“Josef mo Oliva, Tufala i Kasem Ol Ki Blong Prishud,” Doktrin mo Ol Kavenan Stori (2024)
“Josef mo Oliva, Tufala i Kasem Ol Ki Blong Prishud,” Doktrin mo Ol Kavenan Stori
Epril 1836
Josef mo Oliva, Tufala i Kasem Ol Ki Blong Prishud
Jisas Kraes mo ol enjel oli visitim Ketlan Tempol
Wan wik afta we oli bin dediketem Ketlan Tempol, wan taosen Sent oli mit long tempol blong wosipim Sevya. I bin Ista Sandei. Josef Smit, Oliva Kaodri, mo ol Twelef Aposol oli givim sakramen long ol Sent.
Doktrin mo Ol Kavenan 110, seksen heding; Saints, 1:239
Afta long sakramen, Josef mo Oliva i faenem wan kwaet ples insaed long tempol, biaen long keten, blong prea.
Doktrin mo Ol Kavenan 110, seksen heding; Saints, 1:239
Taem tufala finis prea, tufala i lukluk i go antap. Jisas Kraes i bin stanap long fored blong tufala! Hem i save se ol Sent oli bin wokhad blong bildim tempol. “Mi akseptem haos ia,” Hem i talem. Jisas i talem long Josef mo Oliva se ol blesing blong tempol bae i karem bigfala glad i go long plante pipol.
Doktrin mo Ol Kavenan 110:1–10
Afta we Jisas i go, profet Moses blong OlTesteman i kamaot long Josef mo Oliva. Hem i givim long tufala ol prishud ki blong karem Isrel i kam tugeta. Hemia i minim se olgeta oli save lidim wok ia blong stap serem gospel. Olgeta oli save sendem ol misinari i go raon long wol blong karem ol pipol i kam long Jos ia blong Sevya.
Nekis wan, profet Elias i kamaot long tufala. Hem i givim long Josef mo Oliva ol ki blong putumbak kavenan blong Ebraham. Hemia i minim se ol Sent oli save kasem long Lod semmak kavenan we Ebraham i bin kasem. Olgeta bae oli gat paoa blong karem gospel mo ol blesing blong God long ol pipol evri ples blong plante yia we i stap kam.
Long en, profet Elaeja i kamaot long tufala. Hem i givim long Josef mo Oliva ol ki blong sil, o blong karem ol famli i kam wan blong taem we i no save finis. Ol wok we ol Sent oli bin mekem insaed long ol tempol bae oli akseptem long heven. Naoia Jos i gat paoa blong mekem wok blong Sevya mo rere blong taem we Hem i kambak long wol.