Stap Aot long Nauvu mo Go long Wes

Ol Sent oli mekem mo kipim ol promes blong olgeta long Lod

Brigham Yang i stap supavaesem Tempol blong Nauvu we oli stap finisim.

Josef Smit i bin ded. Naoia Brigham Yang mo ol narafala Aposol oli lidim Jos. Brigham i save se ol Sent oli nomo stap sef long Nauvu. Bae oli mas lego ples ia. Be, Lod i wantem olgeta blong oli bildim flatem tempol fastaem. Hem i wantem olgeta blong mekem ol kavenan wetem Hem mo sil tugeta olsem famli.

Saints, 1:571, 579–80

Brigham i stap helpem ol Sent oli kasem ol blesing insaed long tempol.

Afta sam manis i pas, tempol i rere blong ol pipol oli mekem ol kavenan blong olgeta insaed long hem. Taosen long ol Sent oli kam long tempol. Brigham i stap long tempol let long naet blong helpem olgeta oli mekem ol kavenan blong olgeta wetem Lod. Long en, Brigham i talem long evriwan se oli mas lego Nauvu.

Saints, 1:582

Brigham i talem long ol Sent se oli mas lego Nauvu.

Taem Brigham i wekap long nekis moning, plante long ol Sent oli stap wet long tempol. Brigham i talem long olgeta se i no sef blong stap long Nauvu. Oli nid blong faenem wan niu hom long Wes. Hem i promesem olgeta se oli save bildimap wan niu tempol taem oli kasem ples ia.

Saints, 1:582–83; 2:13–14

Ol Sent oli askem strong long Brigham blong oli kasem ol blesing insaed long tempol.

Be ol Sent oli no aot. Oli wantem blong mekem kavenan wetem Lod bifo oli statem wokbaot blong olgeta i go long wan niufala hom.

Saints, 1:583

Brigham i gohed blong helpem ol Sent blong kasem ol blesing long tempol.

Brigham i luk ol fes blong olgeta mo i jenisim maen blong hem. Hem i spenem fuldei ia mo nekis dei blong stap helpem ol Sent oli mekem ol kavenan insaed long tempol.

Saints, 1:583

Ol Sent oli lego Nauvu mo statem wan wokbaot i go long wes.

Naoia we ol Sent oli mekem ol kavenan ia wetem Lod, hem i taem nao blong lego Nauvu. Brigham i save se Lod i gat wan ples we hem i rere blong olgeta. Hem i bin luk long wan visen. Oli bin statem wokbaot blong olgeta. Weta i bin kolkol, mo graon i sofmad. Ol pipol oli sik. Oli nomo gat kaekae.

Saints, 2:16–18, 20–21

Brigham mo ol narawan oli stap laef long wan kamp blong sno.

Ol Sent oli gat wan longfala rod blong go. Brigham i stap tingting se olsem wanem olgeta oli save mekem wan longfala mo had wokbaot olsem. Hem i prea from help blong God.

Saints, 2:46

Ol Sent oli stap lukaot gud long wanwan long olgeta long Winta Kwota.

Lod i bin givim wan revelesen long Brigham. Hem i tijim Brigham olsem wanem hem i save lidim ol Sent. Hem i talem long olgeta se oli mas helpem wanwan long olgeta blong lukaot gud long olgeta we oli pua.

Doktrin mo Ol Kavenan 136:1–8

Ol Sent oli stap gohed long wokbaot blong olgeta long wes long spring taem.

Lod i talem long ol Sent se oli mas tingbaot ol kavenan we oli mekem wetem Hem. Sapos oli kipim ol kavenan ia, Hem bae i blesem mo helpem olgeta long wokbaot blong olgeta.

Doktrin mo Ol Kavenan 136:4, 11, 42; Saints, 2:47

Wan famli i stap nildaon long saed blong wan gref.

Wokbaot ia i bin had tumas. Sam pipol oli bin ded. Be from tempol kavenan we oli bin mekem, ol Sent oli save se oli save luk ol famli memba blong olgeta bakegen.

Wilford Woodruff mo Brigham Yang oli stap kam long Sol Lek Vale.

Wan manis i pas, ol fas Sent oli kasem Sol Lek Vale long 1847. Taem Brigham Yang i bin luk vale ia, hem i talem “Hemia stret ples.” Hem i semmak ples ia we hem i bin luk long wan visen. Hemia i ples we ol Sent bae oli sef long hem. Long ples ia oli save wosipim Lod mo mekem wok blong Hem long pis.

Saints, 2:17, 64– 67

Wan art blong eni kaen pikja blong ol tempol mo ol Sent raon long wol.

Long plante yia, plante moa long ol Sent oli bin kam. Oli bildim plante moa tempol, ples we ol pipol oli save mekem ol kavenan wetem Lod. Oli sendem ol misinari i go raon long wol blong tijim gospel blong Jisas Kraes. Jos blong Sevya i gohed blong gro, mo i stap blesem laef blong ol pikinini blong Papa long Heven evri ples.