Kōjeraam̧m̧an ko Ejej Uwaer

Jerbal ilo Bisoprik eo Eutiej, ekar wōr aō jeraam̧m̧an n̄an kweilo̧k ippān Armej ro Rekwojarjar ilo Raan Ko Āliktata ipeļaakin laļ in ilo elōn̄ jikin im m̧anit ko. Ejjab bōjrak aō im̧we kōn ami tōmak im wujlepļo̧k n̄an Irooj. Aaet ikar barāinwōt m̧weiur kōn oktak eo im emakijkij in jekjek ko reppen elōn̄ iaami rej jelm̧ae—apan̄ ko āinwōt nan̄inmej, utam̧we in ānbwin, ejjab bwe kein jipan̄, iien ko rem̧m̧an reietļo̧k kōn m̧are im jeļāļo̧kjeņ, kakkure jān ro jet, im idajon̄jon̄ ko ak likjab ko. Jet iien, mālijjon̄ kein remaron̄ bōbraeik eddōkļo̧k eo am n̄an idajon̄jon̄e kijejeto ko am̧ em̧oool n̄an lukkuun mour kake gospel in, kōm̧man bwe en penļo̧k n̄an jerbal, kabun̄ jar, im kakūrm̧ool eddo ko rekwojarjar.

Ro m̧ōtta rejitōnbōro, eļan̄n̄e kwar en̄jake likjab ak jerata kōn jekjek ko ilo mour eo am̧, ikōnaan bwe kwon jeļā menin: Irooj ej lukkuun iakwe eok. E ejeļā jekjek ko am̧, im kōjām eo n̄an kōjeraam̧m̧an ko An rej peļļok wōt n̄an kwe jekdo̧o̧ņ ta apan̄ ko kwoj jelm̧ai.

Ikar katak m̧ool in jān juon en̄jake aō make bwe, men̄e āinwōt ejjab bwe, ekar likūt juon im̧we aitok kitien ilo n̄a. Ke ekar 22 aō iiō, ke ikar jerbal ilo France Air Force eo ilo Paris, ikar bwilōn̄ n̄an jeļā bwe Elder Neal A. Maxwell, juon Rijilōk an Irooj, enaaj kōnono ilo juon kweilo̧k ilo Champs-Élysées eo. Ijoke, m̧okta wōt jān iien eo, ikar bōk kappe n̄an ettōr n̄an juon senior opija n̄an airport eo ilo ejja awa eo wōt kweilo̧k eo enaaj pojak in bōk jikin.

Iaar lukkuun inepata. Jōke ilo būruō n̄an pād, ikar ektuwe opija eo im ekairirļo̧k n̄an kweilo̧k eo. Ālkin lo juon jikin baak, ikar kairļo̧k n̄an Champs-Élysées n̄an jikin kweilo̧k eo im itakļo̧k ikkūjeļok kōn ļalem wōt minit ko m̧okta jān an kweilo̧k eo jem̧ļo̧k. Ke ikar deļo̧n̄ļo̧k, ikar ron̄ an Elder Maxwell ba, “Inaaj kiiō lewaj n̄an kom̧ juon kōjeraam̧m̧an an rijilōk.” Ilo iien eo wōt, ikar bōk juon, jetōb in en̄jake eo iban meļo̧kļo̧ke. Ikar obrak kōn Jetōb, kōn naan in kōjeraam̧man ko raar āinwōt deļo̧n̄ ilo aolepān aō, āinwōt n̄e raar meļeļe āinwōt n̄an n̄a.

Ta eo ikar en̄jake raan jab eo ekar dik bōtaab juon kakōļļe ekajoor kōn juon m̧ōttan kaenōm̧m̧an eo an karōk eo an Anij n̄an ro Nejin: N̄e jekjek ko reļlapļo̧k jān ad maron̄ kōtōbalbali rej dāpij kōj jān kakūrm̧ool ikdeelel ko rejim̧we an būruōd, Iroon enaaj ņa wōņāān ilo wāween ko me rej kōtļo̧k ad bōk kōjeraam̧m̧an ko An kar kallim̧ur kaki.

M̧ool in ej pedped ioon jilu pedped in katak ko raorōk loi ilo gospel eo an Jisōs Kraist kar kōjepļaaktok.

1. Eweppān an Anij iakwe kōj kajjojo. “E ej kūrtok er kōj 18}aolep n̄an itok n̄an ippān im bōk leen em̧m̧an eo an.” Karōk in pinmuur eo An ej kam̧ool bwe aolep, ilo ejjeļo̧k kalijekļo̧k, naaj leļo̧k juon iien em̧m̧an n̄an juon raan n̄an bōk kōjeraam̧m̧an ko an lo̧mo̧o̧r im mour ijo eutiej tata.

2. Kōnke Anij ej jim̧or jim̧we im tūriam̧o kake im An karōk eweppān E ej jamin naaj ņa ruwōd kōn men ko reļļap jān ad maron̄. Elder Neal A. Maxwell ekar kōmeļeļeik bwe Anij … ejjab ļōmņak in tūriam̧o wōt kōn ikdeelel ko ad im jerbal eo ad, ak barāinwōt dettan pen eo me jekjek ko ad rellōn̄ rej itok iood.”

3. Kōn Jisōs Kraist im Pinmuur eo An, jemaron̄ lo kajoor n̄an niknik im aliktata anjo̧ ioon aolep apan̄ ko an mour. Āinwōt an Alma kar katakin, Rilo̧mo̧o̧r eo ekar bōk Ioon make ejjab jerwiwi ko wōt an eo ej ukweļo̧k ak barāinwōt “metak ko im nan̄inmej ko an armej ro An” im “m̧ōjņo̧ ko aer.” Kōn menin, eļapļo̧k jān baj lo̧mo̧o̧ren kōj jān bōd ko ad, tūriam̧o eo im jouj eo an Irooj rej rie kōj ilo kalijōkļo̧k ko, likjab ko, im idajon̄jon̄ ko likūt iood jān en̄jake eo ad ilo mour in.

Bōk kōjeraam̧m̧an kein rej itok ippān jekjek ko rem̧ool. Irooj ej kajjitōk ippād n̄an kōm̧m̧ane “aolep ijo jemaron̄” im n̄an “wūjlepeļo̧k aolep jetōb ko [ad] āinwōt juon katok n̄an e.” Menin ej aikuj juon ikdeelel em̧wilaļ, juon bōro em̧ool im tiljek, im niknik eo ad eļaptata ilo kōjparok kien ko An im kajetjet ankilaad ippān eo An.

N̄e kijejeto ko ad rem̧ool rej likjab jān kōtemen ko ad kōn wōt jekjek ko reļļap jān ad maron̄, Irooj ej maron̄ bōk wōt ikdeelel ko an būruōd āinwōt juon jortak eaorōk. Būreejtōn Dallin H. Oaks ekar katakin, “Jenaaj jeraam̧m̧an kōn ikdeelel in jim̧we ko an būruōd jekdo̧oon n̄e jet jekjek ko itulik kar kōm̧m̧an an ped n̄an ad kōm̧m̧ani ikdeelel ko n̄an m̧akūtkūt.”

Ke Rikanaan Josep Smith ekar inepata kōn ļeo jein Alvin, eo ekar mej ilo an kar jab bōk kain̄i ko an gospel eo remenin aikuj, ekar bōk revelesōn in ekaenōm̧m̧an: “Aolep ro renaaj mej jān iien in m̧aanļo̧k kōn ejjeļo̧k jeļā kōn [gospel eo], ro renaaj kar bōk e kōn aolepān burueer, renaaj rijolōte [aelōj in selestial eo an Anij].” Irooj rekar kakkobaba, “Bwe N̄a, I naaj ekajet aolep amrej raņ ekkar n̄an jerbal ko aer, ekkar n̄an ikdeelel ko an burueer.”

Ta eo aorōk n̄an Irooj ejjab baj men̄e jej maron̄ bōtaab n̄e jej m̧ōņōņō n̄an kōm̧m̧ane aolep jemaron̄e n̄an ļoor E āinwōt ad Rilo̧mo̧o̧r.

Juon m̧ōtta juon iien ekar kaenōm̧m̧an juon mijenede ebūrom̧ōj kōn an kar m̧ōkaj in kōtļo̧ke kōnke kōn ājmour, jekdo̧o̧n ta ko an rem̧ool im lukkuun ikdeelel n̄an jerbal. E ekar kwaļo̧k juon eoon ijo Irooj ekar kean̄ bwe n̄e ajri ro Nejin rej “etal kōn aolepān aer maron̄” im “ab bōjrak ilo aer laļn̄ijn̄ij” n̄an kakūrm̧ool kein ko An, “im rikōjdat ro aer [eo emaron̄ koba jekjek ko rej bōbrae ilo mour ko ad] pinej er jān kōm̧m̧ane jerbal en, ekkar n̄an Eō n̄an jab aikuji jerbal eo ļo̧k wōt jān pein m̧aan ro nejin [armej raņ], ak n̄an bōk joortak ko aer

Eo m̧ōtta ekar kam̧ool n̄an likao eo bwe Anij ekar jeļā ekar leļo̧k ijo em̧m̧an tata ippān n̄an uwaake kūr eo n̄an jerbal. Ekar kam̧ool n̄an ļein bwe Irooj ekar bōk joortak eo an im bwe kōjeraam̧m̧an ko kar kallim̧ur kaki n̄an aolep mijenede ro retiljek jamin maron̄ in būki.

Kōjeraam̧m̧an ko an Irooj emakijkij aer itok kōn jouj im jerbal in jipan̄ n̄an ro jet me rej jpian̄ kōj kadedeļo̧k ta eo jejjab maron̄ kōm̧m̧an kōn kōj make. Ij keememej juon iien ke, ikar jokwe ettoļo̧k jān leddik ro nejim ilo Frane, kōm kar en̄jake jeļo̧k jipan̄ n̄an jipan̄ liin ālkin juon kōmmour eo epen. Ejja wiik eo wōt, ward eo am ilo Utah ekar kappok jipan̄ n̄an juon m̧am̧a eo me ej kab keotak bo. Lio pāleeō, Valérie, ekar baļintiier n̄an bōkļo̧k juon m̧ōn̄ā n̄an liin ilo an jar ilo būruōn n̄an jim̧or m̧am̧a in im leddik eo nejim repād ilo aikuj. Ejjab tok ālkin, kōm kar jeļā bwe sister ro ilo ward eo an leddik eo nejim ilo France rekar kōm̧m̧an karōk n̄an bōkļok m̧ōn̄ā n̄an baam̧le eo an. N̄an kōm, Anij ekar uwaake jar ko am, jilkinļo̧k enjeļ ro An n̄an bōkļo̧k kaenm̧m̧an ke kōm̧ kar jab maron̄.

N̄an jelm̧ae idajon̄jon̄ ko im apan̄ ko, jen kile kōjeraam̧m̧an ko ad—menin letok ko ad, kein jipan̄ ko, im iien—im kōjerbali n̄an jerbal n̄an ro rej aikuj. N̄an kōm̧m̧ane menin, jej jamin naaj kōjeraam̧m̧an wōt ro jet ak kūrtok kemour im wōn̄āān n̄an mour ko ad make.

Juon iaan wāween ko rekajoor tata jemaron̄ jipan̄ kōjeraam̧m̧an ko ņa wōņaer ej kōn jerbal in iminene eo jej kōm̧m̧ane n̄an rūttor ro ad ilo m̧weo im̧ōn Irooj. Ilo ad kōm̧m̧ani kain̄i ko ilo etaer, jej niknik bōk koņaad ilo jerbal in lo̧mo̧o̧r eo eļap an Irooj, kōjerbal menin letok ko ad im maron̄ ko n̄an leļo̧k kōjeraam̧m̧an ko n̄an ro me ekar ejjeļo̧ aer iien em̧m̧an n̄an būki ilo tōre in mour ko aer ilo mour in.

Jerbal in jipan̄ eo em̧m̧an jej ajeļo̧k ilo tampeļ ko rekwojarjar rej kakeememej kōj bwe jouj eo an Rilo̧mo̧o̧r ej eļļā eļeļo̧k jān mour in. Ilo mour ej itok, emaron̄ itok n̄an kōj iien ko rem̧m̧an rekāāl n̄an kadedeļo̧k ta eo jekar jab maron̄ kōm̧m̧ane ilo mour in. Kōnono n̄an sister ro me rejjan̄in kar lo juon m̧ōttaer indeeo, Būreejtōn Lorenzo Snow ekar kwaļo̧k: “Ejjeļo̧k juon Armej Ekwojarjar ilo Raan Ko Āliktata eo ej mej ālkin an mour kōn juon mour etiljek eo enaaj luuji jabdewōt men kōnke ekar likjab in kōm̧m̧ani jet men ko ekar ejjeļo̧k iien kar liļo̧k n̄an ļeo ak lio. … Enaaj wōr aer aolep kōjeraam̧m̧an ko, mour ijo eutiej tata, im aiboojoj eo me jabddwōt em̧m̧aan ak kōrā naaj wōr an me ekar wōr aer iien in em̧m̧an.”

Ennaan in kōjatdikdik in im kaenōm̧m̧an in n̄an aolepādwōj, ro nejin Anij. Ejjeļo̧k iaad emaron̄ ko jān apan̄ ko im idajon̄jon̄ ko an mour in. Ālkin men otemjeļo̧k, jej aolep ļotak kōn juon jolet in ejjeļo̧k maron̄ n̄an lo̧mo̧o̧ren kōj make. Mekarta ewōr juon Rilo̧mo̧o̧r em̧m̧an, im “kōm jeļā bwe ej jān jouj [An] jej mour, ālikin aolep ijo jemaron̄ kōm̧m̧an make.”

Ij kam̧ool bwe ilo an lōn̄ jekjek ko ilo mour in maron̄ ļap jān ad maron̄, ejjeļo̧k iaad ej ettoļo̧k n̄an tōpar kōjeraam̧m̧an ko ejjeļo̧k jem̧ļo̧kier an Irooj. Kōn en̄taan in pinmuur eo An, Rilo̧mo̧o̧r eo enaaj ņa wōņāān aolep m̧ōjņo̧ im kalijōkļo̧k eļan̄n̄e jej ajeļo̧k aolepān ad n̄an E. Ilo etan Jisōs Kraist, amen.