“Kom̧in Kepaaktok Eō”

Ro jeiū im jatū jitōnbōro, ej juon lan̄lōn̄ n̄an eō n̄an lewaj iakwe eo aō ilo kweilo̧k in eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata. En̄in ej Kabun̄ eo An. Jej kuk tok ippān doon ilo em̧ im m̧oko m̧ōd ipeļaakin laļin ilo Etan.

Jej bōke iood Etan ilo ad deļo̧n̄e aelōn̄ in kiin̄ eo An kōn bujen. E eo em̧ōj an jerkakpeje im ekwojarjar Nejin Anij. Kōj armej, dien jerawiwi im mej. Ijoke, kōn iakwe eo An n̄an kōj, E ej karuwaneneik kōj n̄an epaake E.

Erkein rej naan ko An: “Pād epaake E im Enaaj pād epaake e; jej aikuj pukōt E ilo tiljek im jenaaj loe; jej aikuj kajjitōk im jenaaj bōke; jej aikuj kōļļaļaļ im Enaaj kōppeļļo̧k n̄an kōj.”

Ewōr jet iien jej en̄jake ad epaake Rilo̧mo̧o̧r Jisōs Kraist. Ak bōtaab, jet iien ilo mālejjon̄ ko an ilo mour in, jemaron̄ en̄jake etoļo̧k jidik jān E im kōņaan kaeōm̧m̧an ke E jeļā ta ko ilo būruōd im ej iakwe kōj kajjojo armej.

Karuwanene eo an Rilo̧mo̧o̧r ekoba wāween eo n̄an en̄jake kaenōm̧m̧an in. Kepaake E ilo keememej E aolep iien. Tiljek ilo kappukot E ilo jeje ko rekwojarjar. Kajjitōk ilo buruōn jar n̄an Jemedwōj Ilan̄ n̄ān epaake eo Nejin Ejitōnbōro.

Ewōr juon wāween epidodo n̄an ļōmņak kake. Men eo in kwon kar kōm̧m̧ane n̄e kwon kar etoļo̧k jān juon m̧ōttam̧ ejitōnbōro. Konaaj kar kappukot juon wāween kōnono ippaer, kwōn kar kaorōk jabdewōt enaan eo kwoj bōk jān er, im konaaj kar kōm̧m̧ane aolep men komaron̄i n̄an jipan̄ er.

Eļak ikutkut menin, eaetokļo̧k kitien, em̧wilļaļ in jemjerā eo ekajoorļo̧k, im kom̧ naaj en̄jake ami make epaakeļo̧k wōt doon. N̄e ej ettōr wōt iien ilo an ejjeļo̧k ekōnono ko raorōk im iien em̧m̧an n̄an jipan̄ doon, jemjerā eo em̧ōjņoļo̧k.

Jisōs Kraist ej iakwe kōj kajjojo. E ej letok n̄an kōj iien em̧m̧an n̄an epaake tok E. Im ippān juon m̧ōttam̧ eo kwoj iakwe, konaaj kōm̧m̧ane eitōn ejja wāween in, ilo kōnono ilo jar n̄an Jemedwōj Ilan̄ ilo etan Jisōs Kraist, ron̄jake tōl ko raorōk, im jipan̄ ro jet n̄an E ilo m̧ōņōņō. Ejjab to konaaj en̄jake kōjeraam̧m̧an eo an epaake E.

Ke iar jodikdik, Iar en̄jake lan̄lōn̄ ke ij epaake Rilo̧mo̧o̧r—im An epaake eō—ilo jerbal in pokake ko relam waan n̄an kien ko. Ke iar dik kar letok kwojkwoj eo ilo juon iien kweilo̧k in jota. Ij keememej wōt juon baj bon̄, elōn̄ļo̧k jān 75 iiō remootļo̧k, ke ear marok im m̧olo nabōj. Ij keememej juon en̄jake in meram im okm̧āāņāņ ilo m̧ōnjar eo ke ij kile ke iar kōjparok kien n̄an kuk tok ippān Armej ro Rekwojarjar n̄an bōk m̧ōttan kwojkwoj eo, bujen ippān Jemedwōj Ilan̄ n̄an keememej Nejin aolep iien im kōjparok kien ko An.

Ilo jem̧ļo̧kin kweilo̧k eo kōm̧ ar al al eo “Abide with Me; Tis Eventide,” kōn naan ko ie, “O Savior, stay this night with me.”

Naan kein raar boktok juon en̄jake in jetōb ekajoor ippa, mekarta iar juon ļaddik jodikdik. Iar en̄jake an Rilo̧mo̧o̧r iakwe im epaak joteen eo jān kaenōm̧m̧an eo an Jetōb Kwojarjar.

Iiō ko tokelik, iar kōņaan bar bōktok ejja en̄jake in an Rilo̧mo̧o̧r iakwe im epaak eo iar en̄jake E ilo iien kweilo̧k in kwojkwoj eo ke iar jodikdik. Innām iar kōjparok kien im etale jeje ko rekwojarjar.

Ilo bok in Luk, iar riit kōn raan eo kein kajilu ālkin iien Debwāāl im kallib eo An, ke rikarijeran ro ritiljek raar itok, itok wōt jān iakwe eo aer n̄an Rilo̧mo̧o̧r, n̄an kapit Ānbwinin. Ke raar tōpar tok, raar loe dekā eo em̧ōj kadāpil jān lōb eo im lo ke Ānbwinin ar jab pād ijo.

Ruo enjeļ raar jutak im kajjitōk etke raar mijak, ba:

“Etke koṃij pukot eo E mour, ippān ro re mej?

“E jab pād ijin, a eṃōj An jerkakpeje: koṃwin keememej kōjkan An kōnono ñan koṃ ke Ear pād wōt i Galili,

“Im ba, ‘Nejin armej, naaj ketak E ilo pein armej re nana, im naaj debwāāl E, im ilo raan eo kein ka jilu Enaaj jerkakpeje.”

Joteen eo ke ej marokļo̧k, ruo ilo̧k jān Jerusalem ilo iaļ eo ļo̧k n̄an Emmeōs, im Irooj eo em̧ōj an jerkakpeje ar waļo̧k n̄an er im etetal ippaer.

Bok in Luk ej kōtļo̧k ad etetal ippāer joteen eo:

“Im ke rej kōnono im bwebwenato n̄an doon, Jisōs ej make kepaak, im etal ippāer.

“A dāpij mejeir bwe ren jab kile E.

“Im E ba n̄an er, ta men ko kom̧ro kōnono n̄an doon, ke kom̧ etal, im rej bōjrak im būrom̧ōj mejeir?

“Im juon iaer etan Kliopas, e uwaak im ba n̄an E, Kwe ruwamājet wōt ilo Jerusalem, im Kwaar jab jeļā men ko re waļo̧k ijo ilo raan kein ke?”

Raar jiron̄ E kōn būrom̧ōj eo aer bwe Jisōs eaar mej ke raar lōke Enaaj erom Ripinmuur eo an Israel.

Ewōr wāween eo ejelet ilo ainikien Irooj eo ejerkakpeje ke Eaar kōnono n̄an ribūrom̧ōj rein ruo im rikaļoor rein rebūrom̧ōj.

Ilo ad wōnm̧aanļo̧k wōt im riit, ekar itok naan kein me raar kōm̧āāņāņ būruō, āinwōt aō kar en̄jake ke iar ļaddik jidikdik:

“Im rej kepaak jikin kweilo̧k eo, ijo rej ilo̧k n̄an e: Im Ej kōm̧m̧an āinwōt E kōņaan ilo̧k im̧aan ļo̧k.

“A rejro dāpij E, im ba, Kwōn pād ippem: bwe e jota, im e nan̄in bon̄. Im Ej deļo̧n̄ bwe En pād ippāer. Im Ej deļo̧n̄ bwe En pād ippāer.”

Rilo̧mo̧o̧r eo eaar bōk kūr eo joteen eo n̄an deļo̧n̄e m̧ōko im̧ōn rikaļoor ro An. Ear jijet ilo iien m̧ōn̄ā ippāer. Eaar bōk pilawe, kōjeram̧m̧ane, ruje, im leļo̧k n̄an er. Im e peļļo̧k mejeier, im rej kile E. Innām Eaar jakoļo̧k jān im̧aan mejāer.

Luk eaar ļo̧o̧ke n̄an kōj en̄jake ko an rijilōk ro rejeram̧m̧an: “Im rejro ba n̄an doon, Būruwed e jab bwil ilowad ke Ear kōnono n̄an kōj ilo iaļ eo, im ke Ear kameļeļeik Jeje ko n̄an kōjro ke?”

Rikaļoor ro ruo raar em̧m̧ōkajļo̧k jan Jerusalem n̄an jiron̄ Rijilōk ro jon̄oul juon ta eo eaar waļo̧k n̄an er. Ke rej kwaļo̧k en̄jake ko aer Rilo̧mo̧o̧r eo eaar bar waļo̧k.

E kar jutak ioļapier im “ba n̄an er, “Aenōm̧m̧an en ippemi.” Eaar etale kanaan ko an mijen eo An n̄an pinmuur n̄an jerawiwi ko an ajri ro nejin Jemān im n̄an rube tomede ko an mej.

“Im ba n̄an er, Āindein ar je, bwe ri Kraist enaaj en̄taan, im jerkakpeje jān re mej ilo raan kein ka jilu:

“Im bwe enaaj kwaļo̧k ukweļo̧k im jeorļo̧k jero̧wiwi ko ilo Etan nan ri aelōn̄ otemjej, jinoin jān Jerusalem.

“Im kom̧ ri kōnnaan kōn men kein.”

Āinwōt rikaļoor ro An rejitōnbōro, aolep ajri nejin Jemedwōj Ilan̄ ro em̧ōj aer kāālet in deļo̧n̄e kōjām in peptaij iumin bujen n̄an erom juon rikam̧ool n̄an Rilo̧mo̧o̧r im n̄an lale ro rej pād ilo aikuj ilo aolepen mour ko ad. Kallim̧ur in kar kapidodoik n̄an kōj jān rikanaan Alma eo jān Bok in Mormon epepen ko etto ilo Dān ko Mormon:

“Āinwōt kom̧ij kōņaan itok ilo wōrwōr an Anij, im kom̧ij m̧ōņōņō n̄an ineek eddo ko an ro jet, bwe ren maron̄ mera;

“Aaet, im kom̧ij m̧ōņōņō in jan̄ ippān ro rej jan̄; aaet, im kaenōm̧m̧an ro rej pād ilo aikuj in aenōm̧m̧an, im n̄an jutak āinwōt ri kam̧ool ro an Anij ilo aolep iien ko im ilo aolep men otemjeļo̧k, im aolep jikin ko kom̧ maron̄ pād ie … , em̧ool m̧ae mej … bwe kom̧in maron̄ bōk mour indeeo.”

Ilo ami tiljek n̄an kallim̧ur kein, kom naaj lo ke Irooj ej kōjparok kallim̧ur eo An n̄an juon wōt ippami ilo jerbal eo ami im kōm̧m̧ane bwe eddo ko ami ren mera. Kom̧ naaj jeļā E, im ilo iien kom naaj erom āinwōt E im “weeppān ilo E.” Ilo jipan̄ ro jet n̄an Rilo̧mo̧o̧r, kom naaj lo ke komij epaake tok E.

Elōn̄ iami ewōr nejier jitōn bōro ro rej jōbābwe ilo iaļ eo n̄an mour indeeo. Kwoj ke ļōmņak ta eo eļapļo̧k komaron̄ kōm̧m̧ane n̄an kōro̧o̧ltok er. Komaron̄ pedped ioon Irooj n̄an kepaak tok er ilo ami jerbal n̄an E ilo tōmak.

Kom̧ij ke keememej kalim̧m̧ur eo n̄an Joseph Smith im Sidney Rigdon ke raar pād ettoļo̧k jān baam̧le ko aer ilo jerbal an Irooj: “Irooj eaar jiron̄ļo̧k Sidney im Joseph, bwe baam̧le ko aer em̧m̧an aer pād; raar pād ilo Pein, im enaaj kōm̧m̧an n̄an er ta eo Ej peek ej em̧m̧an; Epād aolep kajoor Ippān.”

Ilo ami korak kinej ko an ro repād ilo aikuj, kajoor eo an Irooj enaaj reejetak eok. Pein renaaj erļo̧kwaj n̄an peimi n̄an jipan̄ im kōjeraam̧m̧an ajri ro nejin Jemedwōj Ilan̄.

Aolep rijerbal in bujen an Jisōs Kraist renaaj bōk tōl ilo aer kōjeraam̧m̧an im jerbal n̄an ro jet n̄an E. Innām renaaj en̄jake An iakwe im loe lan̄lōn̄ ilo epaake E.

Ij juon rikam̧ool an Jerkakpeje eo an Irooj āinwōt em̧ool eļan̄n̄e iaar pād ijo joten eo ippān rikaļoor ro ruo ilo m̧weo ilo iaļ eo n̄an Emmaus. Ijeļā ke E emour.

En̄in ej kabun̄ eo An jera—Kabun̄ eo an Jisōs Kraist in em̧ool. Jenaaj, ilo Raan in Ekajet, jutak im̧aan Rilo̧mo̧o̧r eo ilo lukkuun nememein armej. Enaaj juon iien lan̄lōn̄ eļap n̄an ro ilo mour in me raar kepaak E ilo jerbal n̄an E im m̧ōņōņō in ron̄jake naan kein: “Em̧m̧an am̧ kōm̧m̧an kwō karijera em̧m̧an.”

Ij kam̧ool āinwōt juon rikam̧ool an Rilo̧mo̧o̧r eo ejerkakpeje im ad Ripinmuur, ilo etan Jisōs Kraist, amen.