Iakwe eo an Anij

Juon jōm̧ar ke iaar etal ñan juon jikin ettolok, baamle eo aō raar jolok juon boñ ijo im kiki nabōj ke ekar em̧m̧an lañ im jab ekōroro̧. Elukkuun kar alikkar am loi iju in eāñ, im ar obrak lañ kōn iju im jet iien iju ko me rej wōtlok jān lañ. Ilo am būlōñ kōn kōm̧anm̧an kein an Irooj Anij bōtata, kōm̧ ar en̄jake juon eñjake in kautiej n̄an E. Ajri ro nejum redik, me raar rittolok ilo Hong Kong, rejaññin kar en̄jake jabdewōt men rot kein m̧okta. Raar kajjitōk eļan̄n̄e kōmij bar pād ium̧win ejja kain lan̄ rot in ilo ijo jikum. Ikar kajjieon̄ kōmeļeļeiki er ke kōmij bar pād ium̧win ejja kain lan̄ rot in, bōtaab mejatoto im tab in ettoon ko kōmij jokwe ie ej kōm̧m̧an menin an pen am loe iju kein mekarta rej pād ijeņ.

Jeje ko rekwojarjar rej katakin kōj bwe “tōmak ej āinwōt lōke kōn men ko jej kōjatdikdik kōj kaki, im reel būruōd kōn men ko je jab loi.” Ilo ad kajjeoñ jolok menin kapo ko im kapo ko an lal bwe ej pinej mejed jen ad lo men ko an jetōb, ak ñe jej kōjerbale tōmak eo ad ilo Anij im Nejin Maan Jisōs Kraist, enaaj alikkar an itok m̧ool eo aaer im naaj walok aaer inepata kōn kōj.

Ilo Bok in Mormon, rikanaan Liai ar loe “juon wōjke, eo leen ar lukkuun kōm̧m̧an an jet m̧ōņōņō” im ar “lukkuun tōñal, jān aolep leen wōjke.” Ke ekar ādjoñe leen wōjke eo, an eaar obrak kōn juon lem̧ōņōņō elap, im eaar bar kōnaan bwe baamle an ren bar ādjoñe. Jej katak bwe wōjke in ej bōk jikin “iakwe eo an Anij,” im āinwōt Liai, kōj barāinwōt jemaron̄ bōk juon kam̧ool elan̄lōn̄ an Anij n̄e jej karuwaineneik E n̄an mour ko ad.

Jisōs Kraist ej kalikare iakwe eo an Jemādwōj Ilan̄ ñan kōj. Kōn katok in pinmuur eo An, Jisōs Kraist eaar en̄taan kōn jerawiwi ko ad im bōk ioon E Make im mao ko kōn jerawiwi ko ad. E eaar make bōklok būromōj ko ad, kotak būromōj ko ad, im Ear bōk ioon metak im naññinmej ko ad. Ej jilkintok Jetōb Kwojarjar bwe en kainem̧m̧an kōj, im leen Jetōb in ej men bwe jen lañlōñ, aenōm̧m̧an, im tōmak, im ej kobrak kōj kōn kōjādikdik im iakwe.

Ilo an iakwe eo an Anij pidodo an aolep bōke, ak ebool rej kajjeoñ pukōte, ilo an ro jet kōnaan eñjaake iakwe eo an Anij ak rejjab tōmak bwe rej aikuj i. Ak jet rej lukkuun aikuji bwe rej rāpiji wōt. Jeje ko rekwojarjar im rikanaan ro an Irooj rej katakin kōj bwe jemaroñ wōnmaanlok im bōke wōt iakwe in an Anij, kōn tūriamo eo an Jisōs Kraist, jej pārro ukwelok, im lukkuun kaju jolok bōd, kate kōjparok kien ko An, im lale ro jet ilo ejelok watōk. Jej eñjaake iakwe eo an Anij ñe jej kōm̧m̧ani men ko me rej kōm̧m̧an ad epaake E, men ko āinwōt ar kōnono ippān ilo ad jar kajojo raan im katak kōn jeje ko rekwojarjar, im bōjrak ar kōm̧m̧ani men ko rej kattolok kōj jān E, āinwōt ne jej utiej, kōm̧m̧an bok, im ñe jej jumae.

Būreejtōn Russell M. Nelson ekar kūr kōj ñan “jolok, kōn jipañ eo an Rilo̧mo̧o̧r, bwe in men ko remo̧r ilo mour in ad”im ñan “jolok inepata.” E eaar kōkkapilōklōk kōj bwe jen kōkajoorļo̧k pedped ko in jetōb ko ad wājabdikļo̧k ilo ad likūt ilo ioļapļap in mour ko ad Ippān im ilo kain̄i ko im bujen ko an tampeļ eo An. Ekar kallim̧ur bwe Ilo ad kōjparok bujen tampeļ ko ad, jej bōk eļapļo̧k kajoor eo an Irooj. Jej en̄jake iakwe eo erreeo an Jisōs Kraist im Jemādwōj Ilan̄ kōn kōjeraam̧m̧an eļap!”

Ewōr juon m̧ōtta eo me ekar jeraam̧m̧an kōn juon baamle aebojooj im juon jerbal emōj kallim̧ur ke naaj an. Menin ar oktak ke ar bōk juon naññinmej bwe en jab maroñ jerbal, innām ālkin jepel. Ālkin menin ekar pen iiō eo, bōtaab iakwe eo an ñan ajri ro nejin im bujen ko eaar kōm̧m̧ani ippān Anij raar rejtake E. Juon raan eaar roñ ke kar kōrā eo pāleen emōj an bar m̧are im ekar kajjitōk bwe ren jolok liāp in tampeļ eo aeero. Ekar inepata im po̧k kōlmenlokjen eo an. Ekar kapukōt aenem̧an im meļeļe eo jemaron̄ en̄jaake ilo m̧weo im̧ōn Anij. Raan eo ālkin an kar pād tampeļ, iaar bōk juon ennaan jān e.

“Ekar wōr juon aō en̄jake em̧m̧an ilo tampeļ jota. Ij lōmnak elukkuun alikkar ke ij rāpij jidik aō ellotaan. … Ijelā ke iaar aikuj oktak, im iaar jar aolep wiik bwe im maroñ kōm̧m̧ane. … Jota ilo tampeļ en iaar lukkuun eñjaake Jetōb an joloke aō ellotaan jān būruō. … Elukkuun kar em̧m̧an eñjaake eo ke iaar anjo jān menin. … Juon eddo me ar jiped lallok eō emōj bōke jān eō.”

Ilo an wōr wōt men ko reppen ej iooni, likao in mōtta ar lukkun kaorōk to eo em̧m̧an ar walok ilo imōn Irooj ijo me anemkwoj in kajoor eo an Anij ar jipañ eñjaake an epaakelok Anij, im maroñ in kōjatdikdik kōn mour eo an, im diklok an inepata kōn ilju im jeklaaj eo an.

Ñe jej ioone em̧m̧an in iakwe eo an Anij, jemaroñ jelmae kōn aenem̧an im wōr kijenmej im m̧ōņōņō kōn Ankilaan. Jenaaj lōke ke Anij enaaj kememej kalimur ko An ippād, naaj lotok kōj ilo ar eñtaan, im enaaj bōk kōj jān kōmakoko. Jenaaj ikdeleel ñan kwalok m̧ōņōņō in jej eñjaake ippān baamle ko ad im ro jej iakwe. Ak kōn baamļe eo an Liai, kajojo armej renaaj wōr aeer anemkwoj in kālet ñan bōke ak jab bōke leen wōjke eo, bōtaap iien kein rem̧m̧an ej ñan iakwe, im ej kūr ñan ro me jej iakwe bwe ren eñjaake iakwe in an Anij.

Ñan jipañ ro jet eñjaake iakwe in an Anij, jej aikuj kōm̧m̧an bwe kōj make jen āinwōt Kraist ilo ad meanwōd, iakwe eo em̧ool an Kraist, tūriamo, im kijenmej, im jipañ ukōt ro jet ñan Rilo̧mo̧o̧r ilo aaer ļoore ruo kien ko rellap ñan iakwe Anij im iakwe ro ritūrōr.

Juon iaan ļaddik ro neju eaar pen ñan an lōñ mōttan im an lōke e make ke ekar juon jodikdik. Kōrā eo pāleeō im ña kōmar jar in kajitōk elmān am̧ro jipañ e, im kōmro kōnaan kōm̧m̧an jabrewōt men me Irooj ej kōnaan bwe kōmin kōm̧m̧ane. Juon raan iaar eñjaake ke ij aikuj kajitōk ippān būreejtōn eo an doulul eo an em̧m̧an ñe ejelā wōn ej aikuj jipañ bwe kōmro ladrik eo neju en lolok. Ālkin an kōlmenlokjen jidik, eaar kajitōk bwe kōmro en lolok juon kōrā ebooļ an apan̄ ko ikkijjen nan̄inmej, im jān mālim eo jen branch būreejtōn eo, bwe kōmin maroñ bōklok kwojkwoj eo kajojo wiik. Iaar lukkuun m̧ōņōņō, bōtap bar inepata kōn ta eo ļaddik eo neju enaaj lōmnak kōn jerbal in kajojo wiik.

Jinoin tata am lolok kōrā in, kōmar lukkuun būromōj kake, bwe ekkān an kijoñ metak. Ekar lukkuun kam̧olol kōn kwojkwoj in, im ekar em̧m̧an ippām am lolok e kab leo ippān. Ālkin jet iaan iien lolok kein, juon Jabōt iaar jako im jab maroñ etal ippān ļaddik eo neju bōtap iaar kakkememej e kōn jerbal in. Ke Iaar tōpar kapijuknen, ilukkuun kijōrjōr in roñ kōn an kar lolok kōrā eo. Ļaddik eo nejū ekar uwaak ke ejjab tōmak classmate ro an rej kōm̧m̧ani kain men kein rem̧m̧an. Ļaddik eo neju eaar uwaak im ba ke ejjab tōmak bwe ro uwaan kilaaj eo an rejaññin kar kōm̧m̧an jōkjōk in, im ar wōnmaanlok wōt im ba ke ar āññin ladrik eo jatūn ippān ñan jipañ e, im bwe ar em̧m̧an kwojkwoj eo, bōtap kōrā in ar būromōj ilo aolepen kar wiik eo kōnke ar kūr tok jet mōttan ñan meeo imōn ñan alwōj jet pija, ak video eo nejin ar jab maroñ in jerbal. Innem ļaddik eo neju ar lale ilo online, im lo jorren eo, im ar kōm̧m̧ane jorren eo iien eo wōt. Ar eñjaake an wōr tokjen e make, im m̧ōnōņō, im lōke kōn an kar maroñ kōm̧m̧ane menin ñan kam̧ōņōņōik kōrā in. Ekar en̄jake iakwe eo an Anij n̄an e.

Elaññe, kōjōkdoon am lukkuun kate, mour elukkuun tab, im koj lōmnak bwe jar ko am rejjab uaak, jouj im jelā bwe ilo am lukkuun kate ewōr tokjān im, ilo ar lukkuun jelā im āinwōt iju ko lañ, bwe Jemādwōj Ilan̄ im Jisōs Kraist rejelā, rej roñjaake im rej iakwe eok.

Ilo kar juon iien ke rikalo̧o̧r ro An rar pād ilo juon loon eo im rar “joto jotak ed [kōn] no ko,” Rilo̧mo̧o̧r eo ad etetal lok ñan ippāir ioon den im kōkajoor ed, im ba, “Komin m̧ōņōņō; bwe ej Ña in; komin jab mijak.” Ke Pita ar kōnaan etal ñan ippān Rilo̧mo̧o̧r eo ioon den, Jisōs ar jiroñlok, im ba, “Itok.” Im ke Pita ar dik lok an tōmak im jino rūmlok, Rilo̧mo̧o̧r eo ar kair im lelok pein im baori im lo̧mo̧o̧re ak ej ba, “O edik am tōmak, kōn mennin etke koj pere?”

Elaññe ļañ ko rej jelmae mour kāin ad, jenaaj ke lem̧ōņōņō im peran? Elmen ar kememej ke Rilo̧mo̧o̧r eo eppan erlok jān kōj im bwe Ej pād iturur ilo jet wāwewn meñe jejjab maroñ in kile? Jenaaj ke maroñ in wōnmaanlok wōt ilo tōmak elaptata ñe ial eo imaar epen? Im ilo jōkjōk rot Ej kotak kōj ñan kōjparok ñe jej tippok? Elmen ar reilok ñan E ilo aolepen lōmnak ko ar kōn tōmak, ilo ejelok pere im mijak?

Ñe koj kōnaan eñjaake iakwe eo an Anij elaplok ilo mour eo am, imaroñ ke kur eok bwe kwon lōmnak kōn laajrak kein:

• Moktata, kōmakijkij am bōjrak jidik ñan am kememej ke kwoj nejin Anij im lōmnak kōn men ko koj kam̧oolol kaki.

• Kein karuo, jar kajjojo ran, kajitōk ippān Jemādwōj Ilan̄ ñan jipañ eok jelā wōn ipālakum me ej aikuji iakwe eo An.

• Kein kajilu, m̧ool in am kajitōk ta eo komaroñ kōm̧m̧ane ñan am maroñ jipan̄ rein rej aikuj jipañ ñan eñjaake iakwe eo an Anij.

• Im kein kemān, jab kaepādpād ilo am bōke im̧we kein.

Elaññe enaaj emakijkij ar jar im kajitōk ilo etan ro jet, Anij enaaj kwalok ñan kōj armej ro me jemaroñ jipañ er. Im elaññe emōkaj ad jerbal, jemaroñ erom ro me rej aikuji ekkar ñan jar ko aeer me emōj An uwaaki. Kōn kōm̧m̧an ko, im kōn iien, jenaaj bōk uaak in jar ko ad, im jenaaj eñjaake iakwe eo an Anij ilo mour ko ad.

Jet allōñ emootlok ilo kar ao kar etal ñan Vietnam, kōrā ippa im ña kōmro ar pād ilo juon balluun me ar ekkāke ilo an nana lañ. Elukkuun kar nana lañ, im marok, lap an wōt, im jemaroñ lo jo̧ruur ko ilo wūntō ko. Ālkin juon iien aetok im jaje ñaat ej wanlōñlok, balluun eo waam ar tal le jān lañ eo im wanlōñlok ñan juon jikin aebojooj. Ar kakkememej kōm bar juon allen kōn Jemedwōj Ilañ im Jisos Kraist im kōn iakwe eo elap Aer ñan kōj.

Ro mōtta rejitōn bōro, āinwōt juon eo emōj an jelā kōn iakwe in an Anij, ij lukkuun m̧ōņōņō kam̧ool ke Rilo̧mo̧o̧r Jisōs Kraist ej Iakwe eo an Anij. Iakwe eo aer n̄an kōj ewānōk, ñan kōj make, im ejjamin jōmlok. Ilo ar tōmak im lo̧o̧re E, jen obrak kōn iakwe in An im jen meram eo ñan tōl ro jet ñan iakwe in An. Ilo etan Jisōs Kraist, amen.