Susa Young Gates mo Josef F. Smit

Susa Young Gates hem i gel blong Brigham Yang. Hem i bin bon long Yuta mo groap long ples ia. Hem i laekem blong raet, mo hem i laekem blong givim seves insaed long Jos blong Lod.

Saints, 3: 9– 10, 64

Taem Susa i wan adalt, hem i sik bigwan. Hem i askem wan prishud blesing. Long blesing ia, Lod i talem long Susa se Hem i wantem hem blong mekem tempol wok.

Saints, 3:193–94

Afta long blesing, Susa i harem gud. Hem i spenem taem blong hem blong stap lanem abaot famli histri blong hem. Taem hem i faenem ol memba blong famli we oli ded mo oli no kasem baptaes, hem i go long tempol mo mekem baptaes blong olgeta. Hem i laekem blong talem long ol pipol abaot famli histri wok. Sore tumas, plante pipol oli no bin gat interes.

Saints, 3:194– 95, 206

Wan dei, Susa i visitim fren blong hem Josef F. Smit, Presiden blong Jos. Presiden Smit i bin sik blong plante wik. Susa i save se hem i stap harem nogud from boe blong hem i ded. Hem i harem nogud abaot ol samting blong wol we oli stap hapen tu, olsem ol wo mo ol sik.

Saints, 3:197–99, 205–6

Be taem Susa i sidaon wetem Presiden Smit, hem i glad tumas blong toktok long Susa. Hem i talem long Susa se God i givim long hem wan spesel visen. Hem i abaot spirit wol, ples we man oli go long hem afta we oli ded. Hem i raetem visen blong hem long wan pepa. Presiden Smit i givim long Susa mo askem hem blong ridim.

Saints, 3:206–7

Susa i ridim pepa ia. I talem se Jisas Kraes i visitim spirit wol. Hem i sendem Adam, Iv, mo ol narafala fetful man mo woman blong tijim ol spirit we oli no bin kasem gospel taem oli bin stap laef. Oli stap helpem ol spirit ia oli rere blong mekem se ol man oli save mekem baptaes blong olgeta long tempol.

Doktrin mo Ol Kavenan 138: 11– 19, 29–48; Saints, 3:206–7

Susa i sapraes taem hem i ridim visen blong Presiden Smit. Presiden Smit i smael long hem. “Susa,” hem i talem, “yu stap mekem wan gudfala wok.” Hem i talem long Susa se hem i lavem hem from fet blong hem long Lod.

Saints, 3:206

Susa i raetem revelesen ia long jenol blong hem. “O, hemia i givim kamfot long mi!” hem i talem. Hem i no save wet blong talem long ol fren mo ol nara memba blong Jos abaot revelesen ia. Hem i save se visen blong Presiden Smit bae i helpem ol Sent oli glad blong mekem tempol wok blong ol pipol long spirit wol.

Saints, 3:207