Jane Manning I Travel I go long Nauvu

Jane Manning mo famli blong hem oli stap long wan ples we sam long ol pipol oli no laekem olgeta mo oli mekem nogud long olgeta from kala blong skin blong olgeta. Wan dei, Jane i harem wan misinari i stap tij. Hem i save se mesej blong hem i tru Long nekis Sandei, hem i kasem baptaes.

Saints, 1:500–501

Ol famli blong Jane oli joenem Jos tu. Lod i wantem ol Sent blong oli kam tugeta long Nauvu. Jane i lavem Lod. Hem mo famli blong hem i wantem blong stap wetem ol narafala Sent. Mekem se oli statem wokbaot blong olgeta i go long Nauvu.

Doktrin mo Ol Kavenan 124:25; Saints, 1:501

Pat blong trip blong olgeta oli mas travel long bot. Plante long ol pipol oli save pem rod blong bot long en blong wan trip. Be sam man oli talem long famli blong Jane blong oli mas pem rod blong olgeta fastaem bifo oli travel. Oli no bin gat inaf mane. Ol man ia oli mekem olgeta i aot long bot ia, mo oli aot i go mo lego olgeta i stap.

Saints, 1:501

Famli blong Jane oli mas wokbaot yet blong 800 maels, o 1,300 kilometa. Oli mas krosem wan dip reva ia we i nogat brij long hem. Oli silip aotsaed. Weta ia plante taem i kolkol. Be famli blong Jane i tingting strong blong oli kasem Nauvu. Oli leftemap tingting blong olgeta taem oli stap singsing mo wokbaot.

Saints, 1:501, 505–6

Jane mo famli blong hem oli wokbaot kasem taem ol sus blong olgeta i nogud mo ol leg blong olgeta i soa. Be taem oli bin prea long God from help, Hem i hilim leg blong olgeta.

Saints, 1:505

Oli helpem ol man we oli mitim long rod blong olgeta. Oli iven help blong hilim wan pikinini we i sik from fet blong olgeta.

Saints, 1:505–6

Long en, !Jane mo famli blong hem i kasem Nauvu! Oli taet mo nidim wan ples blong stap long hem. Mekem se oli go long haos blong Josef mo Ema. Taem Josef i harem wanem oli bin gotru long hem, hem i talem long Jane, “God i blesem yu. Yumi kam ol fren nao.” Josef mo Ema invaetem i Jane blong stap wetem tufala.

Saints, 1:506