Oli Bin Atakem Josef mo Sidni

Sam pipol oli laekem wanem we Josef Smit i stap tijim abaot Papa long Heven, Jisas Kraes, mo heven. Be ol narawan oli no laekem wanem hem i stap tijim. Sam long olgeta oli kros mo wantem blong stopem Josef blong stap tij.

Doktrin mo Ol Kavenan 76; Saints, 1:149–50

Wan naet, Josef i wekap let i stap helpem Ema blong lukaotem wan long ol twin blong tufala we tufala i adoptem. Bebi ia i sik tumas.

Saints, 1:150

Ema i karem bebi mo talem long Josef blong hem i spel. From hem bae i prij long nekis moning. Long en, tugeta Josef mo Ema tufala i silip.

Saints, 1:150

Sek nomo, doa i open, mo wan grup blong man we oli kros oli ron go insaed long rum. Ema i singaot taem ol man ia oli karem ol han, leg mo hea blong Josef. Oli bin pulum mo sakem hem i go aotsaed.

Saints, 1:150–51

Josef i traem blong ronwe long ol man ia, be oli holemtaet strong hem. Josef i luk ol man ia oli pulumaot fren blong hem tu Sidni Rigdon aot long haos blong hem.

Saints, 1:151

Ol man ia oli brekem klos blong Josef mo kap saedem hot ta long skin mo hea blong hem. Afta oli kavremap hem wetem feta mo oli ronwe.

Saints, 1:152

Afta we ol man ia oli aot, Josef i wokbaot wetem so bodi blong hem sloslo nomo i go bak long haos. Ema i fraet taem hem i luk Josef. Ol fren we oli stap kolosap oli harem wanem i hapen mo oli hariap blong kam mo help. Ema i pulumaot ol ta long skin blong Josef. Ema mo ol fren blong hem oli help blong lukaotem Josef mo Sidni long naet ia.

Doktrin mo Ol Kavenan 25:5; Saints, 1:153

Long nekis dei, Josef i harem nogud yet. Be hem i jenis mo tijim wan grup blong pipol abaot Jisas Kraes. Sam long ol man we oli bin atakem hem long naet ia oli kam blong lisin long hem i tij. Afta long dei ia, Josef i baptaesem tri man. Hem i gohed blong mekem wok blong Lod, iven taem ol pipol oli traem blong stopem hem.

Doktrin mo Ol Kavenan 24:8; Saints, 1:153