“Rilif Sosaeti,” Ol Doktrin mo Ol Kavenan Stori (2024)
“Rilif Sosaeti,” Ol Doktrin mo Ol Kavenan Stori
Maj 1842
Rilif Sosaeti
Ol woman long Nauvu oli givim seves long Lod
Margaret i stap long Nauvu. Hem i stap wok blong Sara Kimball mo i helpem hem blong stap somap. Taem hem i wok, tufala i laekem blong stap tokbaot abaot niu tempol we oli stap bildim long Nauvu. Tufala i glad tumas from tempol ia.
Saints, 1:447
Wan dei, Margaret i luk se plante long ol man we oli stap bildim tempol oli werem ol olfala klos mo i stap brokbrok. Hem i stap tingting sapos Sara mo hem i save wok tugeta blong somap ol niu set blong ol man ia. Sara i laekem tingting ia. Margaret mo hem i toktok long ol nara woman blong fomem wan grup blong helpem ol man blong wok ia.
Saints, 1:447–48
Profet Josef i talem se Lod i glad wetem tingting blong olgeta, mo Hem i gat gudfala samting moa blong oli mekem. Josef i invaetem ol woman ia blong mit wetem hem long Maj 17, 1842. Hem i oganaesem ol woman blong Jos wetem raet mo prishud we hem i gat. Oli disaed blong singaotem grup blong olgeta ia Rilif Sosaeti Woman blong Nauvu.
Saints, 1:448, 450–51
Josef i askem Rilif Sosaeti blong helpem ol pipol blong rere long ol blesing blong tempol mo laef we i no save finis. Olgeta i mas stap olsem ol eksampol blong stap folem Jisas.
Saints, 1:451
Josef i talem tu long Rilif Sosaeti blong oli mas faenem ol pipol we oli pua mo helpem olgeta. Iven ol woman we oli pua oli wantem blong helpem ol pipol we i stap long nid.
Saints, 1:449
Oli bin oganaesem Rilif Sosaeti. Oli bin singaotem Ema Smit blong stap olsem presiden. Hem i singaotem tu kaonsela, Sara Cleveland mo An Witni. Hem i singaotem wan sekretari, Eliza R. Snow
Saints, 1:450
Lod i helpem Ema blong save mekem koling blong hem. Ema i tijim ol woman se olgeta oli save mekem ol gudfala samting blong givim seves long Lod. Hem i wantem wanwan long olgeta blong lukluk long ol wei blong mekem gud. Impoten samting we hem i bin talem long olgeta, i blong lavem ol pipol olsem we Jisas i bin mekem. Plante woman long Nauvu i bin joenem Rilif Sosaeti.
Doktrin mo Ol Kavenan 25:3, 7; Saints, 1:451
Oli bin helpem ol pipol blong rere long ol blesing blong tempol mo oli bin helpem plante famli long Nauvu we oli stap long nid. Long taem ia kasem tedei, ol woman raon long wol oli bin joenem Rilif Sosaeti. Olgeta i gohed blong givim seves long ol pipol mo helpem olgeta blong kasem ol tempol blesing.
Saints, 1:451