Oli Oganaesem Jos Ia blong Jisas Kraes

Oli printim Buk blong Momon, mo prishud blong God i kambak long wol bakegen. Lod i talem long Josef Smit se, hem i taem blong oganaesem Jos Ia blong Jisas Kraes.

Saints, 1:84

Long 6 Epril 1830, kolosap 40 man mo woman oli kam long hom blong famli Witma mo oganaesem Jos. Lod i bin singaotem Josef mo Oliva blong lidim Jos blong Hem. Josef mo Oliva tufala i askem ol pipol blong leftemap han blong soem se oli sastenem olgeta olsem ol lida blong olgeta.

Doktrin mo Ol Kavenan 20:1–3; Saints, 1:84

Afta, Josef mo Oliva oli blesem Sakramen. Tufala i givim long ol pipol blong helpem olgeta tingbaot Jisas Kraes. Josef mo Oliva tufala i putum han antap long hed blong ol pipol we oli bin kasem baptaes. Faswan oli konfemem olgeta olsem ol memba blong Jos mo givim long olgeta presen ia we i Tabu Spirit.

Doktrin mo Ol Kavenan 20:75–79; Saints, 1:85

Lod i givim long Josef wan mesej blong niufala Jos. Hem i talem long olgeta blong raetemdaon wanem i hapen insaed long Jos. Hem i se Josef Smit i profet blong Hem. Hem i promesem ol memba blong Jos se sapos oli folem ol komanmen we Hem i givim long Josef, Hem bae i blesem olgeta. Devel bae i nogat paoa ova long olgeta.

Doktrin mo Ol Kavenan 21:1–6; Saints, 1:85

!Ol pipol oli hapi blong gat Jos Ia blong Jisas Kraes! Afta long miting, fulap moa pipol oli bin kasem baptaes, wetem papa mo mama blong Josef. Taem we papa blong hem i kamaot long wota, Josef i givim long hem wan bigfala hag. “Mi laef i stap blong luk papa blong mi i baptaes insaed long tru jos ia blong Jisas Kraes!” hem i talem.

Saints, 1:86

Long naet ia, Josef i bin go hemwan long bus blong ol tri. Hat blong hem i fulap wetem glad. Hem i bin 10 yia nao we hem i bin luk Papa long Heven mo Jisas Kraes. Plante samting i bin hapen afta long hemia. !Josef hem i glad from hem i save help blong putumbak, o karem i kambak Jos Ia blong tingbaot Jisas Kraes!

Saints, 1:86