Faktri blong Hawn

Willard Smit i bin gat 11 yia. Famli blong hem i stap laef long Faktri blong Hawn, Misuri, wetem ol narafala Sent. Olgeta oli wantem tumas blong go tugeta wetem ol Sent long Fa Wes.

Doktrin mo Ol Kavenan 115:7–8; Saints, 1:347–48

Wan dei, Willard i stap wetem papa mo ol brata blong hem, Sardius mo Alma. Wantaem nomo, oli harem ol masket i faerap mo ol man oli stap singaot bigwan wetem fraet. Ol pipol oli stap kam blong atakem ol Sent.

Saints, 1:348–49

Evriwan oli ron blong faenem wan sefples. Plante man mo pikinini oli haed long stoa blong blaksmit. Papa blong Willard mo ol brata blong hem oli stap insaed tu, be Willard i bin seperet aot long olgeta. Hem i haed biaen long wan pael blong hud. Hem i harem ol masket oli faerap raon long hem.

Saints, 1:349, 353

Willard i ron long wan ples i go long nara ples blong haed. Long en, ol masket oli stop blong faerap. Ol man blong atak ia oli bin lego Faktri blong Hawn

Saints, 1:353

Willard i kam insaed long stoa blong blaksmit blong faenem famli blong hem. Papa blong hem mo Sardius i ded. Be smol brata blong Willard, Alma i laef nomo i stap.

Saints, 1:353

Alma i bin kasem wan sut blong masket long hip blong hem. Kil ia i nogud tumas. Willard i pikimap Alma mo karem hem i go long tenet blong famli blong olgeta.

Saints, 1:353–54

Mama blong Willard, i no save olsem wanem blong helpem hip blong Alma. Be hem i save se God i save mekem. Hem i bin prea, mo hem i harem wan voes we i talem long hem stret wanem hem i save mekem.

Saints, 1:354

Amanda i wasem ol soa blong Alma wetem asis. Afta hem i granem sam rus blong tri mo putum i go long soa blong hem. Hem i fasem hip blong hem wetem klos. “Yu slip olsem, mo yu no muv,” hem i talem “mo Lod bae i mekem wan narafala hip blong yu.”

Saints, 1:354–55

Afta, gavna blong Misuri i talem se ol Sent oli mas aot long stet o bae oli kilim olgeta. Be hip blong Alma i no kam gud yet. Amanda i prea mo askem Lod blong help. Wan voes i talem long hem se Jisas bae i neva lego famli blong hem. Amanda i filim se bae i nogat samting bae i mekem hem i harem nogud.

Doktrin mo Ol Kavenan 88:83; Saints, 1:372, 378–79

Afta nomo we hem i bin prea, Amanda i harem ol pikinini blong hem oli stap singaot. Hem i ron blong go luk olgeta, taem hem i kasem olgeta, Alma i stap ron. “Mi oraet, Mama, Mi oraet!” hem i talem. !Hip blong hem i kam gud bakegen! Hem i bin wan merikel we i kam long Lod. Amanda mo ol pikinini oli lego Misuri blong faenem wan sef ples wetem ol narafala Sent.

Saints, 1:379