Mool n̄an Tōmak eo ro Jined im Jemād raar Kōjparoke

Ke iaar loļo̧k Tampeļ eo ilo Nashville Tennessee n̄an bar lale juon alen, ikar jeraam̧m̧an n̄an kōm̧m̧ane juon iien alooj āinwōt mōttan wōt jerbal in, lale mwiin aiboojoj im̧ōn Irooj. Ikar lukkuun bwilōn̄ kōn pijain Mary Wanlass kar nae etan Wōnmaanļo̧k in Niknik an etoto dipin opij in matron eo.

En̄in ej bwebwenato eo kōn pija in:

Ilo Missouri ilo 1862 Mary Wanlass eo me 14 an iiō ekar kallim̧uri riab in jinen bwe enaaj loe bwe jemān eo me emōjno [im ro redik ļo̧k emān jatin renaaj aolep tōprak] ļo̧k Kom̧laļ eo Eļap an Salt Lake. Mary ekar tōl ļo̧k ox im kau ko me rej kwaļo̧k milik me rekar iuunļo̧k waikōn eo ijo jemān ekar babu wōt ie, im liin ekar oņaake … ro jatin. Ālkin kajjojo iaļ ko, liin ej naajidik baam̧le eo jān an aiintok menin eddōk ko rem̧m̧an n̄an m̧ōn̄ā, wūt ko, im berri ko. Kam̧bōj eo an eaar kōmeļeļe eo dee eo liin eaar bōke n̄an itoitak i rilik m̧ae iien kōdo̧ ko retōtoḷọk in kapin lan̄ rej loi.

“Rekar tōprak [ļo̧k] Utah Valley ilo Jebtōm̧ba, ālkin kar itoitak aolepen spring im summer eo. Jemān liin ekar mej ejjab to ālkin an baam̧le in kar kwon ilo Utah County, ijo Mary ekar tokālik m̧are im jino baam̧le eo an make.”

Menin ej juon bwebwenato ekabwilōn̄lōn̄ kōn tōmak im kajoor an juon jiron̄ eo 14 an iiō me emaron̄ jipan̄ juon iaad rainin n̄an “wōnmaanļo̧k in niknik.”

“Wōnmaanļo̧k in niknik”—ak n̄an ukōt tok ilo kajin eo aō Dutch, Gewoon doorgaan—ej barāinwōt mato eo an jinō im jema.

Ro jinō im jema im jinen im jemān kōrā eo ippa rej painier ro ilo baam̧le eo ad. Rekar kijoone “meļaaj,” ko aer make āinwōt ro otemjej rej itok n̄an Kabun̄ in, wōrwōr an Anij, aolep raan. Bwebwenato ko aer ej kōnono jidik kōn ox im waikōn ko ijoke ewōr ie ejja ta eo ej waļo̧k n̄an epeepen ko tokālik.

Rekar m̧ōņōņō kake gospel eo im rekar peptaij ilo iiō in jodikdik im rūtto ko aer. Jimor jinō im jema ekar pen n̄an er ke raar ajri wōt. Jema ekar rūttoļo̧k ilo aelōn̄ in Java ilo Indonesia. Ilo tōrein Bata eo an Laļ in kein Karuo, kar kōjenolo̧ke jen baam̧le eo an im kar kalbuuji ilo juon kāām, ijo im eaar lukkuun en̄taan ke eaar juon jodikdik.

Jinō ekar rūttoļo̧k ilowan juon baam̧le eo erub im bar en̄taan jān n̄ūta im men ko reppen jen Bata eo An Laļ in kein Karuo. Jet iien liin aikuj in m̧ōn̄ā wut ko men̄e ekar jab kōņaan. Kōn wōt kōm̧m̧an ko an Jemāņ im an jepel jāņ eo jinen, ekar jet iien pen an loe Jemedwōj Ilan̄ āinwōt juon Jemān eo ej iakwe.

Jinō im Jema rekar ioon doon ilo juon makūtkūt an Kabun̄ in im ejjab etto raar ļōmņak in m̧are im kar liāp ilo Bern Switzerland Tampeļ eo. Kar kōttar ilo railway station eo, kar joļo̧k āliktata iien ko aer n̄an tūreep eo n̄an tam̧peļ eo, rej ļōmņak elmen aer maron̄ pojak ak raar lōke bwe aolep men im naaj tōprak. Im ekar tōprak!

Raar jino in karuttoļo̧k baam̧le eo aer jān lukkuun ettā tata kōm̧m̧an in juon wōt ruum ilo jikin eo ilo borwaj eo. Ālkin jejjo iiō ko in kwaļi nuknuk ko aer kōn pā, āliktata rekar kōjeparok ebwe jāān n̄an wia juon mijiin in kwaļkwoļ. Mokta wōt jen aer maron̄ kar wia, bisop eo ekar loļo̧k er, kajjitōk jipan̄ n̄an kalek m̧ōn kweilo̧k eo ilo Amsterdam. Rekar ļōmņak in leļo̧k aolep men ko ippāer im raar kōjeparoki n̄an mijiin in kwaļkwoļ eo im wōnmaanļo̧k wōt in kwaļkwoļ kōn pā.

Āinwōt juon baam̧le kōm ekar ilo̧k deplo̧ki jet iien ko reppen, āinwōt bar jet baam̧le. Men kein raar kōm̧m̧an wōt ad kajoor ļo̧k im kar kamwilaļ ļo̧k tōmak eo am ilo Irooj Jisōs Kraist, āinwōt iien eo Alma ekar kwaļo̧k bwebwenato eo an ippān ļaddik eo nejin Hilamōn, ijo ekar jiron̄ e bwe emōj an kar bōk kar “jipan̄ ium̧win mālejjon̄ ko im inepata ko otemjej” kōnke eaar likūt an lōe ilo Irooj Jisōs Kraist.

Ewi wāween an ruo armej ro rekar en̄jaake elōn̄ mālejjon̄ ko ilo iiō in jodikdik ko aer im jino erom̧ ro jinen im jemen rem̧m̧antata me imaron̄ in kōņaan? Uwaak eo epidodo: rekar lukkuun m̧ōņōņō kake gospel eo im mour jān bujen ko aer n̄an rainin!

Ālikin elōn̄ ļo̧k jen 65 iiō in pālele, jinō, eo me ekar en̄taan jān nan̄inmej in eppaļ, kar jako ilo Pāpoode. Jema, ke eaar 92 im kar mour wōt ilo m̧ōn lale rūtto, ekar emakijkij an loļo̧k jinem mae iien ekar jako. Jet iien emootļo̧k jema ekar kōnono n̄an ro jatu reddikļo̧k kake en̄jake ko rakaamijak ilo kāām eo ilo Indonesia ilo tōrein Bata eo an Laļ in kein Karuo kar kepooj e n̄an kijenmej im oņaake lio pāleen elōn̄ iiō ko ke lieo ekar n̄an̄inmej im nana jān nan̄inmej ko rakaamijak im barāinwōt n̄an raan eo ekar aikuj in lōke taktō eo an n̄an ro jet im jab bar maron̄ pād iturin. Mato eo aer ekar baj im ej wōt n̄an “wōnmaanļok in niknik,” kōn juon kōjātdikdik emeram ilo Kraist n̄an jerkak ilo raan eo āliktata im n̄an jokwe Ippān ilo aiboojoj indeeo.

Aer tōmak im naan in kam̧ool rej juon im̧we n̄an epeepen ko raar itok ālikin er.

Ilo bukwōn eo ijo lieo pāleeō eaar rūtto ļo̧k ie, ro jinen im jemen, jet armej in etal im jar rem̧m̧an, kar m̧ōņōņō kake gospel eo āinwōt jet ripālele ro rem̧m̧an dettāer ippān lieo pāleeō ke leddik eo nejier ruo-an iiō im ekar ajri eo wōt ilo iien eo. Ļōmņak eo aer n̄an erom̧ uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar juon menin jelet mour ko aer ke raar kowaane jān armej in bukwōn eo im jān baam̧le eo aer. Ekar bōk elōn̄ iiō ko, naan in iakwe ko rem̧m̧an n̄an ro uwaan baam̧le eo, im jerbal n̄an jukjukinpād eo mokta jen aer kar bōke.

Juon iien ke jemān lieo pāleeō eaar jerbal āinwōt juon bisop, kar na ruwōn kōn juon men im kar mōkaj in kōtļo̧k. Jinen lieo pāleeō eaar lukuun metak ke ekar kajitūkin ļeo pāleen eļan̄n̄e rej aikuj in wōnmaanļo̧k in etal n̄an jar. Ekar uwaak aeet rej maron̄ wōnmaanļo̧k wōt in etal n̄an jar kōnke ejjab an armej kabun̄ in, ak ej Kabun̄ eo an Jisōs Kraist in.

Ekar bōk jet iien mokta jān an waļo̧k m̧ool eo im jeorļo̧k bōd ko rekar kōm̧m̧an. Ta eo me emaron̄ in kar tōlļo̧k er n̄an etaļ ekar kobaļo̧k n̄an kajoor eo aer im mool eo.

Etke ej āindein bwe jet iaad rej likjab jen tōmak im naan in kam̧ool ko an ro jined im jemed ro me deplo̧ke en̄taan ko aer im kar tiljek? Jej ke ļōmņak bwe raar jab bōk juon jeļāļo̧kjeņ erreo kōn men ko? Rekar jab im raar jab m̧oņ er! Rekar bōk elōn̄ en̄jaake ko ippān Jetōb eo im maron̄ ba kōn rikanaan Josep, “Ijeļā menin, … im ijab maron̄ kariab e menin.”

Emman ke ippam̧ al eo kōn jarin tariņae an Hilamōn, epād ilo Bok in Al eo an Ajri?

Men̄e emaron̄ in jab kar jekjek eo in, āinwōt an jinō kar en̄jake āinwōt ajri, komaron̄ juon iaan “mama im baba ro rem̧m̧an rej iakwe Irooj” im leļo̧k juon waanjon̄ak em̧m̧an n̄an ro jet.

Jej ke en̄jaake bwe menin elukkuun jim̧we n̄e jej al kake? Kwoj ke en̄jake bwe kwoj “āinwōt ritarinae ro an Hilamōn” im bwe kwoj “kwonaaj mijenede ro an Irooj n̄an boktok n̄an laļ mool eo”? Emōj aō en̄jaake menin elōn̄ iien ko ilo aō al kōn al in ilo iien makūtkūt ko an N̄an Kōkajoorļo̧k Jodikdik ro im kobain ippān doon ko jet an jodikdik ro.

Ak ta eo jej en̄jaake n̄e jej al al in jar eo “Mool n̄an Tōmak eo”?

N̄an ro rej epepen tokālik jabdewōt ia kwoj pād ie im jekdoon jekjek rōt komaron̄ loe eok make ie, jouj ekkatak im bōk kajoor jān tōmak eo im naan in kam̧ool ko an ro raar itok mokta jen kwe. Enaaj jipan̄ eok meļeļe bwe n̄an maron̄ bōk ak kaddōkļo̧k juon naan in kam̧ool, kaarmejjete ko renaaj aikuj in kar kōm̧m̧an im bwe “kaarmejjete ej boktok kōjeram̧m̧ān ko jen lan̄.”

Ļōmņak kōn juon kaarmejjete me enaaj m̧ool in kōjeraam̧m̧an mour eo am̧, jouj im ļōmņak im jar kōn karuwainene eo an rikanaan eo ad ejitōnbōro, Būreejtōn Russell M. Nelson, ke ekar kajjitōk ippān “aolep likao ro rerreo, ekeke ānbwinnier n̄an m̧aanjabpopo n̄an im etal in mijen. N̄an likao ro me rej Armej ro Rekwojarjar ilo Raan Ko Āliktata, jerbal in mijenede ej juon eddo an priesthood. …

N̄an … kom̧ jiron̄ ro im sister ro rekeke ānbwinnier, juon mijen ej barāinwōt juon kajoor, ak kāāletej juon iien em̧m̧an.”

Komaron̄ in kūr āinwōt juon mijenede in jerbal in jipan̄ ak katakin. Jim̧or taip in mijenede ro rej leļo̧k n̄an ejja jipadpad eo wōt n̄an bōktok elōn̄ armej n̄an Kraist, kajjojo ilo wāween eo aer e āinjuon im kajoor.

Ilo jim̧or taip in jerbal in jipan̄ ko im katakin, kwonaaj kwaļo̧k n̄an Irooj bwe kwoj iakwe E im bwe kwonaj kōņaan jeļā E eļapļo̧k. Kemeemej, “bwe ekōjkan an juon armej jeļā karo eo eaar jab jerbal n̄an e, ak eo ej juon ruwamāejet n̄an e, im ej ettoļo̧k jān ļōmņak ko im jibadbad ko an būruōn?”

Aoleped wōj, men̄e jej jen epepen eo mokta ilo gospel in ak kein ka ļalem, aikuj kajitūkin kōj make, ta bwebwenato ko an tōmak, kajoor, im kallim̧ur an selestial inaaj likūti n̄an epeepen eo tokālik?

Jej aolep wōnmaanļo̧k wōt ilo kijejeto ko ad n̄an jeļā kōn ad Rilo̧mo̧o̧r Jisōs Kraist, im kōkm̧anm̧an ļo̧k n̄an kōm̧m̧an bwe E en pād ioļapļap in mour ko ad. E ej ejm̧aan eo jej aikuj kalōk bwe n̄e iien ko rej eppen tok, jenaaj maron̄ in jutak dim.

Kōtļo̧k ad maron̄ “mool n̄an tōmak eo ro jined im jemād raar kōjparoke, mool n̄an ro rekar mej kōn tōmak, n̄an kien an Anij, jetōb, bōro, im pa, tiljek im mool jenaaj aolep iien jutak.” Ilo etan Jisōs Kraist, amen.