Enjel Moronae I Visitim Josef Smit

Tri yia i pas afta long Fas Visen blong Josef Smit. Josef i bin filim nogud tumas from sam mistek we hem i bin mekem afta long taem ia. Hem i stap tingting se God bae i filim olsem wanem abaot hem.

Josef Smit—Histri 1:28–29; Saints, 1:20

Wan naet, afta we evriwan oli stap silip, Josef i disaed blong prea. God i bin ansarem ol prea blong hem bifo finis, mo Josef i save se Hem bae i ansarem olgeta bakegen.

Josef Smit—Histri 1:29; Saints, 1:21–22

Taem we Josef i stap prea, laet i fulumap rum ia. Josef i luk wan enjel i stap stanap long ea long saed blong bed blong hem. Enjel ia i talem se nem blong hem Moronae. God i bin sendem hem i kam. Hem i se, God i bin fogivim Josef mo i gat wan wok blong hem blong mekem. Evri pipol raon long wol bae oli save abaot Josef mo wok ia we God i bin givim long hem.

Josef Smit—Histri 1:30–33

Moronae i talem se i gat wan buk we oli wokem long ol pej blong gol o long gol. Oli berem i stap long wan hil kolosap long hom blong Josef. Buk ia i abaot ol pipol we oli bin stap laef long Ol Amerika long taem bifo. Oli save abaot Jisas Kraes mo gospel blong Hem. Moronae i talem se God bae i helpem Josef blong transletem buk ia, mekem se ol pipol oli save ridim.

Josef Smit—Histri 1:34, 46

Moronae i visitim hem tri taem long naet ia mo bakegen, long nekis dei. Josef i bin talem long papa blong hem, wanem we hem i bin luk. Papa blong Josef i glad tumas. “Hemia wan visen we i kam long God,” hem i talem long Josef.

Josef Smit—Histri 1:35–50; Saints, 1:22–25

Josef i go long hil ia mo faenem ol buk we oli wokem long gol, andanit long wan hevi strong ston. Taem hem i stap wantem blong tajem olgeta, hem i stap tingting abaot hamas praes blong ol gol ia. Moronae i kam mo talem long Josef se hem i no rere yet blong karem ol buk ia. Hem i talem long Josef blong kambak long ples ia evri yia, kasem taem hem i rere blong karemaot.

Josef Smit—Histri 1:51–54; Saints, 1:25–27