Bōk Koņaad n̄an M̧aanjabpopo n̄an Ro̧o̧ltok eo an Kraist

Ilo “aorōk eo an iien in,” n̄e aelōn̄ in kiin̄ eo an Anij ej ererakļo̧k im tampeļ ko rej pād ilo aolepān laļ in, ewōr juon aikuj eo eļap n̄an jetōb ko rekōņaan bōk koņaer ilo jerbal in an Anij. Lukkuun jerbal āinwōt ro rikaļooran ĀinwōtKraist. Bōtaab jerbal ejeja an jetjet. En̄in unin aō nebar kom̧ rikaļoor ro rej kōjparok bujen eo aer, ekitbuuj mijenede ro nejid rejitenbōro, ro rej likūt kōņaan ko im apan̄ ko ami n̄an jerbal n̄an Anij im jerbal n̄an ro Nejin. Anij ej “itok-limo n̄an kautiej [kwe eo kwoj jerbal n̄an E] ilo jim̧we.” E ej kallim̧ur, “Eļap naaj men eo [wōņāām̧] im indeeo naaj [am̧] aiboojoj.” N̄e jej ba aaet n̄an jerbal, jej ba aaet n̄an Jisōs Kraist. Im n̄e jej ba aaet n̄an Kraist, jej ba aaet n̄an mour eo ejjeļo̧k jemļo̧kin.

Ikar katak menin ke ikar jerbal im ekkatak kōn chemical engineering ilo kaļōj. Kar kajjitōk ippa n̄an erom āinwōt juon rikōm̧m̧an m̧akūtkūt ko n̄an juon ward an ro ejjeļo̧k pāleer. Menin ekar kūr eo aō ekamijak. Mekarta, ikar bōke, im ilo jinoin ekar jālimo. Innām ilo juon m̧akūtkūt juon jiron̄ aiboojoj ekar nebar wāween eo ikar ajej ice cream. Liin ekar bar ro̧o̧ltok jilu alen, kōjatdikdik enaaj kar kareel eō. Kōmro kar kōņaan doon, im liin ekar kajjitōk ippa ruo wiik tokālik. Ekwe, bōlen ebwe an kar m̧ōkaj, im en kar n̄a eo in kar kajjitōk, bōtaab m̧ool eo in: ikar kanooj inepata n̄an jerwane Heidi n̄e inaaj kar ba jaab n̄an kūr eo.

Jej bōk koņaad ilo jerbal in an Anij ejjab kōnke Anij ej aikuji kōj bōtaab kōnke jej aikuj Anij im kōjeraam̧m̧an ko An reļļap. E ej kallim̧ur, “Lo, Inaaj kōjeraam̧m̧an aolep ro rej jerbal ilo jikin kallib grep eo Aō kōn juon jeraam̧m̧an eo ekajoor.” In kwaļo̧k jilu pedped in katak ko me rej katakin ekōjkan an bōk koņaad ilo jerbal eo an Anij ej kōjeraam̧m̧an im jipan̄ kōj m̧aanjabpopo n̄an iioon Rilo̧mo̧o̧r eo.

Eo m̧okta, ilo ad bōk koņaad, jej eddōk m̧aanļo̧k n̄an “lukkuun kōm̧anm̧an eo [ad]”

Jej katak jon̄ok in ilo bwebwenato in Kōm̧anm̧an eo. Ālkin kajjojo raan in jerbal, Anij ekar kile eddōkļo̧k eo kar kōm̧m̧ane kōn ba “bwe em̧m̧an.” E ekar jab ba jerbal eo dedeļo̧k ak em̧m̧an. Bōtaab kajjojo raan ekar wōr em̧m̧anļo̧k, im ilo mejān Anij, em̧m̧an!

Kūr ko rejjab kōmlet ak kapen aorōk ak wōr tokjān eo an juon armej. Ijello̧kin, ilo ad jerbal ippān Anij jabdewōt wāween E ej kajjitōk, jej eddōkļo̧k n̄an lukkuun kōm̧anm̧an eo ad make.

Anij ej lan̄lōn̄ ilo eddōkļo̧k eo ad, im kōn menin jej aikuj, jekdo̧o̧n ej lōn̄ wōt ad jerbal n̄an kōm̧m̧ani. Ilo iien ko emaron̄ jab bwe kajoor eo ad ak wūn ko n̄an jerbal ilo juon kūr. Ekab wōt, jemaron̄ bōk koņaad ilo jerbal eo im kōjparok naan in kam̧ool eo ad kōn wāween ko eļap meļeļeier āinwōt jar im ekkatak jeje ko rekwojarjar. Jemedwōj Ilan̄ ejjab liaakeļo̧k kōj n̄e jej m̧ōņōņō ak jab maron̄ jerbal.

Ruo, jerbal ilo kūr ko ej ļōn̄aj m̧ōko m̧ōd im m̧ōn jar ko n̄an jikin ko rekwojarjar ijo jemaron̄ kaminene mour kōn bujen.

N̄an waanjon̄ak, bujen eo ad n̄an keememej Kraist iien otemjej ej kōm̧m̧an n̄an kajjojo, bōtaab bujen in ej mour ilo ad jerbal n̄an ro jet. Kūr ko rej jepooļ kōj kōn iien ko rem̧m̧an n̄an “ineek … an doon eddo, im kōn menin kakūrm̧ool kien eo an Kraist. N̄e jej jerbal jej iakwe Anij im kōņaan mour kōn bujen ko ad, juon iien jerbal in jipan̄ eo ej āinwōt eddodo im kam̧ōkm̧ōk im jino oktakļo̧k.

Kain̄i ko rejjab lo̧mo̧o̧ren kōj kōnke rej eddo ko ilo jetōb n̄an kadedeļo̧ki. Ijello̧kin, n̄e jej mour kōn bujen ko rej kobaik kōj ippān kain̄i kein, jej erom kain armej eo me ekōņaan pād ilo im̧aan mejān Anij. Meļeļe in ej anjo̧ ioon pere ko n̄an jerbal ak kōņaan ko n̄an jab jerbal. M̧aanjabpopo eo ad n̄an iioon Jisōs Kraist ej kūron̄ n̄e jej bōjrak im kajjitōk ta eo Anij enaaj kōtļok im jino kajjitōk ta eo Anij ej kōņaan.

Jilu, bōk koņaad ilo jerbal eo an Anij ej jipan̄ kōj bōk menin letok eo an jouj an Anij n̄an en̄jake iakwe eo An eļap.

Jejjab bōk wōn̄āān ad jerbal. Ijello̧kin, jeje ko rekwojarjar rej katakin bwe n̄an ad “jerbal [jej] bōk jouj an Anij, bwe [jej] maron̄ kanooj kajoor ilo Jetōb, [obrak] jeļāļo̧kjeņ jān Anij, [im] katakin kōn kajoor im maron̄ jān Anij.” Ej lukkuun juon jerbal em̧m̧an!

Kōn wōt jouj eo an Anij, maron̄ im jab maron̄ ko ad rejjab pedped eo eaorōk n̄an leļo̧k ak bōk juon kūr. Anij ejjab kōtmene jerbal rōm̧m̧an ak tōļan ko rōm̧m̧an n̄an bōk koņaam̧ ilo jerbal in An. Eļan̄n̄e aindein, Queen Esther eban kar lo̧mo̧o̧ren laļ eo an, Piter eban kar tōl Kabun̄ eo jinoin, im Josep Smith eban kar erom Rikanaan eo an Jepļaaktok in.

Ilo ad jerbal ilo tōmak n̄an kōm̧m̧ane juon men eļapļo̧k jān maron̄ ko ad, ad m̧ōjņo̧ ej waļo̧k. Menin ejjamin ineem̧m̧an, bōtaab ej menin aikuj n̄an kōj n̄an “jeļā bwe ej kōn an [Anij] jouj … n̄an kōm̧m̧ani men kein.”

Jenaaj wōtlo̧k elōn̄ alen ilo ad bōk koņaad ilo jerbal in an Anij. Ak ilo ad kijejeto, Jisōs Kraist ej jipan̄ kōj. Ej jidik jidik ļōn̄aj kōj n̄an en̄jake lo̧mo̧o̧r jān likjab ko ad im mijak ko im jān en̄jake āinwōt n̄e jejjab aorōk. N̄e jej kōkkwojarjar kijejeto eo ad ejabwe ak em̧m̧an tata, Anij ej kōļapļo̧k. N̄e jej wujlepļo̧k n̄an Kraist, E ej kōkkwojarjar kōj. Menin ej kajoor in oktak eo an jouj an Anij. Ilo ad jerbal, jej eddōkļo̧k ilo jouj eo m̧ae iien jej pojak n̄an “kotak jān Jema, n̄an jutak im̧aan [Jisōs Kraist].”

Ijjab jeļā aolep men Rilo̧mo̧o̧r enaaj kajjitōk ippa n̄e ij jutak im̧aan Mejen, ak bōlen juon kajjitōk āinwōt “Wōn ro kwar bōktok ippam̧ tok?” Kūr ko rej menin letok ko rekwojarjar jān Jemedwōj Ilan̄ eo em̧m̧an n̄an jipan̄ kōj bōktok ro jet ippādtok n̄an Jisōs Kraist. Kōn menin ij kūr ritōl ro im kōj kajjojo iaad n̄an kōļapļo̧k ad ļōmņak in pukot ro ejjeļo̧k aer kūr. Rōjan̄ im jipan̄ er bōk koņaer ilo jerbal in an Anij n̄an jipan̄ er m̧aanjabpopo n̄an ro̧o̧ltok eo an Kraist.

Jon ekar jab niknik ilo Kabun̄ in ke bisop eo an ekar loļo̧k im jiron̄ e bwe ewōr an jerbal jān Irooj n̄an an kōm̧m̧ane. Ekar kajjitōk ippān Jon n̄an bōjrak an kōbaatat. Men̄e Jon ekar kajjieon̄ elōn̄ alen n̄an bōjrak, iien in ekar en̄jake an juon kajoor jab loe jipan̄ e.

Jilu wiik tokālik, stake būreejtōn eo ekar loļo̧k Jon. Ekar kūr e bwe en jerbal ilo bisoprik. Jon ekar ilbōk. Ekar jiron̄ stake būreejtōn eo ke ej kab baj joļo̧k an kōbaatat. Eļan̄n̄e menin ekar meļeļe in n̄an an joļo̧k iminene eo an n̄an etal n̄an ikkure in football ko ilo Jabōt, ekwe, ekar kanooj in ļap n̄an kajjitōk. Uwaak eo ejim̧we an stake būreejtōn eo ekar ļam waan: “Jon, ejjab n̄a eo ij kajjitōk ippam̧; ej Irooj.”

Jon ekar uwaak, “Eļan̄n̄e ej jekjek eo in, inaaj jerbal.”

Jon ekar jiron̄ eō bwe kaarmejete kein n̄an jerbal raar men in oktak ilo jetōb n̄an e im n̄an baam̧le eo an.

Ij ļōmņak eļan̄n̄e ewōr juon ad men jejjab kile, likjab n̄an leļo̧k kūr ko n̄an kajjojo ro me, n̄an mājin kanniōk eo ad, ej waļo̧k āinwōt eban ak jab wōr tokjān. Ak emaron̄ ļapļo̧k ad n̄ūrbōktak kōn kōtmene eo kōn an juon em̧m̧an an naaj jerbal jān kōn katak in eddōkļo̧k eo, kowaan n̄an lo ekōjkan an Rilo̧mo̧o̧r eo kōļapļo̧k maron̄ eo ilo men ej jab ļōmņake im kam̧oole jān leļo̧k n̄an er iien ko rem̧m̧an n̄an jerbal.

Elder David A. Bednar ej katakin kōn aorōk eo an kappe eo an jeje ko rekwojarjar “kōtļo̧k bwe [kōrā im] em̧m̧aan otemjej ren jeļā jerbal eo [aer], im n̄an m̧akūtkūt.” Jej ke kōm̧m̧ane menin? N̄e ritōl ro im ro jinen im jemān rej kōm̧m̧ane bwe ro jet ren katak im m̧akūtkūt kōn er make, rej ebbōl im juļ. Ilo an iaļ eo epidodoļo̧k maron̄ in leļo̧k n̄an membōr ro retiljek kūr eo kein karuo, eļapļo̧k wāween ko rem̧m̧anļo̧k ej n̄an kūr remaron̄ jab kōņaan n̄an jerbal im kōm̧m̧an bwe ren katak im eddōkļo̧k.

Eļan̄n̄e Kraist ekar pād ijin ilo likio in armej, E enaaj kar loļo̧k rinan̄inmej, katakin kūlaaj in Jabōt Jikuuļ, jijet ippān jiron̄ eo erup būruōn, im kōjeraam̧m̧an ajri ro. E emaron̄ make kōm̧m̧ane jerbal eo An. Bōtaab E ej mour kōn pedped in katak in an kōtļo̧k ad jerbal im katak, bwe E ej jilkinļo̧k kōj ilo Etan.

N̄an bōk koņaad ilo jerbal in an Anij ej itok “jim̧we, maron̄ im eddo n̄an bōk jikin Irooj [Jisōs Kraist].” N̄e jej jerbal n̄an kōļapļo̧k Kraist im jab kōj make, ad jerbal in jipan̄ eo ad ejino m̧ōņōņōļo̧k. N̄e ro jet rej ilo̧k jān kūlaaj, kweilo̧k, loļo̧k an jerbal in karejar, ak lukkuun keememej Kraist eļapļo̧k jān aer keememej kōj, jerbal eo ekajoor.

N̄an lukkuun lale n̄an pijen jenkwan Rilo̧mo̧o̧r, jej erom̧ eļapļo̧k āinwōt E. Bwe ej m̧aanjabpopo eo em̧m̧an tata n̄an iien eo ekwojarjar n̄e kajjojo iaad naaj bukwelōlō im kwaļo̧k bwe Jisōs ej RiKraist eo, eo ij kam̧ool bwe E ej, im bwe Būreejtōn Russell M. Nelson ej An “ainikien … n̄an jem̧ļo̧k ko in laļ” n̄an jipan̄ kōj “pojak … n̄an ta eo enaaj itok.” Ilo et eo ekwojarjar etan Jisōs Kraist, amen.