Josef mo Ema

Stap wok tugeta blong karem Buk blong Momon i go long wol

Ema Hel i stap sidaon long saed blong reva kolosap long hom blong hem.

Ema Hel i groap long wan bigfala famli long Pensilvania, i no longwe long Niu Yok, ples we Josef i stap long hem. Ema mo famli blong hem, oli biliv long God. Ema i laekem blong rid, singsing, ron long hos, mo padel long wan kenu long reva kolosap long hom blong hem.

Saints, 1:31–32

Josef Smit mo papa blong hem tufala i stap wokbaot long saed blong hom blong Ema Hel. Ema i stap lukluk tru long windo mo stap lukluk long Josef.

Taem Ema i gat 21 yia, Josef Smit mo papa blong hem tufala i kam blong wok blong wan long ol neba blong Ema. Papa blong Ema i invaetem tufala blong kam stap long hom blong hem.

Josef Smit—Histri 1:56–57; Saints, 1:31–32

Josef mo Ema i stap toktok tugeta aotsaed long hom blong Ema. Papa mo mama blong Ema tufala i stap long rod blong doa.

Josef mo Ema tufala i kam blong savsave tufala. Tufala i laekem blong stastap tugeta. Be papa mo mama blong Ema, tufala i no laekem Josef. Tufala i no bilivim se hem i bin luk wan enjel.

Saints, 1:32–33

Ema mo Josef Smit i stap sidaon tugeta long wan open kat we hos i pulum long sno.

Wan yia i pas, Josef i askem Ema blong maredem hem. Ema mo Josef tufala i lavlavem tufala. Tufala i mared mo go stap wetem papa mo mama blong Josef long Niu Yok.

Josef Smit—Histri 1:57–58; Saints, 1:34–35

Ema mo Josef Smit i stap sidaon long wan wilkat we hos i pulum insaed long ol bigfala tri.

Fo yia i bin pas, afta we Moronae i bin talem long Josef abaot ol buk we oli wokem long gol. Taem we i stret taem, Ema mo Josef i go long hil ia, long ples we oli haedem ol buk ia.

Josef Smit—Histri 1:59; Saints, 1:36–37

Moronae i givim ol buk we oli wokem long gol, long Josef Smit.

Enjel Moronae i mitim Josef long hil ia mo i bin givim ol buk ia long hem. Hem i talem long Josef se, sapos hem i traehad blong lukaot gud long ol buk ia, bae oli stap sef.

Josef Smit—Histri 1:59; Saints, 1:37–38

Josef Smit i stap karem ol buk we oli wokem long gol. Wan man i stap ronem hem mo stap traem blong karemaot ol buk ia we oli wokem long gol.

Ol pipol oli bin harem se Josef i holem ol buk we oli wokem long gol, mo sam long olgeta oli traem blong stilim ol buk ia long hem. Josef i mas faenem ol ples blong haedem olgeta. Taem we Josef i stap karem ol buk ia long wan ples blong haedem long ol bus blong ol bigfala tri, sam man oli atakem hem. Hem i pusum olgeta oli foldaon long graon mo ron i go long hom blong papa mo mama blong hem.

Josef Smit—Histri 1:60; Saints, 1:38, 40–41

Josef Smit i tekem ol buk we oli wokem long gol i kam hom mo letem ol famli blong hem oli tajem ol buk ia.

Taem Josef i karem ol buk ia i kam hom, sista blong hem i helpem hem blong putum gud olgeta long tebol. Moronae i bin talem long Josef blong no letem eniwan i luk ol buk ia, be ol famli blong hem oli save tajem ol buk ia we oli kavremap long wan kaliko.

Saints, 1:41

Ema mo Josef tufala i stap muv i go long wan niufala haos.

God i wantem Josef blong transletem ol buk we oli wokem long gol, mekem se ol pipol oli save ridim olgeta. Be ol pipol long Niu Yok oli stap traem blong stilim ol buk ia. Josef i gohed blong stap haedem ol buk ia blong kipim oli sef. So, Josef mo Ema tufala i muv i go long wan haos kolosap long papa mo mama blong Ema. Tufala i hop se bae tufala save transletem long pis.

Josef Smit—Histri 1: 61– 62; Saints, 1:43, 45–46

Josef Smit i stap kisim Ema long fored blong hed blong hem. Hem i stap helpem Josef blong translet aot long ol buk we oli wokem long gol.

Josef i stat blong transletem ol buk ia. Hem i yusum ol spesel tul we God i bin rere long olgeta blong helpem hem. Taem Josef i transletem, Ema i stap raetemdaon wanem we hem i stap talem. Aoa afta aoa, tufala i wok tugeta. Ema i bin sapraes tumas. Hem i save se hasban blong hem i stap translet tru long paoa blong God.

Josef Smit—Histri 1:35; Saints, 1:49