Elder Ozani Farias

Jar kōn jokāālet ko reppen ekar erom pedped eo n̄an Elder Ozani Farias jān ke ekar dik. Elder Farias ekar jar ālkin an kar iioon mijenede ro ke ekar 15 iiō dettan. E ekar jar n̄an jerbale juon mijen, jeļāļo̧kjeņ (education), m̧are, im iien ko rem̧m̧an n̄an jerbal.

Im jekdo̧o̧n n̄e iaļ eo ekar jab alikkar, e ekar jeļā ta eo ekar aikuj in kōm̧m̧ane.

“Anij ej aolep iien itok m̧okta,” e ekar ba. “Jerbal n̄an E m̧okta. Em̧ōj am lo kōjeraam̧m̧an ko reļļap jān kōm̧m̧ane menin.”

Ļoor im̧we ko jān Jetōb Kwojarjar eo ekar jan̄in kōjbwābweik ļein im lio pāleen, ekar ba. “Ikar katak kajoor eo an revelesōn an juon make. Anij ej kōnono n̄an ajri ro Nejin. Im Anij ewōr juon an karōk n̄an kōj.”

Ozani Barboza Marques Farias ekar ļotak ilo Recife, Brazil, ilo Oktoba 19, 1969, n̄an José Osanã Farias im Severina Barbosa Marques. E im lio pāleen, Giovanna de Medeiros Prata Farias, raar liāp ilo São Paulo Brazil Tampeļ ilo Jānwōde 18, 1994 eo. Ewōr jilu nejier ajri ro.

Elder Farias ekar bōk juon bachelor degree kōn accounting jān Catholic University of Pernambuco, juon postgraduate degree kōn finance jān University of Pernambuco, im juon master of business administration jān Getulio Vargas Foundation. E ekar jerbal n̄an Kabun̄ in ilo jerbal ko rooktak, ekoba āinwōt juon financial menija, human resources menija, im eo kiiō epaak āinwōt juon tōrāāktōr eo an temporal affairs n̄an Brazil Eria eo.

Elder Farias ej kiiō jerbal āinwōt mijen būreejtōn an Georgia Atlanta Mijen. E ekar barāinwōt jerbal āinwōt rikakpilōklōk ilo stake būreejtōnji, kūļōk an stake, ko̧o̧njeļ eutiej, bisop, rikakpilōklōk ilo bisoprik, im rūkaki in Būraimere.