Ol Witnes Oli Luk Ol Buk we Oli Wokem long Gol, blong Buk blong Momon

Josef, Ema, mo Oliva Kaodri oli stap gohed blong transletem buk we oli wokem long gol long hom blong Smit long Pensilvania. Be ol pipol long taon blong olgeta oli wantem blong stopem olgeta. Oliva i gat wan fren we nem blong hem Deved Witma we i stap laef long Niu Yok. Oliva i askem Deved Witma sapos olgeta oli save kam stap wetem olgeta ol Witma famli, blong finisim translesen.

Saints, 1:68

Deved mo famli blong hem oli agri. Olgeta i welkamem Josef, Ema, mo Oliva long hom blong hem. Naoia oli save wok long translesen wetem pis. I gat plante pipol we oli stap wetem ol Witma long hom blong tufala. Hemia i minim se i gat plante wok blong mekem, speseli mama blong Deved, Meri.

Saints, 1:68–70

Wan dei taem Meri i stap wok, enjel Moronae i visitim hem. Hem i talem se evri ekstra wok ia i stap mekem hem i taed. Hem i wantem blong mekem fet blong hem i kam strong moa. Hem i openem wan basket mo tekemaot ol buk we oli wokem long gol. Hem i tanem ol pej mo i soem long Meri raeting we i stap insaed. Hem i promesem Meri se bae hem i kasem blesing.

Saints, 1:70–71

Sam pipol oli no bilivim se buk ia we oli wokem long gol i ril. Josef i bin obei long komanmen blong Lod blong no soem ol buk ia long eniwan. Hem i talem se Lod bae i letem tri moa witnes blong luk ol buk ia. Deved Witma, Martin Haris, mo Oliva Kaodri oli askem sapos oli save stap olsem ol witnes. Lod i talem se oli save stap olsem ol witnes

Doktrin mo Ol Kavenan 5:11–12; 17; Saints, 1:73

Josef, Martin, Oliva, mo Deved oli go long bus blong ol bigfala tri. Oli nildaon mo wanwan i prea mo askem God sapos oli save luk ol buk ia, be i nogat samting i hapen.

Saints, 1:73

Martin Haris i filim se hem nao i risen from wanem oli no ansarem ol prea blong olgeta. Martin i aot, mo ol narawan oli gohed blong prea.

Saints, 1:73

Afta wan enjel i kamaot wetem wan laet we i saen. Hem i soem long Oliva mo Deved ol buk we oli wokem long gol mo ol raeting we oli stap long hem. Oli harem voes blong God i talem se Josef i bin transletem ol buk ia tru long paoa blong God mo translesen ia i stret. God i talem se oli mas talem long evriwan wanem we oli bin luk mo harem.

“Testemoni blong Olgeta Tri Witnes”; Saints, 1:73–74

Josef i go faenem Martin Hem i stap prea yet. Josef i prea wetem hem. Afta enjel i kamaot mo soem ol buk ia long Martin olsem we hem i kamaot long Oliva mo Deved.

Saints, 1:74

Afta, Josef i go lukaotem papa mo mama blong hem, we oli stap visitim Meri Witma. Hem i talem long tufala se hem i glad we ol narafala pipol oli bin luk buk ia we oli wokem long gol. Naoia ol witnes ia oli save talem long ol pipol se Josef i stap talem trutok. Martin i talem long evriwan se hem i glad tumas we God i letem hem blong kam wan long ol witnes.

Saints, 1:74–75

Sam dei afta, Lod i talem long Josef blong soem ol buk ia we oli wokem long gol long eit moa pipol—papa blong hem, tu brata blong hem, fo long ol brata blong Deved, mo tawi blong Deved [man blong sista blong hem]. Oli gat janis ia blong holem ol buk ia mo tanem ol pej blong hem. Oli save se ol buk ia i ril.

“Testemoni blong Olgeta Eit Witnes”; Saints, 1:75

Translesen blong Buk blong Momon i finis nao. Josef i givimbak ol buk we oli wokem long gol i gobak long enjel Moronae. Naoia hem i taem blong printim ol kopi blong buk ia mekem se evriwan i save moa abaot Jisas Kraes.

Saints, 1:75–76

Hem i sas tumas blong printim Buk blong Momon. Martin Haris i salem haf blong fam blong hem blong pem. Hem i mekem olsem from hem i save se Buk blong Momon i tru. Evri kopi blong buk ia i gat testemoni blong Martin Haris mo ol narafala witnes, blong evriwan oli ridim. Ol witnes ia oli neva tanem baksaed blong olgeta long testemoni blong olgeta.

Doktrin mo Ol Kavenan 19:26–27, 34–35; Saints, 1:76–78