Meri mo Caroline Rollins

Meri Rollins i gat 12 yia taem ol misinari i visitim feswan Ketlan, Ohaeo Hem i harem olgeta i stap tokbaot Buk blong Momon. Long taem ia, i gat wan kopi nomo blong Buk blong Momon long Ketlan, mo wan Jos lida we nem blong hem Issac Morely nao i gat.

Meri i go long haos blong Brata Morely mo askem blong luk buk ia. Brata Morely i letem hem i holem buk ia. Meri i askem hem sapos hem i save tekem buk ia i go long haos blong hem.

Brata Morely i no wantem givim long Meri kopi blong buk ia. Hem i no bin ridim gud yet buk ia. Meri i askem strong long Brata Morely blong i letem hem i tekem buk ia i go ridim afta bae hem i karem kambak.

Brata Morely i letem. Hem i talem se Meri i save tekem buk ia i go long haos sapos hem i karem i kambak eli long nekis dei. Meri i lukaotem gud buk ia olsem wan tresa. Hem i bin wekap fulnaet blong rid.

Taem we Meri i givimbak buk ia, Brata Morely i sek long hamas nao Meri i bin ridim. Hem i talem, “Pikinini, tekembak buk ia i gobak long haos mo ridim flatem.” Mi save wet”

Meri i faswan long Ketlan we i bin ridim Buk blong Momon kasem en blong hem. Afta we hem i bin ridim finisim, hem i bin mitim Profet Josef Smit. Taem hem i faenemaot hamas Meri i lavem Buk blong Momon, hem i talem se hem i save karem kopi blong Brata Morely. Bae hem i givim long Brata Morely wan narawan.

Samtaem long yia ia, Meri mo famli blong hem i muv i go long Indipendens, Misuri. Meri i stap glad taem ol lida oli stap putum tugeta wan niufala buk ia we oli singaotem Buk blong Ol Komanmen. Buk ia bae i gat plante revelesen we Jisas Kraes i bin givim long Josef Smit.

Doktrin mo Ol Kavenan 67; 70:1–4; Saints, 1:178

Be samfala pipol long Indipendens oli no laekem Jos. Oli wantem ol Sent blong oli aot. Wan dei, sam man we oli kros oli brekem bilding ia we oli stap printim Buk blong Ol Komanmen. Oli sakem masin blong print i kam aotsaed long windo mo saksakem ol pej blong ol Buk blong Komanmen long rod.

Saints, 1:177–78

Meri mo sista blong hem Caroline tufala i stap waj biaen long fanis. Meri i talem long Caroline se hem i wantem blong go karem ol pej bifo oli go nogud. Caroline i talem se hem i fraet long ol man ia we oli stap kros ia. “Bae oli kilim ded yumi ia,” hem i talem. Be Meri mo Caroline tufala i save se ol pej ia oli gat ol toktok blong God long hem.

Saints, 1:178

Tufala sista i wet kasem taem we ol man ia oli no luk tufala. Tufala i ron i go long rod mo karem plante long ol pej we tufala i save karem. Taem tufala i stap ronwe, sam long ol man ia oli luk tufala mo singaot long tufala blong stop. Meri mo Caroline i holem taet strong ol pej ia mo ron hariap i go long plantesen blong kon we i stap kolosap.

Saints, 1:178–79

Tu man tufala i ronem tufala sista ia i go insaed long plantesen blong kon. Ol kon ia oli tol tumas, Meri mo Caroline tufala i no save luk wea ples tufala i stap go long hem. Tufala i go daon long graon mo haedem ol pej blong skripja andanit long bodi blong tufala. Tufala i stap kwaet mo lisin taem ol man ia oli stap lukaotem tufala.

Saints, 1:179

No long taem afta tufala man ia i taet blong tufala sista ia. Meri mo Caroline tufala i sef. Tufala i bin sevem ol pej blong revelesen blong Lod blong Buk blong Ol Komanmen. Tedei ol revelesen ia i stap long Doktrin mo Ol Kavenan.

Saints, 1:179