Tupã Ra’y ha Rajykuéra

Ko árape añe’ẽse peteĩ umi evanhélio añetegua iglorióso, hory ha ipu’akapavéva Tupã oikuaaukava’ekue rehegua. Upéicha avei, irónicamente, ha’e peteĩ mba’e ojekaguaivare ñande rehe. Peteĩ tembiasa areko’akue ojapóma heta ary ombopypuku che chehayhu ko evanhélio añeteguáre.

Tupao orrepresentáva ramo, añeinvitákuri peteĩ conferencia religiosa-pe oñemomaranduhápe upe ára guive orrekonosetaha hikuái oĩporãva ramo opa ñemongarai ojapóva haimete opa ambue tupao cristiano, akóinte pe ordenánsa ojejapóramo ýpe ha Túva ha Ta’ýra ha Espíritu Santo rérape. Upéi oñemyesakã ndojeaplikamo‘aiha ko polítikape umi ñemongarai ojapóva Jesucristo Tupao Santokuéra Ára Pahapegua.

Pe conferencia rire ikatúkuri aikuaaporãve mba’érepa upe excepción peteĩ umi líder oĩva ndive enkargádo upe marandu rehe. Rorekókuri peteĩ ñemongeta hechapyrã ha ome’ẽva tesakã.

Mbykyháicha, omyesakã chéve upe excepción ha’eha Divinida rehegua jeguerovia rupi, ambue denominasiõ cristiana py’ỹi oheróva Trinida. Ame’ẽ chupe aguyje omboyke haguére tiempo omyesakã hag̃ua chéve umi ha’e ogueroviáva ha itupaogua polítika. Ore ñemongeta pahápe, rojedespedi peteĩ añuápe

Upéi añepymongetávo ore ñemongeta rehe, ko angirũ he’iva’ekue Santokuéra Ára Pahapegua noroikumbýi upe ha’e ohenóiva “Trinida ñemimby” chemoakã pohýikuri. Mba’épa he’ise ra’e hína? Oĩporã, ha’ékuri ñane entendimiénto Tupã naturalesa rehe. Ñande jaguerovia Tupã pe Túva “ha’eha peteĩ tekove oje’exalta pyréva” orekóva peteĩ “tete to’o ha kangueguigua, ikatúvare ojepoko yvypóra oguerekoháicha; [ha] upéicha avei pe Ta’ýra”. Upéicha, opa ára ñañe’ẽ jave Tupã naturalesa rehe, peteĩ hendáicha ñanẽ’ẽha avei hína ñande naturalesa tee rehe.

Ha péva añetegua ndaha’éi opa ñendekuéra jaje’apo haguére “[Ha]’angáicha, [Ha]’eichagua”, ha katu, pe Salmista ohai haguéicha, Tupã he’i rupi, “Peẽ tupãnguéra; ha opa peẽ ha’e pe Ijyvatevéva ra’ykuéra”. Kóva ha’e doctrina porãite ko’ág̃a ojerekuperáva Restaurasiõ ñeg̃uahẽ reheve. Ñemombykýpe ndahetavéi ni namichĩvéi pe ñande misionero-kuéra ñanembo’évagui lección ñepyrũha, párrafo peteĩha, línea peteĩháme: “Tupã ha’e ñande Ru Yvagagua.”

Ko’ág̃a, ikatu peje “oĩha heta tapicha ogueroviáva ñande ha’eha Tupã ra’ykuéra.” Héẽ, upéva añete, ha katu pe endimiénto orekóva hikuái ikatu iñambue’imi pe isignifikádo pypuku he’isévagui upe ñande ña’afirmáva. Santokuéra Ára Pahapeguápe g̃uarã, ko mbo’epy ndaha’éi ñemoha’anga. Uperangue katu, añetehápe jaguerovia opa tekove ha’eha literalmente Tupã ra’y ha rajykuéra. Ha’e “[ñande] espíritu Túva” ha upéva rupi, jareko potensial Ha’éicha hag̃ua ñande, ha’ete ku oñentende’ỹva alguno-pe g̃uarã.

Ohasáma 200 ary Visiõ Peteĩha oipe’ahague umi okẽ Restaurasiõme g̃uarã. Upe ára, mitãrusu José Smith ohekákuri gía yvágagui oikuaa hag̃ua mba’e tupaópe ojoajúta. Revelasiõ upe ára ohupytyva’ekue rupive, ha uperiregua rrevelasiõme oñeme’ẽva’ekue chupe, Proféta José Smith ohupytýkuri kuaapy Tupã naturalesa ha ñane rrelasiõ rehegua Hendive Ita’yrakuéra ramo.

Upévare, jaikuaa resakãve ñande Ru Yvagagua ohekombo’ehague ko doctrina porãite iñepyrũmby guive. Pehejami chéve ta’e pẽme mokõi escritura-pegua tembiasa amyesakã porãve hag̃ua kóva.

Oiméne penemandu’a Tupã ñehekombo’ekuéra Moisés-pe ojehaiháicha Pérla Hepyetévape.

Ñamoñe’ẽ, “Tupã oñe’ẽ Moisés-pe, he’ívo: Péina ápe, Che ha’e Tupã Ñandejára Ipu’akapáva, ha Opa’ỹva ha’e che réra”. Ambue ñe’ẽme, Moisés, aipota reikuaa mávapa che. Upéi Ha’e omoĩve, “Ha péina ápe, nde ha’e che ra’y.” Uperire ha’e he’i, “Ha Che aguereko peteĩ tembiapo ndéve g̃uarã, Moisés, che ra’y; ha nde che Unihénito joguaha”. Ha upéi, Ha’e ombopaha, “Ha ko’ág̃a, péina ápe, kóvante ahechaukáta ndéve, Moisés, che ra’y.”

Ha’ete ku Tupã he’írõguáicha ombo’etaha Moisés-pe ko peteĩ mbo’epy jepe: “Nde ha’e che ra’y”, Ha’e he’i jeýva mbohapy jey. Ha’e ndaikatúikuri he’ívo Moisés réra jepe ombojoapy’ỹre Ita’yraha ha’e.

Upevére, Moisés opyta rire ha’eño, ikangýkuri noĩvéima rupi Tupã renondépe. Upérõ oúkuri Satana otenta hag̃ua chupe. Pehechakuaápa peteĩ modelo ko’ápe? Peteĩ mba’e ha’e he’i raẽvéva Moisés-pe ha’ékuri, “Moisés kuimba’e ra’y, chetupãitũ”

Kóicha jehechápe, Satana mba’e jerure otupãitũ hag̃ua chupe ikatu ha’éra’e omanãnte hag̃ua ambue gotyo. Tuichaite jepy’ara’ã Moisés-pe g̃uarã upe tekokangy javete ha’ékuri oñekonfundi ha oguerovia hag̃ua ha’enteha “kuimba’e ra’y”, ha’e rangue peteĩ Tupã ra’y.

“Ha ojehu Moisés oma’ẽ Satanáre ha he’i chupe: Mávapa nde? Péina ápe, che ha’égui peteĩ Tupã ra’y, Iñunihénito joguaha”. Vy’arã, Moisés noñekonfundíri ha noñeme’ẽi ijupe oma’ẽ hag̃ua ambue henda gotyo. Oikuaákuri mbo’epy mávapa ha’e añetehápe.

Ñemombe’u oúva ojejuhu Mateo 4-pe. Umi iñarandúva ombohéra kóva “Mbohapy Jesús Jepy’ara’ã” Ñandejárape oñetentarõguáicha mbohapy jeyvénte, ndaha’eirõ upéicha.

Miles tinta galón ojeporuva’ekue oñemyesakã hag̃ua ko’ã jepy’ara’ã he’iséva ha ipypegua. Jaikuaaháicha, pe kapítulo oñepyrũ omyesakãvo Jesús ohohague pe tave’ỹme, “ha oajuna rire cuarenta ára ha cuarenta pyhare, upéi Ha’e iñembyahýi”.

Satana jepy’ara’ã peteĩha ojogua ha’ékuri omyanyhẽ hag̃uánte umi Ñandejára rete remikotevẽ. “Emanda ko’ã itápe toiko chuguikuéra mbujape,” ha’e oipy’ara’ã Salvador-pe.

Mokõiha ñeha’ã ha’ékuri Tupãme oipy’ara’ã rehegua: “Ejeity yvy gotyo: ojehaígui, Ha’e omboúta hi’anhelkuéra oñangareko hag̃ua nderehe”.

Ipahápe, Satana mbohapyha jepy’ara’ã ha’ékuri pe múndo oipotáva ha iglória rehegua. Ojehechauka rire Jesús-pe “opa mundogua rreinokuéra, … [Satana] he’i chupe, Opaite ko’ã mba’e ame’ẽmbáta ndéve, reñesũramo che renondépe ha chetupãitũ”

Añetehápe, Satana jepy’ara’ã paha oho’ive ko’ã mbohapy ñeha’ãre ha ohove oñetenta reheve Jesucristo-pe oñeporandu hag̃ua Inaturalésa divínare. Mokõi jeyve jepe, upe ñeha’ã mboyve oúkuri Satana akusasiõ rasyete “Nde ha’éramo Tupã ra’y”—añetehápe regueroviáramo, upérõ ejapo péva térã amóva.

Pehechakuaami mba’epa oikohague pya’ete Jesús oho mboyve pe tave’ỹme oajuna ha oñembo’e hag̃ua: jajuhu Cristo ñemongarai ñemombe’u. Ha Ha’e osẽvo pe ýgui, ou “peteĩ ñe’ẽpu yvágagui, he’íva, Kóva ha’e che Ra’y ahayhuetéva , máva chembovyʼavéva”.

Jahechápa upe mbojoaju? Ikatúpa jahechakuaa peteĩ modélo ko’ápe?

Ndareíri opa ára ñañehekomb’e jave ñande naturalesa ha ñande destíno divíno rehe, pe opa tekojoja rayhu’ỹha ñanetenta ñañeporandu hag̃ua umíva rehe.

Iñambueténe umi ñane desisiõ añetehápe jaikuaáramo mávapa añetete ñande.

Jaiko peteĩ múndo hasývape, peteĩ múndo heta hetaveha guyryry,umi tapicha hekoporãva oñeha’ãhápe he’i mbarete jepe ñane dignida humana, upe aja katu ñapertenese peteĩ tupaópe ha ña’añua peteĩ evanhélio ombotuicháva ñane visiõ ha ñaneinvitáva mba’e divínope.

Jesús rembiapoukapy ñande “rekoporãmbaite jepe [ñande] Ru yvágape oĩva hekoporãmbaiteháicha”ha’e jepy’amongeta resakã ijyvateha umi Ha’e oha’arõva ha umi ñande posibilida eterna. Ko’áĝa, mba’eve ko’ãva ndoikomo’ãi peteĩ pyhare ko’ẽme. Presidente Jeffrey R. Holland ñe’ẽme, oikóta “ára ohasávo”. Ha katu promésa ha’e ñande “jajúramo Cristo rendápe” “ñañemoĩporãmbáta Ipype”. Upéva oikotevẽ heta tembiapo—ndaha’éi oimeraẽ tembiapónte, ha katu tembiapo divíno. Hembiapo!

Ko’ág̃a, marandu porã ha’e ñade Ru Yvagagua voi pe he’iva’ekue, “Péina ápe, kóva ha’égui che rembiapo ha che glória—toiko yvypóra ñemanokuaa’ỹ ha tekove ijapyra’ỹva”.

Presidente Russell M. Nelson invitasiõme “ñapensa hag̃ua celestial-háicha”oike peteĩ momandu’a techapyrã ñande naturalesa divina, origen ha potencial destino-gui. Ñande ikatu jahupyty upe celestial Jesucristo sacrificio expiatorio rupive añoite.

Oiméne upévare Satana oha’ã Jesús-pe peteĩchagua jeipy’ara’ã reheve Iministério yvy arigua ñepyrũmby guive ipaha peve. Mateo ohai Jesús osaingo aja kurusúre, umi upérupi ohasáva okaguai hese, … he’ívo, … Nde ha’éramo Tupã Ra’y, aguejy pe kurusúgui”. Glória Tupãme Ha’e nohendúi ha uperangue katu omoĩ tape jahupyty hag̃ua opa yvagagua jehovasa.

Akói tañanemandu’a ojehepyme’ẽhague tuicha hepykue ñande vy’apavẽ rehe.

Atestifika Apóstol Pablo ndive “pe Espíritu ijehegui otestifikaha ñande espíritupe, ñande ha’eha Tupã ra’ykuéra: ha ta’ýra ramo, avei eredéro, Tupã eredéro ha koeredéro Cristo ndive; upéicha jahasa’asy hag̃ua hendive, avei oñondive jajeglorifika hag̃ua.” Jesucristo rérape, amén.