvõre añónte ha katu pe pasiencia ha tekomarangatu rehe oúva ndajarresivipái rupi pya’eterei umi jaipotáva térã ndajahupytýi araka’eve, upérõ apromete peẽme peñemo’ag̃uivetaha Hese. Oikóta pendehegui diligente ha longánimo. Ha upérõ peikuaáta pejapo hague opa ikatumíva peipytyvõ hag̃ua umi pehayhúvape ha umi ojerure’asýva onavega hag̃ua umi Satana ñeha’ã mbytépe odesvia hag̃ua chupekuéra.

“Opavave orekóva esperánsa Jehová rehe imbarete pyahu jeýta; ovevéta hikuái ipeporamoguáicha peteĩ taguatóicha; ha’ekuéra odiparáta ha naikaneʼõmoʼãi; oguatáta ha naikangymoʼãi.”

Ikatu ojejuhu ñeha´arõmby umi familia ñemombe´upy rupi escritura-kuérape. Ñamoñe’ẽ umi oñemomombyrýva umi oñembo’eva’ekuégui chupekuéra, térã oñorairõva Tupã ndive ohupyty hag̃ua perdón Alma, pe ta’ýra, Mosiah ra’ykuéra ha Enós-icha. Umi ipy’arasy jave, imandu’a hikuái ituvakuéra ñe’ẽ rehe, umi Jesucristo doctrina ñe’ẽ. Imandu’a umívare osalva chupekuéra. Umi pene mbo’epy pe doctrina sagráda rehegua ojegueromandu’áta.

Ame’ẽ testimonio pe tembiapo marangatu oñembo’eva´erãgui Túva Yvagagua ra’ykuérape upe Jesucristo doctrina isensíllova, ohejáva ñandéve ñañemopotĩ espiritualmente ha ipahápe ñañemog̃uahẽ porãite Tupã renonderãme, jaiko hag̃ua Hendive ha Ita’ýra ndive gloria-pe tapiaite g̃uarã familia-icha. Jesucristo rérape, amén.