Bildimap Nauvu

Lod i bin talem long ol Sent blong kam tugeta long wan niu ples. Hemia i kolosap long wan bigfala reva we oli singaotem Misisipi. Graon ia i wetwet mo i gat sofmad. Long sam pipol, ples ia i no bin wan gud ples blong bildim wan siti. Be Profet Josef Smit i save se wetem help blong Lod, bae oli save mekem i kam naes.

Doktrin mo Ol Kavenan 124:25; Saints, 1:417

Ol Sent oli statem blong wokhad blong mekem i kam wan ples blong laef long hem. Profet Josef i bin singaotem taon ia Nauvu, we i minim “wan naesfala ples.”

Saints, 1:417

Lod i talem long Ol Sent blong bildimap wan haos long Nauvu, wan ples we ol man blong travel oli save kam blong faenem spel long hem. Hem i wantem se Nauvu bae i wan ples we evriwan i filim welkam.

Doktrin mo Ol Kavenan 124:22–24, 60; Saints, 1:426

Lod i talem long Profet Josef Smit se Hem i gat wan bigfala plan blong Nauvu. Hem i wantem ol Sent blong Hem blong kam tugeta long ples ia blong mekem se oli save bildim wan tempol. Hem i askem olgeta blong wokhad olsem we oli save mekem blong bildimap haos blong Hem. Kwiktaem nomo ol Sent oli stat blong stap wok.

Doktrin mo Kavenan 124:25–28, 44, 55; Saints, 1:420–21, 425–27

Lod i bin wantem ol Sent blong bildim wan tempol from Hem i gat ol bigfala blesing blong givim long olgeta. Insaed long tempol, olgeta i save mekem ol kavenan, o ol spesel promes, wetem God. Oli save lanem tu abaot plan blong glad blong Papa long Heven blong evri pikinini blong Hem.

Doktrin mo Ol Kavenan 124:29–41; Saints, 1:453–55

Ol Sent oli wokhad blong bildim tempol, olsem we Lod i askem olgeta blong mekem. I tekem wan longtaem, be olgeta oli glad abaot dei we wanwan long olgeta i save lanem abaot ol spesel promes we Lod i gat blong olgeta insaed long tempol.

Saints, 1:453–55