“Ol Aposol oli givim Seves long wan Misin i go long Gret Briten,” Ol Doktrin mo Ol Kavenan Stori (2024)
“Ol Aposol oli givim Seves long wan Misin i go long Gret Briten,” Ol Doktrin mo Ol Kavenan Stori
Julae 1838–Julae 1841
Ol Aposol oli givim Seves long wan Misin i go long Gret Briten
Stap trastem ol promes blong Lod
Long wan revelesen i go long Josef Smit, Lod i singaotem ol Aposol blong go long wan misin, krosem bigfala solwota i go long Gret Briten. Nomata i bin had long Josef blong mekem ol Aposol i go longwe tumas, hem i bin trastem Lod. I bin had tu long ol Aposol blong lego biaen ol famli blong olgeta. Be Lod i promes blong blesem olgeta.
Heber C. Kimball mo waef blong hem, Vilate, i gat wan yang famli. Tufala i gat wan bebi we i gat wan manis nomo. Plante memba blong famli blong tufala oli sik tumas.
Saints, 1:405
Brigham Yang i sik tu, mo famli blong hem i pua. Be waef blong Brigham, Meri An, i talem long hem: “Go mo mekem misin blong yu, mo Lod bambae i blesem yu.”
Saints, 1:404–5
Brigham i stat blong go, be long taem we hem i kasem haos blong Heber, hem i wik tumas mekem se hem i no save wokbaot gud. Hem i bin stap wetem famli blong Heber blong samfala dei.
Saints, 1:405
Meri An Yang i stap lukaot gud long Brigham kasem hem mo Heber i oraet smol blong travel. Tufala tugeta i wik tumas, be tufala wantem blong prijim gospel.
Saints, 1:405
Heber mo Brigham oli talem tata long ol waef blong tufala mo klaem i go insaed long bak blong wan wagun. Tufala i harem nogud blong livim biaen famli blong tufala we oli pua mo sik tumas, Taem wagun ia i stap ron i go, Heber i talem long Brigham, “Hemia i taf tumas.” Hem i wantem blong helpem famli blong tufala blong gat strong tingting. Heber i bin askem long draeva blong wagun blong stop.
Saints, 1:405–6
Insaed long haos, Vilate i harem wan noes. Hem i kam long doa, long ples we Meri An i stap stanap long hem. Tufala i bin luk Heber mo Brigham i stap stanap long bak blong wagun, tufala i stap sakem ol hat blong tufala long ea mo singaot strong, “Hura! Hura! Hura blong Isrel!” Tufala woman i ansa “Tata! God i blesem yutufala!”
Saints, 1:406
Afta long wan longfala trip krosem bigfala solwota, Heber mo Brigham oli kasem Gret Briten. Wetem ol narafala Aposol, oli tijim plante pipol abaot Jisas Kraes mo gospel blong Hem. Taosen long ol pipol oli bin baptaes mo oli bin joenem Jos blong Sevya.
Saints, 1:408–11
Plante long ol pipol we oli bin baptaes long Gret Briten oli muv i go long Nauvu blong help blong bildimap siti mo tempol. Lod i bin kipim promes blong hem blong lukaotem ol famli blong Heber mo Brigham taem oli stap givim seves long Hem olsem ol misinari.
Saints, 1:437–39