Pinmuur eo an Jisōs Kraist Ej Letok Lo̧mo̧o̧r eo Eļaptata

Pinmuur eo an Jisōs Kraist ej letok lo̧mo̧o̧r eo eļaptata jān mālejjon̄ ko jej jelm̧ae ilo mour in. Būreejtōn Russell M. Nelson ear jiton̄ eō bwe in aje Casper Wyoming Tampeļ eo iiō eo ļo̧k. Ekar juon en̄jake em̧wilaļ im ļap jetōb. Ekar boktok mije eo ealikkar an jerbal eo tampeļ ej kōm̧m̧ane ilo kōjparok ajri ro nejin Anij kōn Pinmuur eo an Rilo̧mo̧o̧r.

Stake ko ilo district eo an Casper Wyoming Temple raar kobaik juon m̧ōttan jikin etetal eo Armej ro Rekwojarjar m̧okta raar kōjerbale ikōtaan 1847 im 1868. N̄an kōppopo n̄an aje eo an tampeļ, iar bar riiti jet bwebwenato in iaļan etetal eo ilo Platte River iturin Casper im itok wōt n̄an Salt Lake City. Iaļan etetal eo ear juon iaļ n̄an bukwi taujin rijibadōktok ro an rālik. Ij mijeļo̧k 60,000 Armej ro Rekwojarjar m̧okta ro raar itok ilo iaļ in.

Eitōn aolep painnier ro raar itok ilo wāikōn, ak maron̄ 3,000 raar itok ilo jon̄oul kombani in waan bwilbwil ko. Rualitōk iaan kombani in waan bwilbwil kein raar etal ilo iaļ eo ilo tōprak eļap im jejjo wōt raar mej. Kombani in waan bwilbwil ko an Willie im Martin ilo 1856 ar juon oktak.

Iar etale bwebwenato ko an kombani ko an waan bwilbwil ko an Willie im Martin jān iien eo ear jino an waļo̧k ļan̄ ko renana. Iar jino kile apan̄ ko raar jelm̧ae ilo aer kijoon Sweetwater River, Martin’s Cove, Rocky Ridge, im Rocky Creek Hollow.

Between Storms, jān Albin Veselka

Ijan̄in kar pād lowaan Caspel Tampeļ m̧okta jān aje eo. Ke ij deļo̧n̄e etōņaak eo, iar m̧ōkaj in kalimjōkļo̧k juon jin̄a in waan bwilbwil kar ņa etan Between Storms [Ikōtaan Ļan̄ Ko]. Jin̄a eo ear alikkar ke ear jab tōn kwaļo̧k jorāān ko me raar waļo̧k. Ke ij kalimjōkļo̧k, iar ļōmņak, “Ejim̧we jin̄a in; elōn̄ iaan painnier ro me raar bwilbwil wa raar jab en̄jake jorāān ko.” Ikar en̄jake ke menin āinwōt mour in. Jet iien jej pād ikōtaan ļan̄ im jet iien ikōtaan ko̧do im meram in aļ.

Heaven’s Portal, jān Jim Wilcox

Ke ij jitļo̧k n̄an jin̄a eo ilo kiin em̧ turājet, ņa etan Heaven’s Portal [Jikin Deļo̧n̄ an Lan̄], iar kile ke jin̄a in eaiboojoj me kar ņa etan “Devil’s Gate,” ilo an Sweetwater River toorļo̧k ie, ej kwaļo̧k aiboojoj in kōm̧anm̧an eo an Anij, jab baj apan̄ ko painnier ro raar jelm̧ae wōt ilo iien m̧oļo eo enana.

Innām iar reim̧aanļo̧k, tulik in tebōļ in tampeļ recommend eo, iar lo juon jin̄a in Rilo̧mo̧o̧r eaiboojoj. Menin ear m̧ōkaj im kair eļap en̄jake in kam̧m̧oolol. Ilo juon laļ eļap an eaiboojoj, ebar ļap mennin apan̄ ko. Ilo ad oktakļo̧k n̄an Jisōs Kraist, Rilo̧mo̧o̧r eo an laļ, E ej kōjparok kōj jān ļan̄ ko an mour in kōn Pinmuur eo An ekkar n̄an karōk eo an Jemed.

N̄an n̄a, etōņaak eo ear juon jikin kōppopo ejejjet n̄an ruum̧ in kain̄i ko an tampeļ me rej kōtļo̧k ad bōk kain̄i ko an mour utiejtata, kōm̧m̧ani bujen ko rekwojarjar, im bōk im en̄jake likio in kōjeraam̧m̧an ko an Pinmuur eo an Rilo̧mo̧o̧r. Karōk in m̧ōņōņō eļap an Jemed ej pedped ioon pinmuur in lo̧mo̧o̧r eo an Rilo̧mo̧o̧r.

En̄jake eo an painnier ro ej letok n̄an Armej ro Rekwojarjar juon mantin bwebwenato eoktak im bwebwenato in jetōb eo ekajoor an aolep. N̄an jet, em̧akut eo kar kōm̧m̧ane iumin elōn̄ iio ālkin kar jilkinļo̧k er jān Missouri im Nauvoo jimor. N̄an ro jet, ekar ijjino ālkin an Būreejtōn Brigham Young kōjeļļā kake karōk eo an waan bwilbwil ko, eo me enkar kōm̧m̧an bwe en pidodo kōļļā wōn̄aān em̧akut eo. Edikļo̧k jidik wōņāān waan bwilbwil ko jān waikōn ko im ox.

Juon mijenede ilo England, Millen Atwood, ekar ba ke raar kōjeļļā kōn waan bwilwbil ko, “ekar āinwōt urur in kijeek ej tile meno̧kno̧k, būruōn Armej ro Rekwojarjar are jutak kōn lan̄lōn̄ im m̧ōņōņō.” Elōn̄ raar “jar im jitlo̧k raan n̄an raan, im bon̄ n̄an bon̄, bwe ren maron̄ koba ippan ro jeier im jatier ilo toļ ko.”

Elōn̄ Armej ro Rekwojarjar ro raar pād ilo waan bwilbwil ko raar ioon men ko reppen ak raar jeer jān men ko reļlļap renana. Ak ruo kombani in waan bwilbwil, Willie kombani im Martin kombani, raar ioon kwole, jejedwawa ilo ļan̄ ko renana im m̧olo, im elōn̄ mej.

Eitōn aolep armej ro raar jerak tok jān Liverpool, England, ilo Māe 1856 ioon ruo tima. Raar itaaktok ilo jikin waan bwilbwil eo ilo Iowa City ilo Juun im Juļae. Mekarta kakōlkōl ko, kombani kein jimor raar lukkuun rum̧wij aer em̧akutļo̧k n̄an Salt Lake Valley.

Būreejtōn Brigham Young ear jino an jeļā kōn jekjek in enana an kombani kein ilo Oktoba 4, 1856. Raan eo tok juon ear jutak im̧aan Armej ro Rekwojarjar ilo Salt Lake City im ba, “Elōn̄ iaan ro jeid im jatūd m̧aan im kōrā repād ilo meļaaj ko kōn waan bwilbwil ko, … aikuj bōktok er n̄an ijin; im jej aikuj bokļo̧k jipan̄ n̄an er … m̧okta jān an lukkuun iien m̧olo.”

Ekar kajjitōk bwe bisop ro ren letok 60 tiim in mule ko, 12 ak lōn̄ļo̧k wagon, im 12 ton in pilawe im kean̄, “Etal im boktok armej ro kiiō ilo meļaaj ko.”

Koba in oran painnier ro ilo kombani in waan bwilbwil ko an Willie im Martin ekar pād iturinļo̧k 1,100. 200 jima iaan Rikwojarjar rein raorōk raar mej ilo iaļ eo. N̄e eban itok rilo̧mo̧o̧r ilo iien eo, elōn̄ļo̧k remaron̄ mej.

Iien m̧olo eo ear jino epaake ruo wiik ālkin an ri kōjparok ro jinountata em̧akut jān Salt Lake City. Bwebwenato ko in ro uwaan Willie im Martin kombani rej kōmeļeļeik apan̄ ko rekabūrom̧ōjm̧ōj ālkin an ļan̄ ko jino waļo̧k. Bwebwenato kein rej bar kwaļo̧k lan̄lōn̄ eo eļap ke rikōjparok ro tōpraļo̧k.

Ilo an kōmeļeļeik iien itok eo, Mary ekar ba, “Kemjaļaaļ ar wotlo̧k imejān em̧m̧aan ro,im ajri ro raar eb ilo m̧ōņōņō. M̧ōkaj in wōt an armej ro maron̄ kalur en̄jake ko aer, aolepaer raar juubkwe ilo jiņo im leļo̧k kam̧m̧oolol n̄an Anij.”

Ruo raan tokelik, Willie im Martin kombani raar etal lo iaļ eo epen tata, kijoone Rocky Ridge, ibulōn ļan̄ in m̧olo. Eo āliktata ear jab tōpar kāām eo m̧ae 5:00 jibon̄en eo juon. Jon̄oul jilu armej raar mej im kar kalbwin er ilo juon wōt lōb.

Ilo Nobōm̧ba 7, Willie kombani ear epaake Salt Lake Valley, bōtaab jibon̄en eo, ear bar mej 3 armej. Ruo raan tokelik, Willie kombani raar tōpar Salt Lake, ijo ar wōr juon karuwanene eļap n̄an er im kar boktok er n̄an moko m̧ōn Armej ro Rekwojarjar.

Ejja raan eo wōt, Maritin kombani raar etoļo̧k 325 m̧ail (523 km) ilo iaļ eo, raar en̄taan wōt jān m̧olo im jabwe m̧ōn̄ā. Jejjo raan m̧oktaļo̧k, raar kejoone Sweetwater Rier n̄an tōpar ijo em̧ōj ņa etan kiiō Martin’s Cove, ijo raar kōjatdikdik in kar lo kōjparok jān ļan̄ ko. Juon iaan painnier ro ar ba, “Kar juon iien kejoon reba enana tata ilo em̧akut eo.” Jet iaan rikōjparok ro—āinwōt jim̧m̧aan jim̧aō, David Patten Kimball, eo kar 17 iiō drettan, ippānļo̧k rūm̧m̧an ded ro m̧ōttan, “George W. Grant, Allen Huntington, Stephen Taylor, im Ira Nebeker, raar joļo̧k eļap iien ilo dān eo em̧olo,” raar jipan̄ kombani eo ilo peran kejoon Sweetwater.

Mekarta n̄e iien in ekar ļap mije, ke ij ekkatak eļapļo̧k kōn rikōjparok ro, iar kile ke aolepaer raar ļoor rikanaan eo im kar kōm̧m̧ane jerbal eo eaorōk ilo kōjparok tok Rikwojarjar ro raar ejjeļo̧k iaļier. Aolep rikōjparok ro raar peran, barainwōt ro raar em̧akut tok.

Ilo ekkatak bwebwenato eo aer, ij kam̧m̧oolol kōn jemjerā ko raorōk im visōn eo ejjeļo̧k jem̧ļo̧kin eaetok ibwiljin ro raar em̧akut tok. John im Maria Linford im ajri ro jilu nejier raar ro uwaan Willie kombani. John ar mej awa ko m̧okta jān an rikōjparok eo jinointata tōpar tok. E kar jiron̄ Maria ke em̧ōņōņō bwe ar kōm̧m̧ane em̧akut eo. “Iban mour n̄an tōpar Salt Lake,” ekar ba, “bōtaab kwe im l̗addik ran̗e kom̗ naaj, im ij jab ajlo̗k kōn ta ko jekar debl̗o̗ke n̄e l̗addik ran̗e nejirro remaron̄ rūttol̗o̗k im kōkkaajriri baam̗le ko aer ilo Zaion.”

Būreejtōn James E. Faust ekar kōkaduik naan ko an rekabwilōn̄lōn̄: “Kōn kijejeto ko reperan an paineer ro, jej ekkatak juon m̧ool eļap. Aolep rej aikuj kejoon kijeek an juon rikarreoik, im men ko reddik im rejjab aorōk ilo mour ko ad remaron̄ makonļo̧k āinwōt meno̧kno̧k im kōm̧m̧an bwe tōmak ko ad ren romaak, kijn̄en̄e, im kajoor. Āinwōt ewōr likiieo in liaajļōļ, būrom̧ōj, im rup bōro ippān aolep armej, ekoba ro me rej kijejeto ilo kappukot n̄an kōm̧m̧ane men eo ejim̧we im tiljek. Ak m̧ōttan karreo eo in n̄an ekkeijel ippān Anij.”

Pinmuur eo An ej kipel jekjek in indeeo im Jerkakpeje eo, Rilo̧mo̧o̧r ar rupi “to ko an mej, kōnke Eaar bōk anjo̧ ioon mej” n̄an aolep armej. N̄an ro me em̧ōj aer ukweļo̧k jān jerawiwi ko aer, E ear “bōk ioon make nana ko im jero̧wiwi ko aer, im Eaar lo̧mo̧o̧ren er, im kabun̄-būruōn akweļap ko an jim̧we.”

N̄e ejjab Pinmuur eo, jeban maron̄ lo̧mo̧o̧ren kōj make jān jerawiwi im mej. Ilo an jerawiwi maron̄ juon men eļap ilo mālejjon̄ ko ad,men ko reppen an mour in rej ejaak jān bōd, kāālet ko renana, m̧akutkut ko renana an ro jet, im elōn̄ men ko me jejjab kipeli.

Kwaļo̧k Gospel eo Aō ej katakin: “Ilo ad kōjatdikdik ioon Jisōs Kraist im Pinmuur eo An, E emaron̄ jipan̄ kōj niknik ilo mālijjon̄ ko ad, nan̄inmej ko, im metak. Jenaaj obrak kōn lan̄lōn̄, aenōm̧m̧an, im jokne. Aolepen men ko reppen im kaen̄tanaan kōn mour in remaron̄ kōm̧m̧an bwe ren jim̧we kōn Pinmuur eo an Jisōs Kraist.”

Ilo iien Ijtō in, jej mije Rilo̧mo̧o̧r im en̄taan in pinmuur eo An. Pinmuur eo ej letok kōjatdikdik im meram ilo juon iien me elōn̄ rej pād ilo marok. Būreejtōn Gordon B. Hinckley ear kean̄, “N̄e naaj etale aolep bwebwenato, … ejjeļo̧k juon men em̧m̧an, eaiboojojļo̧k, eļap jān jerbal in jouj in.”

N̄aij kwaļo̧k bun̄tōn kein jilu me ij ļōmņak raorōk n̄an raan kein ad.

M̧oktata, jab pere aorōk in kōm̧m̧ane ta eo jemaron̄ n̄an lo̧mo̧o̧ren ro jet jān apan̄ ko an kannieōk, eļaptata ko an Jetōb.

Kein karuo, bōk ilo kam̧m̧oolol Pinmuur eo an Rilo̧mo̧o̧r. Kōj aolep jej aikuj kajjieon̄ kwaļo̧k lan̄lōn̄ im m̧ōņōņō jekddon n̄e jej jelm̧ae apan̄ ko an mour in. Kōttōbar eo ad ej aikuj in n̄an mour ilo m̧ōņōņō ilo turājet in iaļ eo me emeram. Iar lale ļo̧k eo rājetū eaorōk, Mary, kōm̧m̧ane menin ilo aolepen mour eo an. Ij kam̧m̧oolol kōn paotok eo an erabolbol im kōketak mekarta kem kar ioon jorrāān ko ilo mour eo am.

Kapilōk eo aō kein kajilu ej n̄an kōjenolo̧k iien n̄an tiljek ilo kejōkļo̧kjen Pinmuur eo an Rilo̧mo̧o̧r. Elōn̄ wāween ko n̄an kōm̧m̧ane menin ilo etal in tōmak ko ad make. Ijoke, pād ilo kweilo̧k in kwojkwoj eo im bōk m̧ōttan kwojkwoj eo eaorōktata.

Ebar aorōk etal n̄an tampeļ aolep iien ijo emaron̄. Tampeļ eo ej letok juon kein kakeememej Pinmuur eo an Rilo̧mo̧o̧r im ta eo ear eļļā jān e. Im, ļapļo̧k an aorōk, etal n̄an tampeļ ej kōtļo̧k bwe jen letok jetōb in lo̧mo̧o̧r n̄an ro jej iakwe er remej im ro jet nukud.

Būreejtōn Russell M. Nelson, ilo kweilo̧k eo ad āliktata, ekar kalikkar pedped in im kar kakkobaba,“kōjeraam̧m̧an ko [an tampeļ] … jipan̄ kōj kepooj armej ro renaaj kepooj laļin n̄an Itok eo an Irooj Kein Karuo!”

Jejjab aikuj meloklok en̄taan im waanjon̄ak ko an epepen ko m̧oktaļo̧k, ak ad nebar, kam̧m̧oolol, im kabun̄jar ej iakuj pedped ioon Rilo̧mo̧o̧r eo an laļ im en̄taan in pinmuur eo An. N̄aij kam̧ool bwe kii eo n̄an karōk in m̧ōņōņō eļap an Jemed ej Pinmuur eo Rilo̧mo̧o̧r kōm̧m̧an jān ad Rilo̧mo̧o̧r, Jisōs Kraist. E ej mour im tōl Kabun̄ in An. Pinmuur eo an Jisōs Kraist ej letok lo̧mo̧o̧r eo eļaptata jān men ko jej jelm̧ae ilo mour in. Ilo etan Jisōs Kraist, amen.