Kamp blong Isrel

Stap lanem blong trastem Lod

Ol Sent long Misuri oli stap laef long ol ten.

Ol Sent we oli stap laef long Indipendens, Misuri, oli nidim help. Oli bin wok had blong bildimap Saeon olsem we God i bin askem. Be ol narafala pipol long taon ia oli no wantem olgeta blong stap long ples ia. Oli mekem ol Sent oli lego ol hom blong olgeta.

Saints, 1:195

Josef Smit i stap lanem abaot ol hadtaem blong ol Sent long Misuri.

Josef Smit i stap laef long Ketlan. Hem i harem wanem we i bin hapen long ol Sent long Misuri, mo hem i bin harem nogud. Hem i bin prea blong save wanem blong mekem. Lod i talem long Josef blong faenem ol pipol blong go wetem hem long Misuri. Oli hop se gavman bae i helpem ol Sent blong oli karembak ol hom blong olgeta.

Doktrin mo Ol Kavenan 103:1–2, 11–20, 30–34; Saints, 1:195–96

Kamp blong Isrel i stap rere blong helpem ol Sent long Misuri.

Abaot 100 pipol oli gat hat ia blong joenem hem. Profet i singaotem grup ia Kamp blong Isrel. Oli glad tumas blong go mo helpem ol Sent long Misuri.

Saints, 1:197–99

Josef i stap talem halo long Brigham Yang, Heber Kimball, mo Wilford Woodruff

Brigham Yang mo fren blong hem Heber Kimball i pat long grup ia. Wan yang man we nem blong hem i Wilford Woodruff i bin kam stret long Niu Yok blong help.

Saints, 1:197–98

Ol memba blong Kamp blong Isrel oli stap spel.

Moa pipol oli joenem kamp ia. Oli wokbaot blong wan ful manis mo krosem wan bigfala reva long Misuri. Oli bin taed mo harem nogud. Longfala wokbaot ia i mekem sam pipol oli harem nogud tumas. Oli gat wan longfala rod yet blong go kasem bigfala taon blong Independens.

Saints, 1:200–201

Wan woman i talem long Josef se wan grup blong ol man oli stap lukaotem Kamp ia blong Isrel.

Taem oli stap wokbaot, wan woman i singaot long olgeta. Hem i talem se sam man oli stap kam blong kilim olgeta.

Saints, 1:203

Faef man we oli ron long hos oli stap givim tritmen long Josef mo Kamp ia blong Isrel.

Kamp blong Isrel oli stop long naet ia long wan hil antap long wan reva. Taem oli stap setemap kamp, faef man oli ron long ol hos oli kam long olgeta. Ol man ia oli stap tok flas se 300 moa man oli stap kam blong atakem kamp ia. Plante memba blong Kamp blong Isrel oli wari. Josef i talem long olgeta blong gat fet se God bae i helpem olgeta.

Saints, 1:203

Josef mo ol narawan oli faenem selta insaed long wan jos.

I no longtaem ol grei klaod oli fulap antap long skae. Hevi ren i stat blong foldaon. Reva i stap kam moa dip. Win i blo mo i mekem plante tri i foldaon. Laetning i laet antap long skae. Josef mo ol narawan oli faenem wan smol jos we oli save stap sef insaed long hem. Oli singsing long ol hym long ful naet ia. “God i stap long strong win ia!” Joseph i talem.

Saints, 1:203–4

Josef i stap talem long ol memba blong Kamp blong Isrel se oli save go hom.

Bigfala win ia i bin stopem ol pipol we oli wantem atakem olgeta. Kamp ia i bin sef. Be gavman i bin talem, bae oli no save helpem ol Sent. Lod i talem long Josef Smit se Kamp blong Isrel, oli save go hom. Ol Sent bae oli bildimap Saeon taem oli stap kipim ol komanmen blong God. Hem i promes se bae Hem i “faet long ol faet blong Saeon.”

Doktrin mo Ol Kavenan 105:1–19; Saints, 1:204–5

Ol memba blong Kamp blong Isrel oli stap toktok wetem wanwan long olgeta.

Sam memba blong kamp oli no glad taem oli harem hemia. Oli harem nogud se oli no save faet blong Saeon. Sam pipol oli ting se Kamp blong Isrel i no save mekem. Be ol narawan olsem Brigham Yang, Heber, mo Wilford, oli glad long janis ia blong stap wetem Profet Josef mo lanem ol samting long hem.

Saints, 1:205–6

Brigham Yang i bin set apat olsem wan Aposol blong Jisas Kraes .

Afta, Lod i talem long Josef Smit blong singaotem Ol Twelef Aposol blong help lidim Jos blong Hem. Ol Aposol oli ol spesel witnes blong nem blong Jisas Kraes raon long wol. Eit long ol Twelef Aposol ia oli bin wokbaot long Kamp blong Isrel ia. Blong stap wok wetem Josef i rere olgeta long impoten koling ia.

Doktrin mo Ol Kavenan 18:26–27; 107:23; Saints, 1:214–17