“Peẽ ha’e Che Angirũnguéra”

Diciembre 1832-pe, “umi mba’evai oúva tetãnguéra apytépe” oñepyrũvo “hesakãve” mba’eve ambue áragui Tupao oñeorganisa ypy guive, Santokuéra Ára Pahapegua líder-kuéra Kirtland, Ohio-pe, oñembyaty peteĩ conferencia-rã. Ha’ekuéra oñembo’e “peteĩteĩ ha ñe’ẽ ayvúpe Ñandejárape oikuaauka hag̃ua [chupekuéra] hembipota”. Oikuaávo ko’ã miembro jeroviareko ñembo’ekuéra jejopyvai mbarete árape, Ñandejára omoangapyhy chupekuéra, he’ívo Santokuérape mbohapy jeyve mokõi ñe’ẽ ipu’akapáva: “che angirũnguéra”.

Jesucristo are guivéma ohenóiva Isejihakuéra ijeroviarekóvape Hi’angirũnguéra. Catorce vése Doctrina ha Konveniokuérape, Salvador oiporu upe ñe’ẽ angirũ omyesakã hag̃ua peteĩ rrelasiõ marangatu ha mborayhu reheguáva. Nañe’ẽi hína ñe’ẽ angirũ rehe múndope he’iseháicha—oĩva umi redes socieles segihakuéra térã “me gusta” guýpe. Ndaikatúi oñemoĩ peteĩ etikétare térã peteĩ número Instagram-pe térã X-pe.

Añetete, che mitãrusúpe, chemandu’a umi ñemongeta otĩre ahendúvo ko’ã ñe’ẽ hasyetéva “Nde, ikatúpa ñande oñoamígonte?” térã “Japytána amigo-ichante”. Mamove escritura-kuéra marangatúpe ñahendúva Chupe he’ívo, “Peẽ ha’e che angirũnte”. Upéva rangue, Ha’e ombo’e “avave ndoguerekoiha mborayhu tuichave kóvagui, peteĩ tapicha omoĩva hekove iñanguirũnguérare”. Ha “peẽ ha’e umi che Ru ome’ẽva’ekue chéve; peẽ ha’e che angirũnguéra”.

Hesakã pe temiandu: pe Salvador ñandeipapa peteĩteĩme ha oñangareko ñanderehe. Ko ñeñangareko ndaha’éi mba’e michĩ térã mba’e’i. Upéva rangue, ha’e mba’e omboyvatéva, omopu’ãva, ha opave’ỹva. Che ahecha pe Salvador marandu “peẽ ha’e che angirũnguéra” ha’e ramo peteĩ ñehenói resakã porã oñemopu’ã hag̃ua ijyvateve ha imarangatuvéva relasiõ opa Tupã ra’ykuéra apytépe “ñañemopeteĩ hag̃ua ñande”. Jajapo péva ñañembyatývo oñondivepa jahekávo mokõive oportunida jajoaju hag̃ua ha peteĩ sentído pertenénsia rehegua opavavépe g̃uarã.

Salvador ohechauka porãite péva Iñehenóipe “peju, chesegi”. Ha’e oma’ẽkuri peteĩteĩ umi tapicha don ha atrivutore umi segidor aty opaichagua apytégui ohenói hag̃ua Hemimbo’ekuéra. Ha’e ohenóikuri umi peskador, umi selóte, joyke’ykuéra ojeikuaáva ipersonalida ayvu rehe, ha impuésto mbyatyha jepe. Ombojoaju chupekuéra ijerovia Salvador rehe ha ipotapy oñemoag̃ui hag̃ua Hese. Ha’ekuéra omaña Hese, ohecha Tupãme Ha’e rupive, ha “upepete voi oheja umi ipira ñuhã, ha oho Hendive.”

Ahecháva avei mba’éicha ñamopu’ãvo umi relasiõ ijyvateve ha imarangatuvéva ñanembojoaju peteĩ ramo. Che rembireko, Jennifer, ha che rojehovasa romongakuaa haguére cinco mitã Ciudad de Nueva York-pe. Upe metrópolis ocupada-pe, roforma relasiõ iporãva ha imarangatúva ore vecino, escuela-pegua angirũ, socio comercial, líder religioso ha tapicha Santokuéra ndive.

Mayo 2020-pe, múndo oñorairõ jave peteĩ pandemia mundial isarambíva reheve, pe Comisión de Líderes Religiosos ciudad de Nueva York pegua miembro-kuéra oñembyaty virtualmente peteĩ oñeha’aro’ỹva reunión-pe. Ndaipórikuri agenda. Ndaipóri invitado especial. Peteĩ jerurénte roñembyaty ha roñemongeta hag̃ua umi desafíore opavave rombohovakéva hína líder religioso ramo. Umi Centro de Control de Enfermedades omombe’u ramoite ore táva ha’ehague pe COVID-19 pandemia hetaveha Estados Unidos-pe. Péva he’ise ndaiporimo’ãvéima ñembyaty. Ndaiporivéima reunión.

Ko’ã líder religioso-pe g̃uarã oipe’a pe ministerio personal, pe kongregasiõ ñembyaty ha pe tupãitũ semanal ha’ékuri golpe ivaietéva. Ore aty michĩme—oikévape peteĩ cardenal, peteĩ reverendo, peteĩ rabino, peteĩ imán, peteĩ pastor, peteĩ monseñor, ha peteĩ élder—rojapysaka ojuehe, roñomoangapyhy ha roñopytyvõ. Roñenfoka rangue ore diferénsiare, rohecha mba’épa roguereko peteĩchaguáva. Roñe’ẽ mba’épa ikatúva rehe rojapo ha upéi ikatútapa rojapo. Roñembyaty ha rombohovái porandukuéra jerovia ha ára oúva rehegua. Ha upéi roñembo’e. O, mba’éichaite roñembo’ékuri.

Peteĩ táva orekóva diversida henyhẽva problema ha cultura oñemoĩvape ojuehe, rohecha umi ore diferénsia roñembyatývo angirũnguéraicha peteĩ ñe’ẽpu, peteĩ propósito ha peteĩ ñembo’e reheve.

Noroma’ẽvéima ojuehe ambue mesa renda gotyo ha katu romaña yvága gotyo. Rosẽkuri peteĩteĩ reunión upe rireguágui joajuvépe ha roimépe lísto rojapyhy hag̃ua ore “pála” ha roho romba’apo. Ñeipytyvõjoa upégui osẽva ha servicio oñeme’ẽva miles neoyorquinos-pe cherekombo’e peteĩ múndo ojerurévape ñemboja’o, ñemombobyry ha ñe-desconecta, akói oĩha hetave mba’e ñanembojoajúva umi ñande dividívagui. Pe Salvador he’iva’ekue, “Peñemopeteĩke; ha napeñemopeteĩriramo peẽ ndaha’éi chemba’e.”

Hermano ha hermana-kuéra, anive jaheka mba’ére ñañemboja’o hag̃ua ha uperangue jaheka oportunida “penepeteĩ” hag̃ua”. Ha’e ñande rovasa don ha atrivuto peteĩete reheve ñaneinvitáva ñañemoarandu hag̃ua ojuehegui ha ñandete voi jakakuaa hag̃ua. Py’ỹi ha’e che estudiante-kuéra universitario-pe che ajapóramo peẽ pejapóva ha pẽe pejapo che ajapóva, nañaikotevẽi ojuehe. Ha katu peẽ ndapejapóigui che ajapóva ha che ndajapóigui peẽ pejapóva, ñaikotevẽ ojuehe. Ha upe temikotevẽ ñanembojoaju. Ñemboja’o ha jepu’aka ojuehe ha’e pe aña plan ohundi hag̃ua angirũreko, ogayguakuéra ha jerovia. Ha’e pe Salvador upe ñanemopeteĩva.

Peteĩ umi tovasapy oñeprometéva “ñanepeteĩramo” ha’e peteĩ sentído de pertenencia imbaretéva. Elder Quentin L. Cook ombo’e “pertenénsia reko añete ha’eha ñanepeteĩ hag̃ua Cristo ndive.”

Peteĩ nda’areguaréi visíta che familia ndive tetã Oeste Africano, Ghana-pe, ahayhuetékuri peteĩ jepokuaa upepegua. Rog̃uahẽvo peteĩ tupao térã ogapýpe, roñemomaiteíkuri umi ñe’ẽ “ndaipóri mba’érepa” reheve. Tembi’u ojeservi jave, pe ogajára omomarandu, “Peñeinvita”. Ko’ã momaitei hasy’ỹ oñeme’ẽkuri propósito ha potapy reheve. Ndaipóri mba’érepa. Peñeinvita

Ore romoĩ koichagua momarandu marangatu tenda roñembyatyha rokẽre. Ha katu pe kartel Oñemog̃uahẽporã Visitantekuérape ndaha’éi sufisiénte. Romog̃uahẽ porãitépa opa umi okẽ rupi ohasávape? Hermano ha hermana-kuéra, nasufisiéntei jaguapýnte umi banco-pe. Ñahenduva’erã Salvador ñehenói ñamopu’ã hag̃ua relasiõ ijyvateve ha imarangatuvéva opa Tupã ra’ykuéra ndive. Javiviva’erã ñande jerovia! Che ru chemomandu’a tapiáva Domingo-kue apykápe jeguapýnte ndojapoiha avavégui cristiano porãve, garage-pe jeke ndojapoiháicha avavégui peteĩ kamiõ.

Jaikova’erã ñande rekove upe múndo ani hag̃ua ñanderecha ñandéve ha katu ohecha hag̃ua Chupe ñande rupive. Péva ndojehúi Domingo-kue añónte. Ojehu supermercado-pe, estación de servicio-pe, escuela-pegua reunión-pe, vecino-kuéra ñembyatýpe—opa tenda ñande rogayguakuéra oñemongaraiva’ekue térã nahániri omba’apo ha oikohápe.

Che atupãitũ Domingo peteĩ momandu’a ramo ñande ñaikotevẽha ojuehe ha oñondivepa ñaikotevẽ Hese. Umi ñane don ha talénto peteĩete ñane diferensiáva múndo secular-pe ñanembojoaju peteĩ tenda sagrádope. Pe Salvador ñanerenóikuri ñañopytyvõ, ñañomopu’ã ha jajo’edifika hag̃ua. Péva upe Ha’e ojapova’ekue omonguerárõguare kuña huguýpe imba’asývape, omopotĩ umi lepróso ojerure’asývape Iporiahuverekóre, oñemoñe’ẽ prínsipe mitãme oporandúva mba’épa ikatu ojapove, ohayhu Nicodemo-pe oikuaáva ha katu oduda ijeroviápe, ha oguapy pe kuña póso ykeregua ndive ndorekóiva upe aragua jepokuaa ha katu chupe Ha’e omomarandu Imisiõ mesiánika. Kóva chéve g̃uarã ha’e tupao—peteĩ ñembyaty ha jerrekupera, ñemyatyrõ ha jehechajey renda. Presidente Russell M. Nelson ombo’e haguéicha: “Pe evanhélio red ha’e red tuichavéva múndope. Tupã oinvitákuri opavavépe ou hag̃ua Hendápe. … Oĩ tenda opavavépe g̃uarã.”

Ikatu oime orekóva tembiasa omopensáva chupe noperteneseiha. Pe Salvador mensáhe peẽ ha chéve g̃uarã peteĩchaite: “Peju che rendápe opaite peẽ pemba’apo ha penemba’epohýiva, ha che pombopytu’úta”. Jesucristo Evanhélio ha’e tenda perfecto ñandéve g̃uarã. Tupaópe jeju oikuave’ẽ ñeha’arõ umi ára iporãvévare, promésa napeimeiha peneaño, ha peteĩ família oikotevẽva ñanderehe ñande ñaikotevẽháicha hesekuéra. Elder D. Todd Christofferson omoañete pe “ha’évo peteĩnte Túva, Ta’ýra ha Espíritu Santo ndive ha’eha duda’ỹre pertenénsia tuichaitevéva.” Oimeraẽ osẽva’ekue ha ohekávape oportunida oujey hag̃ua, che aikuave’ẽ peteĩ añetegua ijapyra’ỹva ha peteĩ invitasiõ: Nde pepertenese. Eju jey. Og̃uahẽma ára.

Peteĩ múndo oñorairõva ha ojedividívape, che atestifika pe Salvador Jesucristo ha’eha upe mopeteĩhára guasu. Ainvita peteĩteĩ ñandekuéra ñanderekojoja hag̃ua Salvador invitasiõre “penepeteĩ hag̃ua” ha py’aguasúpe jadeklara, Ha’e he’i haguéicha, “Peẽ ha’e che angirũnguéra.” Jesucristo réra marangatúpe, amén.