Karōk in Tūriam̧o Kake

Eprōļ eo ļo̧k, ālkin wōt kar ron̄ ennaan ko me Kabun̄ in ekar wiaik Kirtland Tempeļ, Būreejtōn Russell M. Nelson ekar kūr kōj n̄an katak jar in aje eo an Kirtland Temple, kar jeje ilo jekjōn 109 Katak im Bujen Ko Jar in aje in, Būreejtōn Nelson eaar ba, “ej juon ekkatak kōn wāween an jetōbin tampeļ kōkajoor kwe im n̄a n̄an jelm̧ae mālijjon̄ ko an mour in ilo raan kein āliktata.”

Ijjeļā kwaar ekkatak jekjōn 109 ekōm̧m̧an iaļ in meļeļe ko rem̧wilaļ ļok me rekar kōjeraam̧m̧an eok. Joteenin, inaaj kwaļo̧k jen men ko iaar ekkatak ilo aō kar ļoor kūr eo an rikanaan eo ad. Iaļ eo ej letok aenōm̧m̧an ilo aō ekkatak ekar kakeememej eō bwe Irooj ej tūriam̧o kake im bwe karōk in lo̧mo̧o̧r eo an Jemedwōj Ilan̄ ej lukkuun juon karōk in tūriam̧o.

Ilo am̧ naaj maron̄ jeļā, “mijenede kāāl ro rej kab kar kūr er kar rōjan̄ er n̄an bōk menin letok kwojarjar eo an tampeļ ilo iien eo em̧ōkaj tata im emakijkij n̄an pād ilo tampeļ ilo wāween ko rekkar.” Ilo iien eo em̧ōj aer bōk menin letok kwojarjar, rej barāinwōt “maron̄ jerbal āinwōt rijerbal in … tampeļ m̧okta jān aer jino jerbal in mijenede eo aer.”

Iien eo ilo tampeļ m̧okta jen deļo̧n̄e missionary training center (MTC) emaron̄ juon kōjeraam̧m̧an eo em̧m̧an n̄an mijenede ro rekāāl ilo aer katak eļapļo̧k kōn bujen ko an tampeļ m̧okta jen aer kwaļo̧k kōjeraam̧m̧an kein n̄an peļaakin laļin.

Ak ilo katak jekjōn 109, ikar katak ke, ilo tampeļ eo, Anij ej kōkajoorļok mijenede kāāl ro— em̧ool, kōj aolep—ilo juon kakkobaba, kokwōjarjar em̧ōj an em̧akut. Ilo kar jar in kōjeraam̧m̧an eo, letok kōn revelesōn, rikanaan Josep eaar jar bwe “n̄āāt ro karejeram̧ renaaj ilo̧k jān m̧wiin Im̧ōm … n̄an kwaļo̧k kam̧ool kōn Etam̧,” bwe “bōro ko” an “aolep armej”—jimor eo“ro reļļap ilo laļ” im “aolep rijeram̧ōl, riaikuj ro, im [ro] rien̄taan.” E eaar jar bwe “aer aolep jem̧ļo̧k ko an laļ ren maron̄ jeļā ial m̧okta jān m̧ool eo, ro karejeram̧, ar ron̄ Ainikiōm, im bwe Kwaar jilkinļo̧k kōm.”

En̄iin ej kallim̧ur eo aiboojoj n̄an juon mijenede kāāl em̧ōj kūri—n̄an kwaļo̧k kam̧ool “bwe kalijōkļo̧k ko aer ren maron̄ jako im̧aan m̧ool eo,” n̄an “armej ro ren maron̄ bōk jouj imejān aolep,” im n̄an kwaļo̧k n̄an laļin jeļā er rej ijilōk in Irooj Anij. Em̧ool kajjojo iaad eaikuji kain kōjeraam̧man in. Ej juon kōjeraam̧m̧an bwe būruwōd en pidodo ilo aer iaio̧ ippān ro rituriid im rijerbal ro m̧ōttad. Jar in kōjeraam̧m̧an in ejjab kōmļeļeiki lukkuun wāween iien eo ad ilowaan tampeļ eo enaaj kameoeoik būruwōn ro jet, ak n̄a iaar kam̧oole ej n̄an kalimjōke wōt ilo wāween iien ilowaan m̧weeo eo im̧ōn Anij ej kameoeoik ļo̧k bōro ko būruwōd jān ad reilo̧k wōt ,jan Jisōs Kraist im Pinmuur eo An.

Ke iaar ekkatak jar in aje eo an Kirtland, ikar bwilōn̄ kōn an kar Josep bar akweļap kōn tūriam̧o—kōn membōr ro an Kabun̄ in, n̄an rikojdāt ro an Kabun̄ in, n̄an ritōl ro an laļ en, n̄an laļ ko ilo laļin. Bwe, kōn an juon make, eaar akweļap n̄an Irooj n̄an keemmej e im n̄an bōk tūriam̧okake ioon Emma eo karejeran im ajri ro nejier.

Ewi wāween an Josep kar en̄jake ke, juon wiik tok ālik, ilo raan in Ijtō, Eprōļ 3, 1836, ilo Kirtland Tampeļ, Riļo̧mo̧o̧r eaar waļo̧k n̄an e im Oliver Cowdery im, āinwōt an kar jeje ilo” jekjōn 110 in Katak im Bujen Ko, ej ba, “Iaar bōke m̧wiin, im eta enaaj pād ijin; im Inaaj kwaļo̧k Eō make n̄an armej ro Aō ilo tūriam̧o ilo m̧wiin.” Kallim̧ur in tūriam̧o in ej aikuj kar wōr aorōkin meļeļe eo an n̄an Josep. Im āinwōt an Būreejtōn Nelson kar kwaļo̧k Eprōļ eo ļo̧k, kallim̧ur in ej barāinwōt “io̧o̧k ļo̧k aolep tampeļ ko emōj kōjeraam̧m̧ani.”

Ekanooj lōn̄ wāween ko jemaron̄ lo tūriam̧o ie ilo Mweo Im̧ōn Irooj. Menin ekar baj m̧ool wōt jen jinoin ke Irooj eaar kakien riIsrael ro n̄an kalōk juon tabernacle im juon jikin “tūriam̧o ejijet.” Ilo tampeļ eo, jej loe tūriam̧o ilo bujen ko jej kōm̧m̧ani. Bujen kein, ilo kakkobaba n̄an kain̄i in paptaij, kobaik kōj ippān Jemād im Nejin im letok elapļo̧k ial n̄an ta eo Būreejtōn Nelson eaar katakin kōn “juon iakwe ejeno̧lo̧k im būruwōn tūriam̧o … kar n̄a etan hesed”ilo Hibru.

Jej lo tūriam̧o ilo iien eo em̧m̧an n̄an liāpe baam̧le ko ad indeeo. Ilo tampeļ, jej barāinwōt meļeļe kōn juon meļeļe eo eļap kōn Kōm̧anm̧an eo, Wōtlo̧k eo, en̄taan in pinmuur eo an Rilo̧mo̧o̧r, im ad maron̄ bar deļo̧n̄ļo̧k im̧aan mejān Jemedwōj Ilan̄—ilo m̧ool, aolep m̧ōttan karōk in lo̧mo̧o̧r—ej juon jerbal ealikkar kōn tūriam̧o. Emaron̄ bar ba ke karōk in lo̧mo̧o̧r eo juon karōk in m̧ōņōņō eo ejim̧we kōnke ej juon “karōk in tūriam̧o.”

Ij m̧ōņōņō kōn kallim̧ur in ilo jekjōn 110 ke Irooj enaaj kwaļo̧k E make ilo tūriam̧o ilo tampeļ ko An. Ij bar kam̧m̧oolol kōn ta eo enaaj waļo̧k ilo wāween an Irooj naaj kwaļo̧k E Make ilo tūriam̧o ilo ad, āinwōt Josep, kar akweļap kōn tūriam̧o̧.

Josep Smith ilo jekjōn 109 ekar jab kein kajuon in an akweļap kōn tūriam̧o kōn im̧we an jetōb. Ilo Bukwon Wōjke eo Ekwojarjar, Josep eo edik eaar jab jeļā ewi Kabun̄ eo em̧ool, ak eaar barāinwōt ba ke “eaar jan̄ n̄an Irooj kōn tūriam̧o, n̄an rein eaar ejjeļo̧k oktak n̄an wōn ij aikuj etal ippān n̄an bōk tūriam̧o.” Wāween kile in eaar aikuji tūriam̧o me Irooj wōt emaron̄ leļo̧k jipan̄ kōppeļļo̧k wūntō ko in lan̄. Jilu iiō tok ālik enjeļ Moronai eaar waļo̧k, ālkin jar eo an Josep “kar jar im bukelōlō n̄an Irooj Ekajoor Bōtata n̄an joļo̧k bōd in aolepen jerawiwi ko im manit ko rejjab em̧m̧an.”

Jon̄ak in revelesōn in ej kōn juon akweļap kōn tūriam̧o jen jeje ko rekwojarjar. Inōs eaar ron̄ ainikien Irooj āļkin wōt an jar n̄an joļo̧k bōd. Oktak eo an jemān Kiin̄ Lamonai eaar ijjino kōn jar eo an: “Inaaj joļo̧k aolep aō jerawiwi bwe in jeļā kwe.” Jemaron̄ jab jeraam̧m̧an kōn kain ejja en̄jake in, ak n̄an ro me jet iien epen an uwaak jar, pukot tūriam̧o eo an Irooj ej juon iaan wāween eo ekajoor n̄an en̄jake kam̧ool eo an Jetōb Kwojarjar.

Ejja juon pedped in katak eo em̧m̧an ilo Moronai 10:3–5. Ekkā ad kōkaduiki eoon kein n̄an katakin kōn lukkuun jar, jemaron̄ jeļā n̄e Bok in Mormon ej m̧ool. Bōtaab kōkadudu in jeje emaron̄ kōjool aorōk eo an jerbal in tūriam̧o. Ron̄jake ewi wāween an Moronai jino naan in kōketak eo an: “Ikōņaan kōketak kom̧ bwe n̄e kwōnaaj kōnono jān men kein, … im eļan̄n̄e e mennin mālōtlōt ilo Anij bwe kom̧in kōnono jān i, bwe kom̧in keememej ekōjkan an Irooj kar tūriam̧okake ro nejin armej, jān ejaake an Adam em̧ool laļtak m̧ae iien eo kom̧ naaj bōk men kein, im kejakļo̧kjeņ kōn e ilo būruōmi.”

Moronai ej libjerjere kōj ejjab n̄an wōt riiti men kein—rekoot kein eaar kapeni—ak n̄an bar kōļmenļo̧kjeņilo būruwōd ta eo Bok in Mormon ej kwaļo̧k kake “ekōjkan an Irooj kar tūriam̧o kake ro nejin armej.” Ej juon kejakļo̧kjeņ ioon tūriam̧o an Irooj me ej kepooj kōj n̄anI “kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool.”

Ilo ad kōļmenļo̧kjeņ kōn Bok in Mormon, jemaron̄ kajjitōk: Em̧ool ke, ilo an Alma kar katakin, bwe karōk an Anij kōn tūriam̧o ej kwaļo̧k bwe aolep armej jabdewōt kar pād ioon laļ in renaaj jerkakpeje im er renaaj “bar ro̧o̧l n̄an jōkjōk eo aer m̧o̧kta”? Em̧ool ke Amulek—Rilo̧mo̧o̧r emaron̄ ke tūriam̧o kake aolep n̄an bōk anjo̧ eo me ekar kōļļāik wōnāān “[atpokwoj kōj] ilo pein kōjparok eo”?

Em̧ool ke, āinwōt an kar Alma kam̧oole, bwe Kraist eaar en̄taan ejjab wōt kōn jerawiwi ko ad ak “metak ko im kaen̄tanaan ko” bwe En maron̄ “bōk … kōtļo̧k to ko an mej rej lukwōn̄ armej ro an”? Irooj ej ke lukkuun tūriam̧o kake, āinwōt an kar Kiin̄ Benjamin kar kwaļo̧k, bwe āinwōt menin letok eo ejjeļo̧k wōnāān, Eaar pinmuur “kōn jero̧wiwi ko an … ro raar mej im jab jeļā ankilaan Anij kōn er, ak ro raar jero̧wiwi ilo jajeļo̧kjeņ”?

Em̧ool ke, āinwōt an Liai kar ba, bwe “Adam eaar wōtļo̧k bwe armej ren kar āinwōt; bwe ren maron̄ āinwōt, bwe ren maron̄ m̧ōņōņō”? Im elukkuun ke m̧ool, āinwōt an Abinadai kar kwaļo̧k, kout jān Aiseia, bwe Jisōs Kraist ekar “kinejnej kōn bōd ko ad, im Ekar mao kōn nana ko ad, kaje eo an adwōj aenōm̧m̧an eaar pād Ioon; im kōn jenkwan den̄den̄ ko An jej ājmour”?

Ilo kakkobaba, ej ke karōk eo an Jemād āinwōt an kwaļo̧k ilo Bok in Mormon ej lukkuun kōn tūriam̧o in? Ij kam̧ool bwe e ej im bwe ainōm̧m̧an eo-letok im kōjatdikdik eļap in katakin kōn tūriam̧o ilo Bok in Mormon ej m̧ool.

Ejja wāween in wōt, ij ļōmņak bwe jet emaron̄ pen aer mour, kōjekdo̧o̧n ami riiti jeje ko rekwojarjar im jar, n̄an kile kōjeraam̧m̧an eo an Moronai bwe Jemedwōj Ilan̄ “enaaj kwaļo̧k m̧ool eo n̄an eok, kōn kajoor eo an Jetōb Kwojarjar.” Ijeļā menin epen kōnke iaar en̄jake, elōn̄ iiō remootļo̧k, ilo aō jinoin kar riiti Bok in Mormon im kar jab m̧ōkaj an uwaak jar ko aō.

N̄e kwoj pād ilo apan̄, in kajjitōk ippam n̄an ļoor kapilōk eo an Moronai n̄an kōļmenļo̧kjeņ kōn elōn̄ wāween ko kōn katak ko ilo Bok in Mormon “ekōjkan an Irooj kar tūriam̧o̧ kake [ro] nejin armej”? Pedped ioon aō imminene, ij kōjatdikdik bwe n̄e kwoj kōm̧m̧ane, aenōm̧m̧an eo an Jetōb Kojarjar emaron̄ delo̧n̄e būruwōm im kwomaron̄ jeļā, tōmak, im en̄jaake bwe Bok in Mormon im karōk in lo̧moor kōn tūriam̧o ej katakin ko rem̧ool.

Ij leļo̧k kile im kam̧oolol kōn karōk kein an Jema rem̧m̧an kōn tūriam̧o im n̄an maron̄ eo an Rilo̧mo̧o̧r n̄an kaduwōjetok einwōt juon kien. Ijeļā ke E enaaj kalikar E make ilo tūriam̧o ilo tempeļ eo An ekojarjar im aolep m̧ōttan ko ilo mour ko ad naaj kapukōte E. Ilo etan Jisōs Kraist, amen.