Pevivi Pende Privilehiokuéraicha

Ramoite che ména, Greg, orresivi peteĩ diagnóstico oikotevẽva peteĩ cirugía mbarete ha heta mese quimioterapia. Heta peẽicha pembohovakéva peteĩ situasiõ peichagua, pya’eterei roñepyrũ roñembo’e rojerurévo pytyvõ yvágagui ha Tupã pu’aka. Pe domingo Greg cirugía rire, ojeservi Santa Cena pe ore hospital kotýpe.

Upérõ che añoite ha’úva pe Santa Cena. Peteĩ mbujape pehẽ. Peteĩ y tasa. Tupaópe, py’ỹi amoĩva che akã mba’éichare ojerreparti pe Santa Cena—pe ñembosako’i, pe jehovasa, ha pe ñembohasa. Ha katu upe ka’aru, ajepy’amongeta Tupã pu’aka don oĩvare aiporu hag̃ua umi ordenánsa marangatu rupive ha pe konvénio promésa ajapóva rehe ha’úvo pe mbujape pehẽngue ha pe y. Upéva ha’ékuri peteĩ momento aikotevẽha yvaguigua pu’aka. Upe tuicha ñembyasy’asy, kane’õ ha jeikuaa’ỹ pa’ũme, añeporandu ko don rehe opermitítava ahupyty pe Ipu’aka aikotevẽtéva. Apartisipávo Santa Cena-gui, che ñemoirũ Ñandejára Espíritu ndive okakuaáta, opermitíva chéve ahupyty pe Tupã pu’aka don, oikévape anhelkuéra ñeministra ha pe mbarete Salvador ome’ẽva jagueropu’aka hag̃ua umi mba’e.

Aimo’ã araka’eve upemboyve nañeme’ẽiva en cuenta tesakã porãite reheve pe imba’eguasúva ndaha’eiha mávapa oofisia upe ordenánsape—upe mba’e pe ordenánsa ha pe ñande konvénio promésa odesblokeáva avei omerese ñande jesareko porã. Umi sacerdocio ordenánsa ha konvénio promesakuéra opermiti Tupãme tañanemomarangatu ha upéi tojapo umi mba’e hechapyrãitéva ñande rekovépe. Ha katu mba’éichapa oiko upéva?

Peteĩha, peteĩ ordenánsa ohechauka hag̃ua Tupã pu’aka ñande rekovépe, ojejapova’erã Tupã Ra’y autorida reheve. Pe ñeme’ẽ sistema imba’eguasu. Pe Túva ome’ẽ Jesucristo-pe umi lláve ha autorida osupervisa hag̃ua umi Isacerdocio ordenansakuéra ñeadministra. Isãmbyhy guýpe ha Isacerdocio órden ryepýpe, Tupã ra’ykuéra oñeordena ojagarra hag̃ua Tupã Ra’y renda.

Mokõiha, ndaha’éi jajapóvante konvénio promesakuéra, ha katu ñakumpliva’erã umíva. Heta evanhélio ordenansakuérape jajapo umi konvénio sagrádo Tupã ndive; Ha’e opromete ñanderovasataha ñañongatúrõ umi konvénio jajapóva. Jahechakuaápa ha’eha umi sacerdocio ordenánsa ha konvénio promesakuéra ñekumpli ñembojoaju opermitíva ñandéve jahupyty pe Tupã pu’aka?

Upe ka’arúpe añeporandu, che, peteĩ Tupã konveniogua rajy, antendepaitépa mba’éicha ahupytykuaa Tupã pu’aka don sacerdocio ordenansakuéra rupive ha ahechakuaápa añetehápe mba’éicha pe Tupã pu’aka omba’apo chepype.

2019-pe ojeipyso peteĩ invitasiõ profétiko Tupaogua kuñanguérape ñanembo’évo mba’éichapa jahupytykuaa pe Salvador pu’aka ñande rekovépe. Presidente Russell M. Nelson ñaneinvita jaestudia hag̃ua Doctrina ha Konveniokuéra 25, peteĩ rrevelasiõ oñeme’ẽva’ekue Emma Smith-pe Harmony, Pensilvania-pe. Upe invitasiõ ñemoneĩ omoambue che rekove.

Mes ohasava’ekuépe arekókuri oportunidad aha’arõ’ỹva avisita hag̃ua Harmony. Upépe, umi arce guýpe, ojerrestaurákuri pe Sacerdocio José Smith ha Oliver Cowdery-pe. Umi yvyramáta ypýpe oĩ pe José ha Emma róga rokẽ principal. Chimenea renondépe upé ógape oĩ peteĩ ventana. Añembo’y upe ventana renondépe ha añeporandu mba’épa oiméne opensa raka’e Emma omaña aja umi yvyramáta rupive.

Julio 1830-pe, Emma oreko 26 áño; ha’e imitãiterei gueteri. Oreko mbohapy ary y medio omendahague. Omano chugui peteĩ imitãmi, pe peteĩha. Pe iñeñotỹha’imi oĩ hustoite pe hóga rape pahápe. Añembo’ývo pe ventana ykére, ndahasýi chéve añeimahina mba’épa oiméne omyanyhẽ hemiandukuéra. Oiméne katuete ombopy’apy chupe isituasiõ ekonómiko, pe ñemuña okakuaáva oamenasáva isegurida, umi hi’ára oútavare. Upevére, Tupã rembiapo oĩ opárupi ijerére. Oiménepa oñeporandu avei henda pe plan-pe, ipropósito Irréinope ha ipotencial Tupã resa renondépe.

Aguerovia oiméne ojapoha upéicha.

Pe tape amogotyovénte, pe Tupã sacerdocio autorida ha llavekuéra ojerrestaurákuri yvy ári. Upéva ha’ékuri peteĩ momento Emma oikotevẽha yvága pu’aka. Upe ñenbyasy’asy, kane’õ ha jeikuaa’ỹ, añeimahina Emma oñeporandúne ra’e upe Tupã sacerdocio don rehe ojorátava Tupã pu’aka ha’e oikotevẽtéva.

Ha katu Emma ndopytái omañávonte pe ventánare ha oñeporandu.

Pe proféta oñemoarandu aja umi lláve, ofísio ha ordenansakuéra, ha mba’éicha oipytyvõva’erã pe sacerdocio servicio-pe, Ñandejaraite, Iproféta rupive, ome’ẽ peteĩ rrevelasiõ Emma-pe. Ndaha’éi Emma ha’éva Nauvoo-gua Sociedad de Socorro presidenta-pe—ko rrevelasiõ oñeme’ẽva’ekue Emma-pe, orekóva 26 áño, Harmony-pe. Revelasiõ rupive, Emma oikuaáta pe santifikasiõ interior-gui ha pe konvénio ñembojoaju ombokakuaátava kapasida orekóva umi sacerdocio-gua ordenánsa omba’apo hag̃ua hekovépe.

Peteĩha, Ñandejára omomandu’a Emma-pe, tenda ha’e orekóva Iplanpe, oñeinkluívo mávapa ha’e ha máva mba’épa ha’e, peteĩ tajýra Irréinope. Oñeinvita chupe “oguata hag̃ua pe tekopotĩ rapére,”peteĩ tape oinkluíva umi ordenánsa odesblokeátava pe Tupã pu’aka, Emma ojejagarra atãramo ikonveniokuérare.

Mokõiha, upe iduélo pypuku árape, Ñandejára ome’ẽ chupe peteĩ propósito. Emma ndorekóinte peteĩ apyka primera fila-pe ohecha hag̃ua pe Restaurasiõ; ha’e niko orekókuri peteĩ partisipasiõ esensiál pe tembiapo ojejapóvape hína. Oje’apartátakuri “omehesakã hag̃ua Escritura-kuéra ha oexorta hag̃ua tupaópe.” Umi hi’ára “ha’e odedikáta ohai hag̃ua, ha oñemoarandu heta hag̃ ua.” Emma-pe oñeme’ẽkuri peteĩ funsiõ sagrádo oipytyvõ hag̃ua ombosako’i Santokuérape otupãitũ hag̃ua; umi ipurahéi Ñandejárape ojerresivíta ñembo’éicha ha “oñembohováita peteĩ jehovasa reheve iñakã arikuéra.”

Ipahápe Ñandejára omohesakã pe santifikasiõ ryepypegua proséso ombosako’ítava Emma-pe exaltasiõrã. “Rejapo ỹro kóva,” Ñandejára omohesakã “ndaikatumo’ãi reju che aimehápe.”

Ñamoñe’ẽ porãrõ pe sección 25, jahecháta oikoha hína peteĩ progresiõ imba’eguasuetéva. Emma ohasáta peteĩ tajýra rréinopeguipeteĩ “kuñakarai jeiporavopyre”ha peteĩ rréinape. Umi Sacerdocio Aarónico ha Melquisedec ordenansakuéra, oñembojoajúvo umi ikonveniogua promesa ñekumpli rehe, ombokakuaáta iñemoirũ Espíritu ha anhekuéra ndive, ombokatupyrývo chupe onavega hag̃ua hekove guía divíno reheve. Ipu’aka divíno rupive, Tupã omonguerátakuri ikorasõ, ombokakuaáta ikatupyrykue ha omoambuéta chupe pe iversiõ porãvévape Ha’e oikuaáva ikatuha oiko chugui. Ha pe Melquisedec Sacerdocio ordenansakuéra rupi “pe divinida pu’aka ojehechaukáta” hekovépe, ha Ñandejára omboykéta pe vélo ohupyty hag̃ua entendimiento Chugui. Upéicha ha’e ojehechaháicha Tupã pu’aka omba’apoha ñande pype.

Presidente Russell M. Nelson ohekombo’e:

“Opa mba’e oikova’ekue [Harmony]-pe oguereko profunda influencia pende rekovépe. Pe sacerdocio restauración, Ñandejára consejo reheve Emma-pe, ikatu pende guia ha penderovasa peteĩteĩme. …

“… Jaguereko acceso Tupã pu’akápe ñande rekovépe oikotevẽ umi mba’e Ñandejára he’iva’ekue Emma-pe ha peteĩteĩ [ñandéve] jajapo hag̃ua.”

Oiko hína kuri heta mba’e imba’eguasúva mokõive lado pe ventánagui Harmony-pe, oikehápe pe rrevelasiõ oñeme’ẽva’ekue peteĩ dama ojeiporavopirévape Ñandejára ohenoiva’ekuépe, peteĩ rrevelasiõ omombaretéta, omokyre’ỹta ha omomarandútava Emma Smith, pe Tupã rajýpe.

Ore nieta Isabella-pe oñeme’ẽrõ peteĩ téra ha peteĩ tovasa, itúva ohovasa chupe entendimiento reheve pe sacerdocio-gui; okontinuataha okakuaávo ha oñemoarandúvo umi jehovasápe upéva oguerútava hekovépe; ha ijerovia sacerdocio-re okakuaataha okakuaaháicha iñentendimiento.

Napy’ỹi peteĩ mitãmi oreko jehovasa sacerdocio ñentende rehegua ha toikuaa mba’éichapa umi ordenánsa ha konveniogua promesakuéra oipytyvõta chupe ohupyty hag̃ua Tupã pu’aka. Ha katu chemandu’a Emma-re ha apensa chejehe, Mba’ére nahanirimo’ãi? Ko mitãkuñami oreko potencial oikóvo chugui peteĩ dama jeporavopyre Irréinope ha ára ohasávo, peteĩ rréina. Isacerdocio ordenansakuéra rupive ha umi promesa, ha’e ojapóva konvénio rupive, ñekumpli, pe Tupã pu’aka omba’apóta ipype ha upéva rupive oipytyvõta chupe ogueropu’aka hag̃ua oimeraẽ mba’e tekove oguerútava chupe ha oikóta chugui pe kuña Tupã oikuaáva ikatuha oiko. Kóva ha’e peteĩ mba’e che aipotáva opa mitãkuñami rréino pegua toentende.

“Pevivi pende privilehiokuéraicha.”

Peñemoarandu mba’éichapa umi sacerdocio ordenánsa ha konveniogua promesa opermitíta pe Tupã pu’aka tosyry pende rekovére hekopeite, omba’apóvo pende pype ha peẽ rupive, penemombaretévo ha penembosako’ívo pehupyty hag̃ua pende propósito ha potencial completo.

Pestudia mbeguekatu ha pemedita umi Sacerdocio Aarónico ha Sacerdocio de Melquisedec ordenánsare, umi konveniogua promesa jajapóva peteĩ teĩme, ha Tupã pu’aka jahupytývare umi ordenánsa rupive.

Penemandu’áke, naimba’eguasúi mávapa ojapo hína pe ordenánsante; pe ordenánsa ha pende konvénio promésa odesblokeáva avei omerese pende jesareko porã.

Jepartisipa mbujape ha ýgui ha’e peteĩ momandu’aha semanal Ipu’aka omba’apoha pendepype penepytyvõvo pevense hag̃ua. Peiporúvo pe santo sacerdocio garment ha’e peteĩ momandu’aha ára ha aragua Ipu’aka omba’apoha hína pendepype penepytyvõvo oiko hag̃ua pendehegui.

Opavave jareko acceso Tupã pu’aka don-pe.

Káda japartisipa jave Santa Cena-gui.

Káda jahasa vove peteĩ templo rokẽ rupi.

Kóva ha’e che Pytu’u ára ijyvatevéva. Upévare ohayhuete che templo-pegua rrekomendasiõ.

“Iñordenánsape ojehechauka divinida pokatu.”

Ko don-gui che atestifika, Jesucristo rérape. Amén.